Nen̄ede Fiọk San̄asan̄a Itie Jesus ke Uduak Abasi

“Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.”—JOHN 14:6.

1, 2. Ntak emi ọkpọdọn̄de nnyịn ndidụn̄ọde san̄asan̄a itie Jesus ke uduak Abasi?

 KE OFỤRI emana, ediwak owo ẹsidomo ndiwọrọ nda san̄asan̄a ke otu mbon en̄wen, edi ibat ibat ke otu emi ẹsiwọrọ ẹda. Ata ibat ibat owo ẹkam ẹkeme ndinen̄ede ndọhọ ke enyene ata mme akpan usụn̄ oro mmimọ ikpụhọrede ye mbon en̄wen. Edi Jesus Christ Eyen Abasi edi san̄asan̄a ke ata ediwak usụn̄.

² Ntak emi ọkpọdọn̄de nnyịn ndinen̄ede mfiọk san̄asan̄a itie Jesus? Koro emi abuana itie ebuana nnyịn ye Ete nnyịn eke heaven, Jehovah! Jesus ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” (John 14:6; 17:3) Ẹyak ineme ndusụk usụn̄ emi Jesus edide san̄asan̄a owo. Ndinam ntre ayanam inen̄ede ifiọk itie esie ke uduak Abasi.

“Ikpọn̄-Ikpọn̄ Edibon Eyen”

3, 4. (a) Ntak emi ikemede ndidọhọ ke itie Jesus nte ikpọn̄-ikpọn̄ edibon Eyen edi san̄asan̄a? (b) Didie ke itie Jesus ke edibot n̄kpọ ekedi san̄asan̄a?

³ Jesus idịghe ikpîkpu “eyen Abasi.” Nte Satan okokotde Jesus edi oro ke ini okodomode enye. (Matt. 4:3, 6) Odot ke ini ẹkotde Jesus “ikpọn̄-ikpọn̄ edibon Eyen Abasi.” (John 3:16, 18) Ẹdọhọ ke ikọ Greek oro ẹkabarede “ikpọn̄-ikpọn̄ edibon” ọwọrọ “anana-mbiet, n̄kukụre,” “n̄kukụre owo ke ekpụk m̀mê orụk,” m̀mê “san̄asan̄a.” Jehovah enyene ata ediwak nditọ eke spirit. Ntem, didie ke Jesus edi n̄kukụre owo ke “ekpụk m̀mê ke orụk”?

⁴ Jesus edi san̄asan̄a sia enye ikpọn̄ ke Ete esie okobot nnennen nnennen. Enye edi Akpan. Ke nditịm ntịn̄, enye edi “akpan ke otu kpukpru edibotn̄kpọ.” (Col. 1:15) Enye edi “ntọn̄ọ edibot n̄kpọ Abasi.” (Edi. 3:14) Itie oro ikpọn̄-ikpọn̄ edibon Eyen emi enyenede ke edibot n̄kpọ edi san̄asan̄a n̄ko. Enye ikedịghe Andibot, m̀mê Anditọn̄ọ, edibot n̄kpọ. Edi Jehovah akada enye nte isụn̄utom ndibot kpukpru n̄kpọ eken. (Kot John 1:3.) Apostle Paul ekewet ete: “Nnyịn ke akpanikọ inyene Abasi kiet kpa Ete, emi kpukpru n̄kpọ ẹwọrọde ẹto, nnyịn inyụn̄ idu uwem inọ enye; Ọbọn̄ kiet onyụn̄ odu, Jesus Christ, emi otode ke enye kpukpru n̄kpọ ẹdu, nnyịn inyụn̄ idu oto ke enye.”—1 Cor. 8:6.

5. Didie ke N̄wed Abasi owụt nte Jesus edide san̄asan̄a?

⁵ Nte ededi, odu ekese n̄kpọ oro ẹnamde Jesus edi san̄asan̄a. N̄wed Abasi ọnọ enye ediwak udorienyịn̄ oro ẹwụtde san̄asan̄a itie esie ke uduak Abasi. Ẹyak ineme udorienyịn̄ Jesus ition efen ke N̄wed Abasi Christian Usem Greek.

“Ikọ”

6. Ntak emi odotde ẹkot Jesus “Ikọ”?

⁶ Kot John 1:14. Ntak emi ẹkotde Jesus “Ikọ,” m̀mê Logos? Udorienyịn̄ emi anam ẹdiọn̄ọ utom oro enye anamde tọn̄ọ ẹkebot mme angel ye mme owo. Jehovah akada Eyen esie ọnọ nditọ eke spirit eken ntọt ye item, kpasụk nte akadade Eyen esie ọnọ mme owo ke isọn̄ etop Esie. Se Christ eketịn̄de ọnọ mme Jew oro ẹkekpan̄de utọn̄ ẹnọ enye ọsọn̄ọ ke enye edi Ikọ, m̀mê Etịn̄ikọ ke ibuot Abasi; enye ọkọdọhọ ete: “Se ami n̄kpepde idịghe okịm, edi enyene enye emi ọkọdọn̄de mi. Edieke owo ekededi oyomde ndinam uduak Esie, enye ọyọfiọk aban̄a ukpepn̄kpọ emi m̀mê oto Abasi, m̀mê ntịn̄ ke  ifiọk idemmi.” (John 7:16, 17) Jesus osụk enyenyene udorienyịn̄ oro “Ikọ Abasi” idem ke ama akafiak akada ubọn̄ ke heaven.—Edi. 19:11, 13, 16.

7. Didie ke ikeme ndikpebe nsụhọdeidem oro Jesus enyenede ke itie esie nte “Ikọ”?

⁷ Kam kere se udorienyịn̄ emi ọwọrọde. Okposụkedi emi Jesus ọfiọkde n̄kpọ akan kpukpru edibotn̄kpọ Jehovah, enye iberike edem ke ọniọn̄ esiemmọ. Se Ete esie asiande Jesus ke enye etịn̄. Kpukpru ini enye esidụri ntịn̄enyịn mme owo owụt Jehovah utu ke idemesie. (John 12:50) Nso eti uwụtn̄kpọ ke inyene ntem ndikpebe! Ẹnọ nnyịn n̄ko ọsọn̄urua ifet ‘nditan̄a eti mbụk nti n̄kpọ.’ (Rome 10:15) Nnyịn ndifiọk eti uwụtn̄kpọ Jesus oro aban̄ade nsụhọdeidem ekpenyene ndinam ifep nditịn̄ ikọ ke odudu idem nnyịn. Ke ini inọde mme owo etop unyan̄a uwem oro odude ke N̄wed Abasi, nnyịn ikpenyeneke ‘ndinam n̄kpọ mbe se ẹkewetde.’—1 Cor. 4:6.

“Amen”

8, 9. (a) Nso ke ikọ oro “amen” ọwọrọ, ndien ntak emi ẹkotde Jesus “Amen”? (b) Didie ke Jesus owụt ke imọ idi “Amen”?

⁸ Kot Ediyarade 3:14. Ntak emi ẹkotde Jesus “Amen”? Ẹda ikọ oro “amen” ẹto ikọ Hebrew oro ẹwọn̄ọrede ẹwet nte ẹkotde ke Ikọ Efịk, emi ọwọrọde “edi ntre,” m̀mê “ke akpanikọ.” Akpasarade ikọ Hebrew oro ẹdade ikọ emi ẹto ọwọrọ “nam akpanikọ” m̀mê “se ẹkemede ndibuọt idem.” Kpasụk ikọ emi owụt nte Jehovah anamde akpanikọ. (Deut. 7:9; Isa. 49:7) Ke ntre, didie ke Jesus edi san̄asan̄a ke ini ẹkotde enye “Amen”? Se nte 2 Corinth 1:19, 20 ọbọrọde: “Eyen Abasi, Christ Jesus, emi nnyịn . . . ikọkwọrọde ke otu mbufo, ikakabakede idi Ih ndien ekem edi Ihih, edi Ih amakabade edi Ih ke se iban̄ade enye. Koro inamke n̄kpọ m̀mê mme un̄wọn̄ọ Abasi ẹwak adan̄a didie, mmọ ẹmekabade ẹdi Ih ebe ke enye. Mmọdo oto ke enye n̄ko ke nnyịn ibọrọ ‘Amen’ inọ Abasi ubọn̄.”

⁹ Jesus edi “Amen” kpukpru un̄wọn̄ọ Abasi. Usụn̄ uwem esie ke isọn̄ emi akananade ndo, esịnede n̄kpa uwa esie, ẹsọn̄ọ ẹnyụn̄ ẹnam kpukpru un̄wọn̄ọ emi Jehovah Abasi ọkọn̄wọn̄ọde ẹsu. Jesus ndikọsọn̄ọ nda nnam akpanikọ ama owụt n̄ko ke Satan okososu ke ini eketịn̄de ke n̄wed Job ete ke edieke mme asan̄autom Abasi mînyeneke mme n̄kpọ udu uwem, ẹkụtde ukụt ye idomo, ke mmọ ẹyekpọn̄ Abasi. (Job 1:6-12; 2:2-7) Ke otu kpukpru edibotn̄kpọ Abasi, Akpan esie kpọt ekekeme ndinọ nnennen ibọrọ kaban̄a nsu Satan. N̄ko-n̄ko, Jesus ama ọnọ ata eti uyarade ndiwụt ke imọ ida ye Ete imọ kaban̄a akpan eneni oro owụtde nte ukara Jehovah eke ofụri ekondo enende.

10. Didie ke ikeme ndikpebe Jesus ke san̄asan̄a itie oro enye enyenede nte “Amen”?

¹⁰ Didie ke ikeme ndikpebe Jesus ke san̄asan̄a itie oro enye enyenede nte “Amen”? Ebe ke ndisọn̄ọ nda nnam akpanikọ nnọ Jehovah nnyụn̄ nnọ ukara ofụri ekondo esie ibetedem. Ke ndinam ntre, nnyịn inam se ẹwetde ke Mme N̄ke 27:11: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”

“Esịne-Ufọt Obufa Ediomi”

11, 12. Didie ke itie oro Jesus enyenede nte Esịne-Ufọt edi san̄asan̄a?

¹¹ Kot 1 Timothy 2:5, 6. Jesus edi “esịne-ufọt kiet ke ufọt Abasi ye mme owo.” Enye edi “esịne-ufọt obufa ediomi.” (Heb. 9:15; 12:24) Nte ededi, ẹkot Moses n̄ko esịne-ufọt—oro edi, esịne-ufọt Ibet ediomi. (Gal. 3:19) Didie ndien ke itie oro Jesus enyenede nte Esịne-Ufọt edi san̄asan̄a?

¹² Akpasarade ikọ oro ẹkabarede “esịne-ufọt” edi ikọ mme ekpeibet. Enye aban̄a Jesus nte Ẹsịne-Ufọt oro ibet enyịmede (m̀mê, ke ikọ en̄wen, ekpeibet) obufa ediomi, emi amande obufa idụt, kpa “Israel Abasi.” (Gal. 6:16) Idụt emi esịne mme Christian emi ẹyetde aran ke spirit, oro ẹnamde “otu mme oku emi [ẹdidade] ubọn̄” ke heaven. (1 Pet. 2:9; Ex. 19:6) Ibet ediomi, emi Moses ekedide esịne-ufọt, ikekemeke ndinam ẹnyene utọ idụt oro.

13. Nso ibuana ke itie oro Jesus enyenede nte Esịne-Ufọt?

 ¹³ Nso ke itie oro Jesus enyenede nte Esịne-Ufọt abuana? Ọfọn, Jehovah ada ufọn iyịp Jesus anam n̄kpọ ọnọ mbon oro ẹdude ke obufa ediomi. Ke usụn̄ emi ke enye Jehovah abat mmọ ke edinen. (Rome 3:24; Heb. 9:15) Ntre ke Abasi ekeme ndida mmọ nsịn ke obufa ediomi ye idotenyịn mmọ ndikabade ndi mme oku ye ndidem eke heaven! Nte Esịne-Ufọt mmọ, Jesus an̄wam mmọ ẹka iso ẹnyene edisana idaha ke iso Abasi.—Heb. 2:16.

14. Ntak emi kpukpru Christian, ye se ededi idotenyịn oro mmọ ẹnyenede, ẹkpenen̄erede ẹkpono itie oro Jesus enyenede nte Esịne-Ufọt?

¹⁴ Nso kaban̄a mbon oro mîdụhe ke obufa ediomi, kpa mbon oro ẹnyenede idotenyịn ndidu uwem ke nsinsi ke isọn̄, idịghe ke heaven? Okposụkedi emi mmọ mîtieneke ibuana ke obufa ediomi, mmọ ẹbọ ufọn obufa ediomi emi. Ẹfen mme idiọkn̄kpọ mmọ ẹnyụn̄ ẹbat mmọ ke ndinen, nte mme ufan Abasi. (Jas. 2:23; 1 John 2:1, 2) Edide nnyịn inyene idotenyịn uwem eke heaven m̀mê eke isọn̄, kpukpru nnyịn imenyene eti ntak ndikpono itie oro Jesus enyenede nte Esịne-Ufọt obufa ediomi.

“Akwa Oku”

15. Didie ke itie oro Jesus enyenede nte Akwa Oku okpụhọrede ye eke kpukpru iren oro ẹkedide mme akwa oku ke eset?

¹⁵ Ediwak iren ẹma ẹdi mme akwa oku ke eset, edi itie oro Jesus enyenede nte Akwa Oku enen̄ede edi san̄asan̄a. Didie? Paul ọdọhọ ete: “Enye inyeneke ndiwa uwa ke usen ke usen nte mme akwa oku oro ẹsinamde, ndikpebem iso n̄wa mban̄a mme idiọkn̄kpọ esiemmọ ndien ekem awa aban̄a idiọkn̄kpọ mbio obio: (koro enye akanam emi ini kiet kpọt ke ini enye akawade idemesie;) koro Ibet emek mme owo emi ẹnyenede mmeme enịm ke ikpọ oku, edi ikọ un̄wọn̄ọ oro eketienede Ibet edem emek Eyen, emi ẹnamde ọfọn ama ke nsinsi.”—Heb. 7:27, 28. *

16. Ntak emi uwa Jesus enen̄erede edi san̄asan̄a?

¹⁶ Jesus ekedi mfọnmma owo, ata ukem nte Adam mbemiso Adam akanamde idiọkn̄kpọ. (1 Cor. 15:45) Ntak edi oro Jesus edide n̄kukụre owo emi odotde ndiwa mfọnmma uwa oro edide n̄kemn̄kem—utọ uwa oro mîyomke ẹfiak ẹwa. Ẹkesiwa uwa kpukpru usen ke eyo Ibet Moses. Kpukpru utọ uwa oro ye utom oro mme oku ẹkesinamde ẹkedi mbukpọn̄ n̄kpọ oro Jesus ekenyenede ndinam. (Heb. 8:5; 10:1) Ntre, itie oro Jesus enyenede nte Akwa Oku edi san̄asan̄a sia esiemmọ enyene ufọn onyụn̄ ebịghi akan eke mme akwa oku eken.

17. Ntak emi ikpọfiọkde inyụn̄ ikponode itie emi Jesus enyenede nte Akwa Oku nnyịn, ndien didie ke ikeme ndinam ntre?

¹⁷ Nnyịn imoyom mme utom Jesus nte Akwa Oku man an̄wam nnyịn inyene eti idaha ye Abasi. Nso utịbe utịbe Akwa Oku ke enye edi ntem! Paul ekewet ete: “Nnyịn inyeneke akwa oku emi mîkemeke nditiene nnyịn n̄kop mmemidem, edi edi owo emi ẹma ẹkedomo ẹse ke kpukpru usụn̄ nte nnyịn, edi mînyeneke idiọkn̄kpọ.” (Heb. 4:15) Ke akpanikọ, nnyịn ndifiọk emi nnyụn̄ n̄kpono enye ekpenyene ndinam ‘ikûdu aba uwem inọ idem nnyịn, edi idu inọ enye emi akakpade ọnọ nnyịn.’—2 Cor. 5:14, 15; Luke 9:23.

“Mfri” Oro Ẹkebemde Iso Ẹtịn̄ Ẹban̄a

18. Ewe ntịn̄nnịm ikọ ke ẹketịn̄ ke Adam ama akanam idiọkn̄kpọ, ndien nso n̄kpọ emi aban̄ade ntịn̄nnịm ikọ emi ke ẹkedi ẹdinam ẹfiọk?

¹⁸ Ke Eden, ke ini eketiede nte ke ubonowo ẹma ẹtaba kpukpru n̄kpọ—edisana idaha ke iso Abasi, nsinsi uwem, inemesịt, ye Paradise—Jehovah Abasi ama ebem iso etịn̄ ke Andinyan̄a  eyedi. Ẹkekot enye “mfri.” (Gen. 3:15, NW) Ata ediwak ntịn̄nnịm ikọ Bible ke ofụri emana ẹban̄a mfri emi owo mîkọfiọkke mi. Enye ekenyene ndito ubon Abraham, Isaac, ye Jacob. Enye ekenyene n̄ko ndito ubon Edidem David.—Gen. 21:12; 22:16-18; 28:14; 2 Sam. 7:12-16.

19, 20. (a) Anie edi Mfri oro ẹken̄wọn̄ọde? (b) Ntak emi ẹkemede ndidọhọ ke mbon en̄wen ẹtiene ẹdi mfri oro ẹken̄wọn̄ọde?

¹⁹ Anie ekedi Mfri oro ẹken̄wọn̄ọde? Ẹkeme ndikụt ibọrọ mbụme emi ke Galatia 3:16. (Kot.) Nte ededi, ke akpatre ufan̄ikọ ke ibuot n̄wed oro, apostle Paul ọdọhọ mme Christian oro ẹyetde aran ete: “Akan oro, edieke mbufo ẹdide eke Christ, mbufo ke akpanikọ ẹdi mfri Abraham, mme ada udeme nnyene nte asan̄ade ye un̄wọn̄ọ.” (Gal. 3:29) Asan̄a didie Christ edi Mfri oro ẹken̄wọn̄ọde, ndien mbon en̄wen ẹtiene ẹdi?

²⁰ Ata ediwak owo ẹdọhọ ke mmimọ ito ubon Abraham, ndusụk mmọ ẹkam ẹnam n̄kpọ nte mme prọfet. Ndusụk ido ukpono isịnke mbubru ke ndidọhọ ke mme prọfet mmimọ ẹketo ubon Abraham. Edi ndi kpukpru mmọ emi ẹdi Mfri oro ẹken̄wọn̄ọde? Baba! Edisana spirit ama anam apostle Paul etịn̄ ke idịghe kpukpru mbon oro ẹtode ubon Abraham ẹkeme ndidọhọ ke idi Mfri oro ẹken̄wọn̄ọde. Owo ikadaha mme andito ubon nditọ Abraham eken idiọn̄ ubonowo. Mfri oro otode ubon Isaac kpọt ke ẹkenyene ndida ndiọn̄ ubonowo. (Heb. 11:18) Ke akpatre, owo kiet kpọt, oro edi Jesus Christ, emi Bible owụtde ke oto ubon Abraham, edi akpan ubak mfri oro ẹkebemde iso ẹtịn̄ ẹban̄a. * Kpukpru mbon eken ẹkekabarede ẹdi udiana ubak mfri Abraham ke ntak oro mmọ ‘ẹdide eke Christ.’ Ih, itie oro Jesus enyenede ke ndisu ntịn̄nnịm ikọ emi enen̄ede edi san̄asan̄a.

21. Nso ke afo ama akan ke nte Jesus akamade san̄asan̄a itie oro enye enyenede ke uduak Jehovah?

 ²¹ Nso ke nnyịn ikpep ito ibio ibio edidụn̄ọde san̄asan̄a itie oro Jesus enyenede ke uduak Jehovah? Toto ke ini oro ẹkebotde ikpọn̄-ikpọn̄ edibon Eyen Abasi, enye enen̄ede edi san̄asan̄a, inyeneke mbiet. Nte ededi, san̄asan̄a Eyen Abasi emi akakabarede edi Jesus mi esisụhọde idem kpukpru ini anam n̄kpọ ke n̄kemuyo ye uduak Ete esie, idehedei iyom ubọn̄ idemesie. (John 5:41; 8:50) Nso n̄wọrọnda uwụtn̄kpọ ke enye ekenịm ntem ọnọ nnyịn mfịn! Ẹyak ibiere ndinam ‘kpukpru n̄kpọ nnọ Abasi ubọn̄’ ukem nte Jesus.—1 Cor. 10:31.

[Mme Ikọ Idakisọn̄]

Nte Afo Emeti?

• Nso ke mme udorienyịn̄ Jesus ẹkpep fi ẹban̄a san̄asan̄a itie esie? (Se ekebe.)

• Didie ke afo ekeme ndikpebe uwụtn̄kpọ san̄asan̄a Eyen Jehovah?

[Mme Mbụme Ukpepn̄kpọ]

[Ekebe/Ndise ke page 15]

Ndusụk Udorienyịn̄ Oro Ẹwụtde San̄asan̄a Itie Oro Jesus Enyenede ke Uduak Abasi

◼ Ikpọn̄-Ikpọn̄ Edibon Eyen. (John 1:3) Jesus ikpọn̄ ke Ete esie okobot nnennen nnennen.

◼ Ikọ. (John 1:14) Jehovah esida Eyen esie nte Etịn̄ikọ ke ibuot esie ọnọ mme edibotn̄kpọ eken ntọt ye item.

◼ Amen. (Edi. 3:14) Mfọnmma uwem Jesus ke isọn̄, emi esịnede n̄kpa uwa esie, ama ọsọn̄ọ onyụn̄ anam kpukpru un̄wọn̄ọ emi Jehovah Abasi ọkọn̄wọn̄ọde ẹsu.

◼ Esịne-Ufọt Obufa Ediomi. (1 Tim. 2:5, 6) Sia Jesus edide Esịne-Ufọt oro ibet enyịmede, enye anam obufa idụt amana, kpa “Israel Abasi,” emi mme Christian oro ẹdidide “otu mme oku emi ẹdade ubọn̄” ke heaven ẹnamde.—Gal. 6:16; 1 Pet. 2:9.

◼ Akwa Oku. (Heb. 7:27, 28) Jesus ekedi n̄kukụre owo emi odotde ndiwa mfọnmma uwa, oro mîkoyomke ẹfiak ẹwa. Enye ekeme ndiyet nnyịn isana ibọhọ idiọkn̄kpọ ye n̄kpa.

◼ “Mfri” Oro Ẹken̄wọn̄ọde. (Gen. 3:15, NW) Jesus Christ edi n̄kukụre owo oro edide akpan ikpehe mfri oro ẹkebemde iso ẹtịn̄ ẹban̄a. Kpukpru mbon eken oro ẹkekabarede ẹdi udiana ubak mfri Abraham, “[ẹdi] eke Christ.”—Gal. 3:29.