Nte Afo Ayaka Iso Ọsọn̄ọ Ada?

“Ndisioho mfọn-mma [“nsọn̄ọnda,” “NW”] ke idem mi mfep tutu ndikpa.”—JOB 27:5.

1, 2. Nso ke oyom ika iso inam, ndien mme mbụme ewe ke idineme?

 DA KE ese n̄wed ubọp ufọk. Nte mbuwed oro ọfọnde enen̄ede akpa fi idem. Esịt adat fi aban̄a nte ufọk oro edinyenede ufọn ọnọ fi ye ubon fo. Edi, ndi idịghe akpanikọ ke n̄wed ubọpufọk oro ye se ededi oro afo ekerede idinyeneke ufọn ndomokiet ibọhọke afo ọbọp, odụn̄, onyụn̄ ese aban̄a ufọk oro?

² Kpasụk ntre, imekeme ndifiọk ke nsọn̄ọnda edi eti edu oro edinyenede ufọn ọnọ nnyịn ye mbon oro imade. Edi ndikekere kpọt mban̄a mme ufọn nsọn̄ọnda idinyeneke ufọn inọ nnyịn ibọhọke nnyịn itọn̄ọ ndinyene nsọn̄ọnda inyụn̄ ika iso isọn̄ọ ida nte Christian. Ke ererimbot mfịn, edibọp ufọk esikpa n̄kpọ. (Luke 14:28, 29) Kpasụk ntre, ndika iso nsọn̄ọ nda esida ini ye ukeme, edi iyenen̄ede ibọ ufọn edieke inamde ntre. Ntre, ẹyak ineme mbụme ita emi: Didie ke nnyịn ikeme ndidi mbon nsọn̄ọnda? Didie ke nnyịn ikeme ndika iso nsọn̄ọ nda nte mme Christian? Nso ke ẹkpenam edieke owo mîkọsọn̄ọke ida ini kiet ko?

Didie ke Ikeme Ndidi Mbon Nsọn̄ọnda?

3, 4. (a) Didie ke Jehovah an̄wam nnyịn itọn̄ọ ndinyene nsọn̄ọnda? (b) Didie ke ikpọtọn̄ọ ndinyene nsọn̄ọnda nte Jesus?

³ Ima ineme ke akpa ibuotikọ ke Jehovah ayak nnyịn imek ke idem nnyịn m̀mê iyama ndidi mbon nsọn̄ọnda. Edi ọfọn nte enye mîsanake nnyịn iyak man isọn̄ọ ida ke idem nnyịn. Enye ekpep nnyịn nte ikpọtọn̄ọde ndinyene edu emi, onyụn̄ atat ubọk ọnọ nnyịn edisana spirit esie man an̄wam nnyịn ida se Enye ekpepde nnyịn isịn ke edinam. (Luke 11:13) Enye akam ọnọ mbon oro ẹdomode “ndisọn̄ọ nda” ukpeme ke n̄kan̄ eke spirit.—N̄ke 2:7, NW.

⁴ Didie ke Jehovah ekpep nnyịn ndisọn̄ọ nda? Akakan n̄kpọ emi enye anamde edi ndikọnọ Jesus Eyen esie edi isọn̄. Jesus ama osụk ibuot ọnọ Abasi ke mfọnmma usụn̄. Enye ama “osụk ibuot tutu osụn̄ọ ke n̄kpa.” (Phil. 2:8) Jesus ama osụk ibuot ọnọ Ete esie eke heaven ke kpukpru n̄kpọ oro enye akanamde, idem ọkpọkọm n̄kpọ oro ọkọsọn̄ adan̄a didie. Enye ọkọdọhọ Jehovah ete: “Okûdi ke uduak mi, edi yak  uduak fo ada itie.” (Luke 22:42) Ọfọn nnyịn owo kiet kiet ibụp idem nnyịn ite, ‘Nte mmesisụk ibuot ntre?’ Nnyịn ididi mbon nsọn̄ọnda edieke ikade iso isụk ibuot ke eti esịt. Kere ban̄a ndusụk mme idaha oro ẹnen̄erede ẹyom nsụkibuot.

5, 6. (a) Didie ke David ekenen̄ede owụt ufọn edika iso nsọn̄ọ nda idem ke ini mbon en̄wen mîkwe nnyịn? (b) Nso idomo nsọn̄ọnda ke mme Christian ẹsisobo mfịn ke ini ẹdude ikpọn̄?

⁵ Nnyịn inyene ndikop uyo nnọ Jehovah idem ke ini etiede nte idu ikpọn̄. David andiwet psalm ama owụt nte nsọn̄ọnda edide akpan n̄kpọ ke ini oro etiede nte ke enye okodu ikpọn̄. (Kot Psalm 101:2. *) David ekesidu ye mme owo kpukpru ini sia enye ekedide edidem. Nte eyịghe mîdụhe, ama esidu ini oro ata ediwak owo ẹkedude ye enye. (Men Psalm 26:12 domo.) Ndisọn̄ọ nda ke mme utọ ini oro ekedi akpan n̄kpọ, sia akana edidem enịm eti uwụtn̄kpọ ọnọ ikọt esie. (Deut. 17:18, 19) Edi David ama ọfiọk ke imọ ikosụk inyene ndisọn̄ọ nda ke ini imọ idude ikpọn̄—‘ke esịtufọk imọ.’ Nso kaban̄a nnyịn?

⁶ David ọdọhọ ke Psalm 101:3 ete: “Ndinịmke oburobụt n̄kpọ ke enyịn mi.” Mfịn, ekese idaha ẹdu ndinịm oburobụt n̄kpọ ke iso nnyịn, akpan akpan ke ini idude ikpọn̄. Owo ndinyene Intanet ekeme ndidi idomo ke afan̄ emi. Edi mmemmem n̄kpọ nditap nnyịn ise n̄kpọ oro mîdotke, m̀mê ndikam nse ndise idan̄. Edi ndi ndinam oro ọwọrọ ke imokop uyo inọ Abasi emi ọkọnọde David odudu edisana spirit ewet ikọ oro? Ndise idan̄ ọdiọk etieti, sia enye anam ndiọi udọn̄ ye idiọkitọn̄ ẹtetịm ẹsọn̄ ubọk, abiat ubieresịt, abiat ndọ, onyụn̄ osụhọrede kpukpru mbon oro ẹnyenede ubọk ke enye, itie.—N̄ke 4:23; 2 Cor. 7:1; 1 Thess. 4:3-5.

7. Edumbet ewe ekeme ndin̄wam nnyịn isọn̄ọ ida ke ini idude ikpọn̄?

⁷ Edi akpanikọ ke inyeneke asan̄autom Jehovah oro esinen̄erede odu ikpọn̄. Edima Ete nnyịn esise nnyịn kpukpru ini. (Kot Psalm 11:4.) Esịt esinen̄ede enem Jehovah didie ntem ke ini enye okụtde nte afo ọbiọn̄ọde idomo! Ke ini anamde ntre, afo anam item oro Jesus ọnọde ke Matthew 5:28. Nen̄ede biere nditre ndise mme ndise oro ẹkemede ndinam fi anam idiọk. Kûda ọsọn̄urua nsọn̄ọnda fo ukpụhọ ye esuene esuene edu edise m̀mê edikot n̄wed idan̄!

8, 9. (a) Nso idomo ke Daniel ye nsan̄a esie ita ẹkesobo kaban̄a nsọn̄ọnda? (b) Didie ke mme uyen Christian mfịn ẹnam Jehovah ye nditọete mmọ ẹkop idatesịt?

⁸ Imekeme n̄ko ndidi mbon nsọn̄ọnda edieke ikopde uyo inọ Jehovah ke ini idude ye mbon oro mînịmke ke akpanikọ. Da Daniel ye  nsan̄a esie ita ke uwụtn̄kpọ. Mmọ ẹkedi uyen ke ini ẹkedade mmọ nte mbon ntan̄mfep ẹka Babylon. Mbon oro mînịmke ke akpanikọ, emi mîkọfiọkke n̄kpọ ndomokiet iban̄a Jehovah ẹkekan mmọ ẹkụk, ẹnyụn̄ ẹyom nditọ Hebrew inan̄ emi ẹdia udia oro Ibet Abasi akakpande. Nditọ oro ẹkpekekere ke se ẹkedọhọde mmimọ inam ikenen̄ekede idiọk. Idem n̄kpọ, mme ete ye eka mmọ, nyobiowo, ye mme oku ikodụhe do ndikụt se mmọ ẹkenamde. Edi anie ọkọfiọk? Jehovah ke idemesie ama ọfiọk. Ntre, kpa ye oro ẹkeyomde mmọ ẹdia mme n̄kpọ oro ọkọrọ ye ufen editre ndidia, mmọ ẹma ẹsọn̄ọ ẹda ẹnyụn̄ ẹkop uyo Abasi.—Dan. 1:3-9.

⁹ Mme uyen oro ẹdide Mme Ntiense Jehovah ke ẹnam kpasụk ntre ke ofụri ererimbot, ẹka iso ẹtiene mme edumbet oro Abasi ọnọde mme Christian ẹnyụn̄ ẹsịn nditiene mme owo nnam se idiọkde. Ke ini mbufo mme uyen ẹsịnde ndida n̄kpọsọn̄ ibọk, mîbuanake ke afai, isụn̄i, oburobụt ido, ye mme idiọk edinam eken, mbufo ẹkop uyo Jehovah. Ke ini ẹnamde emi, mbufo ẹnyene nsọn̄ọnda. Mbufo ẹyebọ ufọn ẹnyụn̄ ẹnam Jehovah ye nditọete mbufo ẹkop idatesịt!—Ps. 110:3.

10. (a) Nso ukwan̄ ekikere oro ndusụk uyen ẹnyenede ẹban̄ade use anam mmọ ẹbiat nsọn̄ọnda mmọ? (b) Nsọn̄ọnda akpanam inam n̄kpọ didie iban̄a edinam use?

¹⁰ Oyom ikop uyo n̄ko ke ini idude ye owo isio uduot. Imọfiọk ke Ikọ Abasi akpan use. Nte ededi, isọn̄ke ndiyak edu n̄kopuyo akabade edu nnam-se-mmade. Ke uwụtn̄kpọ, ndusụk uyen ẹsinam idan̄ inua m̀mê idan̄ etịtifuọ, edifiọn̄ọ kiet eken ndido idan̄, ẹnyụn̄ ẹkere ke mme edinam emi inen̄ekede idiọk sia mmimọ mînamke ata idan̄. Mme utọ uyen oro ẹkeme ndifre—mîdịghe ẹkokoi ẹsịn ndinyịme—ke ikọ Bible oro ọwọrọde use, esịne kpukpru edinam oro, emi ẹdide ndiọi ido emi ẹkemede ndinam ẹsio owo ẹfep ke esop. * Se idiọkde ikan edi ke mmọ iyomke ndisọn̄ọ nda. Sia idomode ndika iso nsọn̄ọ nda, nnyịn ikpoyomke mme ntak ndinọ man ibiat ibet Abasi. Nnyịn ikpodomoke ndise adan̄a nte ikemede ndika n̄ketre edi inamke ata idiọkn̄kpọ inyụn̄ ibọ ufen. Nnyịn ikpekereke kpọt iban̄a ikpe oro ẹdibierede ẹnọ nnyịn ke ntak idiọkn̄kpọ. Utu ke oro, nnyịn ikere iban̄a ndinam se inemde Jehovah esịt inyụn̄ ifep se idiyatde enye esịt. Utu ke ndise adan̄a nte ikemede ndika anyan edi inamke ata idiọkn̄kpọ, nnyịn ikpenyene ndida ata nsannsan inyụn̄ ‘ifehe ikpọn̄ use.’ (1 Cor. 6:18) Ntre ke idiwụt ke imenen̄ede isọn̄ọ ida.

Didie ke Ikeme Ndika Iso Nsọn̄ọ Nda?

11. Ntak emi ndika iso n̄kop uyo nnọ Abasi edide akpan n̄kpọ? Nọ uwụtn̄kpọ.

¹¹ Nnyịn itọn̄ọ ndinyene nsọn̄ọnda ebe ke ndikop uyo, ntre nnyịn ika iso isọn̄ọ ida ebe ke ndika iso n̄kop uyo. Ndikop uyo ini kiet ekeme nditie nte idịghe akpan n̄kpọ—ke edi ekpri n̄kpọ. Edi ediwak orụk n̄kopuyo oro ẹwọrọ ke imọsọn̄ọ ida. Ke uwụtn̄kpọ: Ekeme nditie nte ke kọrikọri kiet idịghe akpan n̄kpọ, edi edieke  itịmde ikọk ediwak kọrikọri, imekeme ndibọp ediye ufọk. Ntre, edieke ikade iso ikop uyo inọ Abasi, ọwọrọ ke imọsọn̄ọ ida.—Luke 16:10.

12. Didie ke David ekenịm uwụtn̄kpọ edika iso nsọn̄ọ nda ke ini ẹkenamde n̄kpọ ye enye nte mîdotke ẹnyụn̄ ẹfịkde enye?

¹² Imekeme ndinen̄ede n̄wụt ke imọsọn̄ọ ida ke ini iyọde nsọn̄ọn̄kpọ, ke ini ẹnamde n̄kpọ ye nnyịn nte mîdotke, m̀mê ke ini ẹfịkde nnyịn. Kere ban̄a uwụtn̄kpọ David ke Bible. Ke ini enye ekedide akparawa, enye ama ọyọ ukọbọ emi edidem oro akpakanade ada ke ibuot ukara Jehovah ọkọkọbọde enye. Jehovah ama esịn Edidem Saul, enye onyụn̄ enen̄ede efịbe David, emi Abasi akamade. Edi Saul ama aka iso akara esisịt ini onyụn̄ ada udịmekọn̄ Israel an̄wana ye David. Jehovah ama ayak ufịk emi aka iso ke ndusụk isua. Ndi David ama ayat esịt ye Abasi? Ndi enye ama ọdọhọ ke ufọn idụhe ndiyọ? Baba! Enye ama enen̄ede okpono Saul sia Saul ekedide owo emi Abasi ekeyetde aran, isioho Saul usiene ke ini ekenyenede ifet ndisio.—1 Sam. 24:2-7.

13. Didie ke ikeme ndika iso nsọn̄ọ nda ke ini ẹduede m̀mê ẹkpude nnyịn?

¹³ Nso eti uwụtn̄kpọ ke David ekenịm ntem ọnọ nnyịn mfịn! Nnyịn idu ke esop ofụri ererimbot emi mme anana-mfọnmma owo ẹnamde, ndien owo ekededi ekeme ndidue nnyịn mîdịghe akam ọduọ. Edi nnyịn imokop idatesịt ndidu uwem ke ini emi owo mîdikemeke ndibiat ofụri ikọt Jehovah. (Isa. 54:17) Kpa ye oro, didie ke ikpanam n̄kpọ edieke owo eduede nnyịn m̀mê okpude nnyịn? Edieke isịnde se eyenete nnyịn anamde nnyịn ke esịt, emi ekeme ndinam nnyịn itre ndisọn̄ọ nda ye Abasi. Nnyịn ikpedehedei iyak se mbon en̄wen ẹnamde anam nnyịn iyat esịt ye Abasi m̀mê itre ndinam akpanikọ nnọ enye. (Ps. 119:165) Ndiyọ ke ini isobode idomo ayanam ika iso isọn̄ọ ida.

14. Mbon oro ẹsọn̄ọde ẹda ẹsinam n̄kpọ didie ke ini ẹnamde mme ukpụhọde ke ndutịm esop ye ke ini ẹsịnde un̄wana ke mme ukpepn̄kpọ nnyịn?

¹⁴ Imekeme n̄ko ndika iso nsọn̄ọ nda ke nditre ndikụt ndudue n̄kaha nnọ mme owo. Oro ọwọrọ ndinam akpanikọ nnọ Jehovah. Enye ọdiọn̄ ikọt esie idahaemi akan nte akanam ọdiọn̄de. Ẹnen̄ede ẹtuak ibuot ẹnọ Abasi ke isọn̄ idahaemi ẹkan nte akanam ẹtuakde. (Isa. 2:2-4) Ke ini ẹkpụhọrede nte ẹkesinamde mme itien̄wed Bible ẹn̄wan̄a m̀mê nte ẹsinamde n̄kpọ, oyom inyịme. Esidat nnyịn esịt ndikụt mme uyarade oro ẹwụtde ke un̄wana eke spirit ke aka iso ayama. (N̄ke 4:18) Edieke mme ukpụhọde oro ẹnamde mîn̄wan̄ake nnyịn, nnyịn iben̄e Jehovah anam n̄kpọ emi an̄wan̄a nnyịn. Edi inyene ndika iso n̄kop uyo, ika iso isọn̄ọ ida.

Nso ke Ẹkpenam Edieke Owo Mîkọsọn̄ọke Ida?

15. Anie owo kpọt ekeme ndibiat nsọn̄ọnda fo?

¹⁵ Nte mbụme oro inamke inen̄ede ikere n̄kpọ? Nte ikekpepde ke akpa ibuotikọ, nsọn̄ọnda enen̄ede edi ata akpan n̄kpọ. Edieke nnyịn  mîsọn̄ọke ida, nnyịn ibuanake n̄kpọ ndomokiet ye Jehovah inyụn̄ inyeneke ata idotenyịn. Ti ete: Owo kiet kpọt ke ofụri ererimbot ekeme ndibiat nsọn̄ọnda nnyịn. Afo edi owo oro! Job ama enen̄ede ọfiọk emi. Enye ọkọdọhọ ete: “Ndisioho mfọn-mma [“nsọn̄ọnda,” NW] ke idem mi mfep tutu ndikpa.” (Job 27:5) Edieke anamde ukem ubiere oro Job akanamde, onyụn̄ asan̄a ekpere Jehovah, afo ududehedei usio nsọn̄ọnda ke idem fo ufep.—Jas. 4:8.

16, 17. (a) Edieke owo anamde akwa idiọkn̄kpọ, nso ke enye mîkpanamke? (b) Nso ke enye akpanam?

¹⁶ Edi ndusụk owo ẹtre ndika iso nsọn̄ọ nda. Ndusụk owo ẹnam ikpọ idiọkn̄kpọ mfịn kpa nte ẹkenamde ke eyo mme apostle. Edieke anamde akwa idiọkn̄kpọ, ndi ọwọrọ ke idotenyịn idụhe? Iwọrọke ntre. Nso ke akpanam? Yak ineme kan̄a se mûkpanamke. Nnyịn imesima ndidịp idiọkn̄kpọ oro ikanamde mbak ete ye eka nnyịn, nditọete, m̀mê mbiowo ẹdifiọk. Nte ededi, Bible eti nnyịn ete: “Owo eke edịpde idiọk ido esie idikwe unen: edi owo eke ayararede, onyụn̄ ọkpọn̄de mmọ, oyokụt mbọm.” (N̄ke 28:13) Mbon oro ẹsidịpde idiọkn̄kpọ mmọ ẹsinam akamba ndudue, koro n̄kpọ ndomokiet ikemeke ndidịbe Abasi. (Kot Mme Hebrew 4:13.) Ndusụk owo ẹkam ẹdomo ndidu uwem esịt iba, ẹnam nte inam n̄kpọ Jehovah ndien ke ukem ini oro ẹka iso ẹnam idiọkn̄kpọ. Utọ uwem oro idịghe uwem nsọn̄ọnda—ke nditịm ntịn̄, enye edi ata isio ye nsọn̄ọnda. Jehovah imaha utuakibuot mbon oro ẹdịpde idiọkn̄kpọ mmọ. Utu ke oro, utọ mbubịk ido oro ayayat enye esịt.—N̄ke 21:27; Isa. 1:11-16.

¹⁷ Bible etịn̄ se Christian akpanamde edieke enye anamde akwa idiọkn̄kpọ. Enye enyene ndiyom un̄wam mbiowo. Jehovah anam ndutịm man ẹn̄wam mbon oro ẹnen̄erede ẹdọn̄ọ ke n̄kan̄ eke spirit. (Kot James 5:14.) Kûyak ndịk ntụnọ m̀mê edinen̄ede oro ẹdinọde anam fi etre ndibọ usọbọ eke spirit. Idem n̄kpọ, nte enyene-ibuot owo akpayak ubiak ibio ini oro enye edikopde ke ntak ukịmibọk m̀mê usiakidem akpan enye ndisọbọ udọn̄ọ oro ekemede ndiwot enye?—Heb. 12:11.

18, 19. (a) Didie ke uwụtn̄kpọ David owụt ke owo ekeme ndifiak nsọn̄ọ nda? (b) Nso ke afo ebiere ndinam kaban̄a nsọn̄ọnda?

¹⁸ Nte owo oro ekeme ndinen̄ede n̄kop nsọn̄idem? Ke owo ama akabiat nsọn̄ọnda esie, nte enye ekeme ndifiak nsọn̄ọ nda? Fiak kere ban̄a uwụtn̄kpọ David. Enye ama anam akwa idiọkn̄kpọ. Enye ama ese n̄wan owo ye udọn̄ edifiọk enye, esịn efịbe ye enye, onyụn̄ odiomi man ẹwot ebe esie oro mîkeduehe. Ọsọsọn̄ ndidọhọ ke David ama ọsọn̄ọ ada ini oro. Edi, ndi ọwọrọ ke enye ikenyeneke idotenyịn? Ama oyom ẹnen̄ede ẹtụnọ David, enye ama onyụn̄ ọbọ ntụnọ oro. Ekem, enye ndikabade esịt ke ofụri esịt ama anam Jehovah atua enye mbọm. David ama ekpep n̄kpọ oto ntụnọ oro ẹkenọde enye onyụn̄ afiak ọsọn̄ọ ada ebe ke ndikop uyo nnọ Abasi nnyụn̄ n̄ka iso ndu uwem nsọn̄ọnda. Uwem David eketie nte se idude ke Mme N̄ke 24:16, emi ọdọhọde ete: “Koro eti owo ọduọde utịm ikatiaba, ndien adaha ke enyọn̄.” Nso ikedi utịp? Kere ban̄a se Jehovah eketịn̄de ọnọ Solomon aban̄a David ke David ama akakpa. (Kot 1 Ndidem 9:4.) Abasi eketi David nte owo nsọn̄ọnda. Ke akpanikọ, Jehovah ekeme ndiyet akwa idiọkn̄kpọ mme anamidiọk oro ẹkabarede esịt, mfep.—Isa. 1:18.

¹⁹ Ih, afo edidi owo nsọn̄ọnda edieke okopde uyo ọnọ Jehovah ke ima. Ka iso nam akpanikọ, nyụn̄ yọ, ndien edieke anamde akwa idiọkn̄kpọ, kabade esịt ke ofụri esịt. Nsọn̄ọnda edi ọsọn̄urua n̄kpọ didie ntem! Kpukpru nnyịn ikpakam ibiere nte David ekebierede ete: “Ami nyasan̄a ke mfọn-mma [“nsọn̄ọnda,” NW] mi.”—Ps. 26:11.

[Mme Ikọ Idakisọn̄]

Didie ke Afo Ọkpọbọrọ?

• Didie ke afo ekeme ndidi owo nsọn̄ọnda?

• Didie ke afo ekeme ndika iso nsọn̄ọ nda?

• Didie ke ekeme ndifiak nsọn̄ọ nda?

[Mme Mbụme Ukpepn̄kpọ]

[Ekebe ke page 8]

“Ama Ọfọn Akakaha!”

N̄wan oro akasan̄ade ye idịbi ọfiọn̄ ition eketịn̄ ikọ ibuotikọ oro ke ntak mfọnido ye nsọn̄ọnda owo emi enye mîkọfiọkke. Enye ama aka ufọkurua kọfi, ndien anyan ini ke enye ama ọkọkpọn̄ do, enye ama ọfiọk ke ima ifre ekpatokụk imọ do. Dollar 2,000 ekesịne ke ekpatokụk oro, emi enen̄erede awak akan okụk oro enye esikamade. Ke akpatre, enye ọkọdọhọ mme ewet n̄wedmbụk n̄kpọntịbe n̄kann̄kụk oro ete: “Ibuot ama oyon̄ mi!” Edi n̄kaiferi kiet ama okụt ekpatokụk oro onyụn̄ ọsọsọp oyom andinyene. Sia mîkekemeke ndikụt, enye ama ada okụk oro aka itieutom mme bodisi, ndien mme bodisi ẹma ẹyom n̄wan oro ẹkụt. Enye ama enen̄ede okop idatesịt onyụn̄ ọdọhọ ete: “Se enye akanamde ama ọfọn akakaha!” Ntak emi n̄kaiferi emi ekesịnde ofụri ukeme emi asan̄a oyom andinyene okụk emi? N̄wedmbụk n̄kpọntịbe oro ọkọdọhọ ke sia n̄kaiferi oro edide kiet ke otu Mme Ntiense Jehovah, ke enye ọdọhọ ke “ido ukpono oro ẹkedade ẹbọk imọ ekekpep imọ ndisọn̄ọ nda nnam akpanikọ.”

[Ndise ke page 9]

Mme uyen ẹkeme ndika iso nsọn̄ọ nda ke ini ẹsobode idomo

[Ndise ke page 10]

Ama odu ini oro David mîkọsọn̄ọke ida, edi enye ama afiak ọsọn̄ọ ada