“Ditiene Mi”
“Ditiene Mi”
“Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie ke usen ke usen onyụn̄ aka iso etiene mi.”—LUKE 9:23.
1, 2. (a) Nso ikot ke Jesus ọkọnọ mme owo? (b) Afo anam n̄kpọ didie aban̄a ikot oro Jesus ọnọde fi?
KE JESUS ama ekekpere ndikụre utom esie mi ke isọn̄, enye ama adaha ọkọkwọrọ ikọ ke Perea, emi odude ke edem usiahautịn Jordan, ke edere edere usiahautịn Judea. Akparawa kiet ama asan̄a ekpere enye edibụp se imọ ikpanamde man inyene nsinsi uwem. Ke Jesus ama okokụt ke akparawa emi enịm Ibet Moses ketket, enye ama ọnọ enye akpan ikot, ete: “Ka, kanyam se ededi oro afo enyenede nyụn̄ yak nọ mme ubuene, ndien afo eyenyene n̄kpọuto ke heaven, nyụn̄ ditiene mi.” (Mark 10:21) Nte fi,—Jesus, kpa ikpọn̄-ikpọn̄ edibon Eyen Ata Ọkpọsọn̄ Abasi ọdọhọ owo editiene imọ!
2 Akparawa oro ikamaha nditiene Jesus, edi mbon en̄wen ẹma ẹtiene. Mbemiso ini emi, Jesus ama ọdọdọhọ Philip ete: “Tiene mi.” (John 1:43) Philip ama enyịme, ndien nte ini akakade, enye ama akabade edi apostle. Jesus ama ọdọhọ Matthew n̄ko etiene imọ, enye onyụn̄ enyịme. (Matt. 9:9; 10:2-4) Ke nditịm ntịn̄, Jesus ọnọ kpukpru mbon oro ẹmade se inende ukem ikot oro ete: “Edieke owo ekededi oyomde nditiene mi, yak enye akan̄ idemesie onyụn̄ emen eto ndutụhọ esie ke usen ke usen onyụn̄ aka iso etiene mi.” (Luke 9:23) Ntre, owo ekededi ekeme nditiene Jesus edieke enye enen̄erede oyom. Ndi ọdọn̄ fi nditiene Jesus? Ediwak nnyịn imetetiene Jesus imesinyụn̄ isịn udọn̄ inọ mbon en̄wen ke an̄wautom ite ẹditiene Jesus.
3. Nso idin̄wam nnyịn ika iso itiene Jesus?
3 Inemke nditịn̄ ke ndusụk mbon oro ẹkenyenede udọn̄ ke akpanikọ ikpepke aba Bible. Mmọ ẹtre ndikpep Bible sụn̄sụn̄ tutu ‘ẹfiọrọ ẹkpọn̄ usụn̄’ ẹnyụn̄ ẹtre nditiene Jesus. (Heb. 2:1) Nso ke ikpanam mbak utọ n̄kpọ oro ediwọrọ nnyịn? Se idin̄wamde nnyịn edi ndibụp idem nnyịn ite: ‘Ntak emi n̄ketienede Jesus ke akpa ifet-e? Nso ke nditiene Jesus ọwọrọ?’ Ndikere mban̄a ibọrọ mbụme emi ayan̄wam nnyịn ika iso itiene Jesus, onyụn̄ anam nnyịn isịn udọn̄ inọ mbon en̄wen ẹtiene Jesus.
Ntak Emi Itienede Jesus-e?
4, 5. Nso inam Jesus odot ndida nnyịn usụn̄?
4 Prọfet Jeremiah ọkọdọhọ ete: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jeremiah 10:23) Mbụk ubonowo owụt ke ikọ emi edi akpanikọ. Imenen̄ede ikụt ke mme anana-mfọnmma owo ikemeke ndikara idemmọ. Nnyịn inyịme nditiene Jesus sia imọfiọk ke enye odot ndida nnyịn usụn̄, inyụn̄ idụhe owo ndomokiet emi ebietde enye. Yak ineme ndusụk n̄kpọ oro ẹnamde Jesus odot ndida nnyịn usụn̄.
5 Akpa kan̄a, Jehovah ke idemesie ekemek Jesus nte Messiah ye Adausụn̄. Ndi odu owo en̄wen oro ọdiọn̄ọde utọ Adausụn̄ oro ọfọnde ye nnyịn nte Andibot ọdiọn̄ọde? Ọyọhọ iba, Jesus enyene mme edu oro nnyịn imade inyụn̄ ikpebede. (Kot Isaiah 11:2, 3.) Enye enịm mfọnn̄kan uwụtn̄kpọ ọnọ nnyịn. (1 Pet. 2:21) Ọyọhọ ita, Jesus enen̄ede ama mbon oro ẹtienede enye; ukwe nte enye akayakde uwem esie ọnọ mmọ? (Kot John 10:14, 15.) Enye enen̄ede owụt ke imọ idi eti ekpemerọn̄ ke ndiwụt nnyịn usụn̄ oro ọnọde inemesịt idahaemi, edinyụn̄ anamde inyene utịbe utịbe ini iso. (John 10:10, 11; Edi 7:16, 17) Mme ntak emi ye ediwak eken ẹkenam nnyịn ibiere nditiene enye. Edi nso ke nditiene Jesus ọwọrọ?
6. Nso ke nditiene Jesus ọwọrọ?
6 Nditiene Christ ikụreke ke ndikot idem nnyịn Christian. Se iwakde ibe owo biliọn iba ke ofụri ererimbot mfịn ẹdọhọ ke idi Christian, edi edu uwem mmọ owụt ke mmọ ẹdi “mme abiatibet.” (Kot Matthew 7:21-23.) Ke ini owo ọdọhọde ke imọ iyom nditiene Jesus, nnyịn imesinam enye ọfiọk ke ata mme Christian ẹsidu uwem ekekem ye se Jesus ekekpepde onyụn̄ anamde. Man iwụt se emi ọwọrọde, yak ineme ndusụk n̄kpọ oro idiọn̄ọde iban̄a Jesus.
Kpebe Ọniọn̄ Jesus
7, 8. (a) Nso idi ọniọn̄, ndien ntak emi Jesus ekenen̄erede enyene ọniọn̄? (b) Didie ke Jesus okowụt ke imenyene ọniọn̄, ndien didie ke nnyịn ikeme ndikpebe enye?
7 Jesus ekesinam n̄kpọ ye ọniọn̄, osụhọde idem, enyene ifịk, onyụn̄ ama ima. Yak ibem iso itịn̄ iban̄a ọniọn̄ esie—oro edi, ndikeme ndida ifiọk ye asian nnam n̄kpọ oro enyenede ufọn ọnọ owo. Apostle Paul ekewet ete: “Ke [Jesus] ke ẹtịm ẹdịp ofụri inyene ọniọn̄ ye ifiọk.” (Col. 2:3) Jesus akada utọ ọniọn̄ oro ke m̀mọ̀n̄? Jesus ke idemesie ọkọdọhọ ete: “Kpa nte Ete ekekpepde mi kpa ntre ke ntịn̄ mme n̄kpọ emi.” (John 8:28) Ih, Jehovah ọkọnọ enye ọniọn̄, ntre ikpaha nnyịn idem nte enye ekenyenede ọniọn̄ ntre.
8 Ke uwụtn̄kpọ, Jesus ama ada ọniọn̄ emek nte imọ ididude uwem. Enye ama ebiere ndidu mmemmem uwem, etịn̄ enyịn anam n̄kpọ kiet kpọt, emi ekedide uduak Ete esie. Enye ama ada ofụri ini ye ukeme esie anam n̄kpọ Obio Ubọn̄. Ke ini inamde ‘enyịn nnyịn enen̄ede ese’ mme n̄kpọ Obio Ubọn̄, inyụn̄ ifep mme n̄kpọ oro mînyeneke ufọn, emi ẹkemede ndidia ini nnyịn nnyụn̄ mbọ nnyịn odudu, emi owụt ke imetiene uwụtn̄kpọ Jesus. (Matt. 6:22) Ediwak mme Christian ẹdu mmemmem uwem man ẹkeme ndinen̄ede nsịn idem n̄kwọrọ ikọ. Ndusụk ẹkam ẹtọn̄ọ utom usiakusụn̄. Nnyịn imenen̄ede ikọm fi edieke afo esịnede ke otu emi. “Ndibem iso nyom obio ubọn̄” anam owo enyene akwa idatesịt ye uyụhọ.—Matt. 6:33.
Sụhọde Idem nte Jesus
9, 10. Didie ke Jesus okosụhọde idem?
9 Iyom ndineme idahaemi mban̄a nsụhọdeidem Jesus. Ke ini ẹnọde mme anana-mfọnmma owo odudu, mmọ ẹsiwak ndiwụt ke imedi n̄kpọ ikan owo en̄wen. Jesus iketiehe ntre ke baba usụn̄ kiet! Kpa ye akamba idaha esie ye kpukpru ikpọ n̄kpọ oro Jehovah akadade enye anam, akananam Jesus idehedei itan̄ idem. Ndien N̄wed Abasi eteme kpukpru nnyịn ete ikpebe enye. Apostle Paul ekewet ete: “Ẹnyene orụk edu ukere n̄kpọ emi Christ Jesus ekenyenede, emi, okposụkedi okodude ke mbiet Abasi, mîkekereke ndiwamade mbọ, oro edi, oyomde ndidi n̄ka ye Abasi. Baba, edi enye ama asana emi ayak onyụn̄ emen mbiet ofụn esịne onyụn̄ edidu ke mbiet owo.” (Phil. 2:5-7) Nso ke emi ọkọwọrọ?
10 Jesus ama enyene ata akwa idaha ke heaven—ndidu ke iso Ete esie kpukpru ini—edi enye ama enyịme ndikpọn̄ kpukpru oro. Abasi ama emen enye edisịn ke idịbi an̄wan Jew emi mîkọfiọkke erenowo; Jesus ama ọkọri do ke ọfiọn̄ usụkkiet tutu edimana nte nsekeyen ke ufọk anamusọ eto. Jesus ama okpon ke ufọk Joseph, ọtọn̄ọ ndikpep isan̄, ekem edi akparawa. Enye ekedi mfọnmma owo. Kpa ye oro, Jesus ama aka iso osụk ibuot ọnọ ete ye eka esie emi ẹkedide mme anana-mfọnmma owo ke ofụri ini uyen esie. (Luke 2:51, 52) Nso nsụhọdeidem ke emi ekedi ntem!
11. Didie ke ikeme ndikpebe nsụhọdeidem Jesus?
11 Edieke inyịmede ndinam utom oro etiede nte usụhọde utom, oro owụt ke imosụhọde idem nte Jesus. Ke uwụtn̄kpọ, kere ban̄a utom edikwọrọ eti mbụk. Emi ekeme nditie nte usụhọde utom, akpan akpan ke ini mme owo mîmaha ndikop, ye ke ini mme owo ẹsakde m̀mê ẹsuade nnyịn. Nte ededi, ke ini isịnde idem ikwọrọ ikọ, nnyịn iyan̄wam mme owo ẹnyịme ikot Jesus ẹnyụn̄ ẹtiene enye. Ke ini inamde oro, nnyịn iyan̄wam mmọ ẹnyene edinyan̄a. (Kot 2 Timothy 4:1-5.) Usụn̄ en̄wen oro ikemede ndikpebe nsụhọdeidem Jesus edi ke nte isede iban̄a Ufọkmbono Obio Ubọn̄ nnyịn. Oro ekeme ndisịne edimen mbio n̄kọduọn̄ọ, edikpọri nnyụn̄ nyet isọn̄, edikpọri nnyụn̄ nyet mme itie uken̄idem—kpukpru emi ẹdi usụhọde utom. Edi nnyịn imọfiọk ke edisana utom oro inamde inọ Abasi esịne edise mban̄a Ufọkmbono Obio Ubọn̄, emi edide akpan itie utuakibuot akpanikọ ke n̄kann̄kụk nnyịn. Ndinyịme ndinam utom oro etiede nte usụhọde utom owụt ke imosụhọde idem inyụn̄ itiene nde ikpat Christ.
Nyene Ifịk nte Jesus
12, 13. (a) Didie ke Jesus ekesịn ifịk ọkwọrọ ikọ, ndien ntak emi enye akanamde emi-e? (b) Nso idinam nnyịn isịn ifịk ikwọrọ ikọ?
12 Yak ineme nte Jesus ekesịnde ifịk ọkwọrọ ikọ. Jesus ama anam ekese ke ini enye okodude ke isọn̄. Ke ini enye mîkọtọn̄ọke kan̄a ukwọrọikọ, enyene ndidi enye akanam utomusọ eto ye Joseph ebeeka esie. Ke ini Jesus ọkọkwọrọde ikọ, enye ama anam mme utịben̄kpọ nte edikọk mme owo udọn̄ọ, onyụn̄ anam mme akpan̄kpa ẹset. Edi ata akpan utom esie ekedi ndikwọrọ eti mbụk Obio Ubọn̄ nnyụn̄ n̄kpep mbon oro ẹkemade ndikpan̄ utọn̄, Ikọ Abasi. (Matt. 4:23) Sia nnyịn idide mme anditiene enye, utom nnyịn edi oro n̄ko. Didie ke nnyịn ikeme nditiene uwụtn̄kpọ esie? N̄kpọ kiet oro ikemede ndinam edi ndinyene ukem uduak oro Jesus ekenyenede.
13 Ima Abasi ekenen̄ede anam Jesus ọkwọrọ ikọ onyụn̄ ekpep mme owo n̄kpọ. Edi Jesus ama onyụn̄ ama akpanikọ oro enye ekekpepde mme owo. Enye akada akpanikọ nte ata ọsọn̄urua n̄kpọuto, ndien ama enen̄ede ọdọn̄ enye ndinam mbon en̄wen ẹtiene ẹkụt akpanikọ. Nnyịn emi idide mme andikpep, m̀mê “mme anditeme mbio obio,” ida akpanikọ ntre. Kam kere ban̄a ọsọn̄urua akpanikọ oro ikpepde ke Ikọ Abasi! Nnyịn imọfiọk eneni oro aban̄ade m̀mê anie odot ndikara ekondo, ye nte ẹdibierede enye. Nnyịn imenen̄ede ifiọk se N̄wed Abasi ekpepde aban̄a idaha mme akpan̄kpa, ye mme edidiọn̄ oro obufa ererimbot Abasi edidade edi. Edide ikpep akpanikọ emi ke ndondo emi, m̀mê ebịghi ikekpep, mmọ ikpụhọke, ẹsụk ẹsọsọn̄ urua. (Kot Matthew 13:52.) Ke ini isịnde ifịk ikwọrọ ikọ, nnyịn iwụt mbon oro ikwọrọde ikọ inọ ke imama se Jehovah ekpepde nnyịn.
14. Didie ke nnyịn ikeme ndikpep mme owo n̄kpọ nte Jesus ekekpepde?
14 Kere n̄ko ban̄a nte Jesus ọkọkwọrọde ikọ. Enye ekesida ikọ esie oto N̄wed Abasi kpukpru ini. Mbemiso enye etịn̄de ata ọkpọikọ, enye ekesiwak ndidọhọ: “Ẹwet ẹte.” (Matt. 4:4; 21:13) Ikọ esie oro ẹkewetde ẹdọn̄ ke N̄wed Abasi ẹwụt ke enye ama okot N̄wed Abasi nnennen nnennen m̀mê etịn̄ aban̄a se ibede mbahade iba ke ofụri N̄wed Abasi Usem Hebrew. Ukem nte Jesus, nnyịn isinen̄ede iberi edem ke N̄wed Abasi ke ini ikwọrọde ikọ, inyụn̄ idomo ndikot N̄wed Abasi adan̄a nte ikekeme. Emi esinam mbon oro ẹnyenede eti esịt ẹkụt ke idemmọ ke nnyịn ikpep Ikọ Abasi, idịghe ikọ idem nnyịn. Esịt esinem nnyịn didie ntem ke ini owo enyịmede ndikụbọde Bible n̄kot nnyụn̄ nnyịme ndineme ufọn Ikọ Abasi ye se enye ọwọrọde! Ndien ke ini utọ owo oro enyịmede ndiyere ikot Jesus nnyụn̄ ntiene enye, ke akpanikọ, esịt esinen̄ede enem nnyịn.
Ndikpebe Jesus Ọwọrọ Ndima Mme Owo
15. Nso ikedi n̄wọrọnda edu Jesus, ndien didie ke nditie n̄kere edu emi editụk nnyịn?
15 Akpatre edu Jesus oro iyomde ndineme idahaemi eye ebe nde—oro edi, nte enye amade owo. Apostle Paul ekewet ete: “Ima Christ onụk nnyịn.” (2 Cor. 5:14) Ke ini ikerede iban̄a ima oro Jesus amade ofụri ubonowo ye nte enye amade nnyịn owo kiet kiet, esinen̄ede enem nnyịn onyụn̄ anam nnyịn itiene uwụtn̄kpọ esie.
16, 17. Didie ke Jesus okowụt ke imama mme owo?
16 Didie ke Jesus akama ubonowo? Enye ndinyịme ndiyak uwem esie nnọ ke ibuot ubonowo okowụt ke enye enen̄ede ama nnyịn. (John 15:13) Nte enye akanamde utom esie mi ke isọn̄ ama owụt n̄ko nte enye amade owo. Ke uwụtn̄kpọ, mbọm mbon oro ẹbọde ufen ama esinam enye etieti. Ke ini enye okokụtde Mary ye mbon oro ẹkedude ye enye ẹtuan̄ade n̄kpa Lazarus, mbọm mmọ ama enen̄ede anam enye. Okposụkedi emi Jesus ọkọdiọn̄ọde ke imọn̄ inam Lazarus eset, mbọm ama anam enye “atua eyet.”—John 11:32-35.
17 Owo akpamfia kiet ama ebịne Jesus ke nsonso ini oro enye ọkọtọn̄ọde utom ukwọrọikọ, onyụn̄ ọkọdọhọ enye ete: “Edieke afo akam amade, emekeme ndinam mi nsana.” Nso ke Jesus akanam? Itien̄wed oro aka iso ete: “Mbọm anam enye.” Ekem Jesus ama anam ata n̄wọrọnda n̄kpọ, “anyanade ubọk otụk enye, onyụn̄ ọdọhọ enye ete: ‘Mmama. Sana.’ Ndien kpa idaha oro akpamfia okụre enye, enye onyụn̄ akabade asana.” Ibet Moses akabat mbon akpamfia ke edidehe, Jesus okpokonyụn̄ ekeme ndida nsannsan nnam enye asana. Edi Jesus okoyom enye okop nte idem owo en̄wen etiede, koro anaedi enen̄ede ebịghi owo okotụk enye. Nso owo esịtmbọm ke Jesus ekedi ntem!—Mark 1:40-42.
18. Didie ke ikeme ndiwụt ke ‘imekere iban̄a mbon en̄wen’?
18 N̄wed Abasi eteme mme Christian ete ‘ẹkere ẹban̄a mme owo.’ (1 Pet. 3:8) Ekeme ndisọn̄ ndifiọk nte etiede eyenete oro ọdọn̄ọde udọn̄ọ ọfiọn̄ ke idem, m̀mê eyenete oro enen̄erede okop mfụhọ—akpan akpan, edieke akanam utọ n̄kpọ oro mîwọrọke nnyịn. Edi Jesus ama ọdiọn̄ọ nte etiede mbon udọn̄ọ ke idem okposụkedi emi akanam enye mîdọn̄ọke. Didie ke nnyịn ikeme nditie ntre? Idikeme ndinam emi ke ini inyenede ime ikop mfịna owo emi okụtde nnanenyịn. Nnyịn n̄ko imekeme ndibụp idem nnyịn ite: ‘Ekpetie mi didie ke idem edieke utọ n̄kpọ emi ọkpọwọrọde mi?’ Edieke inịmde idem nnyịn ke itie mbon en̄wen, oro ayanam nnyịn ikeme ‘nditịn̄ ikọ nsọn̄ọ ukpọn̄ eke ofụhọde.’ (1 Thess. 5:14) Ndinam emi ediwụt ke itiene uwụtn̄kpọ Jesus.
19. Didie ke uwụtn̄kpọ Jesus otụk nnyịn?
19 Nso n̄wọrọnda n̄kpọ ke ikpep ntem ito se Jesus Christ eketịn̄de onyụn̄ anamde! Adan̄a nte ikpepde n̄kpọ iban̄a enye, ntre ke idisịn idem ikpebe enye, oyonyụn̄ enen̄ede ọdọn̄ nnyịn ndin̄wam mbon en̄wen ẹkpebe enye n̄ko. Kpukpru nnyịn ikpakam ikop idatesịt ndika iso ntiene Edidem Messiah—ke emi ye ke nsinsi nsinsi!
Nte Afo Emekeme Ndinam An̄wan̄a?
• Didie ke ikeme ndinam n̄kpọ ye ọniọn̄ kpa nte Jesus akanamde?
• Didie ke ikeme ndiwụt ke imosụhọde idem?
• Nso ke ikpanam man inyene ifịk ke utom ukwọrọikọ?
• Didie ke ikeme ndima ima nte Jesus akamade?
[Mme Mbụme Ukpepn̄kpọ]
[Ekebe/Ndise ke page 5]
N̄WED ORO OWỤTDE NNYỊN NTE IKPEKPEBEDE CHRIST
Ẹma ẹsio n̄wed oro enyenede page 192 ke mbono district ke 2007. N̄wed oro ekere “Come Be My Follower.” Ẹsio n̄wed emi man an̄wam mme Christian ẹkpebe Jesus, akpan akpan mme edu ye edinam esie. Ama okot akpa ye udiana ibuot n̄wed emi, afo eyedisịm akpa ikpehe, emi anamde ifiọk nte Jesus okosụhọrede idem, enyene uko, ọniọn̄, okop item, onyụn̄ eme ime.
Ke adianade do, enyene ikpehe oro enemede utom Jesus nte andikpep ye ọkwọrọ eti mbụk, ọkọrọ ye ndusụk usụn̄ oro enye ekenen̄erede ama ima. Ẹwet n̄wed emi ke usụn̄ oro edin̄wamde mme Christian ẹkpebe Jesus.
Nnyịn imodori enyịn ke n̄wed emi ayan̄wam kpukpru nnyịn idụn̄ọde idem nnyịn inyụn̄ ibụp ite: ‘Ndi mmenen̄ede ntiene Jesus? Didie ke n̄keme ndinen̄ede ntiene enye?’ N̄wed emi oyonyụn̄ an̄wam “kpukpru mbon oro ẹnyenede eti esịt ndinyene nsinsi uwem” ẹkabade ẹdi mme anditiene Jesus.—Utom 13:48.
[Ndise ke page 4]
Ewe edu akanam Jesus enyịme ndidimana nte nsekeyen ke isọn̄?
[Ndise ke page 6]
Nso idinam nnyịn isịn ifịk ikwọrọ ikọ?