Ndi Afo Edi “Akama-Ukpọhọde Mfọnido Abasi Oro Owo Mîdotke”?

“Ẹda ima nditọete ẹnyene esịt ima ẹnọ kiet eken. Ẹda iso ke ndinọ kiet eken ukpono.”—ROME 12:10.

1. Nso ke Ikọ Abasi ọn̄wọn̄ọ?

JEHOVAH ọn̄wọn̄ọ ke ediwak itie ke Bible ete ke iyanyan̄a nnyịn ke ini idem ememde nnyịn m̀mê ke ini esịt obụn̄ọde nnyịn. Ke uwụtn̄kpọ, se ise m̀mê utọ un̄wọn̄ọ emi isọn̄ọke fi idem: “Edi Jehovah omụm mmọ eke ẹduọn̄ọde, akama, onyụn̄ emenede mmọ eke ẹnụhọde.” “Enye ọkọk mmọ eke esịt mmọ anuahade, onyụn̄ ofụk mmọ unan.” (Ps. 145:14; 147:3) Akan oro, Ete nnyịn eke heaven ke idemesie ọdọhọ ete: “Koro ami Jehovah Abasi fo mmụmde fi ubọk nnasia, emi ndọhọde fi, nte, Kûfehe; ami n̄n̄wam fi.”—Isa. 41:13.

2. Didie ke Jehovah esinọ mme asan̄autom esie odudu?

² Didie ke Jehovah, emi odụn̄de ke heaven, ‘esimụm nnyịn ubọk’? Didie ke enye ‘esimenede mmọ eke’ esịt ọduọde? Jehovah Abasi esinyan̄a nnyịn ke nsio nsio usụn̄. Ke uwụtn̄kpọ, enye esida edisana spirit esie ọnọ ikọt esie “odudu eke ebede ukeme owo.” (2 Cor. 4:7; John 14:16, 17) Ikọ Abasi, kpa Bible, oro ẹkedade odudu spirit Abasi ẹwet, esinyụn̄ ọnọ mme asan̄autom Abasi odudu. (Heb. 4:12) Edi ndi odu usụn̄ en̄wen oro Jehovah esidade ọsọn̄ọ nnyịn idem? Ibọrọ mbụme emi odu ke Akpa Peter.

“Mfọnido Abasi Oro Owo Mîdotke Emi Ẹwụtde ke Nsio Nsio Usụn̄”

3. (a) Nso ke apostle Peter eketịn̄ aban̄a idomo? (b) Nso ke ẹneme ke 1 Peter ibuot 4?

³ Apostle Peter ekewet leta ọnọ mme Christian oro ẹyetde aran ete ke utịp oro Abasi edinọde mmọ ekpenyene ndinam mmọ ẹkop inemesịt. Ekem, enye ama adian do ete: “Okposụkedi ke esisịt ini emi, enyene ndidi nsio nsio idomo ẹnam mbufo ẹfụhọ.” (1 Pet. 1:1-6) Ikọ oro, “nsio nsio,” owụt ke idomo edidi ke utọ ke utọ. Nte ededi, Peter itreke do mbak nditọete ẹditie ẹkere m̀mê iyakam ikeme ndiyọ utọ nsio nsio idomo oro. Edi Peter etịn̄ ke mme Christian ẹkpenyene ndinịm ke Jehovah ayan̄wam mmimọ iyọ kpukpru idomo oro isobode, inamke n̄kpọ m̀mê idomo oro etie didie. Peter ọsọn̄ọ emi ke 1 Peter ibuot 4, ke ini enye ekenemede nte “utịt kpukpru n̄kpọ [ẹsan̄ade] ẹkpere.”—1 Pet. 4:7.

4. Didie ke 1 Peter 4:10 ọsọn̄ọ owo idem?

⁴ Peter ọdọhọ ete: “Kpa nte mbufo owo kiet kiet ẹkebọde enọ, ẹda enye ẹsan̄a utom ẹnọ kiet eken nte nti mme akama-ukpọhọde mfọnido Abasi oro owo mîdotke emi ẹwụtde ke nsio nsio usụn̄.” (1 Pet. 4:10) Ndi omokụt ke Peter afiak etịn̄ aban̄a “nsio nsio” mi? Ke nditịm ntịn̄, enye ọdọhọ ke ‘kpa nte nsio nsio idomo ẹsisịmde nnyịn, ntre n̄ko ke Abasi ọnọ nnyịn mfọnido esie oro owo mîdotke ke nsio nsio usụn̄.’ Ntak emi ikemede ndidọhọ ke ikọ emi ọdọn̄ owo esịt? Ikọ emi owụt ke se ededi idomo oro esịmde nnyịn, ke Abasi n̄ko ọyọnọ nnyịn mfọnido esie oro owo mîdotke, emi ekemde ye idomo oro. Ndi omokụt ke Peter etịn̄ nte Jehovah esifọnde ido ye nnyịn ke usụn̄ oro owo mîdotke?  Oro edi, ke enye esida nditọete nnyịn anam emi.

“Ẹsan̄a Utom Ẹnọ Kiet Eken”

5. (a) Nso ke Christian kiet kiet akpanam? (b) Nso mbụme idemerede?

⁵ Peter ọkọdọhọ kpukpru mme andidu ke esop Christian ete: “Ke akande kpukpru n̄kpọ, ẹnyene ufiop ufiop ima ẹnọ kiet eken.” Ekem, enye adian do ete: “Kpa nte mbufo owo kiet kiet ẹkebọde enọ, ẹda enye ẹsan̄a utom ẹnọ kiet eken.” (1 Pet. 4:8, 10) Mmọdo, owo kiet kiet ke esop enyene nditiene nsịn udọn̄ nnọ ekemmọ Christian. Jehovah ọnọ nnyịn ọsọn̄urua inyene esie, ndien enye oyom ida in̄wam mme owo. Nso idedi ọsọn̄urua inyene emi? Peter ọdọhọ ke enye edi “enọ.” Nso ke enọ emi edi? N̄ko didie ke ikeme ndida enye ‘nsan̄a utom nnọ kiet eken’?

6. Nso idi ndusụk enọ oro ẹnọde mme Christian?

⁶ Ikọ Abasi ọdọhọ ete: “Kpukpru nti enọ ye kpukpru enọ eke ẹfọnde ẹma ẹto ke enyọn̄.” (Jas. 1:17) Ke akpanikọ, kpukpru se Jehovah ọnọde ikọt esiemmọ ẹdi mfọnido oro owo mîdotke. N̄wọrọnda n̄kpọ kiet oro Jehovah ọnọde nnyịn edi edisana spirit. Enọ emi anam nnyịn ikeme ndinyene nti edu nte ima, mfọnido, ye ifụre ifụre ido. Utọ edu emi anam nnyịn inen̄ede ima nditọete nnyịn inyụn̄ iben̄e idem ndinọ mmọ ibetedem. Ata ọniọn̄ ye ifiọk ẹsịne ke otu nti enọ oro edisana spirit ọnọde nnyịn. (1 Cor. 2:10-16; Gal. 5:22, 23) Ke akpanikọ, kpukpru odudu oro inyenede, ukeme, ye ndammana ifiọk, ẹdi enọ oro ikpadade itoro inyụn̄ ikpono Ete nnyịn eke heaven. Abasi ọdọhọ nnyịn ida edu ye ukeme nnyịn inam nditọete nnyịn ẹkụt mfọnido esie oro owo mîdotke.

“Ẹda Enye Ẹsan̄a Utom Ẹnọ Kiet Eken”—Didie?

7. (a) Nso ke ikọ oro, “kpa nte” ọwọrọ? (b) Ewe mbụme ke ikpobụp idem nnyịn, ndien ntak-a?

⁷ Peter ama enyene n̄ko se etịn̄de aban̄a enọ oro ikọbọde, ete: “Kpa nte mbufo owo kiet kiet ẹkebọde enọ, ẹda enye ẹsan̄a utom ẹnọ kiet eken.” Ikọ oro, “kpa nte” owụt ke kpukpru nnyịn inyene nsio nsio edu ye ukeme. Kpa ye oro, ẹsịn udọn̄ ẹnọ kpukpru owo ẹte “ẹda enye [oro edi, enọ ekededi oro owo ọbọde] ẹsan̄a utom ẹnọ kiet eken.” Akan oro, ikọ oro, “ẹda enye ẹsan̄a utom ẹnọ kiet eken nte nti mme akama-ukpọhọde” edi ewụhọ. Ntre, akpana kpukpru nnyịn ibụp idem  nnyịn ite: ‘Ndi mmenen̄ede nda enọ oro ẹnọde mi nsịn udọn̄ nnọ nditọete mi?’ (Men 1 Timothy 5:9, 10 domo.) Mîdịghe, ndi nda ukeme oro Jehovah ọnọde mi nnam mbubehe idemmi akpan akpan—utọ nte edikọ inyene m̀mê ndidi owo ke ererimbot emi?’ (1 Cor. 4:7) Edieke idade enọ nnyịn ‘isan̄a utom inọ kiet eken,’ Jehovah eyenem esịt ye nnyịn.—N̄ke 19:17; kot Mme Hebrew 13:16.

8, 9. (a) Nso idi ndusụk usụn̄ oro mme Christian ke ofụri ererimbot ẹsin̄wamde kiet eken? (b) Didie ke nditọete ke esop mbufo ẹsin̄wam kiet eken?

⁸ Ikọ Abasi etịn̄ nsio nsio usụn̄ emi mme Christian akpa isua ikie ẹkesisan̄ade utom ẹnọ kiet eken. (Kot Rome 15:25, 26; 2 Timothy 1:16-18.) Ata mme Christian mfịn ẹnen̄ede ẹkop inemesịt ndida enọ mmọ n̄n̄wam nditọete mmọ nte Abasi etemede. Ẹyak ineme ndusụk usụn̄ oro mmọ ẹsịnamde emi.

⁹ Ediwak nditọete nnyịn ẹsibiat ediwak hour kpukpru ọfiọn̄ ẹtịm idem ẹnọ mme mbono esop. Ke ini mmọ ẹdade ifiọk oro mmọ ẹkọde ke Ikọ Abasi ẹbọrọ mbụme ke esop, ikọ ọniọn̄ mmọ esisịn udọn̄ ọnọ kpukpru owo ke esop ndisọn̄ọ nda. (1 Tim. 5:17) Ẹdiọn̄ọ ediwak nditọete nnyịn iren ye iban nte mbon oro ẹsitiede ufan ufan ẹsinyụn̄ ẹtuade ekemmọ nditọete mbọm. (Rome 12:15) Ndusụk owo ẹsiwak ndika n̄kese mbon oro ẹfụhọde ẹnyụn̄ ẹbọn̄ akam ye mmọ. (1 Thess. 5:14) Mbon en̄wen ẹsiwet leta nsịnudọn̄ ẹnọ nditọete oro ẹsobode idomo. Mmọ eken ẹsika ẹkemen mbon oro mîkemeke ndisan̄a ẹdi mbono esop. Ata ediwak nditọete nnyịn ẹsitiene ẹbuana ke utom edinọ un̄wam, ẹn̄wam ekemmọ nditọete ndibọp ufọk mmọ oro oyobio okowụride. Kpukpru un̄wam oro nditọete nnyịn iren ye iban ẹnọde kiet eken ye ima mmọ ẹdi “mfọnido Abasi oro owo mîdotke emi ẹwụtde ke nsio nsio usụn̄.”—Kot 1 Peter 4:11.

Ewe Ọfọn Akan?

10. (a) Ewe ye ewe utom Abasi ke Paul akanam? (b) Didie ke nnyịn ikeme ndikpebe Paul mfịn?

¹⁰ Ke adianade ye enọ oro Abasi ọnọde nnyịn ndida n̄n̄wam nditọete nnyịn, Abasi ọnọ nnyịn n̄ko etop ete itan̄a inọ mme owo. Apostle Paul ama owụt ke imọ imọfiọk ke n̄kpọ mbiba emi ẹdi utom Jehovah oro anade imọ inam. Enye ama ewet leta ọnọ esop Ephesus aban̄a “itie akama-ukpọhọde mfọnido Abasi oro owo mîdotke,” oro ẹkenọde imọ man ida in̄wam mmọ. (Eph. 3:2) Enye ama ọdọhọ n̄ko ete: “Abasi [ama odomo] nnyịn okụt ete odot ndiyak eti mbụk nsịn nnyịn ke ubọk.” (1 Thess. 2:4) Ukem nte Paul, nnyịn n̄ko imọfiọk ke Abasi ọnọ nnyịn utom edikwọrọ Obio Ubọn̄ esie. Ke ini isịnde ifịk ikwọrọ ikọ, nnyịn ikpebe Paul oro mîkakpaha mba nte anditan̄a eti mbụk. (Utom 20:20, 21; 1 Cor. 11:1) Nnyịn imọfiọk ke ndikwọrọ eti mbụk Obio Ubọn̄ ekeme ndinyan̄a owo. Nte ededi, nnyịn imodomo n̄ko ndikpebe Paul ke ndifak ifet mbuana “ndusụk enọ eke spirit” ye nditọete nnyịn.—Kot Rome 1:11, 12; 10:13-15.

11. Nnyịn ikpada didie utom ukwọrọikọ ye edin̄wam nditọete nnyịn?

¹¹ Ewe ọfọn akan ke otu utom mbiba emi? Utọ mbụme oro etie nte ndibụp m̀mê mba ewe ọfọn akan ke otu mba iba oro inuen enyenede? Idụhe owo oro mîfiọkke ibọrọ. Inuen ikemeke ndife ọfọn ke mba kiet kpọt, edi esife ke mbiba. Kpasụk ntre, nnyịn inyene ndinam utom mbiba emi man idi ọyọhọ Christian. Mmọdo, utu ke ndikere ke utom edikwọrọ eti mbụk isan̄ake n̄kpọ ye edin̄wam nditọete nnyịn, nnyịn ikpakam ida n̄kpọ mbiba emi nte Peter ye Paul ẹkedade mmọ—nte itai ye aban̄. Didie?

12. Isan̄a didie idi n̄kpọutom Jehovah?

¹² Sia idide mme ọkwọrọ eti mbụk, nnyịn imesida usọ ekededi oro inyenede ikpep mme owo n̄kpọ man etop Obio Ubọn̄ odụk mmọ esịt. Ke inamde oro, nnyịn  iyan̄wam mmọ ẹkabade ẹdi mme mbet Christ. Nte ededi, nnyịn n̄ko imesida ukeme ye mme enọ eken oro inyenede idomo ndisịn udọn̄ nnọ nditọete nnyịn ke ikọ ye ke edinam—kpukpru emi ẹdi mfọnido Abasi oro owo mîdotke. (N̄ke 3:27; 12:25) Ke ini inamde oro, nnyịn iyom mmọ ẹka iso ẹtiene Christ. Ke ini inamde utom mbiba emi—oro edi, ukwọrọikọ ye ‘edisan̄a utom nnọ kiet eken’—oro owụt ke imayak Jehovah ada nnyịn anam utom esie, ndien nso akwa ukpono ke oro edi ntem!—Gal. 6:10.

“Ẹnyene Esịt Ima Ẹnọ Kiet Eken”

13. Nso ikpetịbe edieke itrede ‘ndisan̄a utom nnọ kiet eken’?

¹³ Paul ama esịn udọn̄ ọnọ ekemmọ mme andinịm ke akpanikọ ete: “Ẹda ima nditọete ẹnyene esịt ima ẹnọ kiet eken. Ẹda iso ke ndinọ kiet eken ukpono.” (Rome 12:10) Ke akpanikọ, ima oro imade nditọete nnyịn anam nnyịn inen̄ede isịn idem ke utom nnyịn nte mme akama-ukpọhọde mfọnido Abasi oro owo mîdotke. Nnyịn imọfiọk ke edieke Satan anamde nnyịn itre ‘ndisan̄a utom nnọ kiet eken,’ edidianakiet ididụhe aba ke otu nnyịn. (Col. 3:14) N̄ko edieke edidianakiet mîdụhe, nnyịn idikemeke ndikwọrọ aba ikọ ifịk ifịk. Satan ọfiọk ke n̄kukụre se inyenede ndinam man nnyịn itek ke ifịk edi ndibụn̄ nnyịn mba kiet kpọt, oro edi, ndinam nnyịn itre ndisan̄a utom nnọ kiet eken.

14. Mmanie ẹsibọ ufọn ke ini ‘isan̄ade utom inọ kiet eken’? Nọ uwụtn̄kpọ kiet ise.

¹⁴ ‘Ndisan̄a utom nnọ kiet eken’ anam ufọn ọnọ mbon oro isan̄ade utom inọ ye nnyịn n̄ko. (N̄ke 11:25) Da Ryan ye Roni n̄wan esie ke uwụtn̄kpọ. Mmọ ẹdụn̄ọ ke Illinois ke U.S.A. Ke ini mmọ ẹkekopde ke akamba oyobio oro ẹkotde Katrina ama owụri ufọk ata ediwak nditọete nnyịn, ima nditọete ama anam mmọ ẹsịn n̄wed ẹkpọn̄ utom, ẹwọrọ ke ufọk mmọ, ẹdep akani ufọkisan̄ ẹdiọn̄ eye, ẹmen ẹyịri ke ubomisọn̄ mmọ ẹwat kilomita 1400 ẹka Louisiana. Mmọ ẹma ẹdụn̄ọ ẹbe isua kiet ke Louisiana, ẹsịn idem ẹn̄wam nditọete mmọ do. Ryan emi edide isua 29 ọdọhọ ete: “Nditiene nnọ un̄wam emi anam mi nnen̄ede nsan̄a n̄kpere Jehovah. Mmokụt nte Jehovah esede aban̄a ikọt esie. Ndinam utom ye nditọete oro ẹma ẹkekponi owo enen̄ede anam mfiọk nte  ẹkpesede ẹban̄a nditọete. Emi anam mfiọk n̄ko ke nnyịn emi idide n̄kparawa imenyene ekese ndinam ke esop Jehovah.” Roni n̄wan esie emi edide isua 25 ọdọhọ n̄ko ete: “Enem mi esịt nditiene n̄n̄wam nditọete mi. Akananam esịt inemke mi ntem. Mmọfiọk ke nyaka iso ndia utịp utịbe utịbe ifetutom emi.”

15. Nso inen̄ede inọ nnyịn nsịnudọn̄ ndika iso nnam utom nte mme akama-ukpọhọde mfọnido Abasi oro owo mîdotke?

¹⁵ Ke akpanikọ, ndikwọrọ eti mbụk nnyụn̄ nsan̄a utom nnọ kiet eken nte Abasi etemede esida ufọn ọsọk kpukpru nnyịn. Mbon oro nnyịn in̄wamde ẹsikop nsọn̄idem ke n̄kan̄ eke spirit, nnyịn n̄ko imesinen̄ede ikop inemesịt oro owo ekemede ndikop n̄kukụre ke ini ọnọde owo n̄kpọ. (Utom 20:35) Kpukpru owo ke esop ẹsitie ufan ufan ke ini kpukpru owo ẹnen̄erede ẹkere ẹban̄a kiet eken. Ke adianade do, ima oro imade kiet eken enen̄ede owụt ke nnyịn idi ata mme Christian. Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Akan oro, emi ọnọ Jehovah, kpa edima Ete nnyịn, ubọn̄ ke ini enye okụtde mme asan̄autom esie mi ke isọn̄ nte ẹsọn̄ọde kiet eken idem nte enye oyomde. Emi esịn udọn̄ ọnọ nnyịn didie ntem ndika iso nda enọ nnyịn ‘nsan̄a utom nnọ kiet eken nte nti mme akama-ukpọhọde mfọnido Abasi oro owo mîdotke!’ Ndi ayaka iso anam ntre?—Kot Mme Hebrew 6:10.

Nte Afo Emeti?

• Didie ke Jehovah ọsọn̄ọ mme asan̄autom esie idem?

• Nso ke ẹnọ nnyịn?

• Didie ke nnyịn isisan̄a utom inọ kiet eken?

• Nso idinam nnyịn ika iso ida enọ nnyịn ‘isan̄a utom inọ kiet eken’?

[Mme Mbụme Ukpepn̄kpọ]

[Mme ndise ke page 13]

Ndi ada “enọ” fo anam n̄kpọ ọnọ mbon en̄wen m̀mê ada enem idemfo esịt?

[Mme ndise ke page 15]

Utom nnyịn edi ndikwọrọ eti mbụk nnyụn̄ n̄n̄wam nditọete nnyịn

[Ndise ke page 16]

Odot ẹtoro nditọete oro ẹsikade ẹken̄wam nditọete oro afanikọn̄ esịmde