Sese! Asan̄autom Jehovah Emi Adatde Enye Esịt

“Se owo [m̀mê, asan̄autom] mi, . . . emi adatde mi esịt.”—ISA. 42:1.

1. Ẹdọhọ ikọt Jehovah ẹnam nso, akpan akpan nte Editi asan̄ade ekpere, ndien ntak-a?

NTE ini Editi n̄kpa Christ asan̄ade ekpere, ikọt Abasi ẹkpenyene ndinam item Paul emi: “[Ẹyak iwụk] enyịn ise Jesus, Akpan Isụn̄utom ye Andinam mbuọtidem nnyịn ọfọn ama.” Paul ama adian do ete: “Ke akpanikọ, ẹtịm ẹkere ẹban̄a enye emi ọkọyọde utọ isa isa ikọ oro mme anamidiọk ẹketịn̄de ẹbiọn̄ọ ufọn idemmọ, mbak mbufo ẹdikpa mba ẹnyụn̄ ẹkop mmemidem ke ukpọn̄ mbufo.” (Heb. 12:2, 3) Ndinen̄ede n̄kere mban̄a nte Christ akanamde akpanikọ tutu ayak uwem esie ọnọ, ayanam mme Christian oro ẹyetde aran ye mme erọn̄ en̄wen oro ẹdide nsan̄a mmọ ẹka iso ẹnam akpanikọ ẹnọ Jehovah ye ‘unana edikpa mba.’—Men Galatia 6:9 domo.

2. Nso ke ikeme ndikpep nto mme ntịn̄nnịm ikọ Isaiah oro ẹban̄ade Eyen Abasi?

² Jehovah ama ada prọfet Isaiah etịn̄ ediwak ntịn̄nnịm ikọ aban̄a Eyen esie nnennen nnennen. Ntịn̄nnịm ikọ emi ẹyen̄wam nnyịn iwụk “enyịn ise [Christ] Jesus, Akpan Isụn̄utom ye Andinam mbuọtidem nnyịn ọfọn ama.” * Mmọ ẹnam nnyịn ifiọk utọ owo emi enye ekedide, ndutụhọ oro enye okosobode, ye nte ẹmenerede enye ke enyọn̄ nte Edidem ye Andinyan̄a nnyịn. Kpukpru emi ẹyenam inyene ọyọhọ ifiọk iban̄a Editi oro ẹdinịmde isua emi ke Thursday, April 9, ke utịn ama okosop.

N̄wed Abasi Anam Ifiọk Asan̄autom Oro

3, 4. (a) Ikọ oro, “owo mi” ke n̄wed Isaiah ada aban̄a anie? (b) Didie ke Bible anam ifiọk “Owo,” m̀mê Asan̄autom, oro ẹtịn̄de ẹban̄a ke Isaiah 42, 49, 50, 52, ye 53?

³ Ikọ oro, “owo mi,” m̀mê “owo esie,” emi ọwọrọde ukem n̄kpọ ye “asan̄autom mi,” odu ediwak itie ke n̄wed Isaiah. Ndusụk ini, ikọ emi esida aban̄a prọfet Isaiah ke idemesie. (Isa. 20:3; 44:26) Ndusụk ini, enye ada aban̄a ofụri idụt Israel, m̀mê Jacob. (Isa. 41:8, 9; 44:1, 2, 21) Edi nso kaban̄a mme n̄wọrọnda ntịn̄nnịm ikọ oro ẹban̄ade Owo mi, oro ẹdude ke Isaiah ibuot 42, 49, 50, 52, ye 53? N̄wed Abasi Christian Usem Greek anam ifiọk Owo, m̀mê Asan̄autom Jehovah emi ẹtịn̄de ẹban̄a ke mme itie N̄wed Abasi emi. Ih, owo Ethiopia oro ẹtịn̄de ẹban̄a ke n̄wed Utom okokot kiet ke otu mme ntịn̄nnịm ikọ emi ke ini spirit eketemede Philip ete okosobo ye enye. Owo Ethiopia emi okokot se  idude ke Isaiah 53:7, 8, onyụn̄ obụp Philip ete: “Mbọk, Prọfet etịn̄ emi aban̄a anie? Ndi etịn̄ aban̄a idemesie m̀mê etịn̄ aban̄a owo efen?” Ye unana ubiatini, Philip ama anam enye ọfiọk ke Isaiah eketịn̄ aban̄a Messiah, kpa Jesus.—Utom 8:26-35.

⁴ Ke ini Jesus ekedide nsekeyen, edisana spirit Abasi ama anam edinen owo oro ekerede Simeon ọdọhọ ke “ekpri eyen emi Jesus,” edidi ‘un̄wana oro edifụhọrede ufụhọn̄kpọ ifep ke iso mme idụt’ kpa nte ẹketịn̄de ke Isaiah 42:6 ye 49:6. (Luke 2:25-32) Ke adianade do, Isaiah 50:6-9 ama etetịn̄ nte ẹdisuenede Jesus okoneyo oro ẹdikpede ikpe esie. (Matt. 26:67; Luke 22:63) Ke ẹma ẹkekụre usọrọ Pentecost eke isua 33 E.N., apostle Peter ama ọdọhọ ke Jesus edi “Asan̄autom” Jehovah emi. (Isa. 52:13; 53:11; kot Utom 3:13, 26.) Nso ke ikeme ndikpep nto mme ntịn̄nnịm ikọ oro ẹban̄ade Messiah mi?

Jehovah Ọnọ Asan̄autom Esie Ukpep

5. Anie ekekpep Asan̄autom Abasi n̄kpọ?

⁵ Kiet ke otu ntịn̄nnịm ikọ Isaiah oro ẹban̄ade Asan̄autom Abasi emi anam ifiọk nte ikpọn̄-ikpọn̄ edibon Eyen Abasi ekenen̄erede ekpere Ete esie, Jehovah mbemiso enye ekedide isọn̄. (Kot Isaiah 50:4-9.) Asan̄autom emi ke idemesie ọdọhọ ke Jehovah ekekpep imọ n̄kpọ kpukpru ini, ete: “Eyedemede mi utọn̄ . . . man n̄kop kpa nte mmọ eke ẹkpepde n̄kpọ.” (Isa. 50:4) Ke ofụri ini oro, Asan̄autom Jehovah emi ama esikpan̄ utọn̄ ọnọ Ete esie, ekpep n̄kpọ oto enye, onyụn̄ osụk ibuot. Nso akwa ifet ke enye ekenyene ntem ndidi eyen ukpepn̄kpọ Andibot ekondo!

6. Didie ke Asan̄autom emi okowụt ke imenen̄ede isụk ibuot inọ Ete imọ?

⁶ Ke mme ntịn̄nnịm ikọ emi, Asan̄autom emi okot Ete esie “Ọbọn̄ Jehovah.” Emi owụt ke Asan̄autom emi ọfiọk ke Jehovah edi Ọbọn̄ Andikara ekondo. Enye etịn̄ ikọ oro owụtde ke imenen̄ede isụk ibuot inọ Ete imọ, ete: “Ọbọn̄ Jehovah an̄wan̄ade mi utọn̄, ndien ami nsọn̄ke ibuot: mfiakke edem.” (Isa. 50:5) Enye okodu Jehovah ke n̄kan̄ nte etubom anamutom ke ini ẹkebotde ekondo ye owo. Enye ama ‘adara ke iso Jehovah kpukpru ini: adara aban̄a edem isọn̄ esie emi owo odụn̄de: ndien nditọ owo akadat enye esịt akan.’—N̄ke 8:22-31.

7. Nso iwụt ke Asan̄autom Jehovah emi ama enyene mbuọtidem ke Ete imọ oyodu ye imọ ke ini idomo?

⁷ Ukpep oro Asan̄autom Jehovah ọkọbọde mi ye san̄asan̄a ima oro enye amade ubonowo ama enen̄ede etịm enye idem ọnọ ubiọn̄ọ oro enye okosobode ke isọn̄. Enye ama aka iso anam uduak Ete esie kpa ye ọkpọsọn̄ ukọbọ. (Ps. 40:8; Matt. 26:42; John 6:38) Ke ofụri idomo oro Jesus okosobode ke isọn̄, enye ama ọfiọk ke Ete imọ do ye imọ, ke enye onyụn̄ ama imọ. Kpa nte ntịn̄nnịm ikọ Isaiah eketịn̄de, Jesus ọkọdọhọ ete: “Enye eke akan̄de mi [m̀mê “owụtde ke nduehe,” NW] emekpere; anie editọhọ ye ami? Sese, Ọbọn̄ Jehovah ayanyan̄a mi.” (Isa. 50:8, 9) Ke akpanikọ, Jehovah ama an̄wam anam-akpanikọ Asan̄autom esie emi ke ofụri ini oro enye okodude ke isọn̄, nte ntịn̄nnịm ikọ Isaiah owụtde.

Ke Ini Asan̄autom Emi Okodude ke Isọn̄

8. Nso iwụt ke Jesus ekedi “edimek owo” Jehovah oro ẹketịn̄de ẹban̄a ke Isaiah 42:1?

⁸ Bible etịn̄ se iketịbede ke ini Jesus akanade baptism ke isua 29 E.N., ete: “Edisana spirit osụhọde . . . edidoro enye ke idem, ndien uyo oto ke enyọn̄ ọwọrọ ete: ‘Afo edi edima Eyen mi; mmenyịme fi.’” (Luke 3:21, 22) Jehovah ama anam ẹnen̄ede ẹfiọk “edimek owo” esie oro ntịn̄nnịm ikọ Isaiah eketịn̄de aban̄a. (Kot Isaiah 42:1-7.) Jesus ama osu ntịn̄nnịm ikọ emi ke n̄wọrọnda usụn̄ ke ini enye akanamde utom Abasi ke isọn̄. Matthew ọkọdọhọ ke Gospel esie ete ke Isaiah 42:1-4 aban̄a Jesus.—Matt. 12:15-21.

9, 10. (a) Didie ke Jesus okosu ntịn̄nnịm ikọ Isaiah 42:3 ke ini enye ọkọkwọrọde ikọ ke isọn̄? (b) Didie ke Christ akanam ẹfiọk se inende ke ini enye okodude ke isọn̄, ndien ini ewe ke enye ‘edinam edinen ikpe odu ke ererimbot’?

⁹ Mme adaiso Ido Ukpono Mme Jew ikadaha  mme usụhọde owo ke n̄kpọ ndomokiet. (John 7:47-49) Ẹma ẹnen̄ede ẹfiomo mmọ tutu mmọ ẹkabade ẹtie nte “esan̄ eke anuahade” m̀mê “ọfọn̄ utuenikan̄” oro ekperede ndinịme. Edi Jesus ama atua mme ubuene ye mbon nnama mbọm. (Matt. 9:35, 36) Enye ama ọnọ utọ mbon oro ikot ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu.” (Matt. 11:28) Ke adianade do, Jesus ama anam mmọ ẹfiọk se Jehovah abatde nte edinen ye ukwan̄n̄kpọ. (Isa. 42:3) Enye ama owụt n̄ko ke ẹkpenyene ndida eti ibuot ye mbọm nnịm Ibet Abasi. (Matt. 23:23) Jesus ama onyụn̄ anam se inende ke ndikwọrọ ikọ nnọ imọ ye ubuene ye unana asari.—Matt. 11:5; Luke 18:18-23.

¹⁰ Isaiah ama etịn̄ n̄ko ete ke “edimek owo” Jehovah ‘ayanam edinen ikpe odu ke ererimbot.’ (Isa. 42:4) Ibịghike, enye ayanam emi ke ini enye edidahade ida nte Edidem Obio Ubọn̄ Messiah isobo kpukpru ukara owo inyụn̄ itọn̄ọ edinen ukara esie. Enye ọyọtọn̄ọ obufa ererimbot oro “edinen ido” edidụn̄de.—2 Pet. 3:13; Dan. 2:44.

“Un̄wana” ye “Ediomi”

11. Didie ke Jesus ekedi “un̄wana mme idụt” ke eyo mme apostle ye idahaemi?

¹¹ Jesus ekenen̄ede edi “un̄wana mme idụt” kpa nte Isaiah 42:6 eketịn̄de. Enye akayama ọnọ mme Jew akpan akpan ke ini emi enye ọkọkwọrọde ikọ ke isọn̄. (Matt. 15:24; Utom 3:26) Edi Jesus ọkọdọhọ ete: “Ami ndi un̄wana ererimbot.” (John 8:12) Enye ekedi un̄wana ọnọ mme Jew ye mme idụt ke ndinam mmọ ẹfiọk Abasi nnyụn̄ nnọ mfọnmma uwem esie man ẹda ẹfak ubonowo. (Matt. 20:28) Ke Jesus ama ekeset, enye ama ọdọhọ mbet esie ete ẹdi ntiense imọ “tutu esịm ke ata utịt ikpehe isọn̄.” (Utom 1:8) Ke ini Paul ye Barnabas ẹkekwọrọde ikọ, mmọ mbiba ẹkedọhọ ke utom ukwọrọikọ oro mmimọ ikanamde ke otu mme idụt okosu ntịn̄nnịm ikọ oro aban̄ade “un̄wana mme idụt.” (Utom 13:46-48; men Isaiah 49:6 domo.) Nditọete Jesus oro ẹyetde aran, emi ẹdude ke isọn̄ ye nsan̄a mmọ ke ẹkwọrọ eti mbụk Obio Ubọn̄ ke kpukpru ebiet ẹnyụn̄ ẹn̄wam mme owo ẹnyene mbuọtidem ke Jesus emi edide “un̄wana mme idụt.”

12. Didie ke Jehovah anam Asan̄autom esie etie nte “ediomi mbio-obio”?

¹² Kpa ke ntịn̄nnịm ikọ oro, Jehovah ọkọdọhọ Asan̄autom oro enye emekde ete: “[Nyekpeme] fi, nnyụn̄ nnịm fi ke ediomi mbio-obio.” (Isa. 42:6) Satan ama enen̄ede esịn ukeme ndiwot Jesus mbak enye edikụre utom esie ke isọn̄, edi Jehovah ama ekpeme enye tutu esịm ini emi akanade enye akpa. (Matt. 2:13; John 7:30) Ekem Jehovah ama anam Jesus eset onyụn̄ anam enye etie nte “ediomi,” m̀mê un̄wọn̄ọ, ọnọ mme odụn̄ isọn̄. Un̄wọn̄ọ emi owụt ke anam-akpanikọ Asan̄autom Abasi ayaka iso edi “un̄wana mme idụt,” onyụn̄ osion̄o mbon oro ẹdude ke ekịm eke spirit.—Kot Isaiah 49:8, 9. *

13. Didie ke Jesus okosio “mmọ eke ẹtiede ke ekịm” ke ini enye ọkọkwọrọde ikọ ke isọn̄, ndien didie ke enye anam emi mfịn?

¹³ Un̄wọn̄ọ emi owụt ke Asan̄autom emi  Jehovah emekde ‘ayanam mbon oro enyịn ẹkịmde ẹkụt usụn̄,’ “osio mbon n̄kpọkọbi ke ufọk ukwak,” onyụn̄ “osio mmọ eke ẹtiede ke ekịm.” (Isa. 42:7) Jesus ama anam emi ke ini enye ọkọkwọrọde ikọ ke isọn̄ ke ndiyarade mme nsunsu ido ukpono nnyụn̄ n̄kwọrọ eti mbụk Obio Ubọn̄. (Matt. 15:3; Luke 8:1) Mmọdo, enye ama osio mme Jew oro ẹkekabarede ẹdi mbet esie ke ekịm eke spirit. (John 8:31, 32) Jesus omonyụn̄ osion̄o ediwak miliọn mmọ eken oro mîdịghe mme Jew ke ekịm eke spirit. Enye ọdọn̄ mme anditiene enye ete “ẹka ẹkenam mme owo ke kpukpru idụt ẹdi mbet” imọ, onyụn̄ ọn̄wọn̄ọ ke iyodu ye mmọ “tutu esịm utịt editịm n̄kpọ emi.” (Matt. 28:19, 20) Christ Jesus etie ke heaven ese aban̄a nte ẹkwọrọde ikọ ke ofụri ererimbot.

Jehovah Emenede Asan̄autom Esie ke Enyọn̄

14, 15. Didie ke Jehovah ekemenede Asan̄autom esie ke enyọn̄, ndien ntak-a?

¹⁴ Jehovah ama etịn̄ ke itien̄wed Isaiah en̄wen oro edide ntịn̄nnịm ikọ oro aban̄ade Messiah, kpa Asan̄autom esie, ete: “Sese, owo mi ayanam [n̄kpọ] ọniọn̄ ọniọn̄, oyoforo, oyodoro ke enyọn̄, onyụn̄ okon̄ eti-eti.” (Isa. 52:13) Jehovah ama emenede Eyen esie ke enyọn̄ sia enye okosụkde ibuot ọnọ Ukara Esie, onyụn̄ akade iso anam akpanikọ kpa ye n̄kpọsọn̄ idomo.

¹⁵ Kop se apostle Peter ekewetde aban̄a Jesus mi: “Enye odu ke ubọk nnasia Abasi, koro enye ama ọnyọn̄ aka ke heaven; ẹma ẹnyụn̄ ẹnam mme angel ye mme andikara ye mme enyene-odudu ẹsụk ibuot ẹnọ enye.” (1 Pet. 3:22) Apostle Paul ama onyụn̄ ewet mbiet ikọ oro ete: “Enye osụhọde idem onyụn̄ akabade osụk ibuot tutu osụn̄ọ ke n̄kpa, ih, n̄kpa ke eto ndutụhọ. Ke ntak emi ke Abasi ekemenede enye enịm ke itie emi okon̄de akan onyụn̄ ọnọ enye enyịn̄ oro okon̄de akan kpukpru enyịn̄, man ke enyịn̄ Jesus kpukpru edọn̄ ẹkpetọn̄ọ, mme andidu ke heaven ye mme andidu ke isọn̄ ye mme andidu ke idak isọn̄, kpukpru edeme ẹkpenyụn̄ ẹnyịme an̄wan̄wa ẹte Jesus Christ edi Ọbọn̄, ẹnọ Abasi Ete ubọn̄.”—Phil. 2:8-11.

16. Didie ke ẹkenam Jesus “okon̄ eti-eti” ke 1914, ndien nso ke enye anam tọn̄ọ oro?

¹⁶ Jehovah ama akam emenede Jesus akan  oro ke 1914. Itie esie ama “okon̄ eti-eti” ke ini Jehovah akayaride enye ntinya nte Edidem Obio Ubọn̄ Messiah. (Ps. 2:6; Dan. 7:13, 14) Toto ke ini oro, Christ ama aka iso ada “ubọn̄ ke otu mme asua” esie. (Ps. 110:2) Se enye ekebemde iso anam ekedi ndisio Satan ye mme demon esie nduọn̄ọ ke isọn̄. (Edi. 12:7-12) Ekem, Christ ama anam n̄kpọ nte Akwa Cyrus, ke ndinyan̄a nsụhọ nditọete esie oro ẹyetde aran mi ke isọn̄ nsion̄o ke “Akwa Babylon.” (Edi. 18:2; Isa. 44:28) Enye ada usụn̄ ke utom ukwọrọikọ oro ẹnamde ke ofụri ererimbot. Utom emi anam ẹkeme ndikụt “nsụhọ” nditọete esie eke spirit ye miliọn “mme erọn̄ en̄wen,” emi ẹsọn̄ọde ẹda ẹdiana kiet ye “ekpri otuerọn̄.”—Edi. 12:17; John 10:16; Luke 12:32.

17. Nso ke nnyịn ikpep ke mme ntịn̄nnịm ikọ oro ẹban̄ade Asan̄autom Abasi?

¹⁷ Se ikpepde ke mme n̄wọrọnda ntịn̄nnịm ikọ Isaiah emi ẹnam nnyịn inen̄ede ifiọk n̄kpọ iban̄a Edidem ye Andinyan̄a nnyịn, Christ Jesus. Nte enye okosụkde ibuot ọnọ Ete esie ke ini enye okodude ke isọn̄ owụt utọ ukpep oro Ete ọkọnọde enye mbemiso enye ekedide isọn̄. Ukwọrọikọ esie ye ndausụn̄ oro enye ọnọde mme ọkwọrọ eti mbụk tutu esịm emi ẹwụt ke enye enen̄ede edi “un̄wana mme idụt.” Nte idikụtde ke ibuotikọ oro etienede, ntịn̄nnịm ikọ en̄wen oro aban̄ade Messiah—kpa Asan̄autom Abasi—owụt ke enye oyokụt ukụt onyụn̄ ọnọ uwem esie ke ibuot nnyịn, kpa se nnyịn ikpenyenede ‘nditịm n̄kere mban̄a’ nte Editi n̄kpa esie asan̄ade ekpere.—Heb. 12:2, 3.

[Mme Ikọ Idakisọn̄]

Ndụn̄ọde

• Anie edi “owo mi” oro ẹtịn̄de ẹban̄a ke Isaiah, ndien nnyịn isan̄a didie ifiọk?

• Nso ke Jehovah ekekpep Asan̄autom Esie emi?

• Didie ke Jesus edi “un̄wana mme idụt”?

• Didie ke ẹkemenede Asan̄autom Abasi emi ke enyọn̄?

[Mme Mbụme Ukpepn̄kpọ]

[Ndise ke page 21]

Philip ama etịn̄ in̄wan̄-in̄wan̄ ke “asan̄autom” m̀mê “owo mi” oro Isaiah etịn̄de aban̄a edi Jesus, kpa Messiah

[Ndise ke page 23]

Jesus, emi edide Asan̄autom oro Jehovah emekde ama atua mme ubuene ye mbon nnama mbọm

[Ndise ke page 24]

Jehovah ama emenede Jesus ke enyọn̄ onyụn̄ ayari enye ntinya nte Edidem Obio Ubọn̄ Messiah