Ọyọhọ Otu 125 Ẹkụre Ukpep Ke Gilead

Ẹsịn Udọn̄ Ẹnọ Mme Isụn̄utom Ẹte Ẹbiet Jeremiah

GEOFFREY JACKSON emi edide owo Otu Ukara ọkọdọhọ ke “otu nditọ ufọkn̄wed Gilead enye emi edi n̄wọrọnda.” Enye eketịn̄ emi ọnọ owo 6,156 emi ẹkedụkde edinam ukụre ukpep ọyọhọ otu 125 ke Ufọkn̄wed Enyọn̄-Ukpeme Ukpep Bible eke Gilead oro ẹkenịmde ke September 13, 2008. Se ibede mme isụn̄utom 8,000, ẹsịnede owo 56 oro ẹsụk ẹkụrede ukpep mi, ẹkụre ukpep ke Gilead ẹkenam utom isụn̄utom “ke ata utịt ikpehe isọn̄”!—Utom 1:8.

Brọda Jackson, emi ekedide etieibuot okpokoro edinam oro ama ọdọhọ mme andikụre ukpep emi ete, “Mme owo ẹma ẹnịm mbufo ke akpanikọ, oro ayanam mme owo ẹnen̄ede ẹkpan̄ utọn̄ ẹnọ mbufo.” Ekem enye asiak n̄kpọ inan̄ oro ẹkemede ndinam ẹnịm mmọ ke akpanikọ: akpa, ndinyene eti edu, ọyọhọ iba, ndinịm eti uwụtn̄kpọ, ọyọhọ ita, ndida se ẹkpepde nto Ikọ Abasi, akpatre, ndinam mme owo ẹdiọn̄ọ enyịn̄ Jehovah.

David Schafer emi anamde utom ye Kọmiti Unọ Ukpep ama eneme ibuotikọ emi: “Ndi Ọyọfiọk Kpukpru N̄kpọ?” Enye ama ọdọhọ mme ndikụre ukpep Gilead emi ete ke okposụkedi mmọ mîdifiọkke kpukpru usem ye ido obio ke ebiet oro mmọ ẹdikade, ke mmọ ẹyefiọk kpukpru se akpanade isụn̄utom ọfiọk edieke mmọ ẹkade iso ẹyom Jehovah ẹnyụn̄ ẹsụhọrede idem ẹtiene ndausụn̄ “ofụn emi anamde akpanikọ onyụn̄ enyenede ọniọn̄.”—N̄ke 28:5; Matt. 24:45.

Ekem John E. Barr emi edide owo Otu Ukara ama ọnọ utịn̄ikọ ke ibuotikọ emi, “Ẹkûyak N̄kpọ Ndomokiet Adian̄ade Mbufo ke Ima Abasi.” Brọda Barr ọkọnọ mme andikụre ukpep emi ye mme ete ye eka mmọ item nte edima ete ọnọ nditọ esie item, ndien utịn̄ikọ esie ama anam idem inyekke aba mmọ iban̄a obufa utom emi. Enye ọkọdọhọ ete, “Ndidu uwem oro edinamde Abasi aka iso ama nnyịn enen̄ede ekpeme nnyịn, idụhe se ifọnde ntre.” N̄kpọ ndomokiet ikemeke ndidian̄ade mme isụn̄utom emi ke ima Abasi ibọhọke mmọ ke idem mmọ ẹmek ndidian̄ade n̄kpọn̄ Abasi.

Sam Roberson oro esinamde utom ke Itieutom Emi Esede Aban̄a Mme Ufọkn̄wed Ukara Abasi ama esịn udọn̄ ọnọ otuowo ndimen “ata eti ekụra” nsịne. Enye ọkọdọhọ ke edieke mme andikụre ukpep emi ẹkpepde nte Jesus ekesinamde n̄kpọ, ẹnyụn̄ ẹdade se enye ekekpepde ẹsịn ke edinam, oro ọwọrọ ke mmọ “ẹmen Ọbọn̄ Jesus Christ ẹsịne.” (Rome 13:14) Ke enye ama okokụre, William Samuelson, esenyịn Itieutom Emi Esede Aban̄a Mme Ufọkn̄wed Ukara Abasi, ama eneme mme n̄kpọ oro anamde owo odot ukpono. Idịghe nte mme owo ẹsede owo anam owo odot ukpono, akam edi nte Abasi esede.

Michael Burnett, kiet ke otu mme andikpep, ama ọdọhọ mme andikụre ukpep emi ẹbụk ifiọkutom oro mmọ ẹkenyenede ke ini mmọ ẹkekwọrọde ikọ ke n̄kann̄kụk oro. Okposụkedi emi ediwak nditọ ufọkn̄wed emi ẹkekwọrọde ikọ ke efakutom oro ẹsikwọrọde ikọ ndien ndien, mmọ ẹkesụk ẹsosobo mbon oro ẹnyenede udọn̄. Gerald Grizzle emi anamde utom ye Itieutom Utịm Mbono ama anam ndụn̄ọde ye nditọete iren ita oro ẹkedụkde Ufọkn̄wed Mme Andibuana ke Kọmiti N̄kọk Itieutom. Se mmọ ẹketịn̄de ama eben̄e mbufa isụn̄utom emi idem ọnọ se mmọ ẹdikụtde ke obufa efakutom mmọ.

David Splane, owo Otu Ukara emi okodụkde  ọyọhọ otu 42 ke Ufọkn̄wed Gilead emi ama ọnọ utịn̄ikọ ke ibuotikọ emi, “Ẹbiet Jeremiah.” Okposụkedi utom emi Jehovah ọkọdọn̄de Jeremiah ekenyekde enye idem, Jehovah ama ọdọhọ enye okûfehe. (Jer. 1:7, 8) Abasi oyonyụn̄ ọsọn̄ọ mbufa isụn̄utom emi idem. Brọda Splane ama aka iso ọdọhọ ete, “Edieke enyenede mfịna ye owo, sụhọde tetie nyụn̄ wet n̄kpọ duop emi afo enen̄erede ama aban̄a owo emi. Ndien edieke mûkemeke ndiwet nyọhọ n̄kpọ duop, oro ọwọrọ ke unen̄ekede ufiọk enye.”

Jeremiah ama enyene edu n̄waidem. Ke ini enye okoyomde nditre utom emi Jehovah ọkọdọn̄de enye, enye ama ọbọn̄ akam, ndien Jehovah ama ọsọn̄ọ enye idem. (Jer. 20:11) Brọda Splane ọkọdọhọ mmọ ete, “Edieke okopde mmemidem, tịn̄ nnọ Jehovah. Ndien idem ayakpa fi aban̄a un̄wam oro enye edinọde fi.”

Ke utịt edinam emi, etieibuot okpokoro ama eti otuowo ke mme andikụre ukpep emi ẹkpep ediwak usụn̄ oro mmọ ẹdinamde n̄kpọ man mme owo ẹnịm mmọ ke akpanikọ. Ke ini mme owo ẹnịmde mme isụn̄utom emi ke akpanikọ, oro ayanam ẹnen̄ede ẹkpan̄ utọn̄ ẹnọ mmọ.—Isa. 43:8-12.

[Ekebe ke page 22]

IDAHA OTU

Ibat idụt oro ẹtode: 6

Ibat idụt oro ẹnọde ẹka: 21

Ibat nditọ ufọkn̄wed: 56

Isua emana ke ẹbaharede ukem ukem: 32.9

Isua oro ẹdude ke akpanikọ ke ẹbaharede ukem ukem: 17.4

Isua oro ẹdude ke utom uyọhọ ini ke ẹbaharede ukem ukem: 13

[Ekebe ke page 23]

Ọyọhọ Otu 125 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.