Ikọ Jesus Owụt Se Inọde Owo Inemesịt
Ikọ Jesus Owụt Se Inọde Owo Inemesịt
“[Jesus] ọdọk ke obot; ndien . . . mbet esie ẹdi ẹbịne enye; ndien enye . . . ọtọn̄ọ ndikpep mmọ n̄kpọ.”—MATT. 5:1, 2.
1, 2. (a) Bụk se iketịbede ke ini Jesus ọkọkwọrọde ikọ ke Obot. (b) Didie ke Jesus ọkọtọn̄ọ ukwọrọikọ esie?
N̄KPỌ emi etịbe ke isua 31 E.N. Jesus osụk ọkwọrọ ikọ ke Galilee, edi adaha kan̄a ete ikodụk Usọrọ Passover ke Jerusalem. (John 5:1) Ke ama ọkọnyọn̄ edi Galilee, enye ada ofụri okoneyo ọbọn̄ akam eben̄e ndausụn̄ Abasi mbemiso emekde mme apostle esie 12. Otuowo ẹkan enye ẹkụk ke ndan̄nsiere nte enye ọkọkde mme owo udọn̄ọ. Mbet esie do n̄ko, enye adaha ọdọk obot, osụhọde etetie, onyụn̄ ọtọn̄ọ ndikpep mme owo n̄kpọ.—Matt. 4:23 esịm 5:2; Luke 6:12-19.
2 Jesus ọtọn̄ọ ukwọrọikọ ke Obot oro ke ndinam mme owo ẹfiọk ke ndinyene eti itie ebuana ye Abasi ọnọ owo inemesịt. (Kot Matthew 5:1-12.) Inemesịt ọwọrọ ‘ndikop idem inem, n̄kop uyụhọ, nnyụn̄ ndara.’ Jesus ama asiak n̄kpọ usụkkiet oro anamde ifiọk ntak emi mme Christian ẹkopde inemesịt, ndien mme n̄kpọ emi ke ẹnọnọ owo inemesịt mfịn nte ẹkenọde ke n̄kpọ nte isua 2,000 oro ẹbede. Ẹyak ineme mmọ kiet kiet.
“Mmọ Oro Ẹkerede Ẹban̄a Unana Mmọ ke N̄kan̄ Eke Spirit”
3. Nso ke ndikere mban̄a unana nnyịn ke n̄kan̄ eke spirit ọwọrọ?
3 “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit, koro obio ubọn̄ heaven enyenede mmọ.” (Matt. 5:3) “Mmọ oro ẹkerede ẹban̄a unana mmọ” ẹfiọk ke mmimọ idi ubuene ke n̄kan̄ eke spirit, ntre ke imoyom ndausụn̄ ye mfọn Abasi.
4, 5. (a) Ntak emi mbon oro ẹkerede ẹban̄a unana mmọ ke n̄kan̄ eke spirit ẹkopde inemesịt? (b) Nso ke ikpanam man iyụhọ ke n̄kan̄ eke spirit?
4 Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt “koro obio ubọn̄ heaven enyenede mmọ.” Mme akpa mbet Jesus ẹma ẹnyịme ke Jesus edi Messiah, ndien emi ama eberede ifet ọnọ mmọ nditiene enye n̄kara ke Obio Ubọn̄ Abasi ke heaven. (Luke 22:28-30) Edide nnyịn idori enyịn ndikara ye Christ ke heaven, m̀mê idori enyịn ndidu nsinsi uwem ke Paradise mi ke isọn̄ ke idak Obio Ubọn̄ oro, nnyịn iyokop inemesịt edieke inen̄erede ikere iban̄a unana nnyịn ke n̄kan̄ eke spirit, oro edi, edieke inen̄erede ifiọk ke imoyom ndausụn̄ Abasi.
5 Idịghe kpukpru owo ẹfiọk ke imanana n̄kpọ ke n̄kan̄ eke spirit, sia ediwak owo inyeneke mbuọtidem ke Abasi, inyụn̄ imaha mme n̄kpọ eke spirit, m̀mê ndisana n̄kpọ. (2 Thess. 3:1, 2; Heb. 12:16) Iyoyụhọ ke n̄kan̄ eke spirit edieke isịnde idem ikpep Bible, isịn ifịk ke utom edinam mbet, inyụn̄ idụk mme mbono esop kpukpru ini.—Matt. 28:19, 20; Heb. 10:23-25.
Mbon Mfụhọ Oro Ẹkopde “Inemesịt”
6. Mmanie ẹdi “mmọ oro ẹfụhọde,” ndien ntak emi mmọ ẹkopde “inemesịt-e”?
6 “Inemesịt edi eke mmọ oro ẹfụhọde, koro ẹyedọn̄ mmọ esịt.” (Matt. 5:4) “Mmọ oro ẹfụhọde,” kpa mmọ ẹdi mbon oro “ẹkerede ẹban̄a unana mmọ ke n̄kan̄ eke spirit.” Idịghe afanikọn̄ ererimbot emi anam mmọ ẹfụhọ. Edi mmọ ẹfụhọ ẹban̄a idaha mmọ nte mme anamidiọk ye ke ntak unana mfọnmma. Ntak emi mmọ ẹkopde ‘inemesịt-e’? Sia mmọ ẹbuọt idem ke Abasi ye Christ. Eti itie ebuana oro mmọ ẹnyenede ye Jehovah onyụn̄ ọdọn̄ mmọ esịt.—John 3:36.
7. Didie ke ikpada ererimbot Satan?
7 Ndi nnyịn owo kiet kiet imesifụhọ iban̄a ukwan̄ido oro ẹyọhọde ererimbot Satan? Nnyịn ida didie se idude ke ererimbot emi? Apostle John ekewet ete: “Kpukpru se idude ke ererimbot—mbumek obụkidem ye mbumek enyịn ye n̄wụtidem ke n̄kpọ eke owo adade odu uwem—itọn̄ọke ito Ete.” (1 John 2:16) Edi nso ke ikpanam edieke ikụtde ke “spirit ererimbot” emi—oro edi, edu oro adianarede mme owo ọkpọn̄ Abasi, ọtọn̄ọ ndidia nnyịn idem? Akpana ibọn̄ akam ke ofụri esịt, ikpep Ikọ Abasi, inyụn̄ iyom un̄wam ito mbiowo. Nte isan̄ade ikpere Jehovah, nnyịn ‘iyokop ndọn̄esịt,’ inamke n̄kpọ m̀mê nso afanikọn̄ ke isobo.—1 Cor. 2:12; Ps. 119:52; Jas. 5:14, 15.
Se Inamde “Mme Enyene Ifụre Ifụre Ido” Ẹkop Inemesịt
8, 9. Nso ke ndinyene ifụre ifụre ido ọwọrọ, ndien ntak emi utọ mbon oro ẹkopde inemesịt-e?
8 “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matt. 5:5) “Ifụre ifụre ido,” m̀mê nsụhọde esịt idịghe nditie nte mbe, m̀mê owo ndisan̄a nte imọ isisioroke uyo. (1 Tim. 6:11) Edieke inyenede ifụre ifụre ido, nnyịn iyosụhọde idem inam uduak Jehovah inyụn̄ itiene ndausụn̄ esie. Nnyịn idinyụn̄ inam n̄kpọ ifụre ifụre ye nditọete nnyịn ọkọrọ ye mbon en̄wen. Utọ sụn̄sụn̄ ido oro ekekem ye item oro apostle Paul ọkọnọde.—Kot Rome 12:17-19.
9 Ntak emi mme enyene ifụre ifụre ido ẹkopde inemesịt-e? Jesus emi enyenede ifụre ifụre ido ọdọhọ ke mmọ ẹkop inemesịt koro “mmọ ẹyeda isọn̄ ẹnyene.” Jesus edi Akpan owo emi adade isọn̄ enyene. (Ps. 2:8; Matt. 11:29; Heb. 2:8, 9) Nte ededi, mme enyene ifụre ifụre ido oro ‘ẹtienede Christ ẹnyene udeme’ ke Obio Ubọn̄ Abasi, ẹtiene ẹda isọn̄ ẹnyene n̄ko. (Rome 8:16, 17) Ediwak mbon eken oro ẹnyenede ifụre ifụre ido ẹdidu ke isọn̄ ke nsinsi ke idak Obio Ubọn̄ Jesus.—Ps. 37:10, 11.
10. Didie ke nditre ndinyene ifụre ifụre ido ekeme nditụk ifetutom nnyịn ye itie ebuana nnyịn ye mme owo?
10 Akpana nnyịn inyene ifụre ifụre ido nte Jesus. Edi nso ke ikpanam edieke esịt esisọpde ayat nnyịn? Mme owo isikemeke ndisan̄a n̄kpere owo iyatesịt. Utọ edu emi idinyụn̄ iyakke nditọete iren ẹdot ndinyene ifetutom ke esop. (1 Tim. 3:1, 3) Paul ọkọdọhọ Titus ete aka iso eti mme Christian ke Crete ete “ẹkûdi mbon utọk, ẹnyene eti ibuot, ẹnyene ifụre ifụre ido ye kpukpru owo.” (Titus 3:1, 2) Utọ mbon oro ẹsinen̄ede ẹnem itie.
Mmọ Ẹkop Biọn̄ “Edinen Ido”
11-13. (a) Nso ke ndikop biọn̄ ye nsatitọn̄ edinen ido ọwọrọ? (b) Didie ke mmọ oro ẹkopde biọn̄ ye nsatitọn̄ edinen ido ‘ẹyụhọ’?
11 “Inemesịt edi eke mmọ oro ẹkopde biọn̄ ye nsatitọn̄ edinen ido, koro mmọ ẹyeyụhọ.” (Matt. 5:6) “Edinen ido” oro Jesus etịn̄de aban̄a mi edi ndinam se inende nte ekemde ye uduak ye ewụhọ Abasi. Andiwet psalm ọkọdọhọ ke edinen ikpe Abasi enen̄ede ‘ọdọn̄ imọ.’ (Ps. 119:20) Ndi imenen̄ede ima se inende tutu enye edidọdọn̄ nnyịn nte udia ye mmọn̄?
12 Jesus ọkọdọhọ ke mbon oro ẹkopde biọn̄ ye nsatitọn̄ edinen ido ẹyekop inemesịt koro “mmọ ẹyeyụhọ.” Ke Pentecost eke isua 33 E.N. ama ekebe, mbon emi ẹkekopde biọn̄ ye nsatitọn̄ edinen ido ẹma ẹyụhọ, sia ini oro ke edisana spirit Jehovah ọkọtọn̄ọ ‘ndiyarade se edinen ido edide nnọ ererimbot.’ (John 16:8) Abasi ama ọnọ mme owo edisana spirit esie onyụn̄ anam mmọ ẹwet N̄wed Abasi Christian Usem Greek, emi ọfọnde ndida “nnọ ntụnọ ke edinen ido.” (2 Tim. 3:16) Spirit Abasi anam nnyịn ikeme ndimen “obufa owo [nsịne] emi ẹkebotde nte ekemde ye uduak Abasi ke ata edinen ido.” (Eph. 4:24) Ndi idịghe n̄kpọ ndọn̄esịt ndifiọk ke Abasi ada mbon oro ẹkabarede esịt ẹyom ẹfen ẹnọ mmimọ ke isọn̄ uwa ufak Jesus nte ndinen owo?—Kot Rome 3:23, 24.
13 Edieke inyenede idotenyịn ndidu uwem mi ke isọn̄, inyụn̄ ikopde biọn̄ ye nsatitọn̄ edinen ido, iyenen̄ede iyụhọ ke ini ididude nsinsi uwem ke edinen ererimbot. Edi mbemiso ini oro, ẹyak ibiere ndidu uwem ekekem ye mme edumbet Jehovah. Jesus ọkọdọhọ ete: ‘Ẹbem iso ẹyom obio ubọn̄ ye edinen ido’ Abasi. (Matt. 6:33) Ndinam oro ayanam nnyịn ika iso inam nti utom, emi oyonyụn̄ enen̄ede adat nnyịn esịt.—1 Cor. 15:58.
Se Inamde “Mme Atua Owo Mbọm” Ẹkop Inemesịt
14, 15. Didie ke ikeme nditua owo mbọm, ndien ntak emi “mme atua owo mbọm” ẹkopde inemesịt-e?
14 “Inemesịt edi eke mme atua owo mbọm, koro ẹyetua mmọ mbọm.” (Matt. 5:7) Mbọm esinam mme owo ẹnyan̄a mbon oro ẹbọde ufen. Mbọm okonyụn̄ anam Jesus anyan̄a ediwak mbon oro ẹkebọde ufen. (Matt. 14:14) Mbọm esinam owo efen ọnọ owo oro eduede enye, kpa nte mbọm esinamde Jehovah efen ọnọ mbon oro ẹkabarede esịt. (Ex. 34:6, 7; Ps. 103:10) Mbọm ekeme ndinam nnyịn n̄ko ifen inọ mme owo, itịn̄ ndinem ikọ ye mmọ, inyụn̄ in̄wam mme ubuene. Eti usụn̄ oro ikemede nditua mme owo mbọm edi ndikpep mmọ Bible. Mbọm otuowo ama anam Jesus “ọtọn̄ọ ndikpep mmọ ediwak n̄kpọ.”—Mark 6:34.
15 Oro anam nnyịn inyịme ikọ Jesus emi: “Inemesịt edi eke mme atua owo mbọm, koro ẹyetua mmọ mbọm.” Edieke isituade mme owo mbọm, mmọ n̄ko iditreke nditua nnyịn mbọm. Nditua owo mbọm ekeme n̄ko ndinam Abasi atua nnyịn mbọm ke ini enye edibierede ikpe ọnọ ererimbot. (Jas. 2:13) Mbon oro ẹsituade owo mbọm kpọt ke ẹdifen ẹnọ; mmọ n̄ko ke ẹdinyụn̄ ẹnọ nsinsi uwem.—Matt. 6:15.
Ntak Emi “Mmọ Oro Esịt Asanade” Ẹkopde Inemesịt
16. Nso ke ‘esịt owo ndisana’ ọwọrọ, ndien didie ke mbon oro ẹnyenede edisana esịt ‘ẹkụt Abasi’?
16 “Inemesịt edi eke mmọ oro esịt asanade, koro mmọ ẹyekụt Abasi.” (Matt. 5:8) Edieke ‘esịt nnyịn asanade,’ se nnyịn imade inyụn̄ ikerede oyowụt emi. Nnyịn iyonyụn̄ inyene “ima eke otode ke edisana esịt.” (1 Tim. 1:5) Esịt nnyịn ama asana, nnyịn ‘iyokụt Abasi.’ Emi iwọrọke ke iyokụt Jehovah ke ata enyịn, ‘koro owo ndomokiet ikemeke ndikụt Abasi iso ndu uwem.’ (Ex. 33:20) Sia Jesus ekenen̄erede anam n̄kpọ nte Ete esie, enye ama ọdọhọ ete: “Owo eke okụtde mi okụt Ete n̄ko.” (John 14:7-9) Nnyịn emi ituakde ibuot inọ Jehovah mi ke isọn̄ imekeme ‘ndikụt Abasi’ ke ini itịn̄de enyịn ise se enye anamde ọnọ nnyịn. (Job 42:5) Mme Christian oro ẹyetde aran ẹyenen̄ede ẹkụt Abasi iso ye iso ke ini ẹdinamde mmọ ẹset ẹkedu uwem ke heaven.—1 John 3:2.
17. Nso ke mbon oro esịt asanade mîdinamke?
17 Mbon oro esịt asanade isitiehe ikere ndiọi n̄kpọ oro Jehovah mîmaha. (1 Chron. 28:9; Isa. 52:11) Edieke esịt nnyịn asanade, nnyịn ididehedei itịn̄ ndedehe ikọ m̀mê ndinam mbubiam n̄kpọ ekededi, mbubịk ndomokiet idinyụn̄ idụhe ke utuakibuot nnyịn.
“Mme Anam Emem” Ẹdi Nditọ Abasi
18, 19. Didie ke “mme anam emem” ẹsinam n̄kpọ?
18 “Inemesịt edi eke mme anam emem, koro ẹyekot mmọ ‘nditọ Abasi.’” (Matt. 5:9) Nnyịn imọdiọn̄ọ se ‘anam emem’ akpanamde ye se enye mîkpanamke. Edieke nnyịn idide mme anam emem, nnyịn “[ididaha] idiọk isio owo ekededi usiene idiọk.” Utu ke oro, ‘idinam se ifọnde ye kpukpru owo.’—1 Thess. 5:15.
19 Man idi mme anam emem, ana idomo ofụri ukeme ndinam emem odu. Mme anam emem isinamke n̄kpọ oro ‘edidianarede mme ufan.’ (N̄ke 16:28) Nte mme anam emem, ana inam n̄kpọ man “[idu ke] emem ye kpukpru owo.”—Heb. 12:14.
20. Mmanie ẹdi “nditọ Abasi” idahaemi, ndien mmanie efen ẹdidi nditọ Abasi ke ini iso?
20 Mme anam emem ẹkop inemesịt koro “ẹyekot mmọ ‘nditọ Abasi.’” Jehovah ada mme anam-akpanikọ Christian oro ẹyetde aran obon nte nditọ, ntak edi oro ẹkotde mmọ “nditọ Abasi.” Mmọ ẹnen̄ede ẹkpere Jehovah idem nte nditọ esie sia mmọ ẹbuọt idem ke Christ ẹnyụn̄ ẹtuak ibuot ẹnọ “Abasi ima ye emem” ke ofụri esịt. (2 Cor. 13:11; John 1:12) Nso kaban̄a “mme erọn̄ en̄wen” oro Jesus enyenede, emi ẹsụk ẹdide mme anam emem? Jesus edidi “Nsinsi Ete” mmọ ke ini enye edikarade ke tọsịn isua, edi ke oro ebede, Jesus ke idemesie oyosụk idem ọnọ Jehovah, ndien mme erọn̄ en̄wen emi ẹyekabade ẹdi ata nditọ Abasi.—John 10:16; Isa. 9:6; Rome 8:21; 1 Cor. 15:27, 28.
21. Nnyịn idinam n̄kpọ didie edieke “idude uwem ke spirit”?
21 Edieke nnyịn “idude uwem ke spirit,” mme owo ẹyekụt ke nnyịn idi mme anam emem. Nnyịn ‘idimiaha mbuba ye kiet eken’ m̀mê ‘ndiyat kiet eken esịt.’ (Gal. 5:22-26; Edisana Ŋwed Abasi Ibom) Utu ke oro, nnyịn iyodomo ukeme “ndidu ke emem ye kpukpru owo.”—Rome 12:18.
Ẹkop Inemesịt kpa ye Ukọbọ!
22-24. (a) Nso inam mbon oro ẹkọbọde ke ntak edinen ido ẹkop idatesịt? (b) Nso ke nnyịn idineme ke mme ibuotikọ ukpepn̄kpọ iba emi ẹtienede?
22 “Inemesịt edi eke mmọ oro ẹkọbọde ke ntak edinen ido, koro obio ubọn̄ heaven enyenede mmọ.” (Matt. 5:10) Jesus ama adian do ete: “Inemesịt edi eke mbufo ke ini mme owo ẹsụn̄ide mbufo ẹnyụn̄ ẹkọbọde mbufo ẹnyụn̄ ẹtịn̄de kpukpru orụk idiọkn̄kpọ ke nsu ẹdian mbufo ke ntak enyịn̄ mi. Ẹdara ẹnyụn̄ ẹfrọ ke idatesịt, koro utịp mbufo ke heaven omokpon; koro kpa ntem ke mmọ ẹkekọbọ mme prọfet emi ẹkebemde mbufo iso ẹdu.”—Matt. 5:11, 12.
23 Mme Christian ẹdiọn̄ọ ke ẹyesụn̄i, ẹkọbọ, ẹnyụn̄ ẹsu nsu ẹdori mmimọ ke “ntak edinen ido,” kpa nte ẹkenamde ye mme prọfet Abasi ke eset. Edi edieke nnyịn iyọde kpukpru emi, nnyịn iyokop inemesịt sia imọfiọk ke imanam se inemde Jehovah esịt inyụn̄ inọ enye ukpono. (1 Pet. 2:19-21) Ndutụhọ ekededi oro nnyịn isobode ikemeke ndibiat idatesịt oro utom Jehovah ọnọde nnyịn idahaemi m̀mê ke ini iso. Idinyụn̄ ikemeke ndibiat idatesịt mbon oro ẹdikarade ye Christ ke Obio Ubọn̄ heaven m̀mê eke mbon oro ẹdidude nsinsi uwem mi ke isọn̄. Kpukpru emi ẹwụt nte Abasi ọfọnde ido onyụn̄ atatde ubọk ọnọ nnyịn n̄kpọ.
24 Ediwak n̄kpọ en̄wen ẹdu oro ikemede ndikpep nto Ukwọrọikọ Jesus Oro ke Obot. Ibuotikọ ukpepn̄kpọ iba emi ẹtienede ẹneme nsio nsio n̄kpọ en̄wen oro ikemede ndikpep ke ukwọrọikọ oro. Ẹyak ise nte ikemede ndinam se Jesus Christ ekekpepde emi.
Didie ke Afo Ọkpọbọrọ?
• Ntak emi “mmọ oro ẹkerede ẹban̄a unana mmọ ke n̄kan̄ eke spirit” ẹkopde inemesịt?
• Ntak emi “mme enyene ifụre ifụre ido” ẹkopde inemesịt?
• Ntak emi mme Christian ẹkopde inemesịt kpa ye oro ẹkọbọde mmọ?
• Ewe ke afo ama akan ke otu mme n̄kpọ oro Jesus ọkọdọhọ nte anamde owo okop inemesịt?
[Mme Mbụme Ukpepn̄kpọ]
[Ndise ke page 7]
N̄kpọ usụkkiet oro Jesus eketịn̄de aban̄a ke ọnọnọ mme owo inemesịt mfịn kpa nte ọkọnọde ini oro
[Ndise ke page 8]
Eti usụn̄ nditua mme owo mbọm edi ndikpep mmọ Ikọ Abasi