Ikọ Jehovah Enyene Uwem

Mme Akpan N̄kpọ Oro Ẹtode N̄wed Ediyarade—II

NSO iditịbe inọ mbon oro ẹtuakde ibuot ẹnọ Jehovah Abasi ye mbon oro mîtuakke? Nso iditịbe inọ Satan ye mme demon esie? Didie ke ẹdidiọn̄ nti owo ke Tọsịn Isua Ukara Christ? N̄wed Ediyarade 13:1 esịm 22:21 ọbọrọ mme mbụme emi ye mme akpan mbụme en̄wen. * Mme ufan̄ikọ Bible emi ẹneme mme akpatre n̄kukụt usụkkiet ke otu n̄kukụt 16 oro apostle John okokụtde ke utịt akpa isua ikie E.N.

John ewet ete: “Inemesịt edi eke enye emi okotde ye mmọ emi ẹkopde ntịn̄nnịm ikọ emi, ẹnyụn̄ ẹnịmde mme n̄kpọ eke ẹwetde ke esịt.” (Edi. 1:3; 22:7) Edieke ikotde inyụn̄ inamde mme item oro ẹdude ke n̄wed Ediyarade, oro eyenen̄ede otụk nte nnyịn ikponode Abasi, ayanam idọdiọn̄ ibuọt idem ke Abasi ye Jesus Christ Eyen esie, onyụn̄ anam inen̄ede idori enyịn ke ini iso. *—Heb. 4:12.

ẸN̄WAN̄A USAN IYATESỊT ABASI ITIABA ẸDUỌK

(Edi. 13:1 esịm 16:21)

Ediyarade 11:18 ọdọhọ ete: ‘Mme idụt ẹkeyat esịt, ndien iyatesịt Abasi ama edi, ye edikem ini oro ẹdisobode mmọ oro ẹsobode isọn̄.’ Ọyọhọ n̄kukụt itiaita owụt se ‘idiọk unam oro enyenede nnụk duop ye ibuot itiaba’ anamde, emi anamde Abasi ayat esịt.—Edi. 13:1.

Ke ọyọhọ n̄kukụt usụkkiet, John okụt ‘eyenerọn̄ adade ke Obot Zion ye owo tọsịn ikie ye aba-ye-inan̄ oro ẹkefakde ẹsio ke otu owo.’ (Edi. 14:1, 4) Ekem enye okụt mme angel ẹnọde ntọt. N̄kukụt efen oro John okokụtde ekedi “angel itiaba emi ẹkamade ufen itiaba.” Etie nte Jehovah ke idemesie ọdọhọ mme angel emi “ẹken̄wan̄a usan iyatesịt Abasi itiaba oro ẹduọk” ke nsio nsio ikpehe ererimbot Satan emi. Ntọt ubiereikpe Abasi ẹdọn̄ọ ke mme usan emi. (Edi. 15:1; 16:1) N̄kukụt iba emi ẹnam ifiọk n̄kpọ efen iban̄a ubiereikpe Abasi oro enyenede ebuana ye ọyọhọ nnama ita ye ọyọhọ ukotowo itiaba oro ẹfride.—Edi. 11:14, 15.

Mme Mbụme N̄wed Abasi Oro Ẹbọrọde:

13:8—Nso idi “n̄wed uwem Eyenerọn̄”? N̄wed emi edi ndamban̄a n̄wed oro ẹwetde sụk enyịn̄ mbon oro ẹkarade ye Jesus Christ ke Obio Ubọn̄ heaven. Enye n̄ko esịne enyịn̄ mme Christian oro ẹyetde aran oro ẹsụk ẹdude mi ke isọn̄, emi ẹdoride enyịn ndika heaven.

13:11-13—Didie ke idiọk unam oro enyenede nnụk iba anam n̄kpọ nte dragon onyụn̄ anam ikan̄ oto ke enyọn̄ osụhọde? Idiọk unam oro enyenede nnụk iba—oro edi, Ukara Ererimbot eke Britain ye America—etịn̄ ikọ nte dragon, ndien emi owụt ke enye enyenyịk mme owo ẹsụk ibuot ẹnọ ukara esie. Ndidọhọ ke enye anam ikan̄ oto enyọn̄ osụhọde ọwọrọ ke enye anam nte idi prọfet, ke imọ iketre ekọn̄ ererimbot iba oro ẹken̄wanade ke 1914 esịm 1918 ye eke 1939 esịm 1945; ke ima inyụn̄ ikan Ukara Mbon Communist.

16:17—Nso ke “ofụm” oro ẹken̄wan̄ade ọyọhọ usan itiaba ẹduọk ada aban̄a? “Ofụm” oro ada aban̄a idiọk udọn̄, “kpa spirit  oro anamde utom ke emi ke esịt nditọ ntụtutọn̄.” Kpukpru mbon oro ẹdide ubak idiọk ererimbot Satan emi ẹn̄wek idiọk ofụm emi.—Eph. 2:2.

Se Nnyịn Ikpepde:

13:1-4, 18. “Idiọk unam” oro adade aban̄a ukara owo ‘ọwọrọ ke inyan̄.’ Inyan̄ oro ada aban̄a ubonowo oro ẹtiede ntịme ntịme. (Isa. 17:12, 13; Dan. 7:2-8, 17) Satan enyene unam emi, enye n̄ko ọnọ unam emi odudu. Idiọn̄ọ unam emi edi 666, emi adade aban̄a unana mfọnmma oro mînyeneke mbiet. Ndidiọn̄ọ se unam emi adade aban̄a idiyakke nnyịn itiene enye ye n̄kpaidem m̀mê ndituak ibuot nnọ enye nte ndusụk owo ẹnamde.—John 12:31; 15:19.

13:16, 17. Kpa ye oro n̄kpọ ọsọn̄de, tutu nnyịn ikemeke ‘ndidep m̀mê ndinyam n̄kpọ’ ndusụk ini, nnyịn ikpedehedei iyak idiọk unam emi akara nnyịn. Edieke iyakde ẹwet ‘idiọn̄ọ idiọk unam oro ke ubọk m̀mê ke ọkpọ-iso nnyịn,’ oro ọwọrọ ke imayak idiọk unam oro ebiere se inamde ye se ikerede.

14:6, 7. Etop angel oro owụt ke nnyịn ikpenyene ndinen̄ede nsịn ifịk ntan̄a eti mbụk Obio Ubọn̄ Abasi oro ama ọkọtọn̄ọ ndikara ke heaven. Nnyịn ikpenyene ndin̄wam nditọ ukpepn̄kpọ Bible nnyịn ẹbak Jehovah Abasi ẹnyụn̄ ẹnọ enye ubọn̄.

14:14-20. Ke ẹma ẹkekpen̄e “mbun̄wụm isọn̄” ẹma, oro edi, nditan̄ mbon oro ẹdinyan̄ade mbok ọtọkiet, adan̄a do ke angel editop “vine isọn̄” ọdọn̄ “ke akwa obube unyịmi wine iyatesịt Abasi.” Vine oro edi idiọk ndutịm ukara Satan emi akarade ubonowo ke idiọk usụn̄. Ẹyesobo vine emi ẹfep ke nsinsi. Nnyịn ikpenyene ndibiere ke nnyịn idiyakke vine isọn̄ emi abiat nnyịn.

16:13-16. “Ndedehe spirit ita” ẹda ẹban̄a usụn̄ oro mme demon ẹdade ẹbian̄a ndidem isọn̄ mbak mmọ ẹkûnam n̄kpọ ẹban̄a etop ubiereikpe oro ẹn̄wan̄ade ke usan iyatesịt Abasi mbitiaba ẹduọk, edi ẹkam ẹyom nte ẹkpebiọn̄ọde Jehovah.—Matt. 24:42, 44.

16:21. Nte ererimbot emi asan̄ade ekpere utịt, etop ubiereikpe Jehovah oro ẹtan̄ade ẹdori Satan ye idiọk editịm n̄kpọ esie ekeme ndisịne mme etop ubiomikpe oro ẹtiede nte edịm itiat. Kpa ye oro, ediwak owo ẹdisụk ẹsosụn̄i Abasi.

EDIDEM ORO AKANDE, AKARA

(Edi. 17:1 esịm 22:21)

“Akwa Babylon,” kpa ukara ererimbot eke nsunsu ido ukpono, edi kiet ke otu ikpehe idiọk ererimbot Satan emi. Ẹwụt enye ke ọyọhọ n̄kukụt 11 nte “akwa akpara”—n̄wan akpara—“emi etiede ke enyọn̄ ididuot idiọk unam.” Idiọk unam emi enye odorode ke edem, emi enyenede “nnụk duop,” oyosobo enye taktak. (Edi. 17:1, 3, 5, 16) N̄kukụt en̄wen oro etienede emen akwa akpara emi odomo ye “akwa obio,” owụt nte ẹdisobode enye, onyụn̄ odụri ikọt Abasi utọn̄ ete ẹsọsọp “ẹwọn̄ọ ke esịt esie.” Ediwak owo ẹtuan̄a iduọ akwa obio emi. Edi idara odu ke heaven ke ntak “ndọ Eyenerọn̄.” (Edi. 18:4, 9, 10, 15-19; 19:7) Ọyọhọ n̄kukụt 13 owụt nte awat “afia enan̄ mbakara” akade ndin̄wana ekọn̄ ye mme idụt. Enye osobo idiọk ererimbot Satan fapfap.—Edi. 19:11-16.

Nso iditịbe inọ “akpa urụkikọt, emi edide Devil ye Satan”? Ini ewe ke ‘ẹditop enye ẹsịn ke n̄kpọdiọhọ ikan̄’? Mme akpan mbụme emi ke ẹbọrọ ke ọyọhọ n̄kukụt 14. (Edi. 20:2, 10) Ọyọhọ n̄kukụt 15 ye 16 ẹwụt nte uwem editiede ke Tọsịn Isua Ukara Christ. Ke utịt utịt “n̄kukụt” emi, John okụt ‘akpa mmọn̄ uwem nte ewetde osụhọde ke ufọt akwa efak,’ ndien ẹnọ kpukpru “owo eke itọn̄ asatde” ikot ẹte ẹdin̄wọn̄.—Edi. 1:1; 22:1, 2, 17.

Mme Mbụme N̄wed Abasi Oro Ẹbọrọde:

17:16; 18:9, 10—Ntak emi “ndidem isọn̄” ẹfụhọde ẹban̄a Akwa Babylon emi mmọ  ẹkesobode? Mmọ ẹfụhọ sia mmọ idinyeneke aba se mmọ ẹkesinyenede ẹto Akwa Babylon. Ke ẹma ẹkesobo Akwa Babylon, ndidem isọn̄ ẹyedi ẹdikụt ufọn oro enye ekenyenede ọnọ mmimọ. Mmọ ẹkesidịbe ke edem esie ẹnam ibak. Akwa Babylon n̄ko ẹsibere ye ukara esịn udọn ọnọ n̄kparawa owo ẹka ekọn̄. Akan oro, enye ama esitiene anam mme owo ẹsụk ibuot ẹnọ ukara.

19:12—Ntak emi edide Jesus kpọt ọfiọk ndịbe enyịn̄ esie? Etie nte enyịn̄ emi ada aban̄a idaha Jesus ye san̄asan̄a utom oro enye edinamde ke usen Ọbọn̄, utọ nte mbon oro ẹtịn̄de ẹban̄a ke Isaiah 9:6. Jesus kpọt ọfiọk enyịn̄ esie emi koro enye kpọt ke akwa ifetutom esie an̄wan̄a. Edi Jesus abuana ndusụk ifetutom esie emi ye mbon oro ẹdide n̄wanndọ esie; ntem ke enye ‘ewet obufa enyịn̄ esie emi ke ọkpọiso mmọ.’—Edi. 3:12.

19:14—Anie etiene Jesus awat enan̄-mbakara ke Armageddon? “Udịmekọn̄ oro ẹdude ke heaven” oro ẹtienede Jesus ẹn̄wana ekọn̄ Abasi ẹyesịne mme angel ye mme Christian oro ẹyetde aran, oro ẹma ẹkekan ẹnyụn̄ ẹbọ utịp mmọ ke heaven.—Matt. 25:31, 32; Edi. 2:26, 27.

20:11-15—Mmanie ke ẹwet enyịn̄ ke “n̄wed uwem”? Ẹwet enyịn̄ kpukpru mbon oro ẹdinọde nsinsi uwem ke n̄wed emi—mme Christian oro ẹyetde aran, akwa otuowo, ye mme anam-akpanikọ ikọt Abasi oro ẹdisetde ẹdi nte “ndinen owo.” (Utom 24:15; Edi. 2:10; 7:9) Amaedi “mme anam ukwan̄n̄kpọ” oro ẹdinamde ẹset, ẹdiwet enyịn̄ mmọ ke n̄wed uwem n̄kukụre edieke mmọ ẹnamde “mme n̄kpọ eke ẹwetde ke n̄wed” oro ẹdikụbọrede ke ini Tọsịn Isua Ukara. Edi owo ididaha mmọn̄n̄wed oro owo mîkemeke ndisọhi iwet enyịn̄ mmọ. Ke ini mme Christian oro ẹyetde aran ẹnamde akpanikọ ẹsịm n̄kpa, owo idisọhike enyịn̄ mmọ ifep ke n̄wed uwem ke nsinsi. (Edi. 3:5) Ke ini mbon oro ẹdidude nsinsi uwem mi ke isọn̄ ẹdibede akpatre udomo ke utịt tọsịn isua, owo idisọhike enyịn̄ mmọ ke n̄wed uwem ke nsinsi.—Edi. 20:7, 8.

Se Nnyịn Ikpepde:

17:3, 5, 7, 16. “Ọniọn̄ eke otode ke enyọn̄” anam idiọn̄ọ “ndịben̄kpọ emi aban̄ade n̄wan oro [oro edi, Akwa Babylon, ye ididuot] idiọk unam emi emende enye.” (Jas. 3:17) Ndamban̄a idiọk unam oro ọkọtọn̄ọ nte Esop Ediomi Mme Idụt, ekem akabade edi Edidiana Mme Idụt. Ndi nte ẹyararede ndịben̄kpọ emi ẹnọ nnyịn ikpanamke nnyịn isịn ifịk ikwọrọ eti mbụk Obio Ubọn̄ Abasi inyụn̄ itan̄a usen ubiereikpe Jehovah?

21:1-6. Nnyịn imenen̄ede inịm ke kpukpru nti n̄kpọ oro Bible ọdọhọde ke eyetịbe ke Obio Ubọn̄ Abasi oyosu. Ntak-a? Koro N̄wed Abasi ọdọhọ ke “mmọ ẹmesu ẹma!”

22:1, 17. “Akpa mmọn̄ uwem” oro ada aban̄a ndutịm oro Jehovah anamde man nti owo ẹbọhọ idiọkn̄kpọ ye n̄kpa. Mmọn̄ emi odu idahaemi. Nnyịn ikpakam inyịme ikot oro ẹnọde ẹte ‘idibọ mmọn̄ uwem in̄wọn̄ ke mfọn,’ inyụn̄ isịn ifịk ikot mbon en̄wen ẹtiene ẹdibọ!

[Mme Ikọ Idakisọn̄]

[Ndise ke page 5]

Mbon oro ẹkopde item Abasi ẹyenyene ediwak nti n̄kpọ ke Obio Ubọn̄ Abasi