Yak Ikọ Jesus Okpụhọde Uwem Fo
Yak Ikọ Jesus Okpụhọde Uwem Fo
“Enye emi Abasi okosiode ọdọn̄ etịn̄ mme ikọ eke ẹtode Abasi.”—JOHN 3:34.
1, 2. Nso ke ẹkpemen Ukwọrọikọ oro Jesus ọkọkwọrọde ke Obot ẹdomo, ndien ntak emi idọhọde ke kpukpru se enye eketịn̄de ekedi ‘ikọ Abasi’?
KIET ke otu n̄kponn̄kan daimọn oro ẹnen̄erede ẹye odu ke Africa. Enye edi ata ọsọn̄urua n̄kpọ! Edi Ukwọrọikọ oro Jesus ọkọkwọrọde ke Obot ọdọn̄ọ mme n̄kpọ oro ẹnen̄erede ẹsọn̄ urua ẹkan daimọn emi. Emi ikpakpaha nnyịn idem koro Jehovah eketeme Jesus se enye eketịn̄de! Bible ọdọhọ ete: “Enye [oro edi, Jesus] emi Abasi okosiode ọdọn̄ etịn̄ mme ikọ eke ẹtode Abasi.”—John 3:34-36.
2 Okposụkedi ekemede ndidi Jesus akada n̄kpọ nte minit 20 ọkwọrọ ofụri ikọ oro, enye ama okot utịm ike-21 oto n̄wed itiaita ke N̄wed Abasi Usem Hebrew. Ntre, kpukpru se enye eketịn̄de ekedi ‘ikọ Abasi.’ Ẹyak ineme ndusụk ke otu nsọn̄urua n̄kpọ oro edima Eyen Abasi ekekpepde.
“Kebem Iso Nam Emem ye Eyenusọ”
3. Nso item ke Jesus ọkọnọ ke enye ama akasian mme mbet esie se iditịbede edieke owo mîmaha ndibiere utọk?
3 Nnyịn mme Christian ikop inemesịt inyụn̄ idu ke emem sia imenyene edisana spirit Abasi, ndien idatesịt ye emem ẹdi ubak mbun̄wụm spirit emi. (Gal. 5:22, 23) Jesus ama oyom mme mbet esie ẹka iso ẹkop idatesịt ẹnyụn̄ ẹdu ke emem, ntak edi oro enye ọkọdọhọde mmọ ke owo oro mîmaha ndibiere utọk ekeme ndiwot owo. (Kot Matthew 5:21, 22.) Enye ọkọdọhọ ete: “Ke ntre, edieke afo adade enọ fo edi ke itieuwa ndien afo eti do ete ke eyenete fo enyene ikọ ye afo, kpọn̄ enọ fo nịm do ke iso itieuwa, nyụn̄ nyọn̄; kebem iso nam emem ye eyenusọ, ndien ekem, ke ama akafiak edi, nọ enọ fo.”—Matt. 5:23, 24.
4, 5. (a) Nso ikedi “enọ” oro Jesus eketịn̄de aban̄a ke Matthew 5:23, 24? (b) Ntak edide akpan n̄kpọ ndinam emem ye eyenete oro enyenede ikọ ye nnyịn?
4 “Enọ” oro Jesus eketịn̄de aban̄a mi ekedi enọ ekededi oro ẹkesinọde ke temple ke Jerusalem. Ke uwụtn̄kpọ, uwa unam ekedi ata akpan n̄kpọ ini oro, koro emi ekedi kiet ke otu akpan usụn̄ oro ikọt Jehovah ẹkesituakde ibuot ẹnọ enye ini oro. Edi Jesus ama etịn̄ se ikakam idide ata akpan n̄kpọ—oro edi, ndinam emem ye eyenete oro enyenede ikọ ye afo mbemiso ediwa enọ fo ọnọ Abasi.
5 Jesus ndikọdọhọ ‘ibem iso inam emem’ ekpep nnyịn nso? Emi owụt ke nte inamde n̄kpọ ye mbon en̄wen enen̄ede otụk itie ebuana nnyịn ye Jehovah. (1 John 4:20) Emi owụt ke Jehovah ikesibọhọ uwa owo oro mîkodụhe ke emem ye mbon en̄wen.—Kot Micah 6:6-8.
Ana Osụhọde Idem
6, 7. Ntak oyomde isụhọde idem ke ini idomode ndinam emem ye eyenete oro ikeduede?
6 Ana isụhọde idem man ikeme ndinam emem ye eyenete oro enyenede ikọ ye nnyịn. Mbon nsụhọdeidem isifan̄ake mfan̄a m̀mê nditọhọ utọk ye nditọete mmọ man ẹwụt ke imenen. Emi ekeme ndinam se iketịbede ke eset ke otu nditọete ke Corinth etịbe. Se iketịbede ama anam apostle Paul etịn̄ ikọ oro anamde owo enen̄ede ekere n̄kpọ. Enye ọkọdọhọ ete: “Emi ọwọrọ ke mbufo ẹmekpu ofụri ofụri ke emi mbufo ẹkotde kiet eken ikpe. Ntak emi mbufo mîyakke ẹnam mbufo idiọk? Ntak emi mbufo mîbọhọ utụk ibiom?”—1 Cor. 6:7.
7 Jesus ikọdọhọke ika ibịne eyenete nnyịn man ikanam enye ọdiọn̄ọ ke nnyịn ikeduehe, edi ke enye akakam edue. Uduak nnyịn ekpedi ndifiak ndu ke emem ye enye. Man inam emem odu, ana itịn̄ nte etiede nnyịn ke idem nnennen nnennen. Ana ifiọk ke n̄kpọ oro ama abiak owo enye eken n̄ko. Ndien ana nnyịn isụhọde idem ikpe ubọk edieke ikeduede.
‘Edieke Enyịn Nnasia Fo Anamde Fi Atuak Ukot Ọduọ’
8. Tịn̄ ibio ibio se Jesus eketịn̄de ke Matthew 5:29, 30.
8 Jesus ama ọnọ ata nti item ke Ukwọrọikọ esie Oro ke Obot aban̄a nte ikpodude eti uwem. Enye ama ọfiọk ke sia nnyịn mîfọnke ima, ke mbak idem nnyịn ekeme ndinam ituak ukot iduọ. Ntak edi oro enye ọkọdọhọde Matt. 5:29, 30.
ete: “Edieke enyịn nnasia fo oro anamde fi atuak ukot ọduọ, wụbede enye top duọk. Koro etetịm ọfọn afo nditaba kiet ke otu ndido idemfo akan nditop fi ofụri idem nduọk ke Gehenna. N̄ko, edieke ubọk nnasia fo anamde fi atuak ukot ọduọ, sịbe enye top duọk. Koro etetịm ọfọn afo nditaba kiet ke otu ndido idemfo akan ofụri idemfo ndidụk ke Gehenna.”—9. Didie ke “enyịn” m̀mê “ubọk” nnyịn ekeme ndinam nnyịn ‘ituak ukot iduọ’?
9 “Enyịn” oro Jesus eketịn̄de aban̄a ada aban̄a edinen̄ede n̄wụk enyịn nse n̄kpọ. “Ubọk” ada aban̄a se idade ubọk nnyịn inam. Edieke nnyịn mîkpemeke, mbak idem emi ẹkeme ndinam nnyịn ‘ituak ukot iduọ,’ onyụn̄ anam itre ‘ndisan̄a ye Abasi.’ (Gen. 5:22; 6:9) Ke ini isobode idomo oro edinamde nnyịn idue Jehovah, oyom isọsọp inam n̄kpọ oro etiede nte ediwụbede enyịn m̀mê edisịbe ubọk mfep.
10, 11. Nso idinam nnyịn ifep use?
10 Nso ke ikpanam mbak nnyịn idiwụk enyịn ise oburobụt n̄kpọ? Job oro akabakde Abasi ọkọdọhọ ete: “Mmodiomi ediomi ye enyịn mi; nnam didie, ndien, ntịn̄ enyịn [ke idem] eyen-an̄wan?” (Job 31:1) Job ama ọdọ ndọ, enye ama ebiere ke imọ idibiatke mbet ido uwem oro Abasi ọnọde. Nnyịn n̄ko ikpenyene ndinam utọ ubiere oro, edide imọdọ ndọ m̀mê idọhọ. Edieke nnyịn mîyomke ndinam use, ana nnyịn iyak edisana spirit Abasi ada nnyịn usụn̄, sia edisana spirit emi esinam mbon oro ẹmade Abasi ẹfara ke idem.—Gal. 5:22-25.
11 Se idinamde nnyịn ifep use edi ndibụp idem nnyịn utọ mbụme nte, ‘Ndi esidọn̄ mi ndise ndiọi ndise oro ẹdude ke mme n̄wed, ekebe ndise, m̀mê ke Intanet?’ Ọfọn inyụn̄ iti ikọ James mbet Jesus emi: “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ oro oyomode, aman idiọkn̄kpọ; ndien ke ini idiọkn̄kpọ oro ama okokụre utom esie, ada n̄kpa edi.” (Jas. 1:14, 15) Ke akpanikọ, edieke owo ekededi oro ama akayak idem ọnọ Jehovah “owụkde enyịn ese” eren m̀mê n̄wan ye idiọk uduak, ana enye anam ata akamba ukpụhọde emi etiede nte ediwụbede enyịn ntop nduọk.—Kot Matthew 5:27, 28.
12. Ewe item Paul ekeme ndinam nnyịn ibiọn̄ọ ndiọi udọn̄?
12 Sia ifiọkde ke edieke nnyịn mîkpemeke se idade ubọk nnyịn inam, oro ekeme ndinam nnyịn inam n̄kpọ oro atuahade ye ibet Jehovah, ntre ọfọn isọn̄ọ ibiere ndidu edisana uwem. Nnyịn ikpenyene ndinam item Paul emi: “Ẹwot mme ndido idem mbufo emi ẹdude ke isọn̄ kaban̄a use, mbubiam ido, ọkpọsọn̄ udọn̄ idan̄, udọn̄ oro ekemede ndinọ unan, ye edisịn esịt ke n̄kpọ owo, emi edide ukpono ndem.” (Col. 3:5) Ikọ oro “ẹwot” owụt ke oyom inen̄ede isịn ukeme man ibiọn̄ọ ndiọi udọn̄.
13, 14. Ntak emi ikpọbiọn̄ọde ndiọi ekikere ye ndiọi edinam?
13 Owo ekeme ndinyịme abiausọbọ esịbe imọ ubọk m̀mê ukot efep man anyan̄a imọ. Ndinam n̄kpọ oro etiede nte ndiwụbede enyịn nnyịn nnyụn̄ nsịbe ubọk nnyịn ‘ntop nduọk’ idiyakke nnyịn ikere ndedehe n̄kpọ, idinyụn̄ iyakke inam se idinamde nnyịn ikpan̄a ke enyịn Abasi. Ndikere nti n̄kpọ, ndu edisana uwem, nnyụn̄ ndu ke eti idaha ke n̄kan̄ eke spirit kpọt ẹdinam nnyịn ibọhọ nsinsi nsobo oro ẹmende ẹdomo ye Gehenna.
14 Imemke utom ndidu edisana uwem, koro nnyịn ikadada idiọkn̄kpọ imana. Paul ọkọdọhọ ete: “Ntọn̄ọ idem mi ita, nnam enye odụk ufụn, man, ke mma n̄kọkwọrọ ikọ nnọ mbon en̄wen, ẹdibiom mi ikpe ke usụn̄ ekededi.” (1 Cor. 9:27) Ke ntre, ẹyak kpukpru nnyịn ibiere ndinam item oro Jesus ọkọnọde aban̄a nte ikpodude edisana uwem; ikûdedei idu uwem oro owụtde ke nnyịn inyeneke esịtekọm inọ uwa esie.—Matt. 20:28; Heb. 6:4-6.
“Ẹnọ Owo N̄kpọ”
15, 16. (a) Didie ke Jesus ekpep nnyịn ndinọ owo n̄kpọ? (b) Nso ke ikọ Jesus oro odude ke Luke 6:38 ọwọrọ?
15 Se Jesus eketịn̄de ye n̄wọrọnda usụn̄ oro enye okodude uwem esịn udọn̄ ọnọ nnyịn ndinọ owo n̄kpọ. Jesus ndikenyịme ndidi isọn̄ ke ntak nnyịn ekedi ata akwa mfọnido. (Kot 2 Corinth 8:9.) Jesus ama enyịme ndikpọn̄ itie ubọn̄ esie ke heaven man edidi owo mi ke isọn̄ onyụn̄ akpa ke ibuot nnyịn; ndien ndusụk ke otu mbon emi enye akakpade ọnọ ẹyenyene inyene ke heaven nte nsan̄a mme ada udeme ke Obio Ubọn̄ Abasi nnyene. (Rome 8:16, 17) Jesus ama onyụn̄ esịn udọn̄ ọnọ nnyịn ndinọ owo n̄kpọ ke ini enye ọkọdọhọde ete:
16 “Ẹnọ owo n̄kpọ, ndien mme owo ẹyenọ mbufo n̄kpọ. Mmọ ẹyedomo ọyọhọ udomo, eke ẹmịn̄de osụhọde, eke ẹnyen̄ede onyụn̄ ọyọhọde ọduọhọ, ẹsịn mbufo ke ọfọn̄. Koro udomo eke mbufo ẹdade ẹdomo ẹnọ owo, ke mmọ ẹdida ẹdomo ẹnọ mbufo ke usiene.” (Luke 6:38) ‘Ndidomo ọyọhọ udomo nsịn ke ọfọn̄’ owụt se mme anyamurua ẹkesinamde ke eset; mmọ ẹma ẹsidomo n̄kpọ ẹdọn̄ ke ekụra owo emi edepde n̄kpọ, oro ẹkesibọpde ẹnam ẹtie nte ekpri ekpat udọn̄-n̄kpọ. Ke ini inọde owo n̄kpọ ke ofụri esịt, oro ekeme ndinam mme owo ẹnọ nnyịn n̄kpọ n̄ko ke ini idude ke unana.—Eccl. 11:2.
17. Didie ke Jehovah ekenịm akakan uwụtn̄kpọ edinọ enọ, ndien nso utọ enọ ikeme ndinọ nnyịn inemesịt?
17 Jehovah ama mbon oro ẹsinọde owo n̄kpọ ke ofụri esịt, enye esinyụn̄ ọnọ mmọ nti utịp. Enye ke idemesie ama enịm akakan uwụtn̄kpọ ke ndikọnọ ikpọn̄-ikpọn̄ edibon Eyen esie “man owo ekededi eke ọbuọtde idem ye enye okûtak edi enyene nsinsi uwem.” (John 3:16) Paul ekewet ete: “Owo eke ọtọde ke ntatubọk ọyọdọk uwak uwak n̄ko. Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” (2 Cor. 9:6, 7) Ke akpanikọ, iyokop inemesịt inyụn̄ ibọ ediwak utịp edieke idade ini, odudu, ye inyene nnyịn inam n̄kpọ Abasi.—Kot Mme N̄ke 19:17; Luke 16:9.
“Kûbem Iso Ufri Obukpon̄”
18. Nso ikeme ndinam Ete nnyịn eke heaven ‘okûdiọn̄’ nnyịn?
18 “Ẹtịm ẹkpeme ẹkûnam edinen ido mbufo ke iso owo ẹte mmọ ẹkụt; edieke ẹnamde, mbufo idibọhọ utịp ito Ete mbufo emi odude ke heaven.” (Matt. 6:1) “Edinen ido” oro Jesus etịn̄de aban̄a mi edi ido oro ẹkemde ye uduak Abasi. Ikọ esie ikọwọrọke ke owo ikpanamke nti n̄kpọ ke eferife, mmọn̄ọ, idịghe kpa enye ọkọdọhọ mme mbet esie “ẹyak un̄wana [mmọ] ayama ke iso owo”? (Matt. 5:14-16) Edi ikọ esie ọkọwọrọ ke nnyịn “idibọhọ utịp” ndomokiet ito Ete nnyịn eke heaven edieke inamde n̄kpọ ‘man mme owo ẹkụt’ ẹnyụn̄ ẹtoro nnyịn, nte mme osio ndyọ ẹsidade ke iso kpukpru owo ẹsio ndyọ man mme owo ẹkụt. Edieke nnyịn inyenede utọ edu oro, nnyịn idisan̄ake ikpere Abasi, nnyịn idinyụn̄ ibọhọ mme edidiọn̄ oro Obio Ubọn̄ Abasi edidade edi.
19, 20. (a) Nso ke ikọ Jesus ọkọwọrọ ke ini enye ọkọdọhọde owo ‘okûfri obukpon̄’ ke ini “ọnọde mbon unana n̄kpọ”? (b) Nso ke nditre ndiyak ubọk ufien ọfiọk se nnasia nnyịn anamde, ọwọrọ?
19 Edieke isụhọrede idem, nnyịn iyanam item Jesus emi: “Ntem ke ini afo ọnọde mbon unana n̄kpọ, kûbem iso ufri obukpon̄, kpa nte mbon mbubịk ẹnamde ke mme synagogue ye ke mme efak, man mme owo ẹkpenọ mmọ ubọn̄. Ke akpanikọ ke ndọhọ mbufo, Mmọ ke ẹbọ utịp mmọ ọyọhọ ọyọhọ.” (Matt. 6:2) Jesus ye mme apostle esie ẹma ẹsinọ mbon unana n̄kpọ. (John 12:5-8; 13:29) Sia mme owo mîkesifrike ata obukpon̄ ke ini ẹkenọde mbon unana n̄kpọ, enyene ndidi Jesus eketịn̄ emi man mme owo ẹdida ikọ esie mfefere mfefere. Inaha nnyịn itan̄ ase ke ini inọde mbon unana n̄kpọ nte mme Jew emi ẹkedide mme Pharisee ẹkesinamde. Jesus okokot mmọ mbon mbubịk sia mmọ ẹkesiyom mme owo ke “mme synagogue ye ke mme efak” ẹkụt se mmimọ inọde mbon unana. Mbon mbubịk oro ẹma “ẹbọ utịp mmọ ọyọhọ ọyọhọ.” Jehovah idinọhọ mmọ utịp ndomokiet. N̄kukụre utịp mmọ ẹkedi n̄kpọitie iso oro mmọ ẹkesitiede ke mme synagogue ye itoro oro mme owo ẹkesitorode mmọ. (Matt. 23:6) Edi mbet Christ ẹkenyene ndinam n̄kpọ didie? Jesus ọkọdọhọ mmọ ye nnyịn nde ete:
20 “Edi amaedi afo, ke ini ọnọde enọ mbọm kûyak ubọk ufien fo ọfiọk se ubọk nnasia fo anamde, man enọ mbọm fo ekpedi ke ndịbe; ndien Ete fo emi esede ke ndịbe ọyọnọ fi utịp.” (Matt. 6:3, 4) Nnyịn isida ubọk mbiba inam n̄kpọ. Mmọdo, nditre ndiyak ubọk ufien ọfiọk se nnasia fo anamde ọwọrọ ke nnyịn ikpayakke idem owo oro enen̄erede ekpere nnyịn nte ubọk ufien ekperede nnasia ọfiọk se inọde owo.
21. Nso utịp ke Enye emi “esede ke ndịbe” edinọ nnyịn?
21 “Enọ” nnyịn edidi ke ndịbe edieke nnyịn mîtan̄ke ase. Ndien Ete nnyịn “emi esede ke ndịbe” ọyọnọ nnyịn utịp. Nnyịn ikemeke ndikụt Ete nnyịn emi koro enye odu ke heaven, ntre enye ‘ese ke ndịbe.’ (John 1:18) Utịp oro Jehovah edinọde nnyịn esịne edifen ndudue nnyịn, nyak nnyịn isan̄a ikpere enye, nnyụn̄ nnọ nnyịn nsinsi uwem. (N̄ke 3:32; John 17:3; Eph. 1:7) Mme n̄kpọ emi ẹnen̄ede ẹfọn ẹkan itoro owo!
Ọsọn̄urua Ukpepn̄kpọ Oro Anade Ida ke Akpan N̄kpọ
22, 23. Ntak emi nnyịn ikpadade se Jesus eketịn̄de ke akpan n̄kpọ?
22 Ke akpanikọ, Ukwọrọikọ oro Jesus ọkọkwọrọde ke Obot ọdọn̄ọ ata nsọn̄urua n̄kpọ eke spirit. Enye ọdọn̄ọ nti item oro ekemede ndinam nnyịn ikop idatesịt ke ererimbot afanikọn̄ emi. Ke akpanikọ, nnyịn iyokop inemesịt edieke idade ikọ Jesus emi ke akpan n̄kpọ inyụn̄ iyakde enye okpụhọde edu uwem nnyịn.
23 Ẹyediọn̄ kpukpru mbon oro “ẹkopde” ẹnyụn̄ “ẹnamde” se Jesus ekekpepde emi. (Kot Matthew 7:24, 25.) Ntre ẹyak nnyịn ibiere ndinam item Jesus emi. Ẹyeneme mme n̄kpọ en̄wen oro enye eketịn̄de ke Ukwọrọikọ esie Oro ke Obot, ke akpatre ibuotikọ nneme emi.
Didie ke Afo Ọkpọbọrọ?
• Ntak ọfọnde inam emem ye eyenete oro iduede?
• Nso ke ikpanam mbak “enyịn nnasia” nnyịn edinam nnyịn ituak ukot iduọ?
• Nso utọ edu ke ikpenyene ke ini inọde mme owo n̄kpọ?
[Mme Mbụme Ukpepn̄kpọ]
[Ndise ke page 11]
Enen̄ede ọfọn ‘inam emem’ ye eyenete nnyịn oro iduede!
[Mme ndise ke page 12, 13]
Jehovah esidiọn̄ mbon oro ẹnọde owo n̄kpọ ke idatesịt