“Ẹdu ke Ukpeme”
“Ẹdu ke Ukpeme”
“Utịt kpukpru n̄kpọ amasan̄a ekpere. . . . Ẹdu ke ukpeme ye uduak ndibọn̄ akam.”—1 PET. 4:7.
1. Nso ikedi ibuotikọ ukwọrọikọ Jesus?
KE INI Jesus Christ okodude ke isọn̄, ibuotikọ ukwọrọikọ esie ekedi Obio Ubọn̄ Abasi. Jehovah edida Obio Ubọn̄ emi owụt ke imọ inyene unen ndikara ofụri ekondo, edinyụn̄ ada enye anam enyịn̄ esie asana. Ntak edi oro Jesus ekekpepde mbet esie ẹbọn̄ akam ẹnọ Abasi ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 4:17; 6:9, 10) Obio Ubọn̄ emi ọmọn̄ ọsọp osobo ererimbot Satan onyụn̄ okụt ete ke ẹnam uduak Abasi ke ofụri isọn̄. Kpa nte Daniel eketịn̄de, Obio Ubọn̄ Abasi “ayanuak onyụn̄ ama kpukpru mme idụt emi, ndien enye ayada ke nsinsi.”—Dan. 2:44.
2. (a) Mme anditiene Jesus ẹdisan̄a didie ẹfiọk ke Jesus ọtọn̄ọ ndikara ke heaven? (b) Nso n̄kpọ en̄wen ke idiọn̄ọ oro Jesus ọkọnọde edinam mme owo ẹfiọk?
2 Mme anditiene Jesus ẹma ẹnen̄ede ẹyom Obio Ubọn̄ Abasi edi, ntak edi oro mmọ ẹkebụpde enye ete: “Nso [ididi] idiọn̄ọ edidu fo ye eke utịt editịm n̄kpọ emi?” (Matt. 24:3) Sia mme owo mîdikemeke nditie ke isọn̄ n̄kụt ini emi Jesus editọn̄ọde ndikara ke heaven, ntre, Jesus ekenyene ndinọ idiọn̄ọ oro mme owo ẹdikụtde. N̄wed Abasi ama etetịn̄ aban̄a nsio nsio ikpehe idiọn̄ọ emi. Mme anditiene Jesus oro ẹdikụtde idiọn̄ọ emi ẹyefiọk ke enye ọtọn̄ọ ndikara ke heaven. Emi n̄ko ayanam ifiọk ke “mme akpatre usen” idiọk editịm n̄kpọ emi ọtọn̄ọ.—2 Tim. 3:1-5, 13; Matt. 24:7-14.
Ẹdu ke Ukpeme ke Mme Akpatre Usen Emi
3. Ntak emi mme Christian ẹkpedude ke ukpeme?
3 Apostle Peter ekewet ete: “Utịt kpukpru n̄kpọ amasan̄a ekpere. Ntre, ẹnyene eti ibuot ẹnyụn̄ ẹdu ke ukpeme ye uduak ndibọn̄ akam.” (1 Pet. 4:7) Ana mme anditiene Jesus ẹnyene eti ibuot, ẹnyụn̄ ẹkpeme, m̀mê ẹtịn̄ enyịn ẹse mme n̄kpọntịbe ererimbot oro ẹwụtde ke Jesus ama ọtọn̄ọ ndikara ke Obio Ubọn̄ heaven. Ọyọfọn mmọ ẹnen̄ede ẹdu ke ukpeme akpan akpan nte idiọk editịm n̄kpọ emi enen̄erede ekpere utịt, koro Jesus ọkọdọhọ mbet esie ete: “Ẹdu ke ukpeme, koro mbufo mîfiọkke ini emi eteufọk edidide [edibiere ikpe ọnọ ererimbot Satan].”—Mark 13:35, 36.
4. Tịn̄ nte edu mbon oro ẹdide ubak ererimbot Satan okpụhọrede ye edu ikọt Jehovah. (Sịn ekebe.)
4 Satan akara ata ediwak owo mfịn, ntre mmọ idọn̄ke enyịn m̀mê n̄kpọntịbe ererimbot enyene se ọwọrọde m̀mê inyeneke. Mmọ ifiọkke ke Christ ama ọtọn̄ọ ndikara. Edi ata mme anditiene Christ ẹdu ke ukpeme ẹnyụn̄ ẹfiọk ntak emi n̄kpọ etiede ntem ke n̄kpọ nte isua ikie emi ẹbede. Tọn̄ọ ke 1925, Mme Ntiense Jehovah ẹma ẹfiọk ke akpa ekọn̄ ererimbot ye mme n̄kpọ en̄wen oro ẹketịbede ẹnen̄ede ẹwụt ke Christ ama ọtọn̄ọ ndikara ke heaven ke 1914. Mmọdo, mme akpatre usen idiọk editịm n̄kpọ Satan emi ama ọtọtọn̄ọ. Ediwak mbon oro ẹsisụkde enyịn ẹse n̄kpọ ẹfiọk ke ererimbot enen̄ede okpụhọde tọn̄ọ akpa ekọn̄ ererimbot akasiaha, okposụkedi emi mmọ mîfiọkke ntak emi n̄kpọ ẹtiede ntem.—Se ekebe oro, “Eyo Afanikọn̄ Esiere.”
5. Ntak emi anade ika iso idu ke ukpeme?
5 Mme enyene-ndịk n̄kpọ oro ẹtịbede ke ererimbot ke n̄kpọ nte isua ikie idahaemi ẹnen̄ede ẹwụt ke idu ke mme akpatre usen. Ibịghike, Jehovah ọmọn̄ ọnọ Christ uyo ete ada mme okopodudu udịmekọn̄ heaven an̄wana ye idiọk ererimbot Satan. (Edi. 19:11-21) Jesus ọdọhọ ata mme Christian ete ẹdu ke ukpeme. Ntre, enen̄ede oyom ika iso idu ke ukpeme nte itiede ibet utịt editịm n̄kpọ emi. (Matt. 24:42) N̄ko, ana ika iso inam akpan utom oro Christ ọnọde ndausụn̄ ke ofụri ererimbot.
Utom Ofụri Ererimbot
6, 7. Didie ke utom edikwọrọ Obio Ubọn̄ ọkọri ke mme akpatre usen emi?
6 Ẹma ẹtetịn̄ ẹban̄a utom oro ikọt Jehovah ẹnamde nte kiet ke otu ikpehe idiọn̄ọ oro ẹdiwụtde ke idu ke mme akpatre usen idiọk editịm n̄kpọ emi. Jesus ama asiak utom ukwọrọikọ oro inamde mi ke ofụri ererimbot ke ini enye akabatde nsio nsio n̄kpọ oro ẹditịbede ke utịt ini. Enye ama ọdọhọ n̄ko ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.”—Matt. 24:14.
7 Kere ban̄a ndusụk akpan n̄kpọ oro ẹdọn̄ọde ke ntịn̄nnịm ikọ Jesus emi. Ata esisịt ibat owo kpọt ẹkekwọrọ eti mbụk ke 1914 oro akpatre usen ọkọtọn̄ọde. Edi idahaemi-e, ibat mbon oro ẹkwọrọde eti mbụk awak etieti. Esop Mme Ntiense Jehovah ke ofụri ererimbot ebe 100,000; n̄ko, ibat Mme Ntiense Jehovah oro ẹkwọrọde ikọ ke ofụri ererimbot ebe 7,000,000 idahaemi. Se iwakde ibe owo 10,000,000 oro mîdịghe Mme Ntiense ẹma ẹtiene ẹdụk Editi n̄kpa Christ ke 2008. Oro ọwọrọ ke mbon oro ẹkedụkde Editi isua oko ẹma ẹnen̄ede ẹwak ẹkan mbon oro ẹkedụkde ke 2007.
8. Ntak emi utom ukwọrọikọ akade iso ọkọri kpa ye ukọbọ?
8 Nso akwa ikọ ntiense ke ẹnọ kpukpru idụt ntem ẹban̄a Obio Ubọn̄ Abasi mbemiso editịm n̄kpọ emi esịmde utịt! Ukwọrọikọ emi ke aka iso kpa ye oro Satan edide “abasi editịm n̄kpọ emi.” (2 Cor. 4:4) Kpukpru ndutịm ukara ererimbot emi, mme n̄ka ido ukpono, ndutịm anyamurua, ye ndutịm usuanetop, ẹsịne Satan ke ubọk. Nso ndien inam ikụt unen ntem ke utom ukwọrọikọ? Koro Jehovah odude ye nnyịn. Ntak edi oro utom edikwọrọ Obio Ubọn̄ ọkọride ntem kpa ye ukeme oro Satan esịnde nditre utom emi.
9. Ntak emi ikpọdọhọde ke uforo eke spirit oro inyenede edi utịben̄kpọ?
9 Edi utịben̄kpọ ndikụt nte utom ukwọrọikọ ọkọride, nte Mme Ntiense Jehovah ẹwakde ke usen ke usen ẹnyụn̄ ẹnyenede ekese ifiọk Ikọ Abasi. Nnyịn ikpekemeke ndikwọrọ ikọ edieke Abasi mîkpodụhe ye nnyịn inyụn̄ inọ nnyịn ndausụn̄ ye ukpeme. (Kot Matthew 19:26.) Nnyịn imọfiọk ke edisana spirit Abasi ayan̄wam mbon oro ẹdude ke ukpeme ẹnyụn̄ ẹmade ndinam n̄kpọ Abasi ẹka iso ẹkwọrọ eti mbụk ke ofụri isọn̄, “ndien adan̄aoro ke utịt” edidi. Ke akpanikọ, utịt enen̄ede ekpere.
“Akwa Ukụt”
10. Jesus ọkọdọhọ ke akwa ukụt editie didie?
10 Idiọk editịm n̄kpọ emi edisịm utịt ke “akwa ukụt.” (Edi. 7:14) Bible itịn̄ke nte akwa ukụt emi edibịghide, edi Jesus ọkọdọhọ ete: “Adan̄aoro akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matt. 24:21) Ke ini ikerede iban̄a ukụt oro esịmde ererimbot emi, utọ nte se iketịbede ke ini ẹken̄wanade ọyọhọ ekọn̄ ererimbot iba, emi n̄kpọ nte owo miliọn 50 ẹsịm 60 ẹkekpan̄ade, ọwọrọ ke akwa ukụt oro edidide eyenen̄ede enyene ndịk. Akwa ukụt emi edisịm utịt ke ekọn̄ Armageddon. Ini oro ke Jehovah edidọn̄ udịmekọn̄ esie ẹdisobo ndutịm ukara Satan ekededi oro edisụhọde ke isọn̄.—Edi. 16:14, 16.
11, 12. Nso n̄wọrọnda n̄kpọ iditịbe ndiwụt ke akwa ukụt ọtọn̄ọ?
11 Bible isiakke usen emi akwa ukụt editọn̄ọde, edi etịn̄ n̄wọrọnda n̄kpọ oro editịbede ndiwụt ke akwa ukụt ọtọn̄ọ—oro edi, ukara ererimbot ndisobo kpukpru nsunsu ido ukpono. Mme ntịn̄nnịm ikọ oro ẹdude ke n̄wed Ediyarade ibuot 17 ye 18 ẹwụt ke nsunsu ido ukpono etie nte akpara oro anamde use ye ndidem isọn̄. Ediyarade 17:16 ọdọhọ ke ibịghike, ndidem isọn̄ “ẹyesua akpara oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụk esie ẹnyụn̄ ẹfọp enye ke ikan̄ ofụri ofụri.”
12 Ini ama ekem, Abasi ‘eyesịn ke esịt ndidem isọn̄ ete ẹnam ekikere imọ,’ ẹsobo nsunsu ido ukpono. (Edi. 17:17) Ntre, imekeme ndidọhọ ke Abasi osobo mmọ. Abasi osobo mmọ sia mmọ ẹkpepde mme owo se mîdịghe akpanikọ ke ofụri anyan ini emi ẹnyụn̄ ẹkọbọde mme asan̄autom Abasi. Mme owo ke ererimbot ikereke ke ẹyesobo nsunsu ido ukpono. Edi mme anam-akpanikọ asan̄autom Jehovah ẹdiọn̄ọ ke ẹyesobo mmọ. Mmọ ẹka iso ndisian mme owo se iditịbede ke ukperedem ini emi.
13. Nso iwụt ke nsobo nsunsu ido ukpono ididaha ini?
13 Idem eyenen̄ede akpa mme owo ndikụt ẹsobode nsunsu ido ukpono. Ntịn̄nnịm ikọ Bible ọdọhọ ke idem “ndidem isọn̄” ẹyeseme ẹte: “Mbọm, mbọm, . . . koro ke hour kiet ubiomikpe fo ama edisịm!” (Edi. 18:9, 10, 16, 19) Bible ndidọhọ “hour kiet” owụt ke nsobo emi ididaha ini.
14. Didie ke Jehovah edinam n̄kpọ ke ini mme asua esie ẹtọn̄ọde en̄wan ye mme asan̄autom esie?
14 Nnyịn imọfiọk ke ẹma ẹsobo nsunsu ido ukpono, ke ẹyetọn̄ọ en̄wan ye mme asan̄autom Jehovah oro ẹkekwọrọde etop ubiomikpe Jehovah. (Ezek. 38:14-16) Ini ekededi oro ẹtọn̄ọde en̄wan emi, ọwọrọ ke mmọ ẹdin̄wana ye Jehovah. Jehovah ọn̄wọn̄ọ ke iyekpeme mme anam-akpanikọ ikọt imọ. Enye ọdọhọ ete: “Nyonyụn̄ nda ufụp mi, nda ikan̄ ifụtesịt mi ndọhọ. . . . Ndien mmọ ẹyefiọk ẹte ke ami ndi Jehovah.” (Kot Ezekiel 38:18-23.) Abasi ọdọhọ ke owo ekededi oro “otụkde mbufo [oro edi, mme anam-akpanikọ asan̄autom imọ] otụk eyen enyịn [imọ].” (Zech. 2:8) Mmọdo, ke ini mme asua esie ẹtọn̄ọde ndin̄wana ye mme asan̄autom esie ke ofụri ererimbot, Jehovah ididopke-dop ise. Enye ayanam n̄kpọ oro edidade akwa ukụt ikesịm utịt—oro edi Armageddon. Udịm mme angel oro ẹtịmde ẹkop odudu ẹyetiene Christ ẹdisobo ererimbot Satan.
Se Ikpanamde
15. Nso ke ikpanam ke emi ima ikọfiọk ke ererimbot emi ọmọn̄ ọsọp esịm utịt?
15 Nso ke ikpanam ke emi ima ikọfiọk ke idiọk ererimbot emi ọmọn̄ ọsọp esịm utịt? Apostle Peter ekewet ete: “Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido uwem ye ke mme edinam uten̄e Abasi!” (2 Pet. 3:11) Itie N̄wed Abasi emi owụt ke ana inen̄ede idụn̄ọde idem nnyịn man ikụt ite ke imodu uwem ekekem ye nte Abasi oyomde inyụn̄ inam mme edinam uten̄e Abasi, emi owụtde nte nnyịn imade Jehovah. Kiet ke otu edinam uten̄e Abasi emi edi ndinen̄ede nsịn idem n̄kwọrọ eti mbụk Obio Ubọn̄ mbemiso utịt edi. Peter ama ewet n̄ko ete: “Utịt kpukpru n̄kpọ amasan̄a ekpere. . . . Ẹdu ke ukpeme ye uduak ndibọn̄ akam.” (1 Pet. 4:7) Nnyịn ndibọn̄ akam nnọ Jehovah kpukpru ini, mben̄e enye ada edisana spirit esie ye esop esie emi odude ke ofụri ererimbot ọnọ nnyịn ndausụn̄, owụt ke imasan̄a ikpere enye inyụn̄ ima enye.
16. Ntak anade inen̄ede inam item Abasi?
16 Akpana nnyịn emi idude uwem ke ndiọkeyo emi inen̄ede inam item Bible emi: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.” (Eph. 5:15, 16) Idiọkido awak idahaemi akan nte akanam edide. Satan osio ediwak n̄kpọ edi mbak mme owo ẹdinam uduak Jehovah m̀mê man ada ọwọn̄ọde mme owo ntịn̄enyịn. Nnyịn emi idide mme asan̄autom Abasi imọfiọk n̄kari esie emi, nnyịn idinyụn̄ iyakke n̄kpọ ndomokiet adian̄ade nnyịn ọkpọn̄ Abasi. Imonyụn̄ idiọn̄ọ se iditịbede ke mîbịghike, ndien imọbuọt idem ye Jehovah ye ke se enye aduakde ndinam.—Kot 1 John 2:15-17.
17. Tịn̄ nte mbon oro ẹdibọhọde ekọn̄ Armageddon ẹdinamde n̄kpọ ke ini ẹdinamde mme akpan̄kpa ẹset.
17 Utịbe utịbe un̄wọn̄ọ oro Abasi ọn̄wọn̄ọde ndinam mme akpan̄kpa ẹset oyosu, sia “ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Bible ọsọn̄ọ etịn̄ ete ke mme akpan̄kpa “ẹyeset.” Nnyịn inyeneke eyịghe ndomokiet iban̄a un̄wọn̄ọ emi sia Jehovah ọn̄wọn̄ọ. Isaiah 26:19 ọdọhọ ete: “Mme akpa-n̄kpa fo ẹyedu uwem. . . . Mbufo emi ẹdụn̄de ke ntan ẹdemede, ẹkwọ . . . ndien isọn̄ ayaman mme [okpo].” Mme ikọ emi ẹma ẹsosu ke ini ikọt Abasi ẹkefiakde ẹnyọn̄ọ obio emana mmọ, ndien emi anam inyene idotenyịn ke mmọ ẹyesu ke ata ata usụn̄ ke obufa ererimbot. Nso n̄kpọ inemesịt ke edidi ntem ndikụt mme akpan̄kpa ẹsetde ẹfiak ẹdidiana ye mme ubon mmọ! Ke akpanikọ, ererimbot Satan emi esesịm utịt ama, ndien obufa ererimbot Abasi enen̄ede ekpere. Mmọdo, ana ika iso idu ke ukpeme!
Nte Afo Emeti?
• Nso ikedi ibuotikọ ukwọrọikọ Jesus?
• Ẹkwọrọ etop Obio Ubọn̄ ẹkesịm m̀mọ̀n̄ idahaemi?
• Ntak ọfọnde idu ke ukpeme?
• Nso ke afo enen̄ede ama ke un̄wọn̄ọ emi odude ke Utom 24:15?
[Mme Mbụme Ukpepn̄kpọ]
[Ekebe/Ndise ke page 16, 17]
EYO AFANIKỌN̄ ESIERE
Ke 2007, Alan Greenspan ama osio n̄wed emi ekerede The Age of Turbulence: Adventures in a New World (Eyo Afanikọn̄: Mme Mfịna Obufa Ererimbot). Greenspan ama anam utom ke n̄kpọ nte isua 20 nte etieibuot ke itieutom emi esisede aban̄a mme itie unịm-okụk ke United States. Greenspan ama etịn̄ nte ererimbot idahaemi okpụhọrede ye ererimbot emi okodude mbemiso 1914. Enye ọdọhọ ete:
“Kpukpru se ẹkewetde mbemiso 1914 ẹwụt ke mme owo ẹma ẹsidu eti uwem ini oro, ẹkpono owo, ntatenyịn onyụn̄ odu. Eketie nte ke kpukpru n̄kpọ ẹmọn̄ ẹfọn ẹma. Ẹma ẹtre unyam ifịn. Eketie nte afai osụhọde ubọk. . . . Ẹma ẹnyene ekese ifiọk ubotn̄kpọ, ẹnam usụn̄ tren, urụk ukopikọ, ikan̄ ilektrik, ẹsio mme senima, ẹnam ubomisọn̄, ye mme n̄kpọ ndụn̄ufọk oro anamde uwem enem. Ifiọk ibọkusọbọ, nti udia, ye eti mmọn̄, ẹma ẹnam mme owo ẹsidu uwem ẹbịghi . . . Mme owo ẹkekere ke n̄kpọ ayakam ọfọfọn akan oro.”
Edi . . . “okposụkedi emi ọyọhọ ekọn̄ ererimbot iba ekenen̄erede abiat n̄kpọ akan akpa ekọn̄ ererimbot, akpa ekọn̄ ererimbot ama enen̄ede otụk mme owo, koro ini emi ke nti ido uwem ye ata ntatenyịn ẹketre. Ke nteti nte n̄kpọ eketiede mbemiso akpa ekọn̄ ererimbot. Ẹkenen̄ede etie nte ke kpukpru n̄kpọ ẹmọn̄ ẹfọn ẹma. Edi nnyịn inyeneke utọ idotenyịn emi mfịn, akam etie nte n̄kpọ idifọnke. Ndi nte n̄kpọ etiede ke ererimbot emi idahaemi idikam isịnke nnyịn ke ukem afanikọn̄ oro akpa ekọn̄ ererimbot akadade edi? Idụhe owo oro ekemede ndibọrọ mbụme emi.”
Greenspan ọdọhọ ke prọfesọ Benjamin M. Anderson (emi akamanade ke 1886, akpa ke 1949) ọkọdọhọ ke ini imọ ikedide eyen ufọkn̄wed, ete: “Ikpọ owo oro ẹtide nte uwem eketiede mbemiso akpa ekọn̄ ererimbot ẹsiyom ndifiak ndu utọ uwem oro. Utọ ifụre oro okodude ini oro idụhe aba.”—Economics and the Public Welfare.
G. J. Meyer esịn ke uyo oro. Enye ekewet ke n̄wed esie emi ekerede A World Undone, emi ẹkesiode ke 2006, ete: “Ẹsidọhọ ke akwa n̄kpọntịbe ‘ẹsikpụhọde kpukpru n̄kpọ.’ Se Akwa Ekọn̄ [emi ẹken̄wanade ke 1914 esịm 1918] akanamde edi oro. Ekọn̄ emi ama okpụhọde kpukpru n̄kpọ ke kpukpru ebiet, okpụhọde ukara ye ini iso mme owo, okpụhọde nte mme owo ẹdade idemmọ, ye nte mmọ ẹdade ererimbot. Eketie nte n̄kpọ eke ẹdọhọde ke ẹbot obufa ererimbot oro mîbietke akani ke usụn̄ ndomokiet.”
[Ndise ke page 18]
Jehovah ọyọdọn̄ mme okopodudu angel esie ẹken̄wana ekọn̄ Armageddon