Yak Ekikere Fo Owụhọ ke Utịp Oro Ẹnịmde Ẹnọ Fi

“Mbebịne utịtmbuba oro man mbọ utịp.”—PHIL. 3:14.

1. Ewe utịp ke apostle Paul okodori enyịn ndibọ?

APOSTLE Paul oro ẹkediọn̄ọde n̄ko nte Saul eyen Tarsus okoto ufọk imọ. Gamaliel emi ekedide ata-ekpep Ibet ekekpep enye ibet mme ete ete esie. (Utom 22:3) Paul ekpekedi akwa ekpeibet, edi enye ama ọkpọn̄ ido ukpono esie akabade edi Christian, onyụn̄ odori enyịn ndibọ utịp nsinsi uwem oro Abasi ọkọn̄wọn̄ọde—oro edi, nditiene n̄kara ke Obio Ubọn̄ heaven nte edidem ye oku oro mîkemeke ndikpa. Obio Ubọn̄ oro ayakara isọn̄ emi ke ini ẹdinamde isọn̄ edi Paradise.—Matt. 6:10; Edi. 7:4; 20:6.

2, 3. Paul akada didie utịp edidu uwem ke heaven?

² Se Paul ekewetde ọnọ mbon Philippi owụt ke enye akada utịp oro ẹdinọde enye ke ata ọsọn̄urua n̄kpọ. Enye ọkọdọhọ ete: “Se ikpedide udori inọ mi, mbat mmọ ke ntakurua ke ntak Christ. Kamse, ke ntak oro, ami ke akpanikọ n̄ko mbat kpukpru n̄kpọ ke ntakurua ke ntak akakan ifiọk Christ Jesus Ọbọn̄ mi. Ke ntak esie mmenyịme kpukpru n̄kpọ ke ntakurua nnyụn̄ mbat mmọ ke mbio.” (Phil. 3:7, 8) Mme n̄kpọ oro ediwak owo ẹsibatde ke ọsọn̄urua—utọ nte enyịn̄, inyene, ubọkọkọ, uwọrọ etop—ke Paul akabat ke ntakurua ke enye ama ekedi edifiọk se Jehovah aduakde ndinam nnọ ubonowo.

³ Se ikenen̄ede ibehe ete mbon ke enye ama ekedi edifiọk Abasi ekedi ndinyene ọsọn̄urua ifiọk Jehovah ye Christ, kpa se Jesus eketịn̄de aban̄a ke akam oro enye ọkọbọn̄de ọnọ Abasi, ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:3) Se Paul eketịn̄de ke Philippi 3:14 owụt ke enye ama enen̄ede oyom nsinsi uwem oro. Enye ọkọdọhọ ete: “Mbebịne utịtmbuba oro man mbọ utịp ikot eke heaven oro Abasi okokotde ebe ke Christ Jesus.” Ofụri ekikere esie okowụhọ ke utịp oro Abasi edinọde enye, oro edi, ndidu uwem nsinsi ke heaven, nnyụn̄ ntiene n̄kara ke Obio Ubọn̄ Abasi.

Ndidu Uwem ke Nsinsi ke Isọn̄

4, 5. Nso utịp ke ẹdinọ ediwak miliọn mbon oro ẹnamde uduak Abasi mfịn?

⁴ Utịp oro ediwak mbon oro ẹnamde uduak Abasi ẹkpesịnde idem ẹbịne edi edidu nsinsi uwem ke obufa ererimbot Abasi. (Ps. 37:11, 29) Jesus ama ọsọn̄ọ ke emi edi akpanikọ. Enye ọkọdọhọ ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matt. 5:5) Jesus ke idemesie edi Akpan owo emi edidade isọn̄ inyene nte Psalm 2:8 owụtde, ndien owo 144,000 ẹyetiene enye ẹkara ke heaven. (Dan. 7:13, 14, 22, 27) Mme erọn̄ en̄wen ‘ẹyeda’ isọn̄ ẹnyene—kpa ikpehe Obio Ubọn̄ emi “ẹketịmde ẹnịm ẹnọ [mmọ] toto ke editọn̄ọ ererimbot.” (Matt. 25:34, 46) Nnyịn imenịm ke emi eyetịbe sia Abasi emi ọn̄wọn̄ọde mme n̄kpọ emi ‘ikemeke ndisu nsu.’ (Titus 1:2) Nnyịn imekeme ndinyene ukem mbuọtidem oro Joshua ekenyenede ke mme un̄wọn̄ọ Abasi ẹyesu. Joshua ọkọdọhọ nditọ Israel ete: “Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.”—Josh. 23:14.

⁵ Uwem oro ididude ke obufa ererimbot Abasi iditiehe nte ikpîkpu uwem oro idude  idahaemi. Edidi ata isio koro ekọn̄, ubiatibet, unana, ufịk, udọn̄ọ, ye n̄kpa ididụhe. Idem eyenen̄ede ọsọn̄ kpukpru owo; mme owo ẹdinyụn̄ ẹdụn̄ ke isọn̄ oro ẹnamde edi paradise. Uwem eyenem akan nte ikerede. Ke akpanikọ, iyokop inemesịt kpukpru usen. Nso akwa utịp ke emi edidi ntem!

6, 7. (a) Didie ke Jesus okowụt se iditịbede ke obufa ererimbot Abasi? (b) Nso ke ẹdinam man idem mbon oro ẹma ẹkpekpan̄a ẹfiak ẹtọn̄ọ uwem obufa?

⁶ Ke ini Jesus okodude ke isọn̄, Abasi ama ọnọ enye edisana spirit ndinam mme utịben̄kpọ, ndien oro ẹkewụt se enye edinamde ke ofụri isọn̄ ke obufa ererimbot. Ke uwụtn̄kpọ, Jesus ama ọdọhọ owo emi ekedide akpauben̄ ke ofụri isua 38 adaha ada asan̄a. Bible ọdọhọ ke ete oro ama asan̄a. (Kot John 5:5-9.) Ini en̄wen, Jesus ama okụt “owo emi [ekedide] nnan toto ke emana” onyụn̄ anam enye okụt usụn̄. Ke ini ẹkebụpde eren emi n̄kpọ ẹban̄a Owo emi akanamde enye okụt usụn̄, enye ama ọbọrọ ete: “Toto ke eset akananam owo ikopke ite owo ekededi atat enyịn owo emi akamanade nnan. Edieke owo emi mîkpotoho Abasi, enye ikpanamke baba n̄kpọ kiet.” (John 9:1, 6, 7, 32, 33) Abasi ọkọnọ Jesus odudu ndinam kpukpru emi. Jesus ama “[esinam] udọn̄ọ okụre mmọ emi ẹyomde usọbọ” ke kpukpru ebiet oro enye akakade.—Luke 9:11.

⁷ Ke adianade ye ndikọk udọn̄ọ nnyụn̄ nnam mme mbụn̄ọ ẹsan̄a, Jesus ama akam anam mme akpan̄kpa ẹset. Ke uwụtn̄kpọ, ke ini eyenan̄wan isua 12 akakpade, ete ye eka esie ẹma ẹnen̄ede ẹfụhọ. Edi Jesus ama ọdọhọ eyenan̄wan oro ete: “N̄kaiferi, ndọhọ fi nte, Daha ke enyọn̄!” Eyenan̄wan oro onyụn̄ adaha ada! Ndi emekeme ndikere nte eketiede ete ye eka esie ye mbon eken oro ẹkedude do ke idem? (Kot Mark 5:38-42.) Ke obufa ererimbot Abasi, ata ediwak owo ẹyekop inemesịt ke ini ediwak biliọn mme akpan̄kpa ẹdisetde, koro Bible ọdọhọ ke “ndinen owo ye mme anam ukwan̄n̄kpọ ẹyeset.” (Utom 24:15; John 5:28, 29) Mmọ ẹyetọn̄ọ uwem obufa ẹnyụn̄ ẹdori enyịn ndika iso ndu uwem ke nsinsi.

8, 9. (a) Nso iditịbe inọ idiọkn̄kpọ oro ikadade imana ito Adam ke Tọsịn Isua Ukara Christ? (b) Nso ke ẹdida ẹbiere ikpe ẹnọ mme akpan̄kpa oro ẹnamde ẹset?

⁸ Mbon oro ẹdinamde ẹset ẹyenyene ifet ndidu uwem. Owo ididaha idiọkn̄kpọ oro mmọ ẹkenamde mbemiso ẹkpan̄ade ibiom mmọ ikpe. (Rome 6:7) Ke Tọsịn Isua Ukara Christ, ẹyeda uwa ufak Christ ẹnam mbon oro ẹkopde item ẹfọn ẹma sụn̄sụn̄, ẹnyụn̄ ẹbọhọ idiọkn̄kpọ Adam ke akpatre. (Rome 8:21) Jehovah “eyemen n̄kpa ke nsinsi; Ọbọn̄ Jehovah [oyonyụn̄] ọkwọhọde kpukpru iso mmọn̄eyet efep.” (Isa. 25:8) Ikọ Abasi ọdọhọ n̄ko ete ke “[ẹyenyụn̄] ẹkûbọde mme n̄wed.” Emi owụt ke ẹyenọ mbon oro ẹdidude uwem ini oro mbufa ntọt. (Edi. 20:12) Ke ini isọn̄ edikabarede edi paradise, “mme andidụn̄ ererimbot [ẹdikpep] se inende.”—Isa. 26:9.

⁹ Owo ididaha idiọkn̄kpọ oro ikadade imana ito Adam ibiere ikpe inọ mbon oro ẹdisetde ẹdi, edi ẹdida se mmọ ke idemmọ ẹdinamde ke ẹma ẹkeset ke n̄kpa ibiere. Ediyarade 20:12 ọdọhọ ete: “Ẹda mme n̄kpọ eke ẹwetde ke n̄wed emi ẹkpe ikpe mme akpan̄kpa nte ekemde ye mme edinam mmọ,” oro edi, se mmọ ẹnamde ke ẹma ẹkeset ke n̄kpa. Emi owụt ke Jehovah enen̄ede edi Abasi edinen ikpe, okop mbọm, onyụn̄ ama ima. Ke adianade do, mbon oro ẹdinamde ẹset mi “iditịghi aba” ofụri afanikọn̄ oro mmọ ẹkebọde ke akani ererimbot emi, “idinyụn̄ idụkke [mmọ] ke esịt.” (Isa. 65:17) Mbufa n̄kpọ oro mmọ ẹdikpepde ye obufa uwem oro ọyọhọde ye nti n̄kpọ idiyakke ndiọi n̄kpọ oro ẹketịbede ẹtịmede mmọ esịt. Mmọ iditịghi kpukpru ndiọi n̄kpọ oro ẹketịbede ke edem. (Edi. 21:4) Ntre ke edinyụn̄ edi ye “akwa otuowo” emi ẹdibọhọde Armageddon.—Edi. 7:9, 10, 14.

10. (a) Uwem editie didie ke obufa ererimbot Abasi? (b) Nso ke afo akpanam man ekikere fo aka iso owụhọ ke utịp oro Abasi enịmde ọnọ fi?

¹⁰ N̄kpa ye udọn̄ọ ididụhe ke obufa ererimbot  Abasi. Isaiah 33:24 ọdọhọ ete: “Andidụn̄ ididọhọke ite, Ndọdọn̄ọ.” Mbon oro ẹdidụn̄de ke obufa isọn̄ ẹdisidemede kpukpru usenubọk ye nsọn̄idem, ẹnyụn̄ ẹdọhọ ete, ‘Mfịn enem ntem, n̄kpọn̄-ọ?’ Mmọ ẹyenyene nti utom ndinam ẹnyụn̄ ẹdu ye mbon oro ẹkerede ẹban̄a mmọ. Utọ uwem emi edi ata enọ! Nnyịn imesịn udọn̄ inọ fi ite okot onyụn̄ etie ekere mme ntịn̄nnịm ikọ emi ẹdude ke Isaiah 33:24 ye 35:5-7. Ndi emekeme ndikụt idemfo do? Ke edide ntre, ekikere fo ayaka iso owụhọ ke utịp oro Abasi enịmde ọnọ fi.

Mbon Oro Mîkowụkke Ekikere Mmọ ke Utịp Oro

11. Tịn̄ nte n̄kpọ ọkọfọnde ye Solomon ke nsonso ini ukara esie.

¹¹ Ke emi ima ikọfiọk utịp oro Abasi enịmde ọnọ nnyịn, ana iyak ekikere nnyịn enen̄ede owụhọ ke utịp oro mbak nnyịn iditaba enye. Ke uwụtn̄kpọ, ke ini Solomon ọkọtọn̄ọde ndikara Israel, enye ama osụhọde idem ọbọn̄ akam eben̄e Abasi ifiọk ye eti ibuot man enye etịm ekpe ikpe ikọt Esie. (Kot 1 Ndidem 3:6-12.) Bible etịn̄ nte Abasi ọkọbọrọde akam esie, ete: “Abasi ọnọ Solomon eti ibuot ye asian eti-eti.” Ke akpanikọ, “ifiọk Solomon onyụn̄ awak akan ifiọk kpukpru nditọ edem usiaha-utịn, ye ofụri ifiọk Egypt.”—1 Ndi. 4:29-32.

12. Nso item ke Jehovah ọkọnọ mbon oro ẹdidide ndidem ke Israel?

¹² Jehovah ama odụri mbon oro ẹdidide ndidem Israel utọn̄ ete ‘ẹkûkọ ediwak horse ẹnọ idem,’ ẹkûnyụn̄ ‘ẹdọ ediwak iban, mbak esịt mmọ edikabade’ ọkpọn̄ Abasi. (Deut. 17:14-17) Edidem oro ọkọkọde ediwak horse okowụt ke imọ iberi edem ke udịmekọn̄ imọ edinyan̄a idụt mmimọ, utu ke Jehovah emi edide Andinyan̄a. Ikonyụn̄ ifọnke edidem ọdọ ediwak iban, sia ndusụk iban emi ẹkeme  ndito idụt mme okpono ndem oro ẹkekande Israel ẹkụk, mmọ ẹnyụn̄ ẹkeme ndiwọn̄ọde edidem esịt n̄kpọn̄ Jehovah.

13. Didie ke Solomon okotop se ẹkenọde enye ọduọk?

¹³ Solomon ikanamke mme item emi. Enye akakam anam se Jehovah ọkọdọhọde ndidem ẹkûnam. Enye ama ọkọ ediwak tọsịn horse ye mbio horse ọnọ idem. (1 Ndi. 4:26) Onyụn̄ ọdọ iban 700 ye ibanesa 300, ediwak ke otu iban emi ẹketo idụt mme okpono ndem emi ẹkedude ẹkan mmọ ẹkụk. Iban emi ẹma “ẹyụt enye esịt, ẹsịn enye akabade etiene abasi efen; ndien ofụri esịt esie isan̄ake ye Jehovah.” Solomon ama esitiene atuak ibuot ọnọ nsunsu abasi idụt mme okpono ndem oro nte isen iban esie ẹkekpepde enye. Emi ama anam Jehovah ọdọhọ ke imọ ‘iditreke ndiwai Solomon ubọn̄ ke ubọk.’—1 Ndi. 11:1-6, 11.

14. Nso ikedi utịp nsọn̄ibuot Solomon ye eke nditọ Israel?

¹⁴ Solomon ikekereke aba iban̄a ọsọn̄urua ifet oro ẹkenọde enye, oro edi, ndida ke ibuot ata Abasi. Enye ama ọduọ enyịne ke ukpono ndem. Nte ini akakade, ofụri idụt oro ẹma ẹkabade mbon mfiakedem; ntak edi oro ẹkesobode mmọ ke isua 607 M.E.N. Kpa ye oro mme Jew ẹkefiakde ẹdituak ibuot ẹnọ Abasi, se mmọ ẹkenamde ke ediwak isua ikie ẹma ẹkebe ama anam Jesus ọdọhọ ete: “Ẹyebọ mbufo obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.” Se ikonyụn̄ itịbede edi oro. Jesus ama ọdọhọ ete: “Sese! Ẹmekpọn̄ ufọk mbufo ẹnọ mbufo.” (Matt. 21:43; 23:37, 38) Mfiakedem ama anam mmọ ẹtaba akwa ifet edida ke ibuot ata Abasi. Mmọdo, mbonekọn̄ Rome ẹma ẹsobo Jerusalem ye temple esie ke isua 70 E.N, ndien ediwak mme Jew oro ẹkesụhọde ẹma ẹkabade ẹdi ifịn.

15. Mmanie ẹketop akwa ifet oro mmọ ẹkenyenede ẹduọk?

¹⁵ Judas Iscariot ekedi kiet ke otu apostle Jesus 12. Judas ama okop n̄wọrọnda n̄kpọ oro Jesus ekekpepde onyụn̄ okụt mme utịben̄kpọ oro Jesus akadade odudu edisana spirit Abasi anam. Kpa ye oro, Judas ikekpemeke esịt esie. Ẹkedọhọ enye akama ekebe oro Jesus ye mme apostle esie 12 ẹkesịnde okụk. ‘Edi sia enye ekedide inọ, enye ama esision̄o okụk oro ẹkesịnde ke esịt.’ (John 12:6) Edi idiọkitọn̄ esie ama efri ifiom ke ini enye okodụkde odu ye mbọn̄ oku ndinyam Jesus ke mbak silver 30. (Matt. 26:14-16) Owo en̄wen oro akawahade ọkpọn̄ usụn̄ ekedi Demas emi ekedide nsan̄autom apostle Paul. Enye ikekpemeke esịt esie. Paul ekewet ete: “Demas ama ọkpọn̄ mi sia enye amade editịm n̄kpọ emi.”—2 Tim. 4:10; kot Mme N̄ke 4:23.

Se Nnyịn Owo Kiet Kiet Ikpepde

16, 17. (a) Owo oro ọbiọn̄ọde nnyịn ọsọn̄ odudu adan̄a didie? (b) Nso idin̄wam nnyịn ikan se ededi oro Satan emende ebịne nnyịn?

¹⁶ Kpukpru mme asan̄autom Abasi ẹkpenyene ndinen̄ede ntie n̄kere mme owo emi Bible etịn̄de aban̄a mi, koro Bible ọdọhọ ke “mme n̄kpọ emi ẹkewọrọ mmọ nte uwụtn̄kpọ, ẹkenyụn̄ ẹwet mmọ nte ntọt ẹnọ nnyịn emi idude ke utịt editịm n̄kpọ emi.” (1 Cor. 10:11) Nnyịn idu uwem idahaemi ke mme akpatre usen idiọk editịm n̄kpọ emi.—2 Tim. 3:1, 13.

¹⁷ Satan kpa Devil emi edide “abasi editịm n̄kpọ emi” ọfiọk ke “ini imọ edi ibio.” (2 Cor. 4:4; Edi. 12:12) Enye ayanam kpukpru se enye ekemede man ikọt Jehovah ẹduọ. Satan akara ererimbot emi ye ndutịm usuanetop ererimbot emi. Jehovah ọnọ ikọt esie se inen̄erede  isọn̄ odudu ikan oro—kpa “odudu eke ebede ukeme owo.” (2 Cor. 4:7) Nnyịn imodori enyịn ke Abasi ọyọnọ nnyịn odudu emi man ikan idomo ekededi oro Satan emende ebịne nnyịn. Ntak edi oro Bible etemede ete ibọn̄ akam kpukpru ini inyụn̄ inịm ke Jehovah ‘ayayak edisana spirit esie ọnọ mbon oro ẹben̄ede enye.’—Luke 11:13.

18. Didie ke nnyịn ikpanam n̄kpọ ke ererimbot emi?

¹⁸ Ndifiọk ke ẹmọn̄ ẹsosobo ofụri editịm n̄kpọ Satan emi, ye nte ke ata mme Christian ẹyebọhọ, ọsọn̄ọ nnyịn idem. Akpa John 2:17 ọdọhọ ete: “Ererimbot ke ebebe efep kpasụk ntre n̄ko ye mbumek esie, edi owo eke anamde uduak Abasi ododu ke nsinsi.” Ke ntre, ekpenen̄ede edi ndisịme asan̄autom Abasi ekededi ndikere ke enyene se idude ke ererimbot emi, oro ọsọn̄de urua akan itie ebuana esie ye Jehovah! Ererimbot emi Satan akarade mi ebiet nsụn̄ikan̄ emi esịpde ke akpa. Edi Jehovah enịm esop esie nte “ubom unyan̄a-uwem” ọnọ mme anam-akpanikọ asan̄autom esie. Nte isan̄ade ikpere obufa ererimbot Abasi, imodori enyịn ndikụt nte ntịn̄nnịm ikọ Bible emi edisude. Enye okot ete: “Ẹyekpok mme idiọk owo ẹfep: edi mmọ eke ẹbetde Jehovah ẹyeda isọn̄ ẹnyene.” (Ps. 37:9) Kpukpru nnyịn ikpakam inen̄ede iwụk ekikere nnyịn ke utịbe utịbe utịp emi.

Nte Afo Emeti?

• Didie ke Paul akada utịp oro ẹkenịmde ẹnọ enye?

• Nso ke ẹdida ẹbiere ikpe ẹnọ mbon oro ẹdidụn̄de ke isọn̄ ke nsinsi?

• Nso ke akpanam idahaemi?

[Mme Mbụme Ukpepn̄kpọ]

[Ndise ke page 12, 13]

Ndi emesikụt idemfo ke Paradise ke ini okotde ndusụk itie ke Bible?