Nyene Ukpono Nọ Jesus—Kpa Akamba David ye Akamba Solomon

“Sese! se ikponde ikan Solomon odu mi.”—MATT. 12:42.

1, 2. Ntak emi akpakpade owo idem nte ke Jehovah ọkọdọhọ Samuel ekeyet David aran enịm nte edidem-e?

PRỌFET Samuel ikekereke ke utọ ekpri ekpemerọn̄ emi ekpedi edidem. Akan oro, enye okoto Bethlehem emi ekedide ekpri obio “ke otu mme tọsịn Judah.” (Mic. 5:2) Kpa ye oro, Abasi ama ọdọn̄ prọfet Samuel ete ekeyet enye aran enịm nte edidem Israel.

² Ete esie, Jesse ekedi anam-akpanikọ asan̄autom Jehovah. Enye okonyụn̄ enyene nditọiren itiaita. Samuel ikekereke ke Jehovah ekpemek David, emi ekekpride akan ke otu nditọiren Jesse, ndidi edidem Israel. Enye ikakam idụhe ke ufọk ke ini Samuel ekedide ufọk mmọ ndiyet owo mmọ kiet aran nnịm nte obufa edidem Israel. Edi Jehovah ama ọdọhọ enye eyet David aran sia David ke Jehovah ekemek.—1 Sam. 16:1-10.

3. (a) Nso ke Jehovah esise ke ini enye odụn̄ọrede owo? (b) Nso ikodụk David idem ke ẹma ẹkeyet enye aran?

 ³ Jehovah ama okụt se Samuel mîkekemeke ndikụt. Abasi ama okụt esịt David, onyụn̄ ama se enye okokụtde. Abasi isisehe owo iso, edi esikam ese esịt. (Kot 1 Samuel 16:7.) Ntre, ke ini Samuel okokụtde ke Jehovah imekke ndomokiet ke otu nditọiren Jesse itiaba, enye ama ọdọhọ ẹkekot ekperedem eyen esie ke ikọt ubọkerọn̄ ẹdi. Bible ọdọhọ ete: “Ndien [Jesse] ọdọn̄ ẹkeda [David] ẹdi. Enye onyụn̄ eyịbe, onyụn̄ eye iso, onyụn̄ ọfọn ndise. Ndien Jehovah ọdọhọ enye, Daha ke enyọn̄, yet enye aran, koro edide emi edi enye. Ntre Samuel ada nnụk aran eyet enye idem ke otu nditọ-ete esie: ndien spirit Jehovah odụk David ke idem toto ke usen oro, aka iso.”—1 Sam. 16:12, 13.

David Akada Aban̄a Christ

4, 5. (a) Tịn̄ ndusụk n̄kpọ oro Jesus adade ebiet David. (b) Ntak emi ẹkotde Jesus Akamba David-e?

⁴ Jesus okonyụn̄ amana ke Bethlehem obio David ke n̄kpọ nte isua 1,100 ẹma ẹkebe tọn̄ọ David akamana. Ediwak owo ikonyụn̄ ikereke ke Jesus ekpedi edidem. Jesus ikebietke utọ edidem oro ediwak nditọ Israel ẹketiede ẹbet. Edi Jesus ke Jehovah ekemek kpa nte enye ekemekde David. Jehovah ama ama enye n̄ko nte akamade David. * (Luke 3:22) Spirit Jehovah ama onyụn̄ ‘odụk Jesus ke idem n̄ko.’

⁵ Enyene mme n̄kpọ en̄wen oro Jesus adade ebiet David. Ke uwụtn̄kpọ, Ahithophel emi ekedide owo item David ama ada David ọnọ, kpa nte Judas Iscariot emi ekedide kiet ke otu mme apostle Jesus okonyụn̄ adade enye ọnọ. (Ps. 41:9; John 13:18) David ye Jesus ẹma ẹnen̄ede ẹfịbe ufụp ẹban̄a ufọk Jehovah. (Ps. 27:4; 69:9; John 2:17) Jesus okonyụn̄ edi adiakpa David. Mbemiso ẹkemande Jesus, angel ọkọdọhọ eka esie ete: “Jehovah Abasi ọyọnọ enye ebekpo ete esie David.” (Luke 1:32; Matt. 1:1) Nte ededi, Jesus enen̄ede okpon akan David sia kpukpru ntịn̄nnịm ikọ oro ẹban̄ade Messiah ẹdisude enye ke idem. Enye edi Akamba David, kpa Edidem Messiah oro ẹketiede ẹbet.—John 7:42.

Tiene Edidem Oro Edide Eti Ekpemerọn̄

6. Nso ke David akanam emi owụtde ke enye ekedi eti ekpemerọn̄?

⁶ Jesus okonyụn̄ edi ekpemerọn̄. Nso ke ẹda ẹdiọn̄ọ owo emi edide eti ekpemerọn̄? Eti ekpemerọn̄ esikpeme erọn̄ esie kpukpru ini, ọnọ mmọ udia, inyụn̄ iyakke n̄kpọ anam mmọ. (Ps. 23:2-4) David ama esinen̄ede ekpeme erọn̄ ete esie ke ini enye ekedide eyenọwọn̄. Enye ama akam enyịme ndikpa man anyan̄a erọn̄ ete esie oro lion ye bear ẹkeyomde ndita.—1 Sam. 17:34, 35.

7. (a) Nso ikanam David ekeme ndinam utom esie nte edidem? (b) Didie ke Jesus okowụt ke idi Eti Ekpemerọn̄?

⁷ Ofụri isua oro David ekesitiede ke ikọt ekpeme erọn̄, ọdọdọk, ososụhọ obot, ama etịm enye idem ndise mban̄a ofụri idụt Israel. * (Ps. 78:70, 71) Jesus n̄ko ama owụt ke imọ idi eti ekpemerọn̄. Jehovah ọnọ enye odudu ye ndausụn̄ ndikpeme mme erọn̄ esie, oro edi, “ekpri otuerọn̄” ye “mme erọn̄ en̄wen.” (Luke 12:32; John 10:16) Mmọdo, Jesus edi Eti Ekpemerọn̄. Enye enen̄ede ọfiọk mme erọn̄ esie tutu esikot mmọ ke enyịn̄. Ke ini enye okodude ke isọn̄, enye ama esinam n̄kpọ ọnọ mme erọn̄ esie, ndien emi okowụt adan̄a nte enye akamade mmọ. (John 10:3, 11, 14, 15) Jesus ama anam se David mîkpekemeke ndinam tutu  amama. Uwa ufak esie ọnọ ubonowo edinyan̄a. Idụhe se idikpande enye ndikpeme “ekpri otuerọn̄” esie tutu mmọ ẹnyene uwem eke mîkemeke ndikpa. Enye idinyụn̄ itreke ndikpeme mme “erọn̄ en̄wen” tutu mmọ ẹnyene nsinsi uwem ke obufa ererimbot oro ndiọi owo mîdidụhe.—Kot John 10:27-29.

Tiene Edidem Oro Akande

8. Ntak emi ikpọdọhọde ke David ekedi edidem emi akakande?

⁸ David ekedi edidem oro mîkopke ndịk ndin̄wana ekọn̄ man ekpeme ikọt Abasi. ‘Jehovah ama onyụn̄ anyan̄a enye ke kpukpru ebiet emi enye akakade.’ Ke eyo ukara David ke ẹketat adan̄a idụt Israel ẹto akpa Egypt esịm akpa Euphrates. (2 Sam. 8:1-14) Jehovah ọkọnọ enye odudu. Bible ọdọhọ ete: “Enyịn̄ David asuana ke kpukpru mme idụt: Jehovah onyụn̄ anam kpukpru mme idụt ẹbak enye.”—1 Chron. 14:17.

9. Tịn̄ nte Jesus emi Abasi ekemekde nte edidem akakande.

⁹ Jesus ama enyene uko nte Edidem David. Ke Abasi ama ekemek enye ndidi Edidem, enye ama owụt ke imenyene odudu ikan mme demon, onyụn̄ ebịn mme demon osion̄o ke idem mbon oro mmọ ẹketụhọrede. (Mark 5:2, 6-13; Luke 4:36) Idem akwa asua Abasi, Satan kpa Devil ikenyeneke odudu ke idem Jesus. Jehovah ama ọnọ Jesus odudu ndikan ererimbot emi esịnede ke ubọk Satan.—John 14:30; 16:33; 1 John 5:19.

10, 11. Nso ke Jesus anam ke heaven nte Edidem emi edide An̄wanaekọn̄?

¹⁰ Ke se ikande isua 60 ẹma ẹkebe tọn̄ọ Jesus ekeset afiak ọnyọn̄ heaven, ẹma ẹwụt apostle John ke n̄kukụt ke Jesus edi Edidem ke heaven ye An̄wanaekọn̄. John ewet ete: “Sese! afia enan̄ mbakara; ndien andidoro enye ke edem akama utịgha; ẹnyụn̄ ẹnọ enye anyanya, ndien enye ọwọrọ aka ndikan onyụn̄ okụre edikan esie.” (Edi. 6:2) Jesus awat afia enan̄ mbakara oro. ‘Ẹkenọ enye anyanya’ ke 1914, kpa ini emi ẹkedoride enye ke ebekpo nte edidem ke Obio Ubọn̄ heaven. Ke oro ama ekebe, ‘enye ama ọwọrọ aka ndikan.’ Ke akpanikọ, Jesus edi edidem emi akande ukem nte David. Esisịt ini ke ẹma ẹkedori enye ke ebekpo nte edidem Obio Ubọn̄ Abasi, enye ama akan Satan ke ekọn̄ onyụn̄ osio enye ye mme demon esie ọduọn̄ọ ke isọn̄. (Edi. 12:7-9) Enye ayaka iso awat enan̄ mbakara emi tutu enye “okụre edikan esie” ke ini enye edisobode idiọk ererimbot Satan emi ofụri ofụri.—Kot Ediyarade 19:11, 19-21.

¹¹ Jesus edi edidem emi esituade owo mbọm ukem nte David, ndien enye eyekpeme “akwa otuowo” tutu mmọ ẹbe Armageddon. (Edi. 7:9, 14) N̄ko-n̄ko, ke ini Jesus ye owo 144,000 oro ẹdinamde ẹset ẹdikarade, ẹyenam “ndinen owo ye mme anam ukwan̄n̄kpọ [ẹset] ke n̄kpa.” (Utom 24:15) Mbon oro ẹdinamde ẹset ẹyenyene ifet ndika iso ndu uwem ke nsinsi mi ke isọn̄. Nso utịbe utịbe ini iso ina ibet mmọ ntem! Nnyịn ikpakam ibiere ndika iso ‘nnam nti n̄kpọ’ man ikpetiene idu ke ini oro nti owo emi ẹsụkde ibuot ẹnọ Akamba David ẹdidụn̄de ke isọn̄.—Ps. 37:27-29.

Ẹbọrọ Akam Solomon

12. Nso ke Solomon ekeben̄e Abasi?

¹² Solomon eyen David okonyụn̄ ada aban̄a Jesus. * Ke ini Solomon ekedide edidem, Abasi ama ọdọhọ enye ke ndap ke imọ iyọnọ enye se ededi oro enye ediben̄ede. Utu ke ndiben̄e inyene, odudu, ye anyan uwem, Solomon ọkọdọhọ Jehovah ete: “Kam nọ mi eti ibuot ye ifiọk, man n̄wọrọ ke iso mbio emi, nnyụn̄ ndụk: koro anie edikpe [ikpe] akwa ikọt fo emi?” (2 Chron. 1:7-10)  Jehovah ama ọbọrọ akam Solomon.—Kot 2 Chronicles 1:11, 12.

13. Ntak emi ikpọdọhọde ke idụhe owo emi ekenyenede ifiọk nte Solomon, ndien anie ọkọnọ enye ifiọk?

¹³ Solomon ama enyene ifiọk akan mbon eyo esie ke ofụri ini emi enye akanamde akpanikọ ọnọ Jehovah. Enye ama eke “tọsịn n̄ke ita.” (1 Ndi. 4:30, 32, 34) Ediwak n̄ke emi ẹdu ke Bible, ndien enye ke enyenyene ufọn ọnọ mbon oro ẹyomde ifiọk mfịn. Ọbọn̄ an̄wan Sheba ama oto ebiet emi oyomde usụn̄ ebe itiat 1,500 aka ndidomo “enye ke n̄ke.” Ikọ ọniọn̄ Solomon ye inyene obio ubọn̄ esie ama akpa enye idem. (1 Ndi. 10:1-9) Bible asiak Owo emi ọkọnọde Solomon ifiọk, ete: “Ndien ofụri ererimbot ẹyom iso Solomon, kpan̄ ẹkpekop ifiọk esie, emi Abasi ekesịnde enye ke esịt.”—1 Ndi. 10:24.

Tiene Edidem Emi Enyenede Ọniọn̄

14. Ntak emi Bible ọdọhọde ke Jesus ‘okpon akan Solomon’?

¹⁴ Jesus Christ kpọt enyene ifiọk akan Solomon, ndien enye ọkọdọhọ ke imọ ‘imokpon ikan Solomon.’ (Matt. 12:42) Jesus eketịn̄ “ikọ nsinsi uwem.” (John 6:68) Ke uwụtn̄kpọ, Ukwọrọikọ oro enye ọkọkwọrọde ke Obot enen̄ede anam mme edumbet oro ẹdude ke ndusụk n̄ke Solomon an̄wan̄a. Solomon ama asiak mme n̄kpọ oro ẹkemede ndinọ mbon oro ẹtuakde ibuot ẹnọ Jehovah inemesịt. (N̄ke 3:13; 8:32, 33; 14:21; 16:20) Jesus ọkọdọhọ ke mme n̄kpọ eke spirit ye edisu un̄wọn̄ọ Abasi ẹsinọ owo inemesịt. Enye ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit, koro obio ubọn̄ heaven enyenede mmọ.” (Matt. 5:3) Mbon oro ẹnamde se Jesus ekekpepde ẹsinen̄ede ẹsan̄a ẹkpere Jehovah emi edide “obube mmọn̄ uwem.” (Ps. 36:9; N̄ke 22:11; Matt. 5:8) Christ edi “ọniọn̄ Abasi.” (1 Cor. 1:24, 30) Jesus Christ emi edide Edidem ye Messiah enyene “spirit eti ibuot.”—Isa. 11:2.

15. Didie ke nnyịn ikeme ndikọ ifiọk Abasi?

¹⁵ Didie ke nnyịn emi itienede Akamba Solomon ikeme ndikọ ifiọk Abasi? Sia ifiọk Jehovah odude ke Ikọ esie, ana isịn idem ikpep Bible, akpan akpan mme ikọ Jesus inyụn̄ itie ikere se ikpepde. (N̄ke 2:1-5) Ke adianade do, ana ika iso iben̄e Jehovah ọnọ nnyịn ifiọk. Ikọ Abasi ọdọhọ ke Abasi ọyọbọrọ akam oro ibọn̄de ke ofụri esịt iben̄e un̄wam. (Jas 1:5) Edisana spirit ayanam nnyịn ikụt ọsọn̄urua ifiọk Abasi emi ekemede ndin̄wam nnyịn ke ini inyenede mfịna onyụn̄ an̄wam nnyịn inam nti ubiere. (Luke 11:13) Ẹkenyụn̄ ẹkot Solomon ‘ọkwọrọikọ emi ekpepde mbio obio ifiọk.’ (Eccl. 12:9, 10) Jesus emi edide Ibuot esop Christian onyụn̄ edi ọkwọrọikọ ọnọ ikọt esie. (John 10:16; Col. 1:18) Mmọdo, nnyịn ikpenyene ndisidụk mme mbono esop, kpa ebiet emi ‘ẹsikpepde nnyịn n̄kpọ kpukpru ini.’

16. Nso ke Jesus ada ebiet Solomon?

¹⁶ Edidem Solomon ama anam ediwak n̄kpọ. Enye ama anam ndutịm man ẹbọp mme n̄kpọ ke obio, ẹbọp ufọk edidem, obio unịmn̄kpọ, mme obio chariot, mme obio mbon horse, ẹsiak usụn̄, ẹnyụn̄ ẹnam n̄kpọdiọhọ mmọn̄. (1 Ndi. 9:17-19) Mme n̄kpọ emi enye akanamde ẹma  ẹnyene ufọn ẹnọ kpukpru mbio obio esie. Jesus n̄ko asiak esop esie odori ke enyọn̄ “akamba itiat.” (Matt. 16:18) Enye n̄ko ayada mbon oro ẹdibọpde n̄kpọ ke obufa ererimbot usụn̄.—Isa. 65:21, 22.

Tiene Ọbọn̄ Emem

17. (a) Nso n̄wọrọnda n̄kpọ ikodu ke eyo ukara Solomon? (b) Nso ke Solomon mîkekemeke ndinam?

¹⁷ Ẹda enyịn̄ oro Solomon ẹto ikọ emi ọwọrọde “emem.” Edidem Solomon akakara Jerusalem emi ọwọrọde, “Obio Ediwak Emem.” Orụk emem oro akanam mîdụhe ke Israel ama odu ke ofụri isua 40 emi enye akakarade. Bible ọdọhọ ke “Judah ye Israel [ẹkedụn̄ọ] ke ifụre, kpukpru owo ke idak vine mmọ ye eto fig mmọ, ọtọn̄ọde ke Dan tutu esịm ke Beer-sheba, ke ofụri eyo Solomon.” (1 Ndi. 4:25) Kpa ye ofụri ifiọk emi Solomon ekenyenede, enye ikekemeke ndinam ikọt esie ẹbọhọ udọn̄ọ, idiọkn̄kpọ, ye n̄kpa. Edi Akamba Solomon ayanyan̄a ikọt esie osio ke kpukpru emi.—Kot Rome 8:19-21.

18. Mme edidiọn̄ ewe ke nnyịn inyene ke esop Abasi?

¹⁸ Nnyịn n̄ko imenyene emem ke esop Abasi. Nnyịn imodu ke emem ye Abasi ye nditọete nnyịn ke paradise eke spirit emi. Kop se Isaiah eketịn̄de aban̄a paradise eke spirit oro nnyịn idude idahaemi. Enye ọkọdọhọ ete: “Ndien mmọ ẹyeda ofụt mmọ ẹdom n̄kpọ ufụn̄ isọn̄, ẹda eduat mmọ ẹdom ikwa udiọn̄ vine: idụt idimenke ofụt itiene idụt, mmọ idinyụn̄ ikpepke aba ekọn̄.” (Isa. 2:3, 4) Edieke iyakde spirit Abasi ada nnyịn usụn̄, nnyịn iyanam emem aka iso odu ke paradise eke spirit emi.

19, 20. Ntak emi ikpokopde idatesịt?

¹⁹ Edi ini iso ayakam ọfọfọn akan emi. Ke ini Jesus edikarade, nti owo ẹyenyene orụk emem oro akanam mîdụhe ke ererimbot, ẹyenyụn̄ ẹnam mmọ ‘ẹbọhọ ufụn idiọkn̄kpọ’ sụn̄sụn̄ tutu mmọ ẹfọn ẹma. (Rome 8:21) Mmọ ẹma ẹbe akpatre udomo ke utịt Tọsịn Isua Ukara Christ, “mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” (Ps. 37:11; Edi. 20:7-10) Ke akpanikọ, ukara Jesus Christ ayakan eke Solomon ke usụn̄ oro inua mîkemeke ndibụk!

²⁰ Kpa nte nditọ Israel ẹkekopde inemesịt ke eyo Moses, David, ye Solomon, nnyịn iyakam ikop idatesịt oro okponde akan oro ke ini emi Christ edikarade. (1 Ndi. 8:66) Ekọm enyene Jehovah emi ọnọde nnyịn ikpọn̄-ikpọn̄ edibon Eyen esie emi edide Akamba Moses, David, ye Solomon!

[Mme Ikọ Idakisọn̄]

Nte Afo Emekeme Ndinam An̄wan̄a?

• Nso inam Jesus edi Akamba David?

• Nso inam Jesus edi Akamba Solomon?

• Ntak emi ekpenyenede ukpono ọnọ Jesus emi edide Akamba David ye Akamba Solomon?

[Mme Mbụme Ukpepn̄kpọ]

[Ndise ke page 31]

Ifiọk oro Abasi ọkọnọde Solomon akada aban̄a ifiọk oro Enye ọnọde Jesus, kpa Akamba Solomon

[Ndise ke page 32]

Ukara Jesus ayakan eke Solomon ye eke David ke usụn̄ oro inua mîkemeke ndibụk!