Kpebe Nsọn̄ọnda Ittai

“MME utom fo ẹkponi ẹnyụn̄ ẹdi utịbe, Jehovah Abasi, Ata Ọkpọsọn̄. Mme usụn̄ fo ẹnen ẹnyụn̄ ẹdi akpanikọ, nsinsi Edidem. Anie mîdibakke fi, Jehovah, inyụn̄ inọ enyịn̄ fo ubọn̄, koro afo ikpọn̄ enyene nsọn̄ọnda?” Ikwọ oro “mbon oro ẹkande ẹbọhọ idiọk unam ye mbiet esie” ẹkekwọde mi anam ifiọk nsọn̄ọnda Abasi. (Edi. 15:2-4) Jehovah oyom mme andituak ibuot nnọ enye ẹkpebe imọ ẹnyụn̄ ẹtiene ẹsọn̄ọ ẹda.—Eph. 4:24.

Edi Satan kpa Devil ke anam ofụri se enye ekemede man adian̄ade mme asan̄autom Abasi ọkpọn̄ Abasi oro mmọ ẹtuakde ibuot ẹnọ. Edi ediwak mmọ ke ẹsọsọn̄ọ ẹda ẹnam n̄kpọ Abasi kpa ye afanikọn̄. Nnyịn imokop inemesịt ndifiọk ke utọ nsọn̄ọnda emi enen̄ede ọsọn̄ urua ke enyịn Jehovah. Ke akpanikọ, Bible asian nnyịn ke “Jehovah [ama] edinen ikpe, ndien ikpọn̄ke mbon-ima esie; eyekpeme mmọ ke nsinsi.” (Ps. 37:28) Jehovah ama anam ẹwet mbụkuwem mbon oro  ẹkesọn̄ọde ẹda ke Bible man an̄wam nnyịn itiene isọn̄ọ ida. Kiet ke otu mbon nsọn̄ọnda emi edi Ittai emi okotode Gath.

‘Esenowo ye Owo Emi Efehede Ọkpọn̄ Obio’

Etie nte Ittai okoto Gath emi okodude ke Philistia, kpa obio Goliath ye ọwọrọetop mme asua Israel eken. Akpa ini oro Bible etịn̄de n̄kpọ aban̄a Ittai, emi ekedide ata an̄wanaekọn̄, edi ini emi Absalom okoyomde ndibọ Edidem David ukara. Ittai ye iren Philistia 600 oro ẹketienede enye ẹkefefehe ẹkpọn̄ obio mmọ ẹdidịbe ke mbọhọ Jerusalem.

Ekeme ndidi se ikọwọrọde Ittai ye ikọt esie ama eti David ini emi enye ye nditọ Israel 600 oro ẹkedide mme an̄wanaekọn̄ ẹkefehede ẹkpọn̄ obio mmọ ẹkesịm Philistia, emi ekedide obio Achish, edidem Gath. (1 Sam. 27:2, 3) Nso ke Ittai ye ikọt esie ẹdinam ke emi David ye ikọt esie ẹfehede ke ntak emi Absalom eyen esie oyomde ndibọ enye ukara? Ndi mmọ ẹyewọn̄ọde ẹda ye Absalom, mîdịghe, ndi ẹdida ke idemmọ, m̀mê ẹdida ye David ye ikọt esie?

Tie kere nte David ekefehede ọkpọn̄ Jerusalem ekesịm ebiet emi ẹkotde Beth-merhak, emi ọwọrọde “Ufọk Emi Oyomde Usụn̄.” Etie nte akpatre ufọk ke Jerusalem okodu do ke n̄kan̄ Obot Olive mbemiso ebede Itịghede Kidron. (2 Sam. 15:17) Mi ke David okodụn̄ọde mbonekọn̄ esie kiet kiet nte mmọ ẹsan̄ade ẹbe. Kamse, ke adianade ye mme anam-akpanikọ nditọ Israel, kpukpru mme Cherethite ye kpukpru mme Pelethite ye kpukpru nditọ Gath—Ittai ye mbonekọn̄ esie owo 600 ẹkedu ye David.—2 Sam. 15:18.

Mbọm Ittai ama enen̄ede anam David tutu enye ọdọhọ Ittai ete: “Ke didie ke afo n̄ko oyom nditiene nnyịn n̄ka? Fiak ka ketie ye edidem [etie nte Absalom ke David okokot edidem mi]: koro afo edide esen owo, omonyụn̄ ọkpọn̄ edem mbufo oyom ebiet idụn̄ fo. Afo ekedi n̄kpọn̄; nte ọfọn mi ndiyak fi asan̄a ediyo ye nnyịn mfịn? . . . Fiak, nyụn̄ da nditọ-usọ fiak n̄ko: yak ima ye akpanikọ ẹsụk ẹdu ye afo.”—2 Sam. 15:19, 20.

Ittai ama owụt ke imọ idi ata owo nsọn̄ọnda. Enye ọkọbọrọ David ete: “Ma uwem Jehovah, ye uwem ọbọn̄ mi edidem, ke ebiet eke ọbọn̄ mi edidem edidude, edide ke n̄kpa, onyụn̄ edide ke uwem, ke owo fo edidu n̄ko.” (2 Sam. 15:21) Ekeme ndidi utọ nsọn̄ọnda emi ama eti David nsọn̄ọnda oro eka-eka eka esie Ruth, ekenyenede. (Ruth 1:16, 17) Se Ittai eketịn̄de ama enen̄ede otụk David tutu enye ọdọhọ Ittai ete: “San̄a be” Itịghede Kidron emi. “Ndien Ittai asan̄a ebe, ye kpukpru ikọt esie, ye kpukpru nditọwọn̄ emi ẹdude ye enye.”—2 Sam. 15:22.

“Ndida Nnọ Nnyịn Item”

N̄wed Rome 15:4 ọdọhọ ete: “Ẹkewet kpukpru n̄kpọ oro ẹkewetde ke ini edem ndida nnọ nnyịn item.” Mmọdo, akpana ibụp idem nnyịn ite, ‘Nso ke ikeme ndikpep nto Ittai?’ Kere ban̄a se ikemede ndikanam enye ọsọn̄ọ ada ye David. Kpa ye oro Ittai ekedide owo emi ekefehede ọkpọn̄ obio, enye ama ọfiọk ke Jehovah edi odu-uwem Abasi, ye nte ke David edi enye emi Jehovah eyetde aran. Enye ikonyụn̄ iyakke usua oro okodude ke ufọt nditọ Israel ye mbon Philistia ekịm enye enyịn. Enye ikadaha David n̄kukụre nte owo emi okowotde Goliath, akwa owoekọn̄ mmọ ye nditọ obio mmọ eken. (1 Sam. 18:6, 7) Ittai akada David nte owo emi amade Jehovah, ndien enyene ndidi enye ama ọfiọk ke David edi eti owo. Emi ama anam David enen̄ede okpono Ittai. Kamse, David ama akam ọdọhọ ọyọhọ ubak mbonekọn̄ esie ita “ẹsan̄a ye Ittai” ẹken̄wana ye Absalom.—2 Sam. 18:2.

Akpana idomo ndikụt nti edu oro mbon en̄wen ẹnyenede utu ke ndisua mmọ sia mmọ mîtoho edem nnyịn, m̀mê ndikama udu ke ntak akani utọk. Adan̄a nte David ye Ittai ẹkedianade kiet nte itai ye aban̄ anam ifiọk ke ndima Jehovah ekeme  ndinam nnyịn ikan usua eke orụk oro ikenyenede.

Nte ikerede iban̄a se Ittai akanamde, nnyịn imekeme ndibụp idem nnyịn ite, ‘Ndi mmọsọn̄ọ nda ye Christ Jesus emi edide Akamba David ntre? Ndi mmowụt ke mmọsọn̄ọ nda ye enye ke nditiene n̄kwọrọ etop Obio Ubọn̄ ifịk ifịk nnyụn̄ nnam mme mbet? (Matt. 24:14; 28:19, 20) Adan̄a didie ke nnyịme ndiyọ afanikọn̄ man n̄wụt ke mmọsọn̄ọ nda ye enye?’

Nditie n̄kere mban̄a uwụtn̄kpọ nsọn̄ọnda Ittai oyonyụn̄ enyene ufọn ọnọ mme ibuot ufọk. Ama enen̄ede otụk ikọt Ittai ndikụt nte enye ọsọn̄ọde ada ye David onyụn̄ ebierede ndika ebiet ekededi oro edidem oro Abasi ekemekde akakade. Kpasụk ntre, edieke ibuot ufọk ebierede ndisịn ifịk nnam n̄kpọ Abasi, emi oyotụk ubon esie, okposụkedi emi ekemede ndinam n̄kpọ ọsọn̄ ye mmọ ndusụk ini. Edi Bible anam nnyịn ifiọk ke Jehovah “eyenyene ima ye mbon ima [esie].”—Ps. 18:25.

Bible itịn̄ke aba n̄kpọ ndomokiet iban̄a Ittai ke ekọn̄ oro Absalom akan̄wanade ye ete esie ama okokụre. Edi esisịt se Bible etịn̄de aban̄a enye anam ifiọk nte enye akanamde n̄kpọ ke ini David okodude ke nnanenyịn. Enyịn̄ Ittai ndidu ke edisana N̄wed Abasi owụt ke Jehovah isifreke, isinyụn̄ itreke ndinọ utọ mbon nsọn̄ọnda oro utịp.—Heb. 6:10.