Mme Mbụme Ẹtode Mme Andikot

Ini ewe ke ẹkesio Satan ke heaven ẹduọk ke isọn̄?—Edi. 12:1-9.

Okposụkedi emi n̄wed Ediyarade mîsiakke ata nnennen ini emi ẹkesiode Satan ke heaven ẹduọk ke isọn̄, enye etịn̄ mme n̄kpọ emi ẹketịbede ke adiana ke adiana, emi ẹkemede ndin̄wam nnyịn ifiọk ini emi ẹkesiode enye ẹduọk. Akpa edi ini emi Obio Ubọn̄ Messiah ọkọtọn̄ọde ndikara. Ekem, “ekọn̄ asiaha ke heaven,” ndien ẹkan Satan ẹsio ẹduọk ke isọn̄.

N̄wed Abasi enen̄ede owụt ke “edimek ini mme idụt” eketre ke 1914, Obio Ubọn̄ Abasi onyụn̄ ọtọn̄ọ ndikara. * (Luke 21:24) Ekebịghi didie tọn̄ọ oro eketịbe mbemiso ekọn̄ oro ẹkesiode Satan ẹduọk ke isọn̄ akadade itie?

Ediyarade 12:4 ọdọhọ ke “dragon [oro edi, Satan okosụk] ada ekpere n̄wan emi oyomde ndiman eyen . . . man, ke enye ama akaman, akpata eyen esie.” Emi owụt ke Satan okoyom ndisọsọp mbiat Obio Ubọn̄ oro ke ndondo oro enye ọtọn̄ọde ndikara. Okposụkedi emi Jehovah mîkayakke Satan ọdọk ubi esie, Satan ama odomo ofụri ukeme ndibiat obufa Obio Ubọn̄ emi. Ntak edi oro “Michael ye mme angel esie” mîkabiatke ini ndisio “dragon ye mme angel esie” ke heaven mbak mmọ ẹdibiat Obio Ubọn̄ oro. Emi anam inịm ke ẹkesio Satan ẹduọk ke isọn̄ esisịt ini ke Obio Ubọn̄ emi ama akamana ke 1914.

N̄kpọ en̄wen oro inyenede ndikere mban̄a edi ini oro ẹnamde mme Christian oro ẹyetde aran ẹset, emi N̄wed Abasi owụtde ke ọkọtọn̄ọ esisịt ini ke Obio Ubọn̄ oro ama akamana. * (Edi. 20:6) Sia owo mîdọhọke ke eyenete Christ ekededi oro ẹyetde aran ama etiene Jesus an̄wana ye dragon ye mme angel esie, emi owụt ke anaedi ẹma ẹn̄wana ekọn̄ oro ẹkụre ẹnyụn̄ ẹsio Satan ye mme demon esie ẹduọn̄ọ ke isọn̄ mbemiso ẹketọn̄ọde ndinam nditọete Christ oro ẹyetde aran ẹset.

Bible itịn̄ke ata nnennen ini emi ẹkesiode Satan ye mme demon esie ke heaven ẹduọn̄ọ ke isọn̄. Edi ana in̄wan̄-in̄wan̄ ke ẹkesion̄o mmọ ke heaven ẹduọn̄ọ ke isọn̄ esisịt ini ke Jesus Christ ama akada ubọn̄ ke heaven ke 1914.

[Mme Ikọ Idakisọn̄]