Mme Mbụme Ẹtode Mme Andikot

Jesus ama ọkwọrọ ikọ ke ofụri idụt Israel. Ntak, ndien, emi apostle Peter ọkọdọhọde ‘ke unana ifiọk akanam’ mme Jew ye mme andikara mmọ ẹwot Enye?—Utom 3:17.

Ke ini apostle Peter ọkọdọhọde ndusụk mme Jew ke mmọ ẹma ẹnyene ubọk ke n̄kpa Messiah, enye ọkọdọhọ mmọ ete: “Mmọfiọk nte mbufo ẹkenam emi ke unana ifiọk, kpa nte mme andikara mbufo ẹkenamde n̄ko.” (Utom 3:14-17) Ekeme ndidi ndusụk mme Jew ikọfiọkke Jesus, mme ukpepn̄kpọ esie ikonyụn̄ in̄wan̄ake mmọ. Amaedi mbon eken, unana udọn̄ ndinem Abasi esịt, asari, isịnenyịn, ye usua ẹkedi ntak unana ifiọk mmọ.

Kere nte unana udọn̄ ndinem Jehovah esịt akanamde ekese mmọ ẹse ukpepn̄kpọ Jesus. Jesus ekesida mme uwụtn̄kpọ ekpep mme owo n̄kpọ, onyụn̄ anam se mmọ ẹwọrọde an̄wan̄a mbon oro ẹkenyenede udọn̄. Edi ndusụk mmọ ẹma ẹsinyọn̄ọ ibụpke mbụme man ẹfiọk se mme uwụtn̄kpọ esie ẹkewọrọde. Isan̄ kiet, idem ndusụk mbet Jesus ẹma ẹyat esịt ke ntak ebetọ ikọ oro enye eketịn̄de. (John 6:52-66) Utọ mbon oro ikọfiọkke ke Jesus ọkọnọ uwụtn̄kpọ emi man ese m̀mê mmọ ẹnyene udọn̄ ndikpụhọde ekikere ye mme edinam mmọ. (Isa. 6:9, 10; 44:18; Matt. 13:10-15) Mmọ ikọdọn̄ke enyịn ke ntịn̄nnịm ikọ oro ọdọhọde ke Messiah edida n̄ke ikpep mme owo n̄kpọ.—Ps. 78:2.

Asari akanam ndusụk mmọ ẹsịn mme ukpepn̄kpọ Jesus. “Idem ama akpa” ediwak owo ke ini enye ekekpepde n̄kpọ ke synagogue Nazareth obio emana esie. Utu ke mmọ ndikenyịme ke Jesus ekedi Messiah, mmọ ẹkekam ẹkere m̀mê nso ikpanam enye odot, ẹte: “Owo emi akada mme n̄kpọ emi ke m̀mọ̀n̄? . . . Nte emi idịghe anamusọ eto eyen Mary ye eyeneka James ye Joseph ye Judas ye Simon? Nte nditọeka esie iban inyụn̄ idụhe mi ye nnyịn?” (Mark 6:1-3) Mbon Nazareth ikadaha ukpepn̄kpọ Jesus ke n̄kpọ ndomokiet ke ntak emi enye okotode ufọk ubuene.

Nso kaban̄a mme adaiso ido ukpono? Ukem ntak emi ikayakke ata ediwak mmọ ẹnen̄ede ẹkpan̄ utọn̄ ẹnọ Jesus. (John 7:47-52) Mmọ ẹma ẹkụt ke mme owo ẹnen̄ede ẹma Jesus, ntre isịnenyịn ikayakke mmọ ẹnyịme mme ukpepn̄kpọ esie. (Mark 15:10) Ndien ediwak mme ọwọrọiso owo ẹkesua enye ke ntak emi enye ekesisuade ọnọ mmọ an̄wan̄wa ke mbubịk ido ye abian̄a mmọ. (Matt. 23:13-36) Jesus ama obiom mmọ ikpe ke ndikokoi mfụmi ikọ Abasi, ete: “Mbọm mbufo emi ẹfiọkde Ibet, koro mbufo ẹmemen ukpọhọde ifiọk ẹfep; mbufo ke idem mbufo ibehe idụk [Obio Ubọn̄], mbufo ẹnyụn̄ ẹbiọn̄ọ mmọ eke ẹyomde ndibe ndụk!”—Luke 11:37-52.

Jesus ama ọkwọrọ eti mbụk ke Israel ke isua ita ye ubak. Enye ama onyụn̄ ekpep ediwak owo ẹtiene ẹnam utom emi. (Luke 9:1, 2; 10:1, 16, 17) Jesus ye mme mbet esie ẹma ẹnen̄ede ẹnam utom emi tutu mme Pharisee ẹtọn̄ọ ndikụni ẹte: “Sese! Ererimbot ẹmewọrọ ẹtiene enye.” (John 12:19) Ke ntre, iwọrọke nte ke ediwak mme Jew ikọfiọkke baba n̄kpọ kiet iban̄a Jesus. Edi mmọ ẹkekokoi ẹbiere ‘ndinana ifiọk’ mban̄a Jesus kpa Messiah. Mmọ ẹkpekenen̄ede ẹfiọk ẹnyụn̄ ẹma Messiah, edi mmọ ikanamke oro. Ndusụk mmọ ẹma ẹnyene ubọk ke n̄kpa Jesus. Ntre, apostle Peter ama eteme ediwak mmọ ete: “Ke ntre, ẹkabade esịt ẹnyụn̄ ẹwọn̄ọde ẹkpọn̄ man ẹsọhi mme idiọkn̄kpọ mbufo ẹfep, man mme ini nduọkodudu ẹkpeto iso Jehovah ẹsịm mbufo man enye okponyụn̄ osio Christ emi ẹkemekde ẹnọ mbufo ọdọn̄ edi, kpa Jesus.” (Utom 3:19, 20) Enem ndifiọk ke ediwak mme Jew, esịnede “akwa otu mme oku,” ẹma ẹtọn̄ọ ndisụk ibuot nnọ akpanikọ. Mmọ ikanamke aba n̄kpọ ke unana ifiọk. Utu ke oro, mmọ ẹma ẹkabade esịt ndien Jehovah ama ọdiọn̄ mmọ.—Utom 2:41; 4:4; 5:14; 6:7.