Ẹda Akpanikọ Ẹsịm Mme Nsannsan Ebiet

KE Russia, Tuva Republic odu ke ata usụk usụk Siberia, Mongolia onyụn̄ odu ọtọn̄ọde ke edem usụk tutu esịm edem usiahautịn Tuva. Ediwak mbon Tuva ẹdu ke nsannsan obio oro ọsọn̄de ndida etop Obio Ubọn̄ n̄kesịm. Edi, ini kiet ko, mme owo ẹma ẹto do ẹdi ndibọ ukpep ke Kyzyl, kpa ibuot obio Tuva. Maria, asiakusụn̄ oro odude ke Kyzyl, ama ọfiọk ke mmọ ẹdisịm onyụn̄ okụt ke emi edidi eti ifet ndikwọrọ eti mbụk nnọ mmọ.

Maria obụk se iketịbede ete: “Ufọkn̄wed oro n̄kekpepde n̄wed ẹma ẹdiomi ukpep aban̄ade usọbọ oro ẹkpenọde owo emi adade n̄kpọsọn̄ ibọk, n̄kpọsọn̄ mmịn, ye mme n̄kpọ ntre ke idiọk usụn̄. N̄kpọ nte owo 50 emi ẹtode nsannsan obio Tuva ẹdi ẹkenyene ndibọ ukpep oro. Otu emi ama esịne mme andikpep, mme ekpep n̄kpọ mban̄a ekikere owo, mme andise mban̄a mfọnọn̄kpọ nditọwọn̄, ye mbon eken.” Emi ama ọnọ Maria ifet ndikwọrọ ikọ edi ikememke inọ enye ndinam emi. Enye ọdọhọ ete: “Ami ndi owo bụt ndien esinen̄ede ọsọn̄ mi ndikwọrọ ikọ ke ido nneme. Nte ededi, mma mben̄e Jehovah an̄wam mi nda ifet emi n̄kwọrọ ikọ nnọ mme owo.” Nte enye ama ekeme ndinam emi?

Maria aka iso ete: “Mma n̄kụt Awake! oro enemede n̄kpọ aban̄a edikop ọkpọsọn̄ ndịk m̀mê ndisua n̄kpọ. Mma n̄kere ke owo oro ekpepde n̄kpọ aban̄a ekikere owo ayama ndikot enye emi, ntre mma nda magazine emi n̄ka ufọkn̄wed. Andikpep kiet oro ekedide ndibọ ukpep emi ama edi ọfis mi usen oro, ndien mma nnọ enye magazine emi. Enye ama okop idatesịt ndibọ n̄wed oro. Ke nditịm ntịn̄, enye ama ọdọhọ ke enyene n̄kpọ oro imọ isinen̄erede ikop ndịk iban̄a n̄ko. Mma nda n̄wed oro Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn, Eboho 1, nsọk enye ke ndan̄nsiere. Enye ama okop idatesịt ndibọ n̄wed emi n̄ko. Nte n̄wan emi akanamde n̄kpọ ama anam mi n̄kere ke mme andikpep eken ẹyetiene ẹma n̄wed oro. Ntre mma nda katọn n̄wed N̄kparawa Owo Ẹbụp kiet ye mme n̄wed efen n̄ka ufọkn̄wed.” Ikebịghike, n̄wed ama okụre ke katọn oro. Maria etịn̄ se iketịbede ete: “Mme nsan̄autom andikpep oro n̄kọnọde n̄wed N̄kparawa Owo Ẹbụp, ẹma ẹdi ọfis mi ẹdibụp mi ẹte, ‘Mbọk m̀mọ̀n̄ ke ẹdeme n̄wed emi?’” Mmọ ikọfiọkke ke ami n̄kakam ndeme n̄wed oro!

Akpatre usen ubọ ukpep oro ekedi Saturday. Maria ikanamke utom usen oro, ntre enye ama obon n̄wed ke nsio nsio okpokoro ke ọfis esie, onyụn̄ ewet ke obukpọk ete: “Ndima Mme Andikpep! Ẹmekeme ndida n̄wed emi, ẹnyụn̄ ẹda ẹsọk mme ufan mbufo. Ndiye n̄wed emi ayanam mbufo ẹkụt unen ke utom mbufo, oyonyụn̄ anam ubon mbufo ẹdiana kiet.” Nso iketịbe? “Mma n̄ka ọfis mi usen oro nnyụn̄ n̄kokụt ke ẹma ẹmen ata ediwak ke otu mme n̄wed oro. Mma nsọsọp n̄kọbọ n̄wed ye mme magazine en̄wen.” Ke ẹma ẹkekụre ukpep oro, Maria ama enịm magazine 380, n̄wed 173, ye ndiye uduot n̄kpri n̄wed 34. Mbon oro ẹketode nsannsan ebiet ẹdi ndibọ ukpep oro, ẹma ẹda mme n̄wed oro ẹnyọn̄ obio mmọ ye ebiet oro mmọ ẹkenamde utom. Maria ọdọhọ ete, “Mmenen̄ede n̄kop inemesịt koro akpanikọ esịm mme nsannsan ebiet ke Tuva idahaemi!”—Eccl. 11:6.

[Ndise obio ke page 32]

(Ama oyom ndikụt nte enye enen̄erede etie, se n̄wed)

RUSSIA

TUVA REPUBLIC