Mme Ubon Christian—Ẹtiene Uwụtn̄kpọ Jesus!
Mme Ubon Christian—Ẹtiene Uwụtn̄kpọ Jesus!
“Christ . . . [ama ọkpọn̄] uwụtn̄kpọ enịm ọnọ mbufo man ẹtiene nde ikpat esie ketket.”—1 PET. 2:21.
1. (a) Nso ke Eyen Abasi akanam ke ini ẹkebotde n̄kpọ? (b) Didie ke Jesus ada mme owo?
KE INI Abasi okobotde enyọn̄ ye isọn̄, Akpan esie okodu ye enye ke n̄kan̄ nte etubom anamutom. Enye ama adiana ye Ete esie ke ini ẹkebotde akpakịp orụk unam ye mme eto ke isọn̄ ye ke ini Ete esie akanamde Paradise emi mme owo oro enye okobotde ke mbiet esiemmọ, ẹdidụn̄ọde. Jesus ama enen̄ede ama ubonowo. Bible ọdọhọ ke ‘se ikadatde enye esịt ekedi nditọ owo.’—N̄ke 8:27-31; Gen. 1:26, 27.
2. (a) Nso ke Jehovah ọnọ mme anana-mfọnmma owo? (b) Bible ọnọ ndausụn̄ ke nso?
2 Ke ini Adam ye Eve ẹma ẹkenam idiọkn̄kpọ, Jehovah ama anam ndutịm ndifak ubonowo. Jehovah ama ada uwa Christ afak ubonowo. (Rome 5:8) Ke adianade do, Jehovah ọmọnọ Ikọ esie kpa Bible man an̄wam nnyịn ikụt unen ke uwem kpa ye unana mfọnmma oro ikadade imana. (Ps. 119:105) Jehovah ada Bible eteme mme owo nte ẹkpekopde inemesịt ẹnyụn̄ ẹdiana kiet ke ubon. N̄wed Genesis ọdọhọ ke ebe ekpenyene ‘ndidiana ye n̄wan esiemmọ; nnyụn̄ n̄kabade ndi obụk kiet.’—Gen. 2:24.
3. (a) Nso ke Jesus ekekpep aban̄a ndọ? (b) Nso ke idineme ke ibuotikọ emi?
3 Ke ini Jesus ọkọkwọrọde ikọ mi ke isọn̄, enye ama ọsọn̄ọ etịn̄ ete ke Abasi okoyom ebe ye n̄wan ẹdụn̄ọ kiet ke nsinsi. Enye ama ekpep mme edumbet oro ẹdin̄wamde mme ubon ẹfep mme edu ye ido oro ẹkemede ndibiat ndọ mmọ m̀mê mîdiyakke mmọ ẹkop inemesịt. (Matt. 5:27-37; 7:12) Ibuotikọ emi oyowụt nte ukpepn̄kpọ Jesus ye uwụtn̄kpọ oro enye ekenịmde ọnọ nnyịn ke ini enye okodude ke isọn̄ ekemede ndin̄wam mme ebe, ibanndọ, ete ye eka, ye nditọ ẹkop inemesịt.
Nte Ebe Okpokponode N̄wan Esie
4. Didie ke idaha mme ebe oro ẹdide Christian ebiet eke Jesus?
4 Abasi ekemek ebe ete edi ibuot ufọk, ukem nte Jesus edide Ibuot ọnọ esop. Apostle Paul ọkọdọhọ ete: “Ebe edi ibuot ọnọ n̄wan esie kpa nte Christ n̄ko edide ibuot ọnọ esop, ke emi enye edide andinyan̄a idem emi. Mme ebe, ẹka iso ẹma iban mbufo, kpa nte Christ n̄ko akamade esop onyụn̄ ayakde idemesie ọnọ ke ibuot esie.” (Eph. 5:23, 25) Ke akpanikọ, mme ebe oro ẹdide Christian ẹkpenyene ndinam n̄kpọ ye iban mmọ ukem nte Jesus akanamde ye mme mbet esie. Ẹyak ikere iban̄a ndusụk usụn̄ emi Jesus akadade odudu oro Abasi ọnọde enye anam n̄kpọ.
5. Didie ke Jesus ekesinam n̄kpọ ye mme mbet esie?
5 Jesus ama ‘enyene ifụre-ifụre ido onyụn̄ osụhọde esịt.’ (Matt. 11:29) Edi enye ikedịghe mbe. Akananam enye itreke ndinam se akanade enye anam. (Mark 6:34; John 2:14-17) Enye ama esinọ mme mbet esie item ke ata ima ima usụn̄, ndusụk ini, ọnọ mmọ item kiet ediwak ini. (Matt. 20:21-28; Mark 9:33-37; Luke 22:24-27) Kpa ye oro, akananam enye itọkke mme mbet esie, m̀mê ndinam mmọ ẹkere ke imọ imaha mmọ, enye ikonyụn̄ inamke mmọ ẹkere ke mmimọ idikemeke ndinam se enye ekpepde mmimọ. Utu ke oro, enye ama otoro onyụn̄ esịn udọn̄ ọnọ mme mbet esie. (Luke 10:17-21) Ima oro enye akamade mme mbet esie ye nte enye ọkọfọnde ido ye mmọ akanam mmọ ẹnen̄ede ẹkpono enye!
6. (a) Nso ke ebe ekeme ndikpep nto usụn̄ emi Jesus akanamde n̄kpọ ye mme mbet esie? (b) Nso ke Peter ọdọhọ mme ebe ẹsinam?
6 Uwụtn̄kpọ Jesus ekpep mme ebe nte ke mmọ ikpenyeneke ndisọn̄ ido ye ubon mmọ. Utu ke oro, mme Christian ẹsikpokpono ẹnyụn̄ ẹma iban mmọ. Apostle Peter ama esịn udọn̄ ọnọ mme ebe ete ẹkpebe ima Jesus ẹnyụn̄ “ẹka iso ẹdụn̄ ye [iban] mmọ kpasụk ntre,” ‘ẹnọ mmọ ukpono.’ (Kot 1 Peter 3:7.) Didie ndien ke ebe ekeme ndinam n̄kpọ nte ibuot ufọk ndien osụk okpono an̄wan esie?
7. Didie ke ebe ekeme ndikpono n̄wan esie? Nọ uwụtn̄kpọ.
7 Usụn̄ kiet emi ebe ekemede ndikpono n̄wan esie edi ndibụp ekikere n̄wan esie mbemiso enye anam ubiere oro editụkde ubon esie. Ekeme ndidi enye oyom ubon esie ẹwọrọ ẹkedụn̄ ke ebiet efen mîdịghe oyom ndikpụhọ utom m̀mê mme edinam eke usen ke usen, utọ nte ebiet emi mmọ ẹdikade nduọkodudu m̀mê ndikpeme nte ẹbiatde okụk ke ntak nsọn̄ọn̄kpọ. Sia mme utọ ubiere emi ẹditụkde ubon, ọyọfọn ebe okop ekikere n̄wan esie, sia emi ayan̄wam enye anam nnennen ubiere onyụn̄ anam emem n̄wan esie ndibere ye enye. (N̄ke 15:22) Edieke ebe okponode n̄wan esie, n̄wan esie ayama onyụn̄ okpono enye, ndien se ikam ifọnde ikan edi nte ke Jehovah ayama utọ ebe oro.—Eph. 5:28, 29.
Nte N̄wan Ekemede Ndinyene Ntotụn̄ọ Ukpono Nnọ Ebe Esie
8. Ntak emi nnyịn mîkpekpebeke uwụtn̄kpọ Eve?
8 Jesus ama enịm mfọnn̄kan uwụtn̄kpọ ọnọ ibanndọ ke nte ẹkpesụkde ibuot. Ata akamba ukpụhọde odu ke nte Jesus akanamde n̄kpọ aban̄a se Jehovah ọkọdọhọde ye nte Eve akanamde. Eve ikenịmke eti uwụtn̄kpọ inọ ibanndọ. Jehovah ekenịm ebe esie nte ibuot ọnọ enye, ndien kpa ebe esie ke Abasi akada ọnọ Eve ewụhọ. Edi Eve ikokponoke ebe esie nte owo emi Abasi ekenịmde nte ibuot ọnọ enye. Enye ikanamde se Adam ọkọdọhọde enye. (Gen. 2:16, 17; 3:3; 1 Cor. 11:3) Imọdiọn̄ọ ke ẹkebabian̄a enye, edi akpakana enye obụp ebe esie m̀mê enen imọ ndikop uyo owo emi ọkọdọhọde enye ke imọfiọk se ‘Abasi ọfiọkde.’ Edi enye ama atan̄ idem akabade ọnọ ebe esie ndausụn̄.—Gen. 3:5, 6; 1 Tim. 2:14.
9. Nso uwụtn̄kpọ nsụkibuot ke Jesus enịm?
9 Jesus ama enen̄ede osụk ibuot ọnọ Abasi emi edide Ibuot esie. Se enye akanamde ye nte enye okodude uwem owụt ke enye ‘ikekereke ndiwamade Abasi itie mbọ, oro edi, ndiyom ndidi n̄ka ye Abasi. Edi enye ama asana emi ayak onyụn̄ emen mbiet ofụn esịne.’ (Phil. 2:5-7) Jesus ke ososụhọde idem kpa ye oro enye edide edidem idahaemi. Enye osụk ibuot ọnọ Ete esie ke kpukpru n̄kpọ.—Matt. 20:23; John 5:30; 1 Cor. 15:28.
10. Didie ke n̄wan ekeme ndisụk ibuot nnọ ebe esie?
10 N̄wan ekpenyene ndisụk ibuot nnọ ebe esie kpa nte Jesus osụkde ọnọ Abasi. (Kot 1 Peter 2:21; 3:1, 2.) Ẹyak ineme iban̄a mme ini emi enye okposụkde ibuot ọnọ ebe esie. Eyen esie eben̄e enye ayak imọ inam n̄kpọ oro akpanade ete ye eka ẹnọ unyịme. Sia enye ye ebe esie mîkenemeke iban̄a n̄kpọ emi, ọkpọfọn enye obụp eyen esie m̀mê enye ama etịn̄ ọnọ ete esie. Edieke eyen esie mîketịn̄ke inọ ete, enye eka akpana eneme n̄kpọ oro ye ebe esie mbemiso ebierede. Ke adianade do, ikpanaha n̄wan afan̄a n̄kpọ ye ebe esie ke iso nditọ mmọ. Edieke enye mînyịmeke se ebe esie etịn̄de, enye ekpenyene ndineme n̄kpọ oro sụk enye ye ebe esie.—Eph. 6:4.
Uwụtn̄kpọ Oro Jesus Ekenịmde Ọnọ Mme Ete ye Eka
11. Nso uwụtn̄kpọ ke Jesus ekenịm ọnọ mme ete ye eka?
11 Jesus ama enịm ata eti uwụtn̄kpọ ọnọ mme ete ye eka idem okposụkedi emi enye mîkọdọhọ n̄wan mîkonyụn̄ ibonke nditọ. Ntak idọhọde ntre? Enye ama ada ima ekpep mme mbet esie n̄kpọ ke ikọ ye ke edinam onyụn̄ enyene ime ye mmọ. Enye ama owụt mmọ nte ẹkpekwọrọde ikọ. (Luke 8:1) Nte Jesus akanamde n̄kpọ ye mbet esie ama ekpep mmọ nte mmọ ẹkpenamde n̄kpọ ye kiet eken.—Kot John 13:14-17.
12, 13. Nso ke ete ye eka ẹkpenam edieke mmọ ẹyomde nditọ mmọ ẹbak Abasi?
12 Nditọwọn̄ ẹsiwak ndikpebe uwụtn̄kpọ ete ye eka mmọ, edide eti m̀mê idiọk. Ke ntre, ọkpọfọn mbufo mme ete ye eka ẹbụp idem mbufo ẹte: ‘Nso uwụtn̄kpọ ke nnyịn inịm inọ nditọ nnyịn ke udomo ini oro isidade ise TV inyụn̄ inọ idem inemesịt ye ini oro isidade ikpep Bible inyụn̄ iwọrọ an̄wautom? Nso ke inen̄ede ida nte akpan n̄kpọ ke ubon nnyịn? Ndi nnyịn imenịm eti uwụtn̄kpọ ke ediyak utuakibuot akpanikọ edi n̄kponn̄kan n̄kpọ ke uwem nnyịn?’ Ana mbet Abasi ebem iso odu ete ye eka ke esịt edieke mmọ ẹyomde nditọ mmọ ẹbak Abasi.—Deut. 6:6.
13 Edieke mme ete ye eka ẹdomode ndida mme edumbet Bible nsịn ke edinam ke usen ke usen, nditọ mmọ ẹyekụt. Nditọwọn̄ ẹsida se mme ete ye eka mmọ ẹtịn̄de ẹnyụn̄ ẹkpepde mmọ ke akpan n̄kpọ. Edi edieke nditọ mbufo ẹkụtde ke mbufo inamke se ẹkpepde, mmọ ẹkeme ndikere ke mme edumbet Bible inen̄ekede idi akpan n̄kpọ m̀mê ke inen̄ekede inyene ufọn. Ndien emi ekeme ndinam mmọ ẹyak idem ẹnọ mfịghe ererimbot emi.
14, 15. Nso ke mme ete ye eka ẹkpesịn udọn̄ ẹnọ nditọ mmọ ẹte ẹnam, ndien nso idi usụn̄ kiet oro mmọ ẹkemede ndinam emi?
14 Mme ete ye eka oro ẹdide Christian ẹfiọk ke ndibọk nditọ idịghe sụk ndinọ mmọ mme n̄kpọ obụkidem. Ke ntre, ifọnke ndikpep mmọ ẹnam mme n̄kpọ oro ẹdinọde mmọ ufọn eke obụkidem kpọt. (Eccl. 7:12) Jesus ama ekpep mme mbet esie ete ẹbem iso ẹyom Obio Ubọn̄ Abasi ye edinen ido esie. (Matt. 6:33) Man mme ete ye eka oro ẹdide Christian ẹkpebe Jesus, ana mmọ ẹsịn udọn̄ ẹnọ nditọ mmọ ẹbịne mme utịtmbuba eke spirit.
15 Usụn̄ kiet oro mme ete ye eka ẹkemede ndinam emi edi ndinam nditọ mmọ ẹmehe ye mbon oro ẹnamde utom uyọhọ ini. Kere ban̄a nsịnudọn̄ oro mme uyen ẹdibọde edieke mmọ ẹnamde ufan ye mme asiakusụn̄ m̀mê ye esenyịn circuit ye n̄wan esie. Mme isụn̄utom, mbon Bethel, ye mbon oro ẹnamde utom ubọpn̄kpọ Obio Ubọn̄ ke ofụri ererimbot ẹma ẹdi ufọk fo, mmọ ẹkeme ndibụk nte utom Jehovah ọnọde owo idatesịt. Utọ isenowo emi ẹyenyene nti ifiọkutom ndibụk. Uwụtn̄kpọ n̄waidem mmọ ekeme ndinen̄ede n̄n̄wam nditọ fo ẹnam nti ubiere, ẹnịm nti utịtmbuba, ẹnyụn̄ ẹmek ubọkọkọ oro mmọ ẹdidade ẹn̄wam idem ke utom uyọhọ ini.
Nditọwọn̄—Nso Idin̄wam Mbufo Ẹkpebe Uwụtn̄kpọ Jesus?
16. Didie ke Jesus okokpono Joseph ye Mary, onyụn̄ okpono Ete esie eke heaven?
16 Jesus enịm mfọnn̄kan uwụtn̄kpọ ọnọ mbufo nditọwọn̄ n̄ko. Joseph ye Mary ẹkebọk Jesus, ndien enye ama osụk ibuot ọnọ mmọ. (Kot Luke 2:51.) Enye ama ọfiọk ete ke okposụkedi emi mmọ ẹkedide mme anana-mfọnmma, ke Abasi ọkọdọhọ mmọ ẹse ẹban̄a imọ. Ke ntre, ana imọ ikpono mmọ. (Deut. 5:16; Matt. 15:4) Ke Jesus ama okokpon, enye ama esinam mme n̄kpọ oro enemde Ete esie eke heaven esịt. Ndien oro ọwọrọ ke enye ama esin̄wana ọbiọn̄ọ idomo. (Matt. 4:1-10) Mme uyen ẹsisọn̄ ibuot ye ete ye eka mmọ ndusụk ini. Ke ntre, nso ikeme ndin̄wam fi ekpebe uwụtn̄kpọ Jesus?
17, 18. (a) Nso utọ idomo ke mme uyen ẹsisobo ke ufọkn̄wed? (b) Nso idin̄wam mmọ ẹsọn̄ọ ẹda?
17 Ekeme ndidi ediwak nditọ ufọkn̄wed mbufo isimaha ndinam se Bible etịn̄de. Mmọ ẹkeme ndinyịk fi etiene mmimọ anam idiọkn̄kpọ, ẹnyụn̄ ẹsak fi edieke mûtieneke mmọ unam. Ndi akanam nditọ ufọkn̄wed mbufo ẹsụn̄i fi ke ntak emi mûmaha nditiene mmọ nnam ndusụk n̄kpọ? Edieke edide ntre, afo esinam n̄kpọ didie? Ọmọfiọk ke edieke etienede mmọ anam idiọkn̄kpọ, ke ete ye eka fo ye Jehovah idinemke esịt. Nso iditịbe inọ fi edieke odụkde ndụk ye nditọ ufọkn̄wed mbufo? Ekeme ndidi afo emenịm ndusụk utịtmbuba ọnọ idemfo, utọ nte ndinam usiakusụn̄ ofụri ini m̀mê ndikabade ndi asan̄autom unamutom, ndikanam utom ke ebiet oro ẹyomde-yom mme ọkwọrọ ikọ, m̀mê ndikanam utom ke Bethel. Ndi ndidụk ndụk ye nditọ ufọkn̄wed mbufo ayanam esịm utịtmbuba fo?
18 Ndi akanam mbufo mme uyen emi ẹdude ke esop Christian ẹmesobo idomo? Didie ke mbufo ẹkenam n̄kpọ? Kere ban̄a uwụtn̄kpọ emi Jesus ekenịmde ọnọ mbufo. Enye ikọduọhọ ke ini ẹkedomode enye, edi ama ọsọn̄ọ ada anam se inende. Nditi uwụtn̄kpọ Jesus emi ayanam enyene uko ọdọhọ nditọ ufọkn̄wed mbufo ke imọ iditieneke mmọ inam idiọkn̄kpọ. Nen̄ede kere ban̄a ifet oro enyenede ndinam utom ke idatesịt nnọ Jehovah ke ofụri eyouwem fo, ukem nte Jesus akanamde.—Heb. 12:2.
Se Ubon Ẹkpenamde man Ẹkop Inemesịt
19. Nso ikeme ndinam owo enen̄ede okop inemesịt?
19 Jehovah Abasi ye Jesus Christ ẹyom n̄kpọ ọfọn ye ubonowo. Nnyịn imekeme ndikop inemesịt kpa ye oro nnyịn mîdịghe mfọnmma. (Isa. 48:17, 18; Matt. 5:3) Jesus ama ekpep mme owo Ikọ Abasi emi akanamde mmọ ẹkop inemesịt, edi enye ama ekpep mme mbet esie se ikande oro. Jesus ama ekpep mmọ mfọnn̄kan usụn̄ oro mmọ ẹkpedude uwem. Ke akande oro, enye ama enịm uwụtn̄kpọ ọnọ mmọ ke nte mmọ ẹkpedude eti uwem ẹnyụn̄ ẹnyene nti edu. Kpukpru nnyịn—edide idi ete, eka, m̀mê nditọ—imekeme ndikpep n̄kpọ nto Jesus. Ntre, mme ebe, ibanndọ, ye nditọwọn̄, ẹtiene uwụtn̄kpọ Jesus! Ubon oro ẹdade se Jesus ekekpepde ẹsịn ke edinam ẹnyụn̄ ẹtiene uwụtn̄kpọ esie ẹyenen̄ede ẹkop inemesịt.
[Ndise ke page 11]
Didie ke Afo Ọkpọbọrọ?
• Didie ke mme ebe ẹkpeda itieibuot oro Abasi ọnọde mmọ ẹnam n̄kpọ?
• Didie ke n̄wan ekeme ndikpebe uwụtn̄kpọ Jesus?
• Nso ke mme ete ye eka ẹkeme ndikpep nto usụn̄ emi Jesus akanamde n̄kpọ ye mme mbet esie?
• Nso ke mme uyen ẹkeme ndikpep nto uwụtn̄kpọ Jesus?
[Mme Mbụme Ukpepn̄kpọ]
[Ndise ke page 8]
Nso ke ebe emi amade n̄wan esie edinam mbemiso enye anam ubiere oro editụkde ubon esie?
[Ndise ke page 9]
Didie ke n̄wan okpowụt ke imodiọn̄ọ ke ebe imọ edi ibuot ufọk?
[Ndise ke page 10]
Nditọwọn̄ ẹsikpebe nti edu ete ye eka mmọ