“Ẹnịm Idem Mbufo ke Ima Abasi”

“Ẹnịm idem mbufo ke ima Abasi, ke adan̄aemi mbufo ẹtiede ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.”—JUDE 21.

1, 2. Nso iwụt ke Jehovah enen̄ede ama nnyịn, ndien isan̄a didie ifiọk ke enye idikaha iso ima nnyịn edieke inamde se imade?

JEHOVAH ABASI owụt ke imama nnyịn ke ata ediwak usụn̄. Akakan n̄kpọ oro owụtde ke Jehovah ama nnyịn edi uwa ufak emi enye ọnọde nnyịn. Enye enen̄ede ama nnyịn tutu enye ọnọ edima Eyen esie edi isọn̄ edikpa ke ibuot nnyịn. (John 3:16) Jehovah akanam emi sia enye oyomde nnyịn idu uwem ke nsinsi, enye n̄ko oyom ndika iso mma nnyịn ke nsinsi!

² Edi, ndi akpana ikere ke Jehovah ayaka iso ama nnyịn idem ọkpọkọm inam se imade? Baba. Koro Jude ufan̄ikọ 21 okot ete: “Ẹnịm idem mbufo ke ima Abasi, ke adan̄aemi mbufo ẹtiede ẹbet mbọm Ọbọn̄ nnyịn Jesus Christ emi edisụn̄ọde ke nsinsi uwem.” Ikọ oro, “ẹnịm idem mbufo ke ima Abasi” owụt ke oyom inam n̄kpọ. Mmọdo, nso ke ikpanam man inịm idem ke ima Abasi, m̀mê man Abasi aka iso ama nnyịn?

Nso ke Ikpanam man Abasi Aka Iso Ama Nnyịn?

3. Jesus ọkọdọhọ ke nso idinam Abasi aka iso ama imọ?

³ Se Jesus eketịn̄de okoneyo oro ekesierede  usen oro ẹkewotde enye ọbọrọ mbụme emi. Enye ọkọdọhọ ete: “Edieke mbufo ẹnịmde mbet mi, mbufo ẹyedu ke ima mi, kpa nte ami nnịmde mbet Ete mi nnyụn̄ ndude ke ima esie.” (John 15:10) Ke akpanikọ, Jesus ama ọfiọk ke se idinamde Ete imọ aka iso ama imọ edi ndinịm mbet Esie. Mmọdo, edieke akanade mfọnmma Eyen Abasi anam oro, nnyịn ndien-e?

4, 5. (a) Nso idi akpan usụn̄ oro ikemede ndiwụt ke imama Jehovah? (b) Ntak emi nnyịn mîkpekereke ke nnyịn idikemeke ndinịm mbet Jehovah?

⁴ Akpan usụn̄ oro iwụtde ke imama Jehovah edi ndikop uyo esie. Apostle John ekesịn enye ntem: “Emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3) Nnyịn imọfiọk ke mme owo isimaha ndikop item mfịn. Idịghe emeti ke itien̄wed oro ọdọhọ ke “ibet [Abasi] idobike owo mbiomo.” Jehovah idọhọke inam n̄kpọ oro ọsọn̄de akan nnyịn.

⁵ Ke uwụtn̄kpọ, ndi ọkpọdọhọ edima ufan fo emen ubomisọn̄ fo ke ibuot ọsọk fi? Idụhe eke akpanamde utọ n̄kpọ oro! Jehovah ọfọn akan nnyịn onyụn̄ enen̄ede ọfiọk se ikemede ndinam. Bible anam ifiọk ke Jehovah ‘eti ke nnyịn idi ntan.’ (Ps. 103:14) Enye ididọhọke nnyịn inam se nnyịn mîdikemeke ndinam. Mmọdo, nnyịn ikpekereke ke nnyịn idikemeke ndinịm mbet Jehovah. Utu ke oro, imọfiọk ke ndikop item Jehovah owụt ke imenen̄ede ima enye inyụn̄ iyom enye aka iso ama nnyịn.

San̄asan̄a Enọ Oro Jehovah Ọnọde

6, 7. (a) Nso idi ubieresịt? (b) Wụt nte ubieresịt ekemede ndinam Abasi aka iso ama nnyịn.

⁶ Ke ererimbot emi mînyeneke iwụk mi, ediwak n̄kpọ ẹdu oro anade ibiere, emi owụtde m̀mê imokop uyo inọ Abasi. Idisan̄a didie ifiọk m̀mê se ibierede ndinam ekekem ye uduak Abasi? Jehovah ọnọ nnyịn n̄kpọ oro ekemede ndin̄wam nnyịn ikop uyo esie. Oro edi ubieresịt. Nso idi ubieresịt? Ubieresịt esiteme nnyịn se ikpanamde onyụn̄ asian nnyịn m̀mê se ikanamde ọfọn. Enye etie nte ebiereikpe oro esịnede nnyịn ke idem, emi anamde itie ikere se ikanamde m̀mê se iyomde ndinam man ifiọk m̀mê mmọ ẹfọn m̀mê ifọnke.—Kot Rome 2:14, 15.

⁷ Didie ke ikeme ndida ubieresịt mbiere se ifọnde? Yak idọhọ ke asan̄a ye owo aka ebiet oro akanam mûkaha. Edieke owo oro enen̄erede ọdiọn̄ọ usụn̄, enye ayada fi ekesịm ebiet oro akade. Oyosop usụn̄ edieke mûtieneke enye, mûnyụn̄ ukopke uyo esie. Ntre ke edi ye owo oro ubieresịt esie mînọhọ enye eti ndausụn̄. Enye idifiọkke se akpanamde, m̀mê se ifọnde ye se idiọkde.

8, 9. (a) Nso ke ubieresịt nnyịn mîkemeke ndinam? (b) Nso ke ikeme ndinam man ubieresịt nnyịn ọnọ nnyịn eti ndausụn̄?

⁸ Enyene n̄kpọ emi owo oro adade owo aka isan̄ mîdinamke. Enye idinyịkke fi ite okop se itịn̄de, m̀mê etiene imọ. Ntre ke edi ye ubieresịt. Enye isinyịkke owo ite anam se imọ idọhọde. Ntre, nso iditịbe edieke iyakde udọn̄ obụkidem akara nnyịn? Emi ekeme ndinam ubieresịt abian̄a nnyịn. Bible ọdọhọ ke “esịt abian̄a akan kpukpru n̄kpọ, onyụn̄ abiara fap.” (Jer. 17:9; N̄ke 4:23) N̄ko-n̄ko, edieke mûtieneke owo oro ọdiọn̄ọde usụn̄, udusịmke ebiet emi akade. Ukem ntre, ubieresịt nnyịn iditemeke nnyịn se ifọnde edieke nnyịn mîtieneke nti ndausụn̄ oro ẹdude ke Ikọ Abasi, kpa Bible. (Ps. 119:105) Ediwak owo mfịn idọn̄ke enyịn ke se Ikọ Abasi etemede, edi ẹyom ndinam se  idọn̄de mmọ itọn̄. (Kot Ephesus 4:17-19.) Ntak edi oro mme owo ẹkade iso ẹdọk ubi okposụkedi emi ẹnyenede ubieresịt.—1 Tim. 4:2.

⁹ Ikpanaha idu utọ uwem oro. Edi akpana iyak Ikọ Abasi aka iso ada ubieresịt nnyịn usụn̄ man enye ọnọ nnyịn eti ndausụn̄. Akpana itiene ubieresịt oro Bible ọnọde ukpep utu ke ndinam se idọn̄de nnyịn itọn̄. N̄ko-n̄ko, akpana ikpono ubieresịt ndima nditọete nnyịn iren ye iban. Edieke itide ke ubieresịt mmọ idịghe ukem ye eke nnyịn, nnyịn idinamke n̄kpọ ekededi oro edinamde mmọ ẹtuak ukot ẹduọn̄ọ.—1 Cor. 8:12; 2 Cor. 4:2; 1 Pet. 3:16.

10. Ewe n̄kpọ ita ke iyom ndineme idahaemi?

¹⁰ Ẹyak ineme n̄kpọ ita oro ikpanamde man iwụt ke imama Jehovah inyụn̄ ikop uyo esie. Kpukpru emi ẹyenyene n̄kpọ ndinam ye ubieresịt. Edi mbemiso ubieresịt ọnọde nnyịn eti ndausụn̄, ana iyak mme edumbet Bible ada enye usụn̄. N̄kpọ ita oro ikpanamde man iwụt ke imama Jehovah inyụn̄ ikop uyo esie edi: Akpa, ndima mbon oro Jehovah amade, ọyọhọ iba, ndisụk ibuot nnọ mbon oro ẹdade nnyịn usụn̄, ọyọhọ ita, ndidomo ndika iso nsana ke enyịn Abasi.

Ma Mbon Oro Jehovah Amade

11. Ntak emi ikpamade mbon oro Jehovah amade?

¹¹ Akpa, ana ima mbon oro Jehovah amade. Ẹsidọhọ ke odụk nsan̄a inọ etiene eyịp. Sia idide mme anana-mfọnmma owo, Andibot ọfiọk ke mme ufan ẹkeme ndibiat nnyịn, ẹnyụn̄ ẹkeme ndinam nnyịn ifọn. Ntak edi oro enye ọnọde  nnyịn eti item emi: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (N̄ke 13:20; 1 Cor. 15:33) Nnyịn iyomke ‘ndidọdiọn̄ ndiọk,’ edi iyom ‘ndinyene ibuot.’ Owo ndomokiet ikemeke nditeme Jehovah n̄kpọ m̀mê ndibiat enye. Kpa ye oro, enye enịm eti uwụtn̄kpọ ke nte enye emekde mme ufan. Kere ise—mmanie ke Jehovah esimek nte mme ufan esie?

12. Mmanie ke Jehovah esimek nte mme ufan esie?

¹² Jehovah okokot etinyịn Abraham “ufan mi.” (Isa. 41:8) Abraham ama enen̄ede ọbuọt idem ye Abasi, anam se inende, onyụn̄ okop item—ih, enye ekedi ata owo Abasi. (Jas. 2:21-23) Utọ mme owo emi ke Jehovah esimek nte mme ufan esie. Edieke Jehovah emekde utọ mbon emi nte mme ufan, ndi nnyịn ikpanamke ntre n̄ko—isan̄a ye mme ẹnyene-ibuot owo inyụn̄ inyene ibuot?

13. Nso ikeme ndin̄wam nnyịn imek nti ufan?

¹³ Nso ikeme ndin̄wam fi emek nti ufan? Ndikere mban̄a mme uwụtn̄kpọ Bible ekeme ndin̄wam. Kere ban̄a ufan oro Ruth akanamde ye eka ebe esie, Naomi, enye oro David akanamde ye Jonathan, m̀mê enye oro Timothy akanamde ye Paul. (Ruth 1:16, 17; 1 Sam. 23:16-18; Phil. 2:19-22) Ima oro mmọ ẹkemade Jehovah ekenen̄ede anam mmọ ẹdi itai ye aban̄. Ndi emekeme ndikụt mme ufan oro ẹmade Jehovah ukem nte afo amade? Utọ ufan oro ẹyọyọhọ esop Abasi. Mmọ ididọhọke fi anam se idiọkde. Utu ke oro, mmọ ẹdikam ẹsesịn udọn̄ ẹnọ fi ẹte okop uyo Jehovah, asan̄a ekpere enye, onyụn̄ ọtọ ọnọ spirit. (Kot Galatia 6:7, 8.) Mmọ ẹyen̄wam fi anam mme n̄kpọ oro ẹdinamde Abasi aka iso ama fi.

Sụk Ibuot Nọ Mbon Oro Ẹdade Mbufo Usụn̄

14. Ntak emi esisọn̄de ndisụk ibuot nnọ mbon oro ẹdade nnyịn usụn̄?

¹⁴ Ọyọhọ usụn̄ iba oro iwụtde ke imama Jehovah edi nte isede mbon oro ẹdade nnyịn usụn̄. Ana isụk ibuot inọ mmọ. Ntak esisọn̄de ndinam emi ndusụk ini? Ntak kiet edi koro mbon oro ẹdade nnyịn usụn̄ ye nnyịn emi mmọ ẹdade usụn̄ ifọnke ima. Ikpekpep ndisụk ibuot sia ikadada nsọn̄ibuot imana.

15, 16. (a) Ntak anade isụk ibuot inọ mbon oro Jehovah emekde ete ẹda nnyịn usụn̄? (b) Nso ke ikpep ito nte Jehovah akadade nsụkuyo oro nditọ Israel ẹkesụkde Moses?

¹⁵ Afo emekeme ndikere ete, ‘Edieke ọsọn̄de ndisụk ibuot nnọ mbon oro ẹdade nnyịn usụn̄, ntak ẹdọhọde inam emi?’ Ntak edi koro enye owụt m̀mê ida ke n̄kan̄ anie. Anie ke imek nte andikara? Edieke imekde Jehovah nte Andikara, ana isụk ibuot inọ enye. Edi edieke nnyịn mînamke oro, ndi imekeme ndidọhọ ke Jehovah akara nnyịn? N̄ko-n̄ko, mme anana-mfọnmma owo ke Jehovah esimek ete ẹnọ ikọt imọ ndausụn̄. Didie ke Jehovah edise nnyịn edieke isọn̄de ibuot ye mbon oro enye emekde ete ẹda nnyịn usụn̄?—Kot 1 Thessalonica 5:12, 13.

¹⁶ Ke uwụtn̄kpọ, ke ini nditọ Israel ẹkesụkde Moses uyo, Jehovah akada nte ke imọ ke ẹsụk uyo oro. (Num. 14:26, 27) Abasi ikpụhọkede. Edieke isọn̄de ibuot ye mbon oro enye emekde ete ẹda nnyịn usụn̄, nnyịn isọn̄ ibuot ye enye!

17. Didie ke ikpanam n̄kpọ ye mbon oro ẹkamade ifetutom ke esop?

¹⁷ Apostle Paul ama owụt nte ikpanamde n̄kpọ ye mbon oro ẹkamade ifetutom ke esop. Enye ekewet ete: “Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot, sia mmọ ẹkpemede ukpọn̄ mbufo nte mmọ eke ẹdinamde  ibat, man mmọ ẹkpenam emi ke idatesịt, ẹkûnam ke nsiama, koro emi idifọnke ye mbufo.” (Heb. 13:17) Ke akpanikọ, imemke ndikop item nnyụn̄ nsụk ibuot. Edi ti ke inam emi man Abasi aka iso ama nnyịn. Ndi idịghe se ikpesịnde ofụri ukeme iyom edi oro?

Ka Iso Sana ke Enyịn Jehovah

18. Ntak emi Jehovah oyomde nnyịn ika iso isana?

¹⁸ Ọyọhọ usụn̄ ita oro iwụtde ke imama Jehovah edi ndika iso nsana ke enyịn esie. Mme ete ye eka ẹsisịn ukeme ẹnam nditọ mmọ ẹsana. Ntak-a? Koro mmọ ẹfiọk ke usanaidem edi nsọn̄idem. N̄ko-n̄ko, eyen oro asanade idem esinam ẹtoro ubon mmọ, onyụn̄ owụt ke ete ye eka ẹma ẹnyụn̄ ẹse enye enyịn. Kpasụk ntre, Jehovah emi edide Ete nnyịn eke heaven oyom nnyịn isana. Enye ọfiọk ke edieke isanade, ke nnyịn iyokop nsọn̄idem, ke emi oyonyụn̄ anam mme owo ẹtoro imọ. Emi enen̄ede edi akpan n̄kpọ koro mme owo ẹkeme ndidi ndituak ibuot nnọ Abasi ke ini ẹkụtde nte idade san̄asan̄a ikpọn̄ idiọk ererimbot emi.

19. Isan̄a didie ifiọk ke usanaidem edi akpan n̄kpọ?

¹⁹ Ke nso usụn̄ ke akpana ika iso isana? Ke kpukpru usụn̄. Jehovah ama anam nditọ Israel ẹfiọk ke usanaidem edi akpan n̄kpọ. (Lev. 15:31) Ibet Moses ama etịn̄ aban̄a utọ n̄kpọ nte edifụk ndek, edinam akpan̄kpan̄ asana, ediyet ubọk, ukot, ye ọfọn̄ asana. (Ex. 30:17-21; Lev. 11:32; Num. 19:17-20; Deut. 23:13, 14) Ẹma ẹti nditọ Israel ke Jehovah Abasi mmọ edi edisana. Ke ntre, ana mme asan̄autom edisana Abasi ẹsana n̄ko.—Kot Leviticus 11:44, 45.

20. Ke mme usụn̄ ewe ke akpana ika iso isana?

²⁰ Ana isana ke kpukpru usụn̄. Itre ndikere ndiọi n̄kpọ. Ika iso idu edisana uwem nte Jehovah etemede kpa ye oro idụn̄de ke ererimbot oro ọyọhọde ye oburobụt edinam. Akpan akpan, ana inen̄ede ikpeme mbak edinam nsunsu ido ukpono ekededi edisabade utuakibuot nnyịn. Inyene nditi se idude ke Isaiah 52:11, emi ọdọhọde ete: “Mbufo ẹdan̄a! ẹdan̄a! ẹwọn̄ọ ke esịt! ẹkûtụk n̄kpọ ndek: ẹwọn̄ọ enye ke ufọt; . . . ẹnam idem mbufo ẹsana.” Mfịn, edieke iyomde ndika iso nsana ke n̄kan̄ eke spirit, inaha ibuana ke edinam nsunsu ido ukpono ekededi. Ntak edi oro nnyịn mîkpabuanake ke mme usọrọ ye mme edinam ini nduọkodudu nsunsu ido ukpono emi ẹdide ọsọ n̄kpọ mfịn. Imọfiọk ke imemke ndidu edisana uwem. Edi mme asan̄autom Jehovah ke ẹdomo ndinam emi sia se inamde Abasi aka iso ama mmọ edi oro.

21. Nso ke ikpanam man Abasi aka iso ama nnyịn?

²¹ Jehovah oyom ndima nnyịn ke nsinsi. Edi ana nnyịn n̄ko isịn ofụri ukeme inam se ifọnde man enye aka iso ama nnyịn. Imekeme ndinam emi ke nditiene uwụtn̄kpọ Jesus nnyụn̄ nnịm ibet Jehovah man iwụt ke imama Enye. Edieke inamde kpukpru emi, idụhe se idikemede “ndidianade nnyịn ke ima Abasi oro odude ke Christ Jesus Ọbọn̄ nnyịn.”—Rome 8:38, 39.

Nte Emeti?

• Didie ke ubieresịt nnyịn ekeme ndinam Abasi aka iso ama nnyịn?

• Ntak anade ima mbon oro Jehovah amade?

• Ntak anade isụk ibuot inọ mbon oro ẹdade nnyịn usụn̄?

• Ntak emi mme asan̄autom Abasi ẹdade edidu edisana uwem ke akpan n̄kpọ?

[Mme Mbụme Ukpepn̄kpọ]

[Ekebe\Ndise ke page 20]

N̄WED ORO EKPEPDE OWO NDIDU ETI UWEM

Ke mbono district oro ẹkenịmde ke isua 2008 esịm 2009, ẹma ẹsio n̄wed oro ekotde “Keep Yourselves in God’s Love,” emi enyenede page 224. Nso idi uduak obufa n̄wed emi? Edi man an̄wam mme Christian ẹfiọk ẹnyụn̄ ẹma mme edumbet Jehovah. Enye enen̄ede owụt nte mme Christian ẹkpedude uwem. Nditịn̄ enyịn̄ n̄kpep“Keep Yourselves in God’s Love” ayanam inen̄ede ifiọk ke idụhe se ifọnde nte ndidu uwem ekekem ye mme edumbet Jehovah, ndien emi ayanam inyene nsinsi uwem.

N̄wed emi ayanam ifiọk n̄ko ke ndinam item Jehovah idobike owo mbiomo, edi akam owụt ke imama Jehovah. Ntre, n̄wed emi ayanam ibụp idem nnyịn ite, ‘Ntak emi nnamde item Jehovah?’

Ke ini mme owo ẹkpọn̄de Jehovah, isidịghe sia akpanikọ Bible mîn̄wan̄ake mmọ, edi idiọk usụn̄uwem mmọ esiwak ndidi ntak. Mmọdo, oyom inen̄ede ima mbet ye mme edumbet Jehovah emi adade nnyịn usụn̄ kpukpru usen. Nnyịn imenịm ke obufa n̄wed emi ayan̄wam mme erọn̄ Jehovah ke ofụri ererimbot ẹka iso ẹnam se ifọnde, ẹwụt ke Satan edi ọbọn̄ nsu, ẹnyụn̄ ẹka iso ẹnịm idem ke ima Abasi!—Jude 21.

[Ndise ke page 18]

“Edieke mbufo ẹnịmde mbet mi, mbufo ẹyedu ke ima mi, kpa nte ami nnịmde mbet Ete mi nnyụn̄ ndude ke ima esie”