‘Jehovah Anam Iso Esie Ayama Ọnọ Mmọ’

OSỊP emi odude ke iso owo ebe 30. Osịp 14 ẹsinam owo ekeme ndituak inua imam. Kere nte uyo fo ekpetiede edieke mûkpenyeneke osịp. Ndi ekpenem? Baba-o. Okposụkedi emi mme inan mîsikemeke ndisioro uyo, osịp emi ẹdude mmọ ke iso ẹsinam nneme mmọ enen̄ede enem. Mmọ ẹsida idem ẹtịn̄ se ededi oro mmọ ẹyomde nditịn̄. Idem esinen̄ede akpa ediwak owo ndikụt nte ẹdade usem idiọn̄ọ ẹtịn̄ se ededi oro owo oyomde nditịn̄.

Mfịn, mme inan ke ofụri ererimbot ẹkụt iso owo emi anamde n̄kpọ enen̄ede an̄wan̄a mmọ akan owo ekededi. Oro edi “iso Ọbọn̄” Jehovah. (Ese. 2:19) Emi itịbeke ke mbuari. Jehovah ama owụt ke imama mme inan toto ke eset, idem ke eyo nditọ Israel. (Lev. 19:14) Enye ke amama mmọ tutu emi. “[Uduak Abasi edi] nte kpukpru orụk owo ẹkpenyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:4) Ediwak inan ẹkụt Abasi iso ke ndamban̄a usụn̄ ke ndinyene nnennen ifiọk mban̄a enye. Didie ke mmọ ẹnam emi okposụkedi emi mmọ mîkemeke ndikop n̄kpọ? Mbemiso ibọrọde mbụme emi, ẹyak ineme iban̄a ntak emi usem idiọn̄ọ edide akpan n̄kpọ ọnọ mme inan.

Inan Ẹsikop N̄kpọ ke Enyịn

Mme owo ẹnyene ukwan̄ ekikere ẹban̄a mme inan ye usem idiọn̄ọ. Ẹyak ineme ndusụk n̄kpọ iban̄a mme inan. Mme inan ẹkeme ndiwat ubomisọn̄. Esinen̄ede ọsọn̄ mmọ ndise owo inua mfiọk se ẹtịn̄de. Usem idiọn̄ọ isan̄ake n̄kpọ ndomokiet ye n̄wed mme nnan, inyụn̄ idịghe ikpîkpu edinam idiọn̄ọ. Usem idiọn̄ọ inyụn̄ idịghe kiet; ẹwak. Mme inan ke nsio nsio idụt ye obio ẹnyene nsio nsio usụn̄ oro mmọ ẹsidade ẹneme nneme.

Ndi mme inan ẹkeme ndikot n̄wed? Okposụkedi emi ndusụk mmọ ẹsikotde n̄wed ọfọn, ata ediwak mmọ isikemeke. Ntak-a? Koro se ẹwetde ke n̄wed edi ikọ oro ẹsitịn̄de uyo ọwọrọ. Yak ineme nte ekpri eyenọwọn̄ emi okopde n̄kpọ esikpepde nditịn̄ ikọ. Enye oyokop mme owo ẹsemde usem emana esie toto ke emana. Ibịghike, enye ayada ikọ kiet adian ye efen anam enye ọwọrọ n̄kpọ. Enye ekeme ndinam emi sia enye esikop nte mme owo ẹsemde usem emi. Ntem, ke ini nditọwọn̄ oro ẹkopde n̄kpọ ẹtọn̄ọde ndikot n̄wed, n̄kukụre se mmọ ẹsinamde ẹsidi ndifiọk ke mbubịt n̄kpọ oro ẹdụride ke n̄wed ẹdi se mmimọ isikopde.

Idahaemi, yak idọhọ ke ẹda fi ẹka esenidụt, ẹkesịn fi ke ufọk emi ẹdade akrasi ẹbọp. Amada okụt mme owo, edi ukopke se mmọ ẹtịn̄de. Akanam unyụn̄ ukopke owo esemde usem obio oro. Ndien kpukpru usen, mbon obio oro ẹdida ke edem akrasi oro ẹdomo ndinyene nneme ye afo.  Afo ukopke se mmọ ẹtịn̄de. N̄kukụre se okụtde edi nte ke n̄kpọkinua mmọ ke ẹnyen̄e. Ke ini mmọ ẹkụtde ke ukopke se mmimọ itịn̄de, mmọ ẹwet se mmọ ẹketịn̄de ẹnyan ẹwụt fi ke edem akrasi oro. Mmọ ẹkere ke akpana ọfiọk se iwetde oro. Ndi ọkpọfiọk? Ekpenen̄ede ọsọn̄ fi ndinyene nneme edieke odude ke utọ idaha oro. Ntak-a? Koro akanam ukopke mme owo ẹtịn̄de se ẹkewetde oro ẹnọ fi. Nte esitiede ediwak inan edi oro.

Usem idiọn̄ọ ke mmọ ẹsida ẹnyene nneme. Ẹsida usem idiọn̄ọ ẹtịn̄ se ededi oro ẹyomde nditịn̄. Nte ẹmenerede ubọk, ẹnịmde iso, ye nte ẹnịmde idem—ẹnam kpukpru emi ekekem ye mbet usem idiọn̄ọ. Ntem ke owo esida idem etịn̄ ikọ, ke adan̄aemi andikop adade enyịn okop.

Ekpere ndidi kpukpru se inan ẹsinamde ke ini ẹsemde usem idiọn̄ọ ẹnyene se ẹwọrọde. Nte mmọ ẹsinịmde iso isidịghe ndida nsion̄o ndyọ. Ata akpan usụn̄ kiet oro ẹsemde usem idiọn̄ọ edi oro. Ke uwụtn̄kpọ: Ndimenede nditanenyịn ke ini ẹbụpde owo mbụme ekeme ndiwụt ke owo iyomke ibọrọ mîdịghe ke ẹyom ẹbọrọ ih m̀mê ihih. Edi ndisụhọde nditanenyịn ekeme ndida nnọ utọ mbụme nte anie, nso, m̀mọ̀n̄, ini ewe, ntak-a, mîdịghe didie. Nte ẹnịmde inua ekeme ndiwụt nte n̄kpọ okponde, m̀mê nte n̄kpọ otụkde owo. Nte inan enịmde ibuot, afara, mfụk, ye enyịn—kpukpru emi ẹnyene se ẹwọrọde.

Emi esinam nneme mmọ enen̄ede enyene inem. Idụhe se mme inan emi ẹnen̄erede ẹfiọk usem idiọn̄ọ mîkemeke nditịn̄—se ẹkụtde ke enyịn ye se owo mîkwe.

N̄wed Usem Idiọn̄ọ Ẹnyene Ufọn

Mme inan ẹkeme ndinyene ifiọk Jehovah ẹnyụn̄ ‘ẹbuọt idem’ ye enye edieke etop Abasi odude ke usem idiọn̄ọ. Ntak edi oro Mme Ntiense Jehovah ẹsịnde idem ẹkwọrọ ikọ ẹnọ mme inan ke ofụri ererimbot ẹnyụn̄ ẹnọ mmọ mme vidio oro ẹdin̄wamde mmọ. (Rome 10:14) Idahaemi, Mme Ntiense Jehovah ẹsio n̄wed ke usem idiọn̄ọ 40 ẹdọn̄ ke DVD. Ndien otu 58 ẹdu ke ofụri ererimbot oro ẹkabarede n̄wed ẹsịn ke usem idiọn̄ọ. Ndi kpukpru emi ẹnyene ufọn?

Jeremy, emi ete ye eka esie ẹdide inan ọdọhọ ete: “Mmeti nte ete mi ekesitiede ebịghi ke ubet esie ekpep ikpehe ekikere ifan̄ kpọt ke Enyọn̄-Ukpeme, onyụn̄ odomo ndifiọk se enye ekpepde. Etise enye ọwọrọ edi edinam idiọn̄ọ ete: ‘An̄wan̄a mi do ndien!’ Ekem enye ada usem idiọn̄ọ asian mi se idude ke ibuotikọ oro. N̄kedi isua 12 ini oro. Mma nsọsọp n̄kot mme ikpehe ekikere oro nnyụn̄ ndọhọ enye ke usem idiọn̄ọ nte: ‘Papa, etie nte idịghe se  itie oro etịn̄de edi oro. Itie oro ọdọhọ . . . ’ Enye ete mi bet kan̄a onyụn̄ afiak odụk ubet esie man ekese m̀mê iyọfiọk se itie oro ọwọrọde. Ndifreke mfụhọ oro enye okokopde ye nte esịt ekesinemde mi ndikụt enye afiakde ekekpep ibuotikọ oro ke ubet esie. Edi n̄wed usem idiọn̄ọ oro ẹsion̄ode ke DVD ẹnam enye ekeme ndinen̄ede mfiọk se ẹtịn̄de ẹban̄a. Esịt esinen̄ede enem mi ndikụt enye etịn̄de nte imade Jehovah ye inua imam.”

Kere n̄ko ban̄a ifiọkutom ebe ye n̄wan emi ẹdide Ntiense, emi ẹkenyenede nneme ye n̄kaiferi kiet emi edide inan ke Chile. N̄kaiferi oro ekekere Jessenia. Ke eka Jessenia ama ekenyịme mmọ ẹwụt Jessenia N̄wed Mi eke Mme Mbụk Bible ke DVD ke usem idiọn̄ọ Chile, mmọ ẹma ẹdọhọ ẹte: “Ke ini Jessenia ekesede mbụk emi, enye ama asak ekem ọtọn̄ọ nditua. Ke ini eka esie okobụpde enye m̀mê nso itịbe, enye ọkọdọhọ ke n̄kpọ oro imọ isede enen̄ede enem imọ. Eka esie ama edifiọk ke se enye ekesede ke DVD oro ama enen̄ede an̄wan̄a enye.”

N̄wan kiet emi edide inan, emi onyụn̄ odụn̄de ke Venezuela enyene eyen kiet, ndien ke ama akafiak oyomo, enye ye ebe esie ẹkekere ke mmimọ inyeneke okụk ndida mbọk eyen en̄wen, ntre mmọ ẹma ẹbiere ndision̄o idịbi oro. Mme Ntiense Jehovah ẹma ẹwaha ufọk mmọ, okposụkedi emi mîkọfiọkke se mmọ ẹkeyomde ndinam, ẹnyụn̄ ẹwụt mmọ ọyọhọ ukpepn̄kpọ 12 ke n̄wed Nso ke Abasi Oyom Oto Nnyịn? ke Usem Idiọn̄ọ mbon Venezuela. Ibuotikọ emi etịn̄ aban̄a nte Abasi esede usion̄o idịbi ye uwotowo. Nte ini akade, n̄wan oro ama ọdọhọ Mme Ntiense oro ke imenen̄ede ikop inemesịt ndikekpep n̄wed oro. Enye ọkọdọhọ ke oro ama anam mmimọ ikûsion̄o aba idịbi oro. DVD usem idiọn̄ọ emi ama anyan̄a eyen esịt idịbi oro.

Lorraine, Ntiense kiet emi edide inan ọdọhọ ete: “Ndikpep Bible ekesidi ata ọkpọsọn̄ n̄kpọ ọnọ mi. Ama esisọn̄ ndifiọk se ẹtịn̄de ẹban̄a. Ke ini ẹkesiode n̄wed ukpepn̄kpọ Bible ke usem idiọn̄ọ, akpanikọ ama ọtọn̄ọ ndin̄wan̄a mi.” George n̄ko edi inan. Enye odu ke esop esịm isua 38. Kop se enye ọdọhọde: “Kpukpru owo ẹfiọk ke ndidiọn̄ọ n̄kpọ esinam owo enyene ukpono ye mbuọtidem ke idemesie. DVD usem idiọn̄ọ enen̄ede anam mi nsan̄a n̄kpere Jehovah.”

“Mbono Esop ke Usem Nnyịn”

Ke adianade ye n̄wed oro ẹsiode ke usem idiọn̄ọ, Mme Ntiense Jehovah ẹsinyụn̄ ẹnịm mme mbono esop ke usem idiọn̄ọ n̄ko. Mfịn, esop usem idiọn̄ọ ke  ofụri ererimbot ẹwak ẹbe 1,100. * Ẹnam kpukpru n̄kpọ ke usem idiọn̄ọ, ẹnyụn̄ ẹkpep inan Bible ke usem idiọn̄ọ. Ẹnam emi ke usụn̄ oro owụtde ukpono.

Ndi mme esop usem idiọn̄ọ emi ẹnyene ufọn? Kere ban̄a se iketịbede inọ Cyril emi akanade baptism nte kiet ke otu Mme Ntiense Jehovah ke 1955. Enye esisịn ifịk ekpep n̄wed oro ẹmịn̄de-mịn̄ onyụn̄ odụk mbono esop kpukpru ini. Ẹma ẹsikabade se ẹtịn̄de ẹnọ enye, edi ndusụk ini owo ikodụhe ndikabade. Ke ini andikabade mîkodụhe, nditọete ẹma ẹsiwet se etịn̄ikọ etịn̄de ẹnọ enye. Ke 1989, ke enye ama okodu ke esop n̄kpọ nte isua 34, ẹma ẹsiak esop usem idiọn̄ọ ke New York City ke United States. Eketie Cyril didie ke idem? Enye ọdọhọ ete: “Ndidụk mbono esop ke usem nnyịn eketie nte ndiwọrọ ke makmak ekịm ndụk un̄wana!”

Esop usem idiọn̄ọ Mme Ntiense Jehovah edi ebiet emi mme inan ẹsisopde idem ọtọkiet man ẹkpep n̄kpọ ẹban̄a Abasi ẹnyụn̄ ẹtuak ibuot ẹnọ enye. Do ke ikọt Abasi ẹsisịn udọn̄ ẹnọ kiet eken. Ke ererimbot emi owo mîmaha ndisan̄a n̄kpere mme inan, m̀mê ndinyene nneme ye mmọ, esop emi eberede ifet ọnọ mme inan ndineme nneme nnyụn̄ nnam ufan. Mme inan emi ẹsikpep n̄kpọ mi, ẹnam n̄kọri, ẹnyụn̄ ẹnam n̄kpọ man ẹdot ndikama ifetutom ke esop Jehovah. Ediwak mmọ ẹdu ke utom uyọhọ ini. Ndusụk ẹsika mme idụt en̄wen ẹken̄wam mme inan eken ẹkpep n̄kpọ ẹban̄a Jehovah. Iren emi ẹdide inan ẹkpep ndidi nti mme andikpep, mme anam ndutịm, ye mme ọbọkerọn̄, ndien ediwak mmọ ẹdot ndikama ifetutom ke esop.

Esop usem idiọn̄ọ ebe 100 ke United States, ndien n̄kpọ nte otu usem idiọn̄ọ 80 ẹdu do n̄ko. Ke Brazil, n̄kpọ nte esop usem idiọn̄ọ 300 ye se iwakde ibe otu 400 ẹdu. N̄kpọ nte esop usem idiọn̄ọ 300 ẹdu ke Mexico. Esop usem idiọn̄ọ ke Russia ebe 30 ye otu 113. Emi edi uwụtn̄kpọ ifan̄ oro anamde ifiọk n̄kọri oro inamde ke ofụri ererimbot.

Mme Ntiense Jehovah ẹsinịm n̄kpri ye ikpọ mbono ke usem idiọn̄ọ. Isua oko, ẹma ẹnịm ẹbe mbono 120 ke usem idiọn̄ọ ke ofụri ererimbot. Mbono emi ẹsinam mme inan emi ẹdide Mme ntiense ẹkụt ke mmimọ isịne ke otu ikọt Abasi oro ẹdude ke ofụri ererimbot, emi ẹdiade udia eke spirit oro ẹnọde ke edikem ini.

Leonard emi edide inan odu ke esop ebe isua 25. Enye ọdọhọ ete: “Mmọfiọk ke Jehovah edi ata Abasi. Edi n̄kenen̄ekede mfiọk ntak emi enye ayakde mme owo ẹbọ ufen ntem. Ndien emi ama esinam nyat esịt ye enye. Edi ke utịn̄ikọ oro ẹkenọde ke mbono district oro ẹkenịmde ke usem idiọn̄ọ, mma ndifiọk ntak emi enye ayakde mme owo ẹbọ ufen. Ke utịn̄ikọ oro okụrede, n̄wan mi ama ọfọi mi obụp ete, ‘An̄wan̄a fi?’ Mma mbọrọ ke ofụri esịt nte, ih! Mmodu ke esop mbe isua 25 idahaemi, mmonyụn̄ n̄kọm Jehovah sia mmen̄kọkpọn̄ke enye. N̄kosụk mmama Jehovah, edi n̄kenen̄ekede mfiọk orụk owo emi enye edide. Edi mmọfiọk idahaemi!”

Esịt Enem Mmọ

Inan oro ẹkpepde n̄kpọ ẹban̄a Jehovah ẹkụt Enye nte nso orụk owo? Mmọ ẹkụt enye nte Abasi emi amade ima, atuade owo mbọm, anamde se inende, anamde akpanikọ, ọfọnde ido, ye ntre ntre.

Mme inan emi ẹdide Mme Ntiense ke ofụri ererimbot ẹkụt iso Jehovah ẹyenyụn̄ ẹkekụt ẹkan oro. ‘Jehovah anam iso esie ayama ọnọ mmọ’ ke ntak emi enye amade mmọ. (Num. 6:25) Esịt enen̄ede enem mmọ ndidi ndifiọk Jehovah!

[Ikọ Idakisọn̄]

[Mme ndise ke page 24, 25]

Esop usem idiọn̄ọ ke ofụri ererimbot ebe 1,100

[Mme ndise ke page 26]

Iso Jehovah enen̄ede ayama ọno mme inan