Ima Christ Anam Ima Mbon En̄wen

“Jesus ama se inyenede enye ke ererimbot, onyụn̄ ama mmọ tutu esịm utịt.”—JOHN 13:1.

1, 2. (a) Didie ke ima Jesus edi n̄wọrọnda? (b) Nso ke idineme ke ibuotikọ emi iban̄a ima?

JESUS ama enen̄ede owụt nte ẹkpemade ima. Enye akanam kpukpru n̄kpọ ke ima—nte enye eketịn̄de ikọ, okodude uwem, idem ndikenyịme ndikpa ke ibuot nnyịn—kpukpru emi ẹkewụt nte enye amade nnyịn. Idem tutu esịm usen emi enye akakpade, Jesus okosụk amama mme owo, akpan akpan mme mbet esie.

² Jesus ama enen̄ede owụt mbet esie nte ẹkpemade ima. Nte enye akamade ima anam nnyịn n̄ko ima nditọete nnyịn ke esop, ye mmọ eken. Ke ibuotikọ emi, iyeneme nte mbiowo ẹkpekpebede ima Jesus ke ini ẹnamde n̄kpọ ye mbon oro ẹnamde idiọkn̄kpọ, idem ọkpọkọm edi akwa idiọkn̄kpọ. Iyeneme n̄ko nte ima Jesus esinamde mme Christian ẹn̄wam nditọete mmọ ke ini nsọn̄ọn̄kpọ, afanikọn̄, ye ini udọn̄ọ.

3. Jesus akanam didie n̄kpọ ye Peter kpa ye oro Peter ama akanam akwa idiọkn̄kpọ?

³ Ke okoneyo oro ekesierede usen oro ẹkewotde Jesus, apostle Peter ama akan̄ enye utịm ikata. (Mark 14:66-72) Edi ke Peter ama akakabade esịt nte Jesus ọkọdọhọde, Jesus ama efen ọnọ enye. Jesus ama ọnọ Peter ikpọ ifetutom. (Luke 22:32; Utom 2:14; 8:14-17; 10:44, 45) Nso ke ekpep oto nte Jesus ekesinamde n̄kpọ ye mbon oro ẹkenamde akwa idiọkn̄kpọ?

Nam N̄kpọ ye Mme Anamidiọk nte Jesus Ekesinamde

4. Nso idaha enen̄ede oyom inyene edu ukere n̄kpọ Christ?

⁴ Nsio nsio n̄kpọ ẹsitịbe oro oyomde inyene edu ukere n̄kpọ Christ, edi esịt ekeme ndinen̄ede nduọ nnyịn ke ini owo nnyịn m̀mê owo en̄wen ke esop anamde akwa idiọkn̄kpọ. Edi n̄kpọ mfụhọ nditịn̄ nte ke spirit ererimbot emi iyakke mme owo ẹdu aba eti uwem, akpan akpan nte mme akpatre usen idiọk ererimbot Satan emi asan̄ade ekpere utịt. Ndiọi edu ererimbot emi, m̀mê edu nnam-se-mmade, ẹkeme ndibe owo nnyịn ekededi, edide eyenọwọn̄ m̀mê akwa owo, inyụn̄ iyakke ika iso inam se ifọnde. Ẹma ẹsio ndusụk owo ke esop ẹfep ke eyo mme apostle, ẹnyụn̄ ẹsua ẹnọ ndusụk. Kpasụk ntre ke edi mfịn. (1 Cor. 5:11-13; 1 Tim. 5:20) Kpa ye oro, edieke mbiowo oro ẹkpede ikpe ẹnyenede orụk ima oro Christ ekenyenede, emi ekeme ndinen̄ede n̄n̄wam anamidiọk oro.

5. Didie ke mbiowo ẹkpekpebe Christ ke nte ẹnamde n̄kpọ ye mme anamidiọk?

⁵ Ana mbiowo ẹtiene ndinen edumbet Jehovah kpukpru ini nte Jesus akanamde. Ke ini mmọ ẹnamde emi, oro owụt ke mmọ ẹkpebe ifụre ifụre ido, mfọnido, ye ima Jehovah. Edieke owo enen̄erede akabade esịt, ndien ‘esịt obụn̄ọ onyụn̄ ọduọ enye’ ke se enye akanamde, idisọn̄ke mbiowo “ndinen̄ede utọ owo oro ke ifụre ifụre ido.” (Ps. 34:18; Gal. 6:1) Edi nso ke edinam ye owo emi ọsọn̄de ibuot etre ndikabade esịt?

6. Nso ke mbiowo ẹkpefep ke ini ẹnamde n̄kpọ ye mme anamidiọk, ndien ntak-a?

⁶ Mbiowo ye mbon eken ẹkeme ndiyat esịt edieke anamidiọk esịnde ndida item N̄wed Abasi oro ẹnọde enye, m̀mê odomode ndiduọhọ  mbon en̄wen. Emi ekeme ndinam mmọ ẹyat esịt ye enye, sia mmọ ẹdiọn̄ọ afanikọn̄ oro idiọkn̄kpọ esie adade edi. Edi iyatesịt esibabiat n̄kpọ, inyụn̄ iwụtke ke owo enyene “ekikere Christ.” (1 Cor. 2:16; kot James 1:19, 20.) Jesus ama esisua ọnọ ndusụk owo ke eyo esie, edi akananam enye itịn̄ke ikọ oro owụtde ke imọ isasua mmọ m̀mê ikọ oro ekemede ndinọ owo unan ke esịt. (1 Pet. 2:23) Utu ke oro, enye ama anam mme anamidiọk emi ẹfiọk ke mmọ ẹkeme ndikabade esịt nnyụn̄ mfiak nnyene mfọn Jehovah. Ke akpanikọ, Jesus ekedi ererimbot akpan akpan man ‘edinyan̄a mme anamidiọk.’—1 Tim. 1:15.

7, 8. Didie ke mbiowo ẹkpenam n̄kpọ ke ini ekpede ikpe ẹnọ owo ke esop?

⁷ Didie ke ikeme ndikpebe Jesus ke nte inamde n̄kpọ ye mbon oro anade ẹtụnọ ke esop? Ti ete ke Bible ndidọhọ ẹsikpe ikpe ke esop edi man ẹkpeme otuerọn̄, emi n̄ko ekeme ndinam anamidiọk akabade esịt. (2 Cor. 2:6-8) Esịt esinen̄ede ọduọ nnyịn ke ini ndusụk owo mîmaha ndikabade esịt, ndien ẹsio mmọ ẹfep, edi esịt esinem nnyịn ke ini ediwak ke otu emi ẹfiakde ẹbịne Jehovah ye esop esie. Ke ini mbiowo ẹnamde n̄kpọ nte Christ, emi esinam emem utom ọnọ anamidiọk ndikabade esịt. Ke ini ẹfiakde ẹda mmọ, ndusụk mmọ isikam itịghi-ti kpukpru itie N̄wed Abasi oro ẹkekotde ẹnọ mmọ item, edi ẹsiti nte mbiowo ẹkenamde n̄kpọ ye mmọ ukpono ukpono ye ke ima.

⁸ Ntre, ana mbiowo ẹnyene “mbun̄wụm spirit,” akpan akpan ima oro ebietde eke Christ, idem ọkpọkọm anamidiọk inyịmeke ndinam item Bible oro ẹnọde enye. (Gal. 5:22, 23) Ikpanaha mmọ ẹsọsọp ẹsio anamidiọk ẹfep ke esop. Akpana mmọ ẹnam n̄kpọ ndiwụt ke iyom anamidiọk emi afiak etiene Jehovah. Ntem, ke ini anamidiọk akabarede esịt, nte ediwak mmọ ẹsinamde, enye eyenen̄ede ọkọm Jehovah ye mbiowo ke ndikanam emem utom ọnọ imọ ndifiak nnyọn̄ ndi esop.—Eph. 4:8, 11, 12.

 Nyene Orụk Ima Oro Christ Ekenyenede ke Utịt Ini Emi

9. Nso iwụt ke Jesus ama enen̄ede ama mbet esie?

⁹ Luke etịn̄ n̄wọrọnda n̄kpọ oro Jesus akanamde ndiwụt ke imama mbet esie. Christ ama ọfiọk ke owo idikemeke ndifehe n̄wọrọ ke Jerusalem ke ini mbonekọn̄ Rome ẹdidide ẹdikan enye ẹkụk. Ntre, enye ama eteme mbet esie ete: “Ke ini mbufo ẹkụtde nte mbonekọn̄ ẹkande Jerusalem ẹkụk, ẹfiọk ndien ẹte n̄wụre esie asan̄a ekpere.” Nso ke mmọ edinam? Jesus ama etịn̄ nnennen nnennen se mmọ ẹdinamde, ete: “Adan̄aoro yak mbon oro ẹdude ke Judea ẹtọn̄ọ ndifehe n̄ka ikpọ obot, n̄ko yak mmọ eke ẹdude ke esịt esie ẹwọn̄ọ, yak mmọ eke ẹdude ke in̄wan̄ ẹkûnyụn̄ ẹdụk ke esịt esie; koro emi edi mme usen eke ẹbierede ikpe nte enende, man kpukpru n̄kpọ emi ẹkewetde ẹkpesu.” (Luke 21:20-22) Ke ini mbonekọn̄ Rome ẹkekande Jerusalem ẹkụk ke isua 66 E.N., mbon n̄kopitem ẹma ẹnam se Jesus ọkọdọhọde.

10, 11. Didie ke ndineme n̄kpọ mban̄a nte mme Christian ẹkefehede ẹkpọn̄ Jerusalem ekeme nditịm nnyịn idem nnọ “akwa ukụt”?

¹⁰ Akana mme Christian ẹnanam n̄kpọ ẹwụt ke imama ekemmọ nditọete ke ini itọk oro nte Christ akamade mmọ. Mmọ ẹkenyene ndibuana se ededi oro mmọ ẹkenyenede ye kiet eken. Edi ntịn̄nnịm ikọ Jesus ikaban̄ake nsobo Jerusalem kpọt. Enye ọkọdọhọ ete: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matt. 24:17, 18, 21) N̄kpọ ekeme ndisọn̄ ye nnyịn n̄ko ke ini “akwa ukụt,” m̀mê idem mbemiso enye akam ọtọn̄ọde. Edi iyọbọhọ edieke inyenede edu ukere n̄kpọ Christ.

¹¹ Ini oro ke edinen̄ede iyom ima nditọete nnyịn ke ofụri esịt nte Jesus. Paul ọkọdọhọ ete: “Yak owo nnyịn kiet kiet enem mbọhọidụn̄ esie esịt ke ndida se ifọnde mbọp enye nnam ọkọri. Koro Christ n̄ko ikenemke idemesie esịt . . . Edi Abasi emi ọnọde ime ye ndọn̄esịt akpakam anam mbufo ẹnyene edu ukere n̄kpọ oro Christ Jesus ekenyenede.”—Rome 15:2, 3, 5.

12. Nso orụk ima ke oyom nnyịn inyene mfịn, ndien ntak-a?

¹² Peter ama okụt ke Jesus ama imọ, ntre enye ama esịn udọn̄ ọnọ mme Christian ndinyene “ima nditọete eke mîsan̄ake ye mbubịk” ndinyụn̄ ‘nsụk ibuot nnọ akpanikọ.’ Akana mmọ “ẹnyene ufiop ufiop ima emi  otode esịt ẹnọ kiet eken.” (1 Pet. 1:22) Mfịn, oyom inen̄ede inyene orụk ima oro Christ ekenyenede. Ikọt Abasi ẹsobo ekese afanikọn̄ idahaemi. Ke ndondo emi, kpukpru owo ẹkụt nte mbubehe ẹduọde ke ererimbot, ntre, ikpanaha nnyịn ikọn̄ mbuọtidem nnyịn ke ererimbot emi. (Kot 1 John 2:15-17.) Utu ke oro, nte ererimbot emi asan̄ade ekpere utịt, akpana inen̄ede isan̄a ikpere Jehovah ye nditọete ke esop, inyụn̄ inen̄ede ima mmọ. Paul eketeme mme Christian ete: “Ẹda ima nditọete ẹnyene esịt ima ẹnọ kiet eken. Ẹda iso ke ndinọ kiet eken ukpono.” (Rome 12:10) Peter ama esịn ke uyo oro ete: “Ke akande kpukpru n̄kpọ, ẹnyene ufiop ufiop ima ẹnọ kiet eken, koro ima ofofụk ekese idiọkn̄kpọ.”—1 Pet. 4:8.

13-15. Didie ke ndusụk nditọete ẹkewụt ke imenyene orụk ima oro Christ ekenyenede ke ini afanikọn̄ ekesịmde nditọete mmọ?

¹³ Ẹdiọn̄ọ Mme Ntiense Jehovah ke ofụri ererimbot nte mbon oro ẹnen̄erede ẹnyene orụk ima oro Christ ekenyenede. Ke uwụtn̄kpọ, ke ini oyobio akabiatde ata akamba ikpehe ke usụk usụk United States ke 2005, Mme Ntiense ẹma ẹka ẹken̄wam nditọete mmọ. Se iwakde ibe owo 20,000 ẹma ẹkpebe ima Jesus, ẹnyịme ndikpọn̄ ndiye ufọk mmọ ye eti utom emi mmọ ẹkenamde man ẹken̄wam nditọete mmọ oro ẹkesobode afanikọn̄.

¹⁴ Oyobio ama anam mbufụt mmọn̄ ọtọ emen obio kiet. Mbufụt emi ama okpon ekem ndifụk ufọk oro enyenede enyọn̄ ita. Afanikọn̄ emi ama owụri ata ediwak ufọk. Mme Ntiense oro ẹkenyenede nsio nsio usọ ẹma ẹda ediwak n̄kpọutom ẹto nsio nsio idụt ẹdi, ẹdinam se ededi oro ẹkeyomde ẹnam. Ata nditọeka iba emi ẹkedide mme ebeakpa, ẹma ẹtan̄ n̄kpoduoho mmọ ẹdọn̄ ke ekpri ubomisọn̄ mbiomo ẹwat ebe kilomita 3,000 ẹken̄wam. Owo mmọ kiet ama osụhọ do man aka iso ọnọ un̄wam, onyụn̄ anam utom usiakusụn̄ ofụri ini do n̄ko.

¹⁵ Ufọk oro nditọete nnyịn ẹkefiakde ẹbọp ẹnyụn̄ ẹdiọn̄ ẹnọ ekemmọ nditọete ama ebe 5,600. Eketie mme enyene ufọk emi didie ke idem? Eyenete an̄wan kiet emi oyobio oro okowụride ufọk esie ama ọwọrọ okodụn̄ ke ekpri ndụtndụt ufọkisan̄ oro ẹsiyịride ke ubomisọn̄, inyụn̄ inyeneke eti n̄kpọ utemudia. Nditọete oro ẹma ẹbọp ata ediye ukeuke ufọk ẹnọ enye. Enye ama atua ke ama ekedi edikụt ufọk oro, onyụn̄ ọkọm Jehovah ye nditọete oro. Ndusụk nditọete isifiakke inyọn̄ obufa ufọk oro ẹbọpde ẹnọ mmọ ke ndondo oro ẹbọpde ẹma. Edi ẹsiyak n̄kpọ nte isua kiet m̀mê akande oro ebe. Ntak-a? Man nditọete oro ẹdide ndinọ un̄wam ẹkpedụn̄ọ do ẹbọp eke nditọete eken n̄ko. Emi enen̄ede owụt ke mmọ ẹnyene edu ukere n̄kpọ Christ.

 Nyene Edu Christ ke Ini Owo Ọdọn̄ọde

16, 17. Didie ke ikpanam n̄kpọ ye owo udọn̄ọ man iwụt ke imenyene edu ukere n̄kpọ Christ?

¹⁶ Idịghe kpukpru owo ke oto-obot afanikọn̄ esinọmọ. Edi idụhe owo emi mîsidọn̄ọke, mîdịghe owo esie ọdọn̄ọ. Jesus ama owụt nte ikpanamde n̄kpọ ke ini owo ọdọn̄ọde. Ima akanam enye esitua mbon udọn̄ọ mbọm. Ke ini mme owo ẹkedade mbon udọn̄ọ ẹbịne enye, enye ama “ọkọk kpukpru mbon emi idem mîsọn̄ke.”—Matt. 8:16; 14:14.

¹⁷ Okposụkedi emi mme Christian mîkemeke ndikọk udọn̄ọ nte Jesus ekesikọkde, mmọ ẹsitua mbon udọn̄ọ mbọm nte Jesus ekesituade. Didie ke mmọ ẹsinam emi? Usụn̄ kiet oro mbiowo ẹwụtde ke imenyene edu ukere n̄kpọ Christ ke afan̄ emi edi ndinam ndutịm man ẹse ẹban̄a mbon udọn̄ọ ke esop. Ke ẹma ẹkenam oro, ana mmọ ẹkụt ẹte ke owo odu ndinam emi, man ekekem ye se idude ke Matthew 25:39, 40. * (Kot.)

18. Didie ke nditọete iban iba ẹkenyene ata ima ẹnọ ekemmọ eyenete, ndien nso ikedi utịp?

¹⁸ Edi idịghe mbiowo kpọt ẹnyene ndinam nti n̄kpọ nnọ mme owo. Da se iketịbede inọ Charlene emi ekedide isua 44 ke uwụtn̄kpọ. Enye ọkọdọn̄ọ kansa, ẹkenyụn̄ ẹdọhọ ke enye edidu uwem usen duop kpọt. Nditọete iban iba, Sharon ye Nicolette, ẹma ẹkụt ke Charlene oyom un̄wam, ye nte ke ebe esie ọbọ ufen akaha ndise mban̄a enye, ntre mmọ ẹma ẹnyịme ndise enye enyịn kpukpru usen tutu enye akpa. Charlene ama odu uwem esịm ọfiọn̄ kiet ye ubak, ndien nditọete iban iba emi ikọkpọn̄ke enye tutu esịm usen emi enye ọkọduọkde akpatre ibifịk. Sharon ọkọdọhọ ete: “Imemke ndise mban̄a owo akpan akpan ke ini ọfiọkde ke enye ididụhe uwem. Edi Jehovah ama aka iso ọsọn̄ọ nnyịn idem. N̄kpọ emi ama anam inen̄ede ikpere Abasi ye kiet eken.” Ebe Charlene ọdọhọ ete: “Ndifreke mfọnido ye un̄wam nditọete iban iba emi tutu amama. Nte mmọ ẹkenamde n̄kpọ ama anam n̄kpọ enen̄ede emem ye edima an̄wan mi usen ifan̄ oro enye okosụk okotde ibifịk, onyụn̄ ọnọ mi ndọn̄esịt ye nsịnudọn̄ oro n̄kenen̄erede nyom. Ndifreke mmọ ke nsinsi. Ima n̄waidem emi anam ndọdiọn̄ mbuọt idem ye Jehovah nnyụn̄ nnen̄ede mma nditọete mi ke ofụri ererimbot.”

19, 20. (a) Siak ition ke otu edu Christ oro inemede. (b) Nso ke afo ebiere ndinam?

¹⁹ Ke ibuotikọ ukpepn̄kpọ ita emi, imeneme ition ke otu edu Jesus, ye nte ikemede ndikere nnyụn̄ nnam n̄kpọ nte Jesus. Ẹyak idomo ‘ndinyene ifụre ifụre ido inyụn̄ isụhọde esịt’ nte Jesus. (Matt. 11:29) Idomo n̄ko ndifọn ido ye mme owo, idem ọkpọkọm etie nte unana mfọnmma mmọ akan eke mbon en̄wen. Ẹyak inam se Jehovah ọdọhọde uko uko, inyụn̄ isụk ibuot inọ enye, idem ọkpọkọm ke ini idomo.

²⁰ Ke akpatre, ẹyak ima kpukpru nditọete nnyịn “tutu esịm utịt” nte Christ akamade mbet esie. Orụk ima emi anam ẹdiọn̄ọ nnyịn nte ata mme anditiene Christ. (John 13:1, 34, 35) Ih, “ẹyak ima nditọete [nnyịn] akaka iso.” (Heb. 13:1) Nam se ededi oro ekemede man ima oro akaka iso! Ka iso toro Jehovah nyụn̄ n̄wam mme owo. Jehovah ọyọdiọn̄ fi ke ukeme oro esịnde ndinam emi.

[Ikọ Idakisọn̄]

Nte Afo Emekeme Ndinam An̄wan̄a?

• Didie ke mbiowo ẹkeme ndinyene edu ukere n̄kpọ Christ ke ini ẹnamde n̄kpọ ye anamidiọk?

• Ntak emi enen̄erede oyom inyene orụk ima oro Christ ekenyenede ke utịt ini emi?

• Didie ke ikeme ndinyene edu Christ ke ini owo ọdọn̄ọde?

[Mme Mbụme Ukpepn̄kpọ]

[Ndise ke page 17]

Mbiowo ẹyom anamidiọk afiak etiene Jehovah

[Ndise ke page 18]

Didie ke mme Christian oro ẹkekpọn̄de Jerusalem ẹkewụt ke imenyene edu ukere n̄kpọ Christ?

[Ndise ke page 19]

Ẹdiọn̄ọ Mme Ntiense Jehovah nte mbon oro ẹnen̄erede ẹnyene orụk ima oro Christ ekenyenede