Mma Ndifiọk Se N̄kpadade Uwem Mi Nnam

Nte Gaspar Martínez Obụkde

N̄koto ekpri obio-in̄wan̄ ndiforo ke akwa obio. Edi nte mbụk emi akade iso, oyokụt ke kpukpru inyene oro n̄kọkọde ikedịghe se n̄kenen̄erede nyom.

N̄KAMANA ke iduọk isua 1930, ke obio-in̄wan̄ Rioja ke edem edere Spain. Mma n̄kpọn̄ ufọkn̄wed ke ini n̄kedide isua duop, edi mma n̄keme ndikot nnyụn̄ n̄wet n̄kpọ. Mma nsitiene nditọeka mi itiokiet mbọk erọn̄ mîdịghe ntọ n̄kpọ ke ekpri in̄wan̄ oro ikenyenede.

Ubuene ama anam ikere ke okụk ye inyene ẹdi kpukpru n̄kpọ. Ima itọn̄ọ ndifịbe mbon oro ẹnyenede n̄kpọ. Kpa ye oro, bishop Catholic ọkọdọhọ ke “obio-in̄wan̄ nnyịn ẹkpono Abasi ẹkan ke ofụri ebiet oro imọ isede enyịn.” Enye ikọfiọkke ke nte ini akade, ke ediwak owo idikaha aba Catholic.

Ndiyom Se Ifọnde Ikan Oro

Mma ndọ eyen obio nnyịn emi ekerede Mercedes. Ikebịghike ima inyene eyen. Ima ikpọn̄ obio nnyịn ke 1957 ika akwa obio emi ẹkotde Logroño, ndien ikebịghike mbonubon nnyịn ẹma ẹkpọn̄ obio oro n̄ko. Sia mmen̄kenyeneke ubọkutom, mma mfiọk ke ndinyeneke utom oro ẹdikpede mi eti okụk. Mma n̄kere m̀mê nso ke n̄kpanam. Mma ntọn̄ọ ndikokot n̄wed ke itie ubon n̄wed m̀mê nyokụt utom, okposụkedi emi mmen̄kọfiọkke n̄wed oro n̄kpokotde.

Nte ini akakade, mma n̄kop ke ekebe utịn̄ikọ ke enyene mbon oro ẹsidade leta ẹkpep owo Bible. Ke mma n̄kekpep mma, ndusụk mbon ufọkabasi Protestant ẹma ẹnyene nneme ye ami. Mma n̄kụt nte mme adaiso ufọkabasi mmọ ẹtọhọde ke otu idemmọ usen ifan̄ oro n̄ketienede n̄ka ufọkabasi mmọ. Ntre mma mfiak, nnyụn̄ n̄kere ke kpukpru ufọkabasi ẹtie ntre.

Mmokụt Akpanikọ

Akparawa kiet emi ekerede Eugenio ama awaha ufọk nnyịn ke 1964. Enye ekedi kiet ke otu Mme Ntiense Jehovah, ndien akpa n̄kokopde n̄kpọ mban̄a ido ukpono emi ekedi oro. Edi ama enen̄ede ọdọn̄ mi ndineme n̄kpọ mban̄a Bible. N̄kekere ke mmenen̄ede mfiọk Bible. Mma ntiene nsiak itie Bible ifan̄ oro n̄kọdiọn̄ọde. Kpa ye oro n̄kọdọhọde ke ukpepn̄kpọ Protestant enen, ami ke idemmi n̄kenịmke mmọ.

Ke ami ye Eugenio ima ikenyene nneme ikaba, mma n̄kụt ke enye enen̄ede ọfiọk Ikọ  Abasi. Idem ama akpa mi ndikụt nte enye asiakde ediwak itie Bible onyụn̄ anamde enye an̄wan̄a, kpa ye oro enye mîkakaha n̄wed nte ami. Enye ama owụt mi itie Bible emi ọdọhọde ke nnyịn idu ke mme akpatre usen, ndien ke mîbịghike ke Obio Ubọn̄ Abasi ayanam isọn̄ akabade edi paradise. Esịt ama enem mi etieti.—Ps. 37:11, 29; Isa. 9: 6, 7; Matt. 6:9, 10.

Mma nnyịme ẹkpep mi Bible. Se n̄kekpepde ama enen̄ede otụk mi, ndien ekpere ndidi kpukpru ẹkedi mbufa n̄kpọ. Mma ndikụt do ndien se n̄koyomde, ye se n̄kpadade uwem mi nnam. Mma ndikụt n̄ko ke ofụri emi n̄kesịnde ibuot nsịn itọn̄ nyom eti utom man ndi owo ke ererimbot ọkọwọrọ ikpîkpu ye ukpọk. Esịt ama enem mi ndifiọk ke kpukpru afanikọn̄ emi ẹmọn̄ ẹbe ẹfep, n̄ko ke udọn̄ọ ye n̄kpa ididụhe aba.—Isa. 33:24; 35:5, 6; Edi. 21:4.

Mma nnen̄ede n̄kop idatesịt nnyụn̄ ntọn̄ọ ndisian mme iman mi nte ke Abasi ọn̄wọn̄ọ ndinam isọn̄ emi edi paradise emi nti owo ẹdidụn̄ọde ke nsinsi.

Ubon Nnyịn Ẹkpep Akpanikọ

Ikebịghike, n̄kpọ nte nnyịn owo 12 ima isisop idem kpukpru Sunday ke ufọk eyeneka ete mi ikpep Bible. Ikesida n̄kpọ nte hour iba m̀mê ita inam oro. Ke Eugenio ama okokụt ke ediwak owo ke ubon nnyịn ẹnyene udọn̄ ke Bible, enye ama anam ndutịm man esika ekekpep ubon kiet kiet n̄kpọ.

Mma nnyene iman n̄ko ke Durango, emi edide ekpri obio emi Ntiense ndomokiet mîkodụhe. To ke ebiet oro ikodụn̄de sịm do edi n̄kpọ nte kilomita 120. Ke ọfiọn̄ ita ama ekebe, mma nda usen ifan̄ n̄kese mmọ man nneme se n̄kekpepde ye mmọ. Ima isibono n̄kpọ nte owo duop kpukpru mbubreyo, nnyụn̄ nneme nneme Bible ye mmọ tutu ebe ufọt okoneyo. Mmọ ẹma ẹnen̄ede ẹkpan̄ utọn̄. Ke nyomde ndinyọn̄, mma nnọ mmọ Bible ye mme n̄wed esop Abasi nnyịn. Mma nsika n̄kese mmọ ke ini ke ini.

Ke ini Mme Ntiense ẹkesịmde Durango—emi owo mîkọkwọrọke ikọ akpa—mmọ ẹma ẹkụt owo 18 emi ẹtiede ẹbet ẹdikpep mmimọ Bible. Mmọ ẹma ẹnam ndutịm man ẹkpekpep kpukpru ubon do Bible.

Tutu esịm ini emi, n̄wan mi ikenyịmeke ndikpep akpanikọ ke ntak emi ekefehede owo enyịn. Ẹma ẹkpan utom Mme Ntiense Jehovah ke Spain ini oro, ntem enye ekekere ke ukara ẹyebịn nditọ nnyịn ke ufọkn̄wed, ẹnyụn̄ ẹbịn nnyịn n̄ko ke obio. Edi ke ini enye okokụtde nte kpukpru owo ke ubon nnyịn ẹkpepde akpanikọ, enye ama enyịme nditiene n̄kpep.

Ke ufan̄ isua iba kpọt, owo 40 ke ubon nnyịn ẹma ẹkabade edi Mme Ntiense ẹnyụn̄ ẹna baptism man ẹwụt ke imayak idem inọ Abasi. Ke akpanikọ, kpukpru nnyịn ikenyene ekikere kiet. Mma ndinyene ata inyene. Abasi ama enen̄ede ọdiọn̄ nnyịn ke n̄kan̄ eke spirit.

Nte N̄kponde Ntre ke Uwem Enen̄ede Enem Mi

Mma nda isua 20 nnen̄ede nse mban̄a nditọ nnyịn iba nnyụn̄ n̄n̄wam esop oro n̄kodude. Ke ini ami ye n̄wan mi ikọkpọn̄de obio nnyịn ika Logroño, ke otu n̄kpọ nte owo 100,000 emi ẹkedụn̄ọde ke Logroño, n̄kpọ nte owo 20 kpọt ẹkedi Mme Ntiense. Ikebịghike mma nnyene ediwak ifetutom ke esop.

Ke ini n̄kedide isua 56, usiakifia oro n̄kanamde utom ama ọduọ, ntre n̄kenyeneke aba utom. Ama esidọn̄ mi ndinam utom uyọhọ ini, ntre mma nda ifet oro ntọn̄ọ utom usiakusụn̄. Uwem ama ọsọn̄ etieti koro okụk ukpọn̄ utom oro ẹkekpede mi ikawakke. Edi n̄wan mi ama an̄wam ke okụk utom esie. Ima ikeme ndise mban̄a ubon nnyịn, ndien nnyịn ikananake n̄kpọ udu uwem. Ke nnanam utom usiakusụn̄,  ndien n̄wan mi esinam utom usiakusụn̄ unọ un̄wam ke ini ke ini. Enye enen̄ede ama utom emi.

Isua ifan̄ ko, enye ama esinọ Merche magazine. Merche ọkọtọn̄ọ ndikpep Bible toto ke ini enye ekedide eyenọwọn̄. Enye ama esima ndikot n̄wed nnyịn, ndien n̄wan mi ama okụt ke enye ke enyenyene udọn̄ ke akpanikọ. Nte ini akakade, Merche ama enyịme ẹkpep imọ Bible onyụn̄ ọtọn̄ọ ndinam n̄kọri. Edi Vicente ebe esie ekedi ọn̄wọn̄-n̄kpọ-owo, ntre ikesikemeke ndinam utom kiet mbịghi m̀mê ndise mban̄a enye; emi n̄ko akpakabiat ndọ mmọ.

N̄wan mi ama ọdọhọ Merche ọdọhọ ebe esie edikụt mi, ekem enye ama edikụt mi. Ke ima ikenyene nneme ediwak ini, enye ama enyịme ẹkpep imọ Bible. Enye ama ọtọn̄ọ ndinam ukpụhọde ke uwem esie, onyụn̄ etre ndin̄wọn̄ n̄kpọ ke ediwak usen. Ekem etre ke urua kiet m̀mê akande oro. Nte ini akakade, enye ama etre ndin̄wọn̄ mmịn ofụri ofụri. Enye ama enen̄ede eye edu, ubon esie ẹnyụn̄ ẹdiana kiet. Idahaemi, enye ye n̄wan ye nditọ ke ẹsịn ifịk ẹnam utom ke esop emi odude ke Canary Islands emi mmọ ẹdụn̄de.

Uwem Mi Enen̄ede Enyene Se Ọwọrọde

Okposụkedi emi ediwak iman mi oro ẹkekpepde akpanikọ ẹma ẹkekpan̄a, ubon nnyịn ke ọtọt, Abasi onyụn̄ enen̄ede ọdiọn̄ nnyịn. (N̄ke 10:22) Esịt enen̄ede enem mi ndikụt se ikperede ndidi kpukpru mbon oro ẹkekpepde Bible ke isua 40 emi ẹkebede—ọkọrọ ye nditọ ye nditọ nditọ mmọ—ẹkade iso ẹnam akpanikọ ẹnọ Jehovah.

Mmenyene ediwak iman emi ẹdide Mme Ntiense, ediwak mmọ ẹdi mbiowo, mme asan̄autom unamutom, ye mme asiakusụn̄. Akpan mi ye n̄wan esie ẹnam utom ke n̄kọk itieutom nnyịn ke Madrid ke Spain. N̄kpọ nte Ntiense 3,000 ẹkedu ke Spain ini n̄kodụkde esop, edi idahaemi, imebe owo 100,000. Mmenen̄ede mma utom usiakusụn̄, mmonyụn̄ n̄kọm Abasi ke se enye adade mi anam. Kpa ye oro mmen̄kenen̄ekede n̄ka n̄wed, mmesinam utom andida itie esenyịn circuit ke ini ke ini.

Isua ifan̄ ko, mma n̄kop ke owo idụn̄ke aba ke obio-in̄wan̄ oro n̄kodụn̄de. Nsọn̄ọn̄kpọ ama anam kpukpru owo ẹkpọn̄ in̄wan̄ ye ufọk mmọ ẹkeyom ebiet emi n̄kpọ ọfọnde. Esịt enen̄ede enem mi koro ediwak nnyịn oro ikọkpọn̄de obio-in̄wan̄ oro imedi idiforo ke n̄kan̄ eke spirit. Imedifiọk ke uwem enen̄ede enyene uduak, ye nte ke ndinam n̄kpọ Jehovah anam owo enen̄ede okop inemesịt.

[Ndise ke page 32]

Ekpere ndidi kpukpru mbonubon Brọda Martínez emi ẹfiọkde akpanikọ ke okụt emi