Sụk Ibuot Nyụn̄ Nyene Uko nte Christ

“Ẹnyene uko! Ami mmakan ererimbot.”—JOHN 16:33.

1. Didie ke Jesus okosụk ibuot ọnọ Abasi?

JESUS CHRIST ama esinam uduak Abasi kpukpru ini. Akananam enye ikereke ndisọn̄ ibuot ye Ete esie. (John 4:34; Heb. 7:26) Edi ke ini enye okodude ke isọn̄, enye ama osobo mme idaha oro akpakanamde enye ọsọn̄ ibuot ye Abasi. Toto ke usen emi enye ọkọtọn̄ọde ukwọrọikọ, Satan ye mme asua esie eken, ẹma ẹdomo ndinam enye ọsọn̄ ibuot ye Ete esie. (Matt. 4:1-11; Luke 20:20-25) Mmọ ẹma ẹnam Jesus enen̄ede ofụhọ onyụn̄ okop ọkpọsọn̄ ubiak. Ke akpatre, mmọ ẹma ẹkọn̄ enye ke eto ndutụhọ ẹwot. (Matt. 26:37, 38; Luke 22:44; John 19:1, 17, 18) Kpa ye ofụri emi, ye ibak ibak usụn̄ oro ẹketụhọrede enye, enye ama “osụk ibuot tutu osụn̄ọ ke n̄kpa.”—Kot Philippi 2:8.

2, 3. Nso ke Jesus ndisụk ibuot kpa ye mme ndutụhọ emi enye okosobode ekpep nnyịn?

² Se Jesus okosobode ke isọn̄ ama ekpep enye nsụkibuot ke usụn̄ en̄wen. (Heb. 5:8) Owo ekeme ndikere m̀mê nso ke Jesus, emi ama okodu ye Ete esie ke anana-ibat isua ke heaven akpafiak edikpep mi ke isọn̄ aban̄a Ete esie. Idem n̄kpọ, idịghe enye akakam edi “etubom anamutom” Abasi ke ofụri ini oro ẹkebotde n̄kpọ. (N̄ke 8:30, NW) Edi ndinam akpanikọ kpa ye mme ndutụhọ oro enye  okosobode ama owụt ke enye enen̄ede enyene nsọn̄ọnda. Jesus ama aka iso anam n̄kpọ Abasi. Nso ke ikeme ndikpep nto enye?

³ Okposụkedi emi Jesus ekedide mfọnmma owo, enye ikekereke ke imekeme ndisụk ibuot nnọ Abasi ke odudu idem imọ. Enye ama eben̄e Abasi ete an̄wam imọ ika iso isụk ibuot inọ enye. (Kot Mme Hebrew 5:7.) Man nnyịn n̄ko ikeme ndika iso nsụk ibuot nnọ Abasi, oyom isụhọde idem ibọn̄ akam inọ enye kpukpru ini. Oro akanam apostle Paul eteme mme Christian ete: “Ẹnyene orụk edu ukere n̄kpọ emi Christ Jesus ekenyenede,” enye ama “osụhọde idem onyụn̄ akabade osụk ibuot tutu osụn̄ọ ke n̄kpa.” (Phil. 2:5-8) Nte Jesus okodude uwem owụt ke owo ekeme ndisụk ibuot nnọ Abasi idem ke idiọk ererimbot emi. Imọfiọk ke Jesus ekedi mfọnmma owo, edi nso kaban̄a nnyịn emi mîdịghe mfọnmma mi?

Ndisụk Ibuot kpa ye Oro Idide Mme Anana-Mfọnmma Owo

4. Abasi ndinọ nnyịn ifụre ọwọrọ nso?

⁴ Ke ini Abasi okobotde Adam ye Eve, enye ama ọnọ mmọ ifiọk ye ifụre ndimek se ededi oro mmọ ẹmade ndinam. Sia nnyịn idide nditọ mmọ, imenyene ukem ifụre oro n̄ko. Nso ke emi ọwọrọ? Ọwọrọ ke imekeme ndibiere ndinam eti m̀mê idiọk. Ke nditịn̄ ke usụn̄ en̄wen, ọwọrọ ke Abasi ọnọ nnyịn ifụre ndimek ndisụk ibuot nnọ imọ m̀mê ndisọn̄ ibuot. Edi ikpanaha ifre ke iyanam ibat ke nte idade ifụre emi inam n̄kpọ. Ntem, ubiere oro inamde ekeme ndiwọrọ uwem m̀mê n̄kpa. Enye n̄ko esitụk mme iman ye mme ufan nnyịn.

5. Ewe en̄wan ke inyene ndin̄wana, ndien nso ke ikpanam man ikan ke en̄wan emi?

⁵ Nnyịn ikadaha-da nsụkibuot imana sia idide mme anana-mfọnmma owo. Isimemke utom ndinịm ibet Abasi kpukpru ini. Kpasụk ntre ke ekedi ye Paul. Enye ọkọdọhọ ete: “N̄kụt ibet efen ke mme ndido idem mi nte an̄wanade ye ibet oro odude ke esịt mi onyụn̄ adade mi nte mbuotekọn̄ ọnọ ibet idiọkn̄kpọ emi odude ke mme ndido mi.” (Rome 7:23) Ke akpanikọ, isisọn̄ke ndisụk ibuot ke ini n̄kpọ ọfọnde. Edi nso ke isinam ke ini idiọn̄ọde ke akpana isụk ibuot inọ Abasi, edi “mbumek obụkidem ye mbumek enyịn” iyakke? Ndiọi udọn̄ oro unana mfọnmma ye “spirit ererimbot” emi ẹsinamde owo enyene ẹnen̄ede ẹsọn̄ odudu. (1 John 2:16; 1 Cor. 2:12) Edieke iyomde ndikan mmọ, ana ‘itịm esịt nnyịn’ m̀mê idu ke mben̄eidem mbemiso isobode afanikọn̄ m̀mê idomo ekededi, inyụn̄ ibiere ke nnyịn idiyakke n̄kpọ ndomokiet anam isọn̄ ibuot ye Jehovah. (Ps. 78:8) Bible asiak ediwak mbon oro ẹkekande idomo sia mmọ ẹma ẹbebiere ke esịt mmọ se idinamde.—Ezra 7:10; Dan. 1:8.

6, 7. Tịn̄ nte ukpepn̄kpọ idemowo ekemede ndin̄wam owo anam eti ubiere.

⁶ Usụn̄ kiet emi ikemede nditịm esịt m̀mê idem nnyịn edi ndisịn ifịk n̄kpep Bible ye mme n̄wed esop Abasi. Yak idọhọ ke mbubreyo emi ke esinam ukpepn̄kpọ idemfo. Idaha idaha oro ke osụk ọdọhọ Jehovah ọnọ fi spirit esie man ekeme ndinam se ekpepde ke Bible. Ndien enyene edinam emi aduakde ndise ke ekebe ndise mbubreyo n̄kpọn̄. Mme owo ẹtịn̄ nti ikọ ẹban̄a edinam emi, edi ọmọfiọk ke ẹyesio oburobụt n̄kpọ ye afai n̄ko.

⁷ Ke ekere item Paul oro odude ke Ephesus 5:3, emi ọdọhọde ete: “Ẹkûyak ẹtịn̄ ẹban̄a use ye kpukpru orụk mbubiam ido m̀mê idiọkitọn̄ ke otu mbufo, kpa nte odotde ndisana owo.” Ekem emeti item Paul en̄wen ke Philippi 4:8. (Kot.) Nte osụk ekerede aban̄a item Abasi emi, afo obụp idemfo ete, ‘Edieke n̄koide-koi nse utọ edinam emi, ndi mmetiene uwụtn̄kpọ oro Jesus ekenịmde aban̄a edikop item Abasi ke kpukpru n̄kpọ?’ Nso ke edinam? Ndi oyosụk ese edinam oro?

8. Ntak emi ikpakade iso inen̄ede ikpeme idem ke n̄kan̄ eke spirit-e?

⁸ Edidi ata ndudue ndise oburobụt n̄kpọ  m̀mê afai, nnyụn̄ n̄kere ke utọ ndiọi nsan̄a emi idikemeke ndibiat nnyịn sia edide ke vidio m̀mê ke mme edinam ekebe ndise eken ye mme n̄kpọ ntre. Edi ikpenyene ndinen̄ede n̄kpeme mbak spirit ererimbot Satan idibiat nnyịn ye nditọ nnyịn. Mbon oro ẹnyenede kọmputa ẹsinen̄ede ẹkpeme mbak virus edidụk kọmputa mmọ. Virus edi ata idiọk n̄kpọ emi mme abak-ibak ẹsisịnde ke kọmputa owo man ọsọhi se ẹkewetde, idem abiatde kọmputa oro, onyụn̄ asan̄a do abiat mme kọmputa eken. Edieke mme owo ẹsinamde kpukpru se ẹkekeme mbak n̄kpọ emi edidụk kọmputa mmọ, nte nnyịn n̄ko ikpanamke se ikande oro mbak Satan edida n̄kari esie omụm nnyịn?—Eph. 6:11.

9. Ntak emi anade ibiere ndisụk ibuot nnọ Jehovah kpukpru usen?

⁹ Ekpere ndidi kpukpru usen ke nnyịn isibiere m̀mê iyanam n̄kpọ oro Jehovah amade m̀mê idinamke. Ana isụk ibuot inọ Abasi inyụn̄ ida ndinen edumbet esie idu uwem edieke iyomde ẹnyan̄a nnyịn. Edieke isụkde ibuot inọ Abasi nte Christ okosụkde “tutu osụn̄ọ ke n̄kpa,” emi owụt ke imenyene ata mbuọtidem. Jehovah ọyọdiọn̄ nnyịn ke nsọn̄ọnda nnyịn. Jesus ọkọdọhọ ke “ẹyenyan̄a owo eke ediyọde tutu esịm utịt.” (Matt. 24:13) Emi enen̄ede oyom inyene uko, nte Jesus ekenyenede.—Ps. 31:24.

Idụhe Owo ke Isọn̄ Emi Enyenede Uko nte Jesus

10. Nso idaha ke isisobo mfịn, ndien didie ke ikpanam n̄kpọ?

¹⁰ Ana inyene uko man ifep ndiọi edu ererimbot emi. Mme Christian ẹsisobo mme idaha emi ẹkemede ndinam mmọ ẹdue Abasi, edide ke mbubehe okụk, ido uwem, mme edinam nsunsu ido ukpono, ye ido obio. Mbonubon ẹsikọbọ ndusụk Christian. Ẹnen̄ede ẹkpep ukpepn̄kpọ edito ke unam mforo owo ke ufọkn̄wed ke ndusụk idụt idahaemi ẹkan nte akanam ẹkpepde, ndien ata ediwak owo inịmke ke Abasi odu. Ke emi ererimbot etiede ntem, ikpanaha idodop uyo ise mmọ. Ana in̄wana nte ikekeme ibiọn̄ọ kpukpru emi mbak mmọ ẹdibiat nnyịn. Se Jesus akanamde anam ifiọk se ikpanamde man ikan ererimbot.

11. Didie ke nditie n̄kere uwụtn̄kpọ Jesus ekeme ndinam inen̄ede inyene uko?

¹¹ Jesus ọkọdọhọ mbet esie ete: “Mbufo ẹyekụt ukụt ke ererimbot, edi ẹnyene uko! Ami mmakan ererimbot.” (John 16:33) Enye ikayakke ererimbot abiat enye. Ikonyụn̄ iyakke n̄kpọ ndomokiet ke ererimbot anam enye etre utom ukwọrọikọ emi ẹkedọn̄de enye m̀mê ndinam enye etek ke ifịk mîdịghe anam se mîfọnke; nnyịn ikponyụn̄ iyakke oro etịbe ọnọ nnyịn. Ke ini Jesus ọkọbọn̄de akam, enye ọkọdọhọ ke mbet imọ ‘idịghe ubak ererimbot, kpa nte imọ mîdịghe ubak ererimbot.’ (John 17:16) Ndikpep nte Jesus ekesinamde n̄kpọ uko uko nnyụn̄ n̄kere se ikpepde emi ọyọnọ nnyịn uko ndida san̄asan̄a ke ererimbot emi.

 Yak Jesus Ekpep Fi Ndinyene Uko

12-14. Nso iwụt ke Jesus ama enyene uko?

¹² Jesus ama enen̄ede enyene uko ke ofụri ini oro enye ọkọkwọrọde ikọ ke isọn̄. Enye ama anam n̄kpọ nte Eyen Abasi, ebe uko uko “odụk ke temple onyụn̄ ebịn kpukpru mmọ eke ẹnyamde ẹnyụn̄ ẹdepde n̄kpọ ke temple osion̄o, onyụn̄ onụk okpokoro mme okpụhọ okụk ye nnyan n̄kpọitie mme anyam ibiom ọduọn̄ọ.” (Matt. 21:12) Ke ini mbonekọn̄ ekedide ndimụm enye okoneyo oro ekesierede usen emi ẹkewotde enye, enye ama ọwọrọ uko uko ebịne mmọ man ekpeme mbet esie, onyụn̄ ọkọdọhọ mbonekọn̄ oro ete: “Edieke edide mbufo ẹyom mi, ẹyak mmọ emi ẹnyọn̄ọ.” (John 18:8) Esisịt ini ke oro ebede, enye ama ọdọhọ Peter esịn akan̄kan̄ esie ke efọk, emi owụtde ke idịghe n̄kpọekọn̄ akanam Jesus enyene uko, edi ke Jehovah akanam.—John 18:11.

¹³ Jesus ama adaha ada uko uko ayarade nsunsu ukpepn̄kpọ ndiọi mme adaiso ido ukpono eyo esie. Enye ọkọdọhọ mmọ ete: “Mbọm mbufo, mme ewetn̄wed ye mme Pharisee, mbon mbubịk! Koro mbufo ẹberi usụn̄ obio ubọn̄ heaven ẹbaha mme owo. . . . Mbufo ẹfụmi ikpọ n̄kpọ ke Ibet, oro edi, unenikpe ye mbọm ye edinam akpanikọ. . . . Mbufo [ẹyet] edem cup ye usan ẹsana, edi n̄kpọ mbụme ye okpụm ẹyọhọ ke esịt.” (Matt. 23:13, 23, 25) Ana mbet Jesus ẹnyene orụk uko emi n̄ko sia mme adaiso nsunsu ido ukpono ẹyetiene ẹkọbọ ẹnyụn̄ ẹkam ẹwowot ndusụk mmọ.—Matt. 23:34; 24:9.

¹⁴ Jesus ama onyụn̄ akan mme demon uko uko. Isan̄ kiet, enye ama osobo ye owo emi ekenyenede ndedehe spirit emi ọkọsọn̄de odudu tutu idụhe owo emi ekekemede ndida n̄kpọkọbi n̄kọbi enye nnịm. Jesus ama adaha uko uko ekebịn kpukpru ndedehe spirit oro osion̄o enye ke idem. (Mark 5:1-13) Mfịn, Abasi inọhọ mme Christian odudu ndinam utọ utịben̄kpọ emi. Edi ke ini ikwọrọde ikọ inyụn̄ ikpepde mme owo n̄kpọ, ana in̄wana ye Satan emi ‘esịride enyịn ikike mbon oro mînịmke ke akpanikọ.’ (2 Cor. 4:4) Kpa nte ekedide ye Jesus, n̄kpọekọn̄ nnyịn “idịghe n̄kpọekọn̄ obụkidem, edi edi se Abasi anamde okop odudu ndiwụri mme n̄kpọ eke ẹsọn̄ọde ẹdọn̄ n̄kam” ke esịt mme owo—oro edi, ukpepn̄kpọ nsunsu ido ukpono. (2 Cor. 10:4) Jesus enen̄ede ekpep nnyịn nte ẹkpekamade n̄kpọekọn̄ eke spirit emi.

15. Nso ikanam Jesus enyene uko?

¹⁵ Mbuọtidem akanam Jesus enyene uko, idịghe odudu esie. Ntre, ana ibuọt idem n̄ko ke Abasi man inyene uko. (Mark 4:40) Nso ke ikpanam man inyene ata mbuọtidem? Edi ndikpebe uwụtn̄kpọ Jesus. Jesus ama enen̄ede ọfiọk Ikọ Abasi onyụn̄ enen̄ede ọbuọt idem ke enye. Jesus ikakamake ata akan̄kan̄ in̄wana ẹn̄wan, edi akakama akan̄kan̄ eke spirit emi edide Ikọ Abasi. Enye ama esiwak ndida N̄wed Abasi nsọn̄ọ se enye ekpepde, onyụn̄ esima ndida ikọ emi, “Ẹwet ete,” ntọn̄ọ ikọ esie. *

16. Nso idinam inen̄ede inyene mbuọtidem?

¹⁶ Man inyene mbuọtidem oro ekemede ndin̄wam nnyịn iyọ orụk idomo oro esisịmde mme mbet Jesus, ana isikot inyụn̄ ikpep Bible kpukpru usen, isidụk mme mbono esop, inyụn̄ ida akpanikọ oro ikpepde isịn ke edinam. (Rome 10:17) Inyene n̄ko nditie  n̄kere se ikpepde, iyak enye osụhọde odụk nnyịn ọwọn̄esịt. Mbuọtidem oro asan̄ade ye utom ayanam inyene uko. (Jas. 2:17) Ana iben̄e Abasi edisana spirit koro mbuọtidem edi ubak mbun̄wụm spirit esie.—Gal. 5:22.

17, 18. Didie ke ekpri eyenete an̄wan okowụt ke imenyene uko ke ufọkn̄wed?

¹⁷ Ekpri eyenete an̄wan emi ekerede Kitty ama okụt nte ata mbuọtidem ekemede ndinam owo enyene uko. Toto ke ini emi enye ekedide eyenọwọn̄, enye ama ọfiọk ke ikpanaha ‘ikop bụt iban̄a eti mbụk’ ke ufọkn̄wed. Ntre, enye ama enen̄ede oyom ndikwọrọ eti mbụk nnọ nditọ ufọkn̄wed mmọ. (Rome 1:16) Kpukpru isua, enye ama esidọhọ ke esịt esie ke iyọkwọrọ ikọ ke ufọkn̄wed, edi ikenyeneke uko ndinam emi. Enye ama akaka n̄wed ke ebiet en̄wen ke ama akafiak okpon esisịt. Do ke enye ekebiere ete: “Idahaemi, ndiyakke ifet ekededi ebe mi aba.” Kitty ama ọbọn̄ akam ete Abasi ọnọ imọ utọ uko oro Christ ekenyenede, ye mbufiọk, onyụn̄ eberede ifet ọnọ imọ ndikwọrọ ikọ.

¹⁸ Ata akpa usen emi enye akakade obufa ufọkn̄wed oro, ẹma ẹdọhọ kpukpru nditọ ufọkn̄wed ẹditịn̄ n̄kpọ ẹban̄a idemmọ. Ediwak ke otu mmọ ẹma ẹsiak ido ukpono oro mmọ ẹkemanade ẹdidụk, ẹnyụn̄ ẹdọhọ ke mmimọ isinen̄ekede isịn idem ke ido ukpono emi. Kitty ama ọfiọk ke se ikọbọn̄de akam iben̄e edi emi. Ke ini ama ekedisịm Kitty nditịn̄ ikọ, enye ama ọdọhọ uko uko ete, “Ami ndi kiet ke otu Mme Ntiense Jehovah, ndien Bible esiteme mi nte n̄kpokponode Abasi nnyụn̄ ndu eti uwem.” Nte enye okosụk etịn̄de ikọ, ndusụk nditọ ufọkn̄wed mmọ ẹma ẹse enye ke idiọk enyịn. Edi ndusụk ẹma ẹnen̄ede ẹkpan̄ utọn̄ ẹnọ enye, ẹnyụn̄ ẹbụp mbụme. Andikpep ama ọdọhọ kpukpru owo ẹkpebe Kitty ke ndisọn̄ọ nda ntịn̄ se enye enịmde ke akpanikọ. Kitty enen̄ede okop idatesịt ke ndikekpebe uko oro Jesus ekenyenede.

Kpebe Mbuọtidem ye Uko Christ

19. (a) Nso ke ndinyene ata mbuọtidem ọwọrọ? (b) Didie ke ikeme ndinam esịt Jehovah adat?

¹⁹ Mme apostle n̄ko ẹma ẹfiọk ke mbuọtidem edinam mmimọ inyene uko. Mmọ ẹma ẹben̄e Jesus ete: “Nam mbuọtidem nnyịn etetịm okpon.” (Kot Luke 17:5, 6.) Ndinyene ata mbuọtidem ikụreke ke ndinịm ke Abasi do. Ana owo emi enyenede mbuọtidem enen̄ede asan̄a ekpere Jehovah kpa nte ekpri eyen esisan̄ade ekpere edima ete esie. Abasi ama anam Solomon ewet ete: “Eyen mi, esịt fo ama enyene ifiọk, esịt mi, kpa okịmmọ ayadara n̄ko. Ekpụt mi ẹyenyụn̄ ẹdara, ke ini n̄kpọk-inua fo etịn̄de edinen ikọ.” (N̄ke 23:15, 16) Ntre n̄ko ke Jehovah esikop idatesịt ke ini isọn̄ọde ida inam se inende, ndien ndifiọk emi esinam inen̄ede inyene uko. Mmọdo, ẹyak ika iso inyene uko ndinam se inende kpa nte Jesus ekenyenede.

[Ikọ Idakisọn̄]

Nte Afo Emekeme Ndinam An̄wan̄a?

• Nso idin̄wam nnyịn ika iso isụk ibuot inọ Abasi kpa ye oro idide mme anana-mfọnmma owo?

• Nso isinam owo enyene ata mbuọtidem, ndien didie ke mbuọtidem ekeme ndinam inyene uko?

• Nso ididi utịp edieke isụkde ibuot inọ Abasi inyụn̄ inyene uko nte Christ?

[Mme Mbụme Ukpepn̄kpọ]

[Ndise ke page 13]

Ndi ke ‘etịm esịt’ m̀mê ke eben̄e idem man ekeme ndikan idomo?

[Ndise ke page 15]

Ukem nte Jesus, mbuọtidem ekeme ndinam inyene uko