Ufọn Akakan Ukpep Oro Jehovah Ọnọde

“Ami ke akpanikọ n̄ko mbat kpukpru n̄kpọ ke ntakurua ke ntak akakan ifiọk Christ Jesus.”—PHIL. 3:8.

1, 2. Nso ke ndusụk Christian ẹmek ndinam, ndien ntak-a?

ROBERT ama enen̄ede ọfiọk n̄wed toto ke ini ekedide eyenọwọn̄. Ke ini enye ekedide isua itiaita, andikpep kiet ama aka ufọk mmọ ọkọdọhọ enye ke utọ ifiọkn̄wed oro enye enyenede ekeme ndida enye nsịm ebiet ekededi. Andikpep emi ọkọdọhọ ke enye edidi abiausọbọ. Ibọrọ udomo sekọndri esie ama edi se ẹdade enye ke kiet ke otu mfọnn̄kan ufọkn̄wed ntaifiọk oro ẹdude ke idụt mmọ. Edi Robert ama esịn n̄kpọ emi ediwak owo ẹdade nte etịp-atua man ekeme ndinam utom usiakusụn̄.

² Ukem nte Robert, mfịn ediwak mme Christian—n̄kpri ye ikpọ—ẹnyene ifet ndiwọrọ etop ke ererimbot emi, edi ndusụk mmọ ẹsisịn utọ ifet oro man ẹkeme ndisịn ifịk nnam n̄kpọ Jehovah. (1 Cor. 7:29-31) Ntak emi mmọ ẹbierede ndida ini mmọ nsịn ifịk n̄kwọrọ ikọ? Akpan ntak edi koro mmọ ẹnen̄ede ẹma Jehovah. Ntak en̄wen edi ke mmọ ẹma ukpep oro Jehovah ọnọde ẹkan eke ererimbot. Ndi emekere nte uwem fo ekpetiede ekpedi ukudiọn̄ọke akpanikọ? Ndikere mban̄a ndusụk nti ufọn oro ibọde ito ukpep oro Jehovah ọnọde ayanam ika iso ida eti mbụk ke akpan n̄kpọ inyụn̄ isịn ifịk ikwọrọ enye inọ mme owo.

Edi Akwa Ifet Abasi Ndikpep Nnyịn N̄kpọ

3. Isan̄a didie ifiọk ke Jehovah enyịme ndikpep mme anana-mfọnmma owo n̄kpọ?

³ Mfọnido Jehovah anam enye enyịme ndikpep mme anana-mfọnmma owo n̄kpọ. Isaiah 54:13 etịn̄ ntịn̄nnịm ikọ aban̄a mme Christian oro ẹyetde aran ete: “Jehovah oyonyụn̄ eteme kpukpru nditọ fo; ndien emem nditọ fo [oyokpon].” Itie Bible emi ebehe “mme erọn̄ en̄wen” n̄ko. (John 10:16) Enyene ntịn̄nnịm ikọ Bible oro osude mfịn, emi owụtde ke ikọ emi edi akpanikọ. Isaiah ama okụt ke n̄kukụt nte mme owo emi ẹtode kpukpru idụt ẹdide ẹdikpep akpanikọ, ẹnyụn̄ ẹdọhọde kiet eken ẹte: “Mbufo ẹdi, nnyịn idọk ke obot Jehovah, ke ufọk Abasi Jacob; ndien enye eyekpep nnyịn ido esiemmọ, nnyịn iyonyụn̄ isan̄a ke usụn̄ esie.” (Isa. 2:1-3) Nso akwa ifet ke edi ntem ndisịne ke otu mbon emi Abasi ekpepde n̄kpọ!

4. Nso ke Jehovah oyom mbon oro enye ekpepde n̄kpọ ẹnam?

⁴ Nso ke ikpanam man Abasi ekpep nnyịn n̄kpọ? Ana isụhọde idem inyịme ndibọ ukpep. David emi eketienede ewet psalm ekewet ete: “Jehovah ọfọn onyụn̄ enen. . . . onyụn̄ eteme mbon nsụkidem usụn̄ esiemmọ.” (Ps. 25:8, 9) Jesus ọkọdọhọ ete: “Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo etịmde edịp mbon ọniọn̄ ye mbon ikike mme n̄kpọ emi, onyụn̄ ayarade mmọ ọnọ nditọwọn̄.” (Luke 10:21) Ndi inemke fi ndisan̄a n̄kpere Abasi emi ọnọde “mbon nsụhọdeidem mfọnido oro owo mîdotke”?—1 Pet. 5:5.

5. Nso inam nnyịn inyene ifiọk Abasi?

⁵ Ndi asan̄autom Jehovah ndomokiet ekeme ndikere ke ifiọk oro inyenede  akanam idiọn̄ọ akpanikọ? Baba-o! Tutu amama, nnyịn ikpekemeke nditie ke idem nnyịn mfiọk Abasi. Jesus ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Jehovah ada utom ukwọrọikọ ye edisana spirit esie odụri mbon mbieterọn̄ oro Bible okotde ‘n̄kpọuto ke kpukpru idụt’ ọnọ Eyen esie. (Hag. 2:7, NW) Ndi esịt inemke fi ndidi kiet ke otu mbon oro Jehovah odụride ọnọ Eyen esie?—Kot Jeremiah 9:23, 24.

Ekeme Ndikpụhọde Mme Owo

6. Didie ke “ifiọk Jehovah” ekeme ndikpụhọde mme owo?

⁶ Ntịn̄nnịm ikọ Isaiah ọnọ ata ediye uwụtn̄kpọ oro anamde ikụt nte ukpep emi okpụhọrede mme owo mfịn. Mbon emi ẹkedide mbon afai ẹdidi mbon emem. (Kot Isaiah 11:6-9.) Mbon emi ẹkesisuade kiet eken ke ntak emi ẹtode nsio nsio orụk, idụt, ekpụk, ye ke ntak emi m̀mê oko, ẹdidi itai ye aban̄ idahaemi. Mmọ ẹda “ofụt mmọ ẹdom n̄kpọ ufụn̄ isọn̄,” ke ndamban̄a usụn̄. (Isa. 2:4) Ntak ẹnamde emi? Koro mmọ ẹnyene “ifiọk Jehovah,” ẹnyụn̄ ẹda enye ẹdu uwem. Kpa ye oro mmọ mîfọnke ima, mmọ ẹtie nte ata nditọeka ke ofụri ererimbot. Udọn̄ oro mme owo ke ofụri ererimbot ẹnyenede ke eti mbụk ye nte enye okpụhọrede mme owo owụt ke idụhe ukpep emi ọfọnde nte eke Jehovah.—Matt. 11:19.

7, 8. (a) Nso idi ndusụk “n̄kpọ eke ẹsọn̄ọde ẹdọn̄ n̄kam” emi ukpep oro Jehovah ọnọde anamde mme owo ẹbọhọ? (b) Nso iwụt ke ukpep oro Jehovah ọnọde anam ẹtoro enye?

⁷ Apostle Paul ọkọdọhọ ke utom ukwọrọikọ emi ikọt Abasi ẹnamde edi ekọn̄ eke spirit. Enye ekewet ete: “N̄kpọekọn̄ nnyịn idịghe n̄kpọekọn̄ obụkidem, edi edi se Abasi anamde okop odudu ndiwụri mme n̄kpọ eke ẹsọn̄ọde ẹdọn̄ n̄kam. Koro nnyịn iwụri mme ekikere ye kpukpru n̄kpọ eke ẹkon̄de emi ẹmenerede ke enyọn̄ ndin̄wana ye ifiọk Abasi.” (2 Cor. 10:4, 5) Nso idi “mme n̄kpọ eke ẹsọn̄ọde ẹdọn̄ n̄kam” emi ukpep oro Jehovah ọnọde anamde mme owo ẹbọhọ? Ndusụk mmọ ẹdi ufụn nsunsu ukpepn̄kpọ, nsunsu ekikere, ye ukpepn̄kpọ mbon akwaifiọk. (Col. 2:8) Ukpep emi anam ediwak owo ẹtre ndiọi n̄kpọ, onyụn̄ anam mmọ ẹnam se inemde Abasi esịt. (1 Cor. 6:9-11) Enye anam mme ubon ẹkop inemesịt, onyụn̄ anam mbon oro mîkenyeneke idotenyịn ẹdu uwem oro enyenede se ọwọrọde. Utọ ukpep emi ke ẹyom mfịn.

⁸ Kiet ke otu edu oro Jehovah anamde mme owo ẹnyene edi edinam akpanikọ, nte ifiọkutom oro iyomde ndibụk idahaemi owụtde. (Heb. 13:18) N̄wan kiet ke India ama ọtọn̄ọ ndikpep Bible ye Mme Ntiense Jehovah onyụn̄ akabade edi asuanetop oro mînaha baptism. Ke ini ọnyọn̄de utom ubọp Ufọkmbono Obio Ubọn̄ usen kiet, enye ama okụt n̄kpọmbana gold emi akpade ₦116,000.00, anade ke isọn̄ ekpere itie udụk bọs. Kpa ye oro enye ekedide ubuene, enye ama emen n̄kpọmbana oro ọsọk mme bodisi. Idem ama enen̄ede akpa bodisi oro enye ọkọnọde. Bodisi en̄wen ama obụp enye ete: “Ntak emi mûkadaha n̄kpọmbana emi?” Enye ama ọbọrọ ete: “Bible okpụhọde uwem mi, ndidi owo akpanikọ idahaemi.” Emi ama enen̄ede otụk bodisi oro tutu enye ọdọhọ ebiowo oro akasan̄ade ye n̄wan emi ete: “Mme owo oro ẹdude ke obio emi ẹbe miliọn 38. Ọkpọfọn etieti edieke mbufo ẹkpekemede ndinam owo duop kpọt ke obio emi ẹtie nte mma emi.” Ke ini ikerede iban̄a ediwak miliọn owo oro Bible okpụhọrede uwem mmọ, emi anam inen̄ede itoro Jehovah.

9. Nso inam mme owo ẹkeme ndikpụhọde uwem mmọ?

⁹ Odudu oro Ikọ Abasi enyenede ndikpụhọde owo ye edisana spirit Jehovah ẹsinam  mme owo ẹkpụhọde uwem mmọ. (Rome 12:2; Gal. 5:22, 23) Colossae 3:10 ọdọhọ ete: “Ẹmen obufa owo ẹsịne, emi ẹnamde edi obufa ebe ke nnennen ifiọk nte asan̄ade ekekem ye mbiet Owo oro okobotde enye.” Ikọ Abasi ekeme ndinam ẹfiọk ata owo emi nnyịn idide onyụn̄ ekeme ndikpụhọde ekikere ye usụn̄ nte owo esinamde n̄kpọ. (Kot Mme Hebrew 4:12.) Emekeme ndidi ufan Abasi onyụn̄ enyene idotenyịn nsinsi uwem edieke enyenede nnennen ifiọk N̄wed Abasi onyụn̄ odude uwem ekekem ye ndinen edumbet Jehovah.

Etịm Nnyịn Idem Ọnọ Ini Iso

10. (a) Ntak emi Jehovah edide n̄kukụre owo oro ekemede nditịm nnyịn idem nnọ ini iso? (b) Nso iditịbe ke ererimbot emi ke mîbịghike?

¹⁰ Jehovah edi n̄kukụre owo emi ekemede nditịm nnyịn idem nnọ ini iso koro enye ọfiọk se iditịbede ke mîbịghike. Enye etịn̄ se imọ idinamde ye owo ke ini iso. (Isa. 46:9, 10) Ntịn̄nnịm ikọ Bible owụt ke “akwa usen Jehovah emekpere.” (Zeph. 1:14) Ikọ Mme N̄ke 11:4 emi oyosu usen oro; enye ọdọhọ ete: “Inyene ididoroke [owo udori] ke usen iyatesịt: edi eti ido osio owo ke n̄kpa.” Ke ini Jehovah edisobode ererimbot Satan emi, okụk idinyan̄ake nnyịn, edi se idikam inyan̄ade nnyịn edidi m̀mê imanam se Abasi amade. Ezekiel 7:19 ọdọhọ ke mme owo “ẹyemen silver mmọ ẹduọk ke esien; gold mmọ oyonyụn̄ akabade edi ndek.” Ndifiọk emi ekeme ndin̄wam nnyịn idu eti uwem idahaemi.

11. Nso idi usụn̄ kiet emi ukpep oro Jehovah ọnọde etịmde nnyịn idem ọnọ ini iso?

¹¹ Usụn̄ kiet emi ukpep oro Jehovah ọnọde etịmde nnyịn idem ọnọ akwa usen esie edi ndin̄wam nnyịn inam se inen̄erede idi akpan n̄kpọ ke uwem. Apostle Paul ekewet ọnọ Timothy ete: “Nọ mbon oro ẹnyenede inyene ke editịm n̄kpọ emi uyo ete ẹkûkohode idem, ẹkûnyụn̄ ẹkọn̄ idotenyịn mmọ ke mme inyene oro mînyeneke iwụk, edi ẹkọn̄ ke Abasi.” Idem ọkpọkọm idi ubuene, item emi ekeme ndin̄wam nnyịn. Didie? Utu ke ndisịn ifịk nyom inyene, ikpenyene ‘ndifọn ido nnyụn̄ nyọhọ ye nti utom.’ Edieke ibemde iso iyom Obio Ubọn̄, oro owụt ke ‘imesịn eti itiat idakisọn̄ inọ ini iso.’ (1 Tim. 6:17-19) Utọ n̄waidem oro owụt ke imenyene eti ibuot, sia Jesus ọkọdọhọ ete: “Nso udori ke owo edidia edieke enye enyenede ofụri ererimbot edi ataba ukpọn̄ esie?” (Matt. 16:26, 27) Sia usen Jehovah enen̄erede ekpere, ọfọn ibụp idem nnyịn ite: ‘Mbon n̄kpọuto mi ke m̀mọ̀n̄? Ndi ndụk ufụn nnọ Abasi m̀mê Inyene?’—Matt. 6:19, 20, 24.

12. Ntak emi nnyịn mîkpayakke idem emem nnyịn edieke ndusụk owo ẹdade utom ukwọrọikọ nnyịn nte ndisịme utom?

¹² Utom ukwọrọikọ ye edinam  mbet ẹdi ebeiso ke otu “nti utom” oro Ikọ Abasi ọdọhọde mme Christian ẹnam. (Matt. 24:14; 28:19, 20) Ukem nte ekedide ke eyo mme apostle, ndusụk owo ẹda utom ukwọrọikọ nnyịn nte ndisịme utom. (Kot 1 Corinth 1:18-21.) Edi oro inamke utom nnyịn okûnyene ufọn, inyụn̄ iwọrọke ke ufọn idụhe ndika iso nnọ kpukpru owo ifet ndibuọt idem ke eti mbụk emi mbemiso ini ebede. (Rome 10:13, 14) Ndin̄wam mme owo ẹtiene ẹbọ ukpep oro Jehovah ọnọde ayanam ibọ ekese edidiọn̄.

Jehovah Ọdiọn̄ Ikọt Esie ke Ini Mmọ Ẹnamde N̄waidem

13. Nso n̄waidem ke apostle Paul akanam man ekeme ndikwọrọ eti mbụk?

¹³ Mbemiso apostle Paul ekedide Christian, enye ama ọbọ ukpep oro akpakanamde enye edi n̄kpọ ke ererimbot. Ke ini enye ekedide n̄kpọ nte isua 13, enye ama ọkpọn̄ Tarsus obio emana esie aka Jerusalem man ọkọbọ ukpep ke ukot Gamaliel, ata-ekpep Ibet oro ẹkenen̄erede ẹkpono. (Utom 22:3) Nte ini akakade, enye ama ọtọn̄ọ ndiwọrọ etop, ndien edieke enye akpakakade iso ke ubọkọkọ esie, ekeme ndidi enye akpakakabade edi akwa owo ke Ido Ukpono Mme Jew. (Gal. 1:13, 14) Edi enye ama ọkpọn̄ kpukpru oro ke ama ọkọbọ akpanikọ onyụn̄ ọtọn̄ọ ndikwọrọ ikọ. Ndi enye ama atua n̄kpọfiọk ke ndikanam emi? Baba-o! Utu ke oro, enye akakam ọdọhọ ete: “Ami ke akpanikọ n̄ko mbat kpukpru n̄kpọ ke ntakurua ke ntak akakan ifiọk Christ Jesus Ọbọn̄ mi. Ke ntak esie mmenyịme kpukpru n̄kpọ ke ntakurua nnyụn̄ mbat mmọ ke mbio.”—Phil. 3:8.

14, 15. Nso edidiọn̄ ke ibọ nte “nsan̄autom Abasi”?

¹⁴ Ukem nte Paul, mme Christian mfịn ẹsiyak n̄kpọ atak mmọ ke ntak eti mbụk. (Mark 10:29, 30) Ndi odu se nnyịn inanade ke ntak emi? Robert emi ikasiakde ke ntọn̄ọ ibuotikọ emi etịn̄ se isịnede nnyịn ke esịt, ete: “Ntuaha n̄kpọfiọk ndomokiet. Utom uyọhọ ini anam mi nnen̄ede n̄kop inemesịt, onyụn̄ anam mi ‘ntabi nse nte Jehovah ọfọnde.’ Ini ekededi oro n̄waide idem nnam n̄kpọ Jehovah, edidiọn̄ oro enye esinọde mi esikam akan n̄waidem oro n̄kanamde. Isitiehe nte ke n̄kpọ ndomokiet atak mi. Esikam ọfọn ye ami.”—Ps. 34:8; N̄ke 10:22.

¹⁵ Edieke edide ebịghi esisịt ọkọtọn̄ọ ndikwọrọ ikọ nnyụn̄ n̄kpep mme owo n̄kpọ, anaedi odu ini emi n̄kpọ akanamde fi enen̄ede  okụt nte Jehovah ọfọnde. Ndi odu ini emi ekenen̄erede okụt ke edisana spirit akan̄wam fi ọkwọrọ ikọ? Ndi akanam omokụt nte esịt enemde owo ndikop etop Bible sia Jehovah anam se etịn̄de an̄wan̄a enye? (Utom 16:14) Ndi akanam Jehovah an̄wam fi ọbọhọ afanikọn̄, mîdịghe anam ekeme ndinam n̄kpọ esie n̄kan nte ekesinamde? Ndi enye esinọ fi odudu ndiyọ afanikọn̄ man aka iso anam n̄kpọ esie idem ke ini etiede nte ke ibifịk ọmọn̄ ọbọhọ fi? (Phil. 4:13) Ke ini ikụtde nte Jehovah an̄wamde nnyịn ke ini ikwọrọde ikọ, esinen̄ede etie nte ikụt enye iso ye iso; emi esinyụn̄ anam inen̄ede isan̄a ikpere enye. (Isa. 41:10) Ndi esịt inemke fi ndidi “nsan̄autom Abasi” ke akwa utom unọ ukpep emi?—1 Cor. 3:9.

16. Etie fi didie ke idem ke ini ekerede aban̄a ofụri n̄waidem ye ukeme oro esịnde ekpep mme owo n̄kpọ aban̄a Jehovah?

¹⁶ Esidọn̄ ediwak owo ndinam n̄kpọ nnịm mbụk ke eyouwem mmọ. Imokụt ke ẹsisọp ẹfre idem mme n̄kpọ oro ẹkewọrọde etop ke ererimbot. Edi tutu amama, owo idifreke ukeme oro ikọt Jehovah ẹsịnde mfịn man ẹnam enyịn̄ esie asana. (N̄ke 10:7; Heb. 6:10) Nnyịn ikpakam ida ifet oro inyenede nditiene n̄kpep mme owo n̄kpọ mban̄a Jehovah ke ọsọn̄urua, kpa utom oro owo mîdifreke ke nsinsi nsinsi.

Didie ke Afo Ọkpọbọrọ?

• Nso ke Jehovah oyom mbon oro enye ekpepde n̄kpọ ẹnam?

• Didie ke ukpep oro Jehovah ọnọde okpụhọde mme owo?

• Nso edidiọn̄ ke ibọ ke ini in̄wamde mme owo ẹtiene ẹdibọ ukpep oro Jehovah ọnọde?

[Mme Mbụme Ukpepn̄kpọ]

[Ndise ke page 23]

Mbon oro Jehovah ọnọde ukpep ẹtie nte ata nditọeka ke ofụri ererimbot

[Ndise ke page 24]

Ndi esịt inemke fi ndidi “nsan̄autom Abasi”?