“Mbufo Ẹdi Mme Ufan Mi”
“Mbufo Ẹdi Mme Ufan Mi”
“Mbufo ẹdi mme ufan mi edieke mbufo ẹnamde se ami n̄wụkde mbufo.”—JOHN 15:14.
1, 2. (a) Nso orụk owo ẹkedi mme ufan Jesus? (b) Ntak emi ikpanamde ufan ye Jesus?
NSIO NSIO owo ẹkedu ye Jesus ke ubet enyọn̄. Peter ye Andrew emi ẹkedide nditọeka ẹkedi mme ọkọiyak. Matthew ekedi ọbọ a-tax—ndien mme Jew ẹma ẹsinen̄ede ẹsua mme ọbọ a-tax. Ndusụk mmọ, utọ nte James ye John ẹma ẹdiọn̄ọ Jesus toto ke uyen. Edi etie nte ndusụk mmọ, utọ nte Nathanael, ẹkenyụn̄ ẹdu ye enye isua ifan̄ kpọt. (John 1:43-50) Kpa ye oro, kpukpru mbon emi ẹkedude ye enye ke Jerusalem, ke okoneyo Passover oro ẹma ẹfiọk ke enye edi Messiah oro ẹken̄wọn̄ọde, kpa Eyen Abasi uwem. (John 6:68, 69) Anaedi ama enen̄ede enem mmọ ndikop Jesus ọdọhọde ete: “N̄kot mbufo mme ufan, koro kpukpru n̄kpọ oro n̄kopde nto Ete mi mmanam mbufo ẹfiọk.”—John 15:15.
2 Jesus abat mme Christian oro ẹyetde aran mfịn ye mme erọn̄ en̄wen nte mme ufan esie n̄ko. (John 10:16) Kpukpru nnyịn n̄ko imekeme ndidi ufan esie. Edi ata akwa ukpono ndidi ufan Jesus, koro oro ọwọrọ ndidi ufan Jehovah n̄ko. Ke akpanikọ, nnyịn ikemeke ndidi ufan Jehovah ke nnyịn mîdịghe ufan Jesus. (Kot John 14:6, 21.) Nso ndien ke ikpanam man itọn̄ọ ufan ye Jesus, inyụn̄ ika iso idi ufan esie? Mbemiso ibọrọde mbụme emi, ẹyak ise se Jesus akanamde man owụt ke idi eti ufan, ye se ikemede ndikpep nto se mbet esie ẹkenamde n̄ko.
Se Jesus Akanamde man Owụt ke Idi Eti Ufan
3. Jesus ekesinam ufan ye mmanie?
3 Enyene-ọniọn̄ Edidem Solomon ekewet ete: “Ọbọn̄ enyene ediwak ufan.” (N̄ke 14:20) Emi owụt ke mme anana-mfọnmma owo ẹsima ndinam ufan ye owo emi mmọ ẹdidiade ufọn ito, idịghe enye emi mmọ ẹdinọde n̄kpọ. Jesus iketiehe ntre. Enye ikanamke ufan ye owo ke ntak inyene m̀mê uwọrọiso. Imọfiọk ke Jesus ama ama akparawa oro ekedide owo inyene onyụn̄ ọdọhọ enye edisan̄a ye imọ. Edi enye ama ọdọhọ akparawa oro aka akanyam kpukpru se enye ekenyenede onyụn̄ ayak ọnọ mme ubuene. (Mark 10:17-22; Luke 18:18, 23) Mme owo ikọdiọn̄ọke Jesus nte ufan mbon inyene ye mme ọwọrọiso owo, edi ẹkekam ẹdiọn̄ọ enye nte ufan mme ubuene ye mbon emi owo mîbatke ke n̄kpọ.—Matt. 11:19.
4. Ntak emi ẹkemede ndidọhọ ke mme ufan Jesus ikedịghe mfọnmma?
4 Edi akpanikọ ke mme ufan esie ẹkedi mme anana-mfọnmma owo. Enyene ini emi Peter mîkesehe n̄kpọ nte Abasi esede. (Matt. 16:21-23) James ye John ẹma ẹwụt ke imama ikpọ itie ke ini mmọ ẹkedọhọde Jesus anam mmimọ itie ke ubọk nnasia ye ufien ke Obio Ubọn̄ esie. Emi ama enen̄ede abiak mbet eken sia n̄kpọ emi ama esiwak ndida ikọ ndi. Jesus ikayatke esịt ye mme ufan esie emi, edi ama odomo ndin̄wam mmọ ẹtre utọ edu oro.—Matt. 20:20-28.
5, 6. (a) Ntak emi Jesus akakade iso anam ufan ye apostle esie 11? (b) Ntak emi Jesus mîkedịghe aba ufan Judas?
5 Jesus ndikaka iso nnam ufan ye mbet esie ikọwọrọke ke enye ikekwe unana mfọnmma mmọ, m̀mê nte ke enye ama ama edu mmọ. Edi enye akakam ese se ikesịnede mmọ ke esịt; enye ama onyụn̄ ọfiọk ke mmọ ẹnyene eti esịt. Ke uwụtn̄kpọ, esịt ikenemke Jesus ke ini Peter, James, ye John ẹkedede idap utu ke nditaba idap ntie ye enye ke ini enye ekenen̄erede okop mfụhọ. Kpa ye oro, enye ama ọfiọk ke mmọ ẹnyene eti esịt, onyụn̄ ọdọhọ ete: “Spirit, ke akpanikọ, enyịme, edi obụkidem ememem.”—Matt. 26:41.
6 Edi Jesus ikanamke aba ufan ye Judas Iscariot. Okposụkedi emi Judas akanamde nte imama Jesus, Jesus ama edikụt ke enye ekedi nyakri. Judas ama akabade edi ufan ererimbot onyụn̄ anam idemesie asua Abasi. (Jas. 4:4) Ke ntre, enye ikesịneke ke otu mbon oro Jesus okokotde ufan—oro edi, mme anam-akpanikọ apostle esie 11.—John 13:21-35.
7, 8. Didie ke Jesus okowụt mme ufan esie ke imama mmọ?
7 Jesus ama anam se enye ekekeme ndin̄wam nti ufan esie, utu ke nditie n̄kere ndudue mmọ. Ke uwụtn̄kpọ, enye ama eben̄e Ete esie ete ekpeme mmọ ke ini idomo. (Kot John 17:11.) Jesus ama ọdọhọ mmọ ẹdiduọk odudu ke ini idem ekememde mmọ. (Mark 6:30-32) Jesus ikekereke n̄kukụre iban̄a se ikpepde mbet imọ, edi ama esinyụn̄ ayak mmọ ẹtịn̄ ekikere mmọ, onyụn̄ akpan̄ utọn̄ ọnọ mmọ.—Matt. 16:13-16; 17:24-26.
8 Jesus okodu uwem onyụn̄ akpa ọnọ mme ufan esie. Enye ama ọfiọk ke ana inọ uwem imọ man Ete imọ ekeme ndifen idiọkn̄kpọ mme ufan imọ. (Matt. 26:27, 28; Heb. 9:22, 28) Ima oro enye akamade mme ufan esie akanam enye anam emi. Jesus ọkọdọhọ ete: “Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.”—John 15:13.
Mbet Ẹkenam N̄kpọ Didie ye Jesus Ufan Mmọ?
9, 10. Didie ke mme owo ẹkenam n̄kpọ ẹban̄a ntatubọk Jesus?
9 Jesus ama esitat ubọk, ama ima, onyụn̄ ada ini esie anam n̄kpọ ọnọ mme owo. Emi ama anam mme owo ẹma ndisan̄a n̄kpere enye, nnyụn̄ nnọ enye n̄kpọ n̄ko. (Luke 8:1-3) Oro akanam Jesus ọdọhọ mmọ ete: “Ẹnọ owo n̄kpọ, ndien mme owo ẹyenọ mbufo n̄kpọ. Mmọ ẹyedomo ọyọhọ udomo, eke ẹmịn̄de osụhọde, eke ẹnyen̄ede onyụn̄ ọyọhọde ọduọhọ, ẹsịn mbufo ke ọfọn̄. Koro udomo eke mbufo ẹdade ẹdomo ẹnọ owo, ke mmọ ẹdida ẹdomo ẹnọ mbufo ke usiene.”—Luke 6:38.
10 Edi akpanikọ ke ndusụk owo ẹketiene Jesus ke ntak ufọn emi mmọ ẹdidiade. Mme ufan abian̄a emi ẹma ẹtre ndisan̄a ye enye ke ini enye eketịn̄de ikọ oro mîkan̄wan̄ake mmọ. Utu ke ndibuọt idem ye Jesus, mmọ ẹma ẹsọsọp ẹyịk se enye eketịn̄de ẹnyụn̄ ẹkpọn̄ enye. Edi mme apostle esie ẹma ẹsọn̄ọ ẹda ye enye. N̄kpọ ama esitịbe oro akpanamde mmọ ẹkpọn̄ Jesus, edi mmọ ẹma ẹsọn̄ọ ẹda ye enye kpukpru ini. (Kot John 6:26, 56, 60, 66-68.) Se Jesus eketịn̄de ye mme ufan esie okoneyo oro ekesierede usen emi ẹkewotde enye owụt ke enye ama ama nte mmọ ẹkenamde n̄kpọ ye imọ. Enye ọkọdọhọ ete: “Mbufo ẹdi mmọ emi ẹsọn̄ọde ẹda ye ami ke idomo mi.”—Luke 22:28.
11, 12. Didie ke Jesus ọkọsọn̄ọ mbet esie idem, ndien mmọ ẹkenam n̄kpọ didie?
11 Esisịt ini ke Jesus ama okotoro mbet esie ke ndikọsọn̄ọ nda ye imọ, n̄kpọ ama etịbe oro akanamde mmọ ẹfehe owo enyịn ẹfen̄e ẹkpọn̄ enye ke esisịt ini. Edi Jesus ama efen ọnọ mmọ. Ke Jesus ama ekeset, enye ama ọdọhọ mmọ ke isụk idi ufan mmọ. Ke adianade do, enye ama ọnọ mmọ akpan utom—oro edi, utom edinam “kpukpru mme idụt ẹdi mbet” imọ, onyụn̄ ọdọhọ mmọ ẹdi ntiense imọ “tutu esịm ke ata utịt ikpehe isọn̄.” (Matt. 28:19; Utom 1:8) Mbet esie ẹkenam n̄kpọ didie?
12 Mmọ ẹma ẹsịn ofụri ukeme ẹkwọrọ etop Obio Ubọn̄ Abasi. Edisana spirit Jehovah ama anam mmọ ẹsọsọp ẹkwọrọ etop Obio Ubọn̄ emi ke ofụri Jerusalem. (Utom 5:27-29) Mmọ ẹma ẹnyịme n̄kpa utu ke nditre ndinam ewụhọ Jesus emi. Ke n̄kpọ nte isua 30 kpọt ama ekebe tọn̄ọ Jesus ọkọdọhọ mbet esie ẹkenam mme idụt ẹdi mbet imọ, apostle Paul ama ewet ete ke ẹkwọrọ eti mbụk ẹnọ “kpukpru edibotn̄kpọ ke idak ikpaenyọn̄.” (Col. 1:23) Ntem, mmọ ẹma ẹwụt ke imenen̄ede ima ndidi ufan Jesus.
13. Didie ke mbet Jesus ẹkenam se enye ekekpepde?
13 Mbet Jesus ẹma ẹsinam se enye ekekpepde. Emi ọwọrọ ke ediwak mmọ ẹkenyene ndikpụhọde edu uwem mmọ. Ndusụk mmọ ẹkedi mme adan̄ ukemuduot, mme esịn efịbe, mme akpammịn, m̀mê mme inọ. (1 Cor. 6:9-11) Mbon eken ẹkenyene nditre asari. (Utom 10:25-28) Edi mmọ ẹma ẹnam se Jesus ọkọdọhọde. Ẹsio akani owo ẹduọk ẹnyụn̄ ẹmen obufa owo ẹsịne. (Eph. 4:20-24) Ẹfiọk “ekikere Christ,” ẹnyụn̄ ẹkpep ndikere nnyụn̄ nnam n̄kpọ nte Christ.—1 Cor. 2:16.
Mme Ufan Christ Mfịn
14. Jesus ọkọdọhọ ke idinam nso ke “utịt editịm n̄kpọ emi”?
14 Ediwak Christian oro ẹkedude ke eyo mme apostle ẹma ẹdiọn̄ọ Jesus mîdịghe ẹkụt enye ke enye ama ekeset. Edi akananam nnyịn ikwe Jesus. Didie ndien ke ikeme ndidi ufan esie? Usụn̄ kiet edi ndinam se ofụn emi anamde akpanikọ onyụn̄ enyenede ọniọn̄ ọdọhọde. Kpukpru nditọete Christ emi ẹyetde aran, emi ẹsụk ẹdude ke isọn̄, edi ofụn emi. Jesus ọkọdọhọ ke idimek ofụn emi ese aban̄a ‘kpukpru inyene imọ,’ ke “utịt editịm n̄kpọ emi.” (Matt. 24:3, 45-47) Mfịn, ata ekese ke otu mbon oro ẹyomde ndidi ufan Christ isịneke ke otu ofụn emi. Didie ndien ke ndinam se ofụn emi ọdọhọde ekeme ndinam mmọ ẹdi ufan Christ?
15. Nso ke ẹdida ẹbiere m̀mê owo edi erọn̄ m̀mê ebot?
15 Kot Matthew 25:31-40. Jesus ọkọdọhọ ke ofụn emi edi nditọete imọ. Ke ini Jesus ọkọnọde uwụtn̄kpọ aban̄a edibahade erọn̄ ye ebot, enye ọkọdọhọ ke se ededi oro inamde inọ nditọete imọ, ke inam inọ imọ. Enye ọkọdọhọ ke nte owo anamde n̄kpọ ye idem ‘n̄kpri-n̄kan ke otu nditọete imọ emi’ ke ẹdida ibiere m̀mê enye edi erọn̄ m̀mê ebot. Ntem, akpan usụn̄ emi mbon emi ẹdoride enyịn ndidu nsinsi uwem mi ke isọn̄ ẹwụtde ke imoyom ndidi ufan Christ edi ndibere ye ofụn emi anamde akpanikọ.
16, 17. Nso ke ikpanam inọ nditọete Christ man iwụt ke idi ufan Christ?
16 Edieke odoride enyịn ndidu nsinsi uwem mi ke isọn̄, nso ke akpanam ọnọ nditọete Christ man owụt ke idi ufan Christ? Ẹyak ineme n̄kpọ ita oro ikpanamde. Akpa edi ndisịn ifịk n̄kwọrọ ikọ. Christ ọkọnọ nditọete esie ewụhọ ete ẹkwọrọ eti mbụk ke ofụri ererimbot. (Matt. 24:14) Edi ibat ibat nditọete Christ oro ẹsụhọde ikpekemeke ndida ikpọn̄ n̄kwọrọ eti mbụk emi ke ofụri ererimbot ke mme erọn̄ en̄wen mîkpan̄wamke mmọ. Mmọdo, ini ekededi oro mme erọn̄ en̄wen ẹkade ukwọrọikọ, mmọ ẹn̄wam nditọete Christ ẹnam edisana utom emi ẹkedọn̄de mmọ. Christ ye ofụn emi anamde akpanikọ onyụn̄ enyenede ọniọn̄ ẹnen̄ede ẹdara un̄wam oro mme erọn̄ en̄wen ẹnọde mmimọ.
17 Ọyọhọ n̄kpọ iba oro mme erọn̄ en̄wen ẹkpenamde man ẹn̄wam nditọete Christ edi nditịp okụk nnọ ẹda ẹnam utom ukwọrọikọ. Jesus ọkọdọhọ mme anditiene enye “ẹda inyene ukwan̄ido” mmọ ẹnam ufan ye imọ ye Ete imọ. (Luke 16:9) Emi iwọrọke ke imekeme ndinọ Jesus m̀mê Jehovah ubọkedem man idi ufan mmọ. Utu ke oro, edieke idade inyene nnyịn in̄wam ke utom Obio Ubọn̄, emi owụt ke nnyịn idịghe ufan inua inua kpọt, edi ke idi ata ufan akpanikọ. (1 John 3:16-18) Nnyịn isinọ etịbe emi ke nsio nsio usụn̄—ke ini idade okụk nnyịn ikpe usụn̄ ika ukwọrọikọ, ke ini itịpde okụk man ẹda ẹbọp ẹnyụn̄ ẹse ẹban̄a mme itie utuakibuot nnyịn, ye ke ini itịpde okụk man ẹda ẹse ẹban̄a utom ukwọrọikọ ke ofụri ererimbot. Jehovah ye Eyen esie ẹsinen̄ede ẹdara se ededi oro inọde ke idatesịt, edide esisịt m̀mê uwak uwak.—2 Cor. 9:7.
18. Ntak emi ikpanamde item Bible emi mbiowo ẹnọde?
18 Ọyọhọ n̄kpọ ita oro ikpanamde man iwụt ke idi ufan Christ edi ndinam se mbiowo ẹdọhọde. Ẹmek mmọ ke edisana spirit ke idak ndausụn̄ Christ. (Eph. 5:23) Paul ekewet ete: “Ẹkop uyo ẹnọ mbon oro ẹdade usụn̄ ke otu mbufo ẹnyụn̄ ẹsụk ibuot.” (Heb. 13:17) Ndusụk ini ekeme ndisọn̄ ndinyịme ndinam item Bible emi mbiowo ẹnọde. Ekeme ndidi imesikụt mmọ ẹnamde ndudue, ndien emi ekeme ndinam ikûda item mmọ ke n̄kpọ. Kpa ye oro, Christ emi edide Ibuot esop okop inemesịt ndida mme anana-mfọnmma owo emi nse esop enyịn. Ntre, nte idade ndausụn̄ oro mbiowo ẹnọde owụt m̀mê nnyịn idi ufan Christ m̀mê idịghe. Edieke inamde item mbiowo ke idatesịt, utu ke nditie n̄kere mban̄a ndudue mmọ, oro owụt ke imama Christ.
Ebiet Emi Ikemede Ndikụt Nti Ufan
19, 20. Nso ke ikeme ndinyene ke esịt esop Abasi, ndien nso ke idineme ke ibuotikọ oro etienede?
19 Jesus aka iso ekpeme nnyịn ke ndinọ nnyịn mbon oro ẹdade nnyịn usụn̄, nnyụn̄ nnọ nnyịn mme eka ye nditọeka iren ye iban ke esop Abasi. (Kot Mark 10:29, 30.) Mbonubon mbufo ẹkenam n̄kpọ didie ke ini ọkọtọn̄ọde ndikpep Bible ye Mme Ntiense Jehovah? Ekeme ndidi mmọ ẹma ẹsịn udọn̄ ẹnọ fi ẹte asan̄a ekpere Abasi ye Eyen esie. Edi Jesus ọkọdọhọ ke ndusụk ini “mme asua owo ẹdidi mbonufọk esie.” (Matt. 10:36) Ntem, esịt enem nnyịn ndifiọk ke imekeme ndinyene mme ufan oro ẹnen̄erede ẹma nnyịn ẹkan ata nditọeka nnyịn ke esịt esop Abasi!—N̄ke 18:24.
20 Ekọm oro Paul akadade eberi leta oro enye ekewetde ọnọ esop ke Rome owụt ke enye ama enyene ediwak ufan ke esop oro. (Rome 16:8-16) Apostle John ekeberi ọyọhọ leta ita oro enye ekewetde ntem: “Kọm mme ufan nọ mi ke enyịn̄.” (3 John 14) Emi owụt ke enye n̄ko ama enyene mme ufan. Didie ke ikpekpebe uwụtn̄kpọ Jesus ye eke mbet esie ke nditọn̄ọ nnyụn̄ n̄ka iso nnyene nti ufan ke esịt esop Abasi? Ẹyebọrọ mbụme emi ke ibuotikọ oro etienede.
Didie ke Afo Ọkpọbọrọ?
• Didie ke Jesus okowụt ke idi eti ufan?
• Mbet ẹkenam n̄kpọ didie ye Jesus ufan mmọ?
• Didie ke ikeme ndiwụt ke idi ufan Christ?
[Mme Mbụme Ukpepn̄kpọ]
[Ndise ke page 14]
Jesus ama ekere aban̄a nte etiede mme ufan esie ke idem ye se mmọ ẹkerede
[Mme ndise ke page 16]
Nso ke ikpanam man iwụt ke imoyom ndidi ufan Christ?