Ndi Emenyene Ini Oro Esikpepde Bible?

ISUA oko, Otu Ukara ama okpụhọde ndutịm mbono esop man isida ini oro ikpep Bible inyụn̄ inịm ukpepn̄kpọ ubon. Edieke enyenede nditọ, kụt ete emesinịm ukpepn̄kpọ ubon oro enyenede uforo kpukpru ini ye ubon fo. Mme ọdọ ndọ emi mînyeneke nditọ ẹkpenyene ndida ini emi ntie ọtọkiet n̄kpep Bible. Mbon emi mîdọhọ ndọ ẹkpenyene ndida ini emi nsịn ifịk n̄kpep Bible.

Ediwak owo ẹtịn̄ nte inen̄erede ima ndutịm Utuakibuot Ubon emi. Ke uwụtn̄kpọ, Kevin, emi edide ebiowo ekewet ete: “Imenen̄ede ikọm mbufo ke ndikanam ndutịm emi. Ima ibono ye mbiowo eken ke esop nnyịn ineme nte isidade mbubreyo emi ikpep Bible ye ubon nnyịn, nte Otu Ukara ọkọdọhọde.”

Jodi, emi ebe esie edide ebiowo ekewet ete: “Inyene nditọ iban ita, emi ẹdide isua 15, 11, ye 2. Ke ndondo emi, ima iwọrọ ika esop emi ẹsemde usem idiọn̄ọ. Nditịm idem nnọ kpukpru mbono esop isidịghe ifia ubọk kiet, esinyụn̄ enen̄ede adia ini. Edi ukpụhọde emi anam inyene san̄asan̄a ini emi isinịmde utuakibuot ubon!”

John ye JoAnn, ebe ye n̄wan emi ẹdide mme asiakusụn̄ ẹkewet ete: “Nsio nsio ndutịm ke esop ikayakke isinịm ukpepn̄kpọ ubon kpukpru ini. Obufa ndutịm emi edi enọ Jehovah, ndien edieke idade ini emi inam se ẹdọhọde ida inam, iyokop inem ke n̄kan̄ eke spirit.”

Tony, eyenete emi edide n̄kpọ nte isua 25, esida mbubreyo Tuesday emi ekpep Bible, onyụn̄ ada ini en̄wen etịm idem ọnọ mbono esop. Enye ọdọhọ ete: “Nsitetie mbet Tuesday.” Ntak-a? Tony aka iso ete: “Koro mbubreyo Tuesday edi san̄asan̄a ini emi nsinen̄erede nsan̄a n̄kpere Jehovah. Mmesida n̄kpọ nte hour iba n̄kpep mme n̄kpọ oro ẹsinamde mi nnen̄ede nsan̄a n̄kpere enye. Mmesida ini emi ntie n̄kere mme ufan̄ikọ oro n̄kotde ke Bible.” Nso idi utịp? Enye ọdọhọ ete: “Ikọ Jehovah enen̄ede osụhọde odụk mi esịt akan nte akanam edide.” Ke uwụtn̄kpọ, “mma n̄kot ke Insight mban̄a orụk ufan oro David ye Jonathan ẹkedide. Mma n̄kpep ekese mban̄a orụk ima n̄waidem oro Jonathan ekenyenede. Se enye akanamde anam nnen̄ede mfiọk se isinamde owo edi eti ufan. Nsitetie mbet ndikpep mbufa n̄kpọ ntem mbubreyo Tuesday!”

Ke akpanikọ, kpukpru asan̄autom Jehovah ẹyekpep ekese edieke mmọ ẹdade ini emi ẹkenọde mi ẹsịn ifịk ẹkpep Bible ẹnyụn̄ ẹnịm utuakibuot ubon.