Enọ Imaesịt
Enọ Imaesịt
APOSTLE Paul ama etịn̄ nte ẹkpenọde enọ ete: “Yak owo kiet kiet anam kpa nte enye ebierede ke esịt esie, okûnam mmen̄e mmen̄e m̀mê ke edinyenyịk, koro Abasi amama owo eke ọnọde ke idatesịt.” (2 Cor. 9:7) Jehovah inyịkke owo ndomokiet nditịp n̄kpọ man ẹda ẹnam utom imọ. Enye esiyak mme asan̄autom esie ẹwụt adan̄a nte imade enye ke nditịp se mmọ ẹmade ke ofụri esịt. Toto ke eset, mme asan̄autom Abasi ẹsinen̄ede ẹkop inemesịt ndinọ enọ imaesịt man ẹda ẹnam utom Abasi. Yak inọ uwụtn̄kpọ ita.
Ke Jehovah ama akada nditọ Israel ọwọrọ ke Egypt, enye ama ọdọhọ mmọ ẹbọp tent esop. Ntre, ẹma ẹdọhọ nditọ Israel ẹtịp n̄kpọ man ẹda ẹbọp tent emi. ‘Kpukpru owo eke esịt ẹdemerede’ ẹma ẹnọ gold, sidibe, okpoho, ye mme n̄kpọ eken. Mmọ ẹma ẹnọ n̄kpọ tutu ẹdọhọ ẹkûda aba n̄kpọ udi.—Ex. 35:5, 21; 36:6, 7.
Ke ediwak isua ama ekebe, ikọt Abasi 1 Chron. 29:3-9; 2 Chron. 5:1.
ẹma ẹfiak ẹnyene ifet nditịp n̄kpọ man ẹda ẹnam utom Abasi, ke ini ẹkebọpde temple. Edidem David ama enen̄ede etịp n̄kpọ onyụn̄ esịn udọn̄ ọnọ mbon eken ẹtiene ẹtịp. Mmọ ẹma ẹkop inemesịt nditiene ntịp n̄kpọ. Edieke ẹkpebatde ofụri gold ye sidibe oro ẹketịpde idahaemi, ekpebe triliọn naira 14. Mmọ ẹma ẹnen̄ede ẹkop idatesịt ke nditịp n̄kpọ ke ofụri esịt nnọ Jehovah.—Akpa mme anditiene Jesus Christ ẹkedi mbon ntatubọk n̄ko. N̄kpọ nte owo 3,000 ẹma ẹna baptism ke Pentecost eke isua 33 E.N., ndien ediwak mmọ ikodụn̄ke ke Jerusalem. Nditọete ẹma ẹtịp n̄kpọ man ẹn̄wam mbufa owo emi mîkenyeneke ubọk ẹka iso ẹdu do ẹkpep ekese ẹban̄a Abasi. Nditọete ẹma ẹnyam inyene mmọ ẹda okụk ẹsọk mme apostle man ẹda ẹse ẹban̄a mmọ. Imọfiọk ke esịt ama enen̄ede enem Jehovah ndikụt mmọ ẹnamde n̄kpọ ndiwụt ke imenyene mbuọtidem ye ima.—Utom 2:41-47.
Nditọete ke ẹnanam emi mfịn—ẹnyịme ndida ini, ukeme, ye okụk mmọ nnam n̄kpọ Jehovah. Se idude ke ekebe oro etienede mi ayanam ọfiọk nte ekemede ndinọ un̄wam emi.
[Ekebe ke page 18, 19]
MME USỤN̄ EMI NDUSỤK OWO ẸMEKDE NDINỌ ENỌ
MME ETỊBE KABAN̄A UTOM OFỤRI ERERIMBOT
Ediwak owo ẹsinịm, mîdịghe ẹnam ndutịm ẹban̄a okụk emi mmọ ẹdisịnde ke mme ekebe etịbe oro ẹdiande idiọn̄ọ emi: “Worldwide Work.”
Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Emekeme n̄ko ndinọ okụk imaesịt nnennen nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. (Emekeme n̄ko ndinọ enọ imaesịt oro isiakde ke idak emi ẹsọk n̄kọk itieutom Mme Ntiense Jehovah oro esede aban̄a idụt mbufo.) Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.
ENỌ EMI ẸDIOMIDE-DIOMI
Ke adianade ye edinọ okụk nte enọ, mme usụn̄ enọ efen ẹdu oro ẹkemede ndida nnam utom Obio Ubọn̄ ke ofụri ererimbot. Emi ẹsịne:
Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.
Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.
Inyene ye Mbubehe: Ẹkeme ndinọ Watch Tower inyene ye mbubehe nte enọ mîdịghe ẹnam ẹkpe enye ẹnọ Watch Tower ke ini andinyene akpade.
Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.
Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.
Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.
Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom emi esede aban̄a idụt mbufo.
Jehovah’s Witnesses
P.M.B. 1090,
Benin City 300001,
Edo State, Nigeria.
Telephone: 07080662020