Kpono Ifet Oro Enyenede ke Esop
Kpono Ifet Oro Enyenede ke Esop
“Abasi . . . omobon kpukpru ndido kiet kiet ke ikpọkidem nte enemde enye esịt.”—1 COR. 12:18.
1, 2. (a) Nso iwụt ke owo kiet kiet enyene utom ke esop, oro akpanade enye ada ke akpan n̄kpọ? (b) Ewe mbụme ke idibọrọ ke ibuotikọ emi?
JEHOVAH ada esop esie ọbọk onyụn̄ ọnọ ikọt esie ndausụn̄ toto ke eyo nditọ Israel. Ke uwụtn̄kpọ, ke Israel ẹma ẹkekan obio Ai, Joshua ama ada “ke iso ofụri esop Israel” “okot kpukpru ikọ mbet oro ye eke edidiọn̄ ye eke isụn̄i, ekem ke kpukpru se ẹwetde ke n̄wed ibet.”—Josh. 8:34, 35.
2 Apostle Paul ọkọdọhọ Timothy emi ekedide ebiowo ete ke mme owo ke esop ẹdi “otu mbonufọk Abasi” ye “adaha ye isọn̄ akpanikọ.” (1 Tim. 3:15) Mfịn n̄ko, ata mme Christian ke ofụri ererimbot ẹdi “otu mbonufọk Abasi.” Paul emen esop Abasi odomo ye idemowo ke 1 Corinth 12. Enye ọdọhọ ke okposụkedi emi ndido idemowo ẹnamde nsio nsio utom, ke kpukpru mmọ ẹnyene ufọn. Enye ọdọhọ ke Abasi obon “kpukpru ndido kiet kiet ke ikpọkidem nte enemde enye esịt.” Enye ọdọhọ n̄ko ke “mme ndido ikpọkidem emi nnyịn ikerede ke inen̄ekede inyene ukpono, [ke] nnyịn imen ukpono eke okponde akan inọ.” (1 Cor. 12:18, 23) Mmọdo, idụhe anam-akpanikọ asan̄autom Abasi oro enyenede ufọn ke esop akan enye eken. N̄kukụre edi ke kpukpru owo ẹnyene nsio nsio utom. Didie ndien ke ikeme ndifiọk utom nnyịn ke esop nnyụn̄ n̄ka iso nda enye ke akpan n̄kpọ? Nso isinam owo enyene ifetutom? Didie ke ikeme ndinam ‘kpukpru owo ẹkụt n̄kọri nnyịn’?—1 Tim. 4:15.
Nso ke Ikpanam Ndiwụt ke Imokop Inemesịt Ndidu ke Esop Abasi?
3. Nso idi usụn̄ kiet oro ikemede ndiwụt ke imokop inemesịt ndidu ke esop Abasi?
3 Usụn̄ kiet oro ikemede ndiwụt ke imokop inemesịt ndidu ke esop Abasi edi ndinam item emi ‘ofụn anam-akpanikọ’ ye Otu Ukara esie ọnọde. (Kot Matthew 24:45-47.) Ana ikere iban̄a nte isinamde n̄kpọ ke ini ofụn emi ọnọde ndausụn̄. Ke uwụtn̄kpọ, ke ediwak isua idahaemi, ofụn emi ọnọ ikọt Abasi item aban̄a usịnen̄kpọ ye ukamaidem, unọ idem inemesịt, ye edise mbubiam ke Intanet. Ndi imesinam nti item emi mbak nnyịn ididuọ idụk afia Satan? Nso kaban̄a item oro ẹnọde ẹte isinịm utuakibuot ubon kpukpru ini? Ndi imanam item emi inyụn̄ isio mbubreyo kiet isida inịm utuakibuot ubon? Edieke nnyịn mîdọhọ ndọ, ndi imosio ini inịm isikpep Bible? Jehovah ọyọdiọn̄ kpukpru nnyịn edieke inamde item ofụn anam-akpanikọ emi.
4. Nso ke ikpekere iban̄a ke ini inamde ubiere?
4 Ndusụk owo ẹkeme ndikere ke nte owo ọnọde idem inemesịt, esịnede n̄kpọ onyụn̄ akamade idem, edi mbubehe esiemmọ. Edi Christian oro ama akayak idem ọnọ Abasi, emi amade esop Abasi ikpekereke iban̄a se enye amade kpọt, edi akpakam ekere aban̄a se Jehovah amade, emi ẹwetde ke Bible. Ikọ Abasi ekpenyene ndidi ‘utuenikan̄ ukot nnyịn, ye un̄wana usụn̄ nnyịn.’ (Ps. 119:105) Akpana ikere n̄ko iban̄a nte se inamde otụkde utom ukwọrọikọ nnyịn ye mme owo ke esịt esop ye ke an̄wa.—Kot 2 Corinth 6:3, 4.
5. Ntak emi nnyịn mîkpenyeneke edu nda-ke-idem-e?
5 “Spirit oro anamde utom . . . ke esịt nditọ ntụtutọn̄” ọyọyọhọ kpukpru ebiet nte ofụm oro in̄wekde. (Eph. 2:2) Spirit emi ekeme ndinam nnyịn ikere ke nnyịn iyomke ndausụn̄ oro esop Jehovah ọnọde. Nnyịn iyomke ndibiet Diotrephes emi mîkokponoke n̄kpọ ekededi oro apostle John akanamde. (3 John 9, 10) Inaha inyene edu nda-ke-idem. Ikpanaha idedei itịn̄ m̀mê inam n̄kpọ ekededi oro etiede nte edisọn̄ ibuot ye ofụn emi Jehovah adade ọnọ nnyịn ndausụn̄ mfịn. (Num. 16:1-3) Edi akpana ida ifet oro inyenede ndinam utom ye ofụn emi nte ọsọn̄urua n̄kpọ inyụn̄ inam se enye ọdọhọde. Nso kaban̄a mbiowo ke esop nnyịn? Akpana ikop item mmọ inyụn̄ isụk ibuot inọ mmọ nde.—Kot Mme Hebrew 13:7, 17.
6. Ntak emi ikpodụn̄ọrede idaha nnyịn ise?
6 Usụn̄ en̄wen oro ikpowụtde ke imama esop Abasi edi ndinen̄ede ndụn̄ọde ukeme nnyịn nnyụn̄ nsịn ofụri ukeme nnam utom Jehovah man inọ enye ubọn̄. (Rome 11:13) Ndusụk owo ẹdi mme asiakusụn̄. Mbon eken ẹdi mme isụn̄utom, mme esenyịn oro ẹsan̄ade-san̄a, ye mbon Bethel. Ediwak nditọete iren ye iban ẹn̄wam ke utom ubọp Ufọkmbono Obio Ubọn̄. Ata ekese Mme Ntiense Jehovah ke ẹsịn idem ẹse ẹban̄a ubon mmọ ke n̄kan̄ eke spirit, ke ẹnyụn̄ ẹsịn idem ẹkwọrọ ikọ kpukpru urua. (Kot Colossae 3:23, 24.) Imenen̄ede inịm ke edieke inamde utom Abasi ke ofụri esịt ye ke ofụri ukpọn̄, iyaka iso inyene ufọn ke esop.
Owo Idịghe Ukem
7. Tịn̄ nte idaha nnyịn ekemede nditụk ifetutom nnyịn ke esop.
7 Akpana idụn̄ọde mme idaha nnyịn sia ndusụk ini, se nnyịn ikemede ndinam ke ẹsida ẹdiọn̄ọ ifetutom oro ikpakamade ke esop. Ke uwụtn̄kpọ, ifetutom oro eyenete eren akamade ke esop okpụhọde ye eke eyenete an̄wan. N̄kpọ en̄wen oro enyenede n̄kpọ ndinam ye ifetutom oro ikemede ndikama ke esop edi isua emana, nte idem nnyịn etiede, ye mme n̄kpọ ntre. Mme N̄ke 20:29 ọdọhọ ete: “Mbana n̄kparawa edi odudu mmọ: ndien ubọn̄ n̄kani-iren edi iwat.” N̄kparawa ẹnyene odudu ndinam ekese ke esop, ke ini n̄kani owo ẹsidade ọniọn̄ ye mbufiọk mmọ ẹn̄wam esop. Akpana ifiọk n̄ko nte ke mfọnido Abasi oro owo mîdotke anam inam se ededi oro inamde ke esop.—Utom 14:26; Rome 12:6-8.
8. Didie ke se nnyịn imade enyene n̄kpọ ndinam ye se inamde ke esop?
8 Uwụtn̄kpọ nditọeka iban iba oro iyomde ndinọ mi anam ifiọk n̄kpọ en̄wen oro ekemede nditụk ifetutom owo ke esop. Mmọ mbiba ẹma ẹkụre ufọkn̄wed sekọndri, ẹnyụn̄ ẹdu ke ukem idaha. Ete ye eka mmọ ẹma ẹsịn udọn̄ ẹnọ mmọ ndisiak usụn̄ ke ẹma ẹkụre sekọndri. Ke ẹma ẹkekụre, kiet ke otu mmọ ama ọtọn̄ọ usiakusụn̄, enye eken ọtọn̄ọ utom. Ntak emi mmọ ẹkenamde nsio nsio n̄kpọ? Etiene se owo amade. Mmọ ẹkenam se mmọ ẹmade ndinam. Ndi idịghe se ediwak nnyịn isinyụn̄ inamde edi oro? Akpana inen̄ede ikere se ikpamade ndinam nnọ Jehovah. Ndi imekeme ndinam ekese, idem edieke oro oyomde inam ukpụhọde mi ye ko?—2 Cor. 9:7.
9, 10. Nso ke ikpanam edieke mînemke nnyịn ndinam ekese ke utom Jehovah?
9 Nso ke ikpanam edieke mînemke nnyịn ndinam ekese ke esop? Paul ọkọdọhọ ke leta oro enye ekewetde ọnọ ẹsọk mbon Philippi ete: “Abasi anam utom ke esịt mbufo, nte enemde enye, man mbufo ẹnyịme ẹnyụn̄ ẹnam.” Ke akpanikọ, Jehovah ekeme ndinam utom ke esịt nnyịn onyụn̄ anam inyene udọn̄ ndinam n̄kpọ esie.—Phil. 2:13; 4:13.
10 Ọkpọfọn iben̄e Jehovah ite anam ọdọn̄ nnyịn ndinam uduak esie. Se Edidem David emi akakarade Israel ke eset akanamde edi oro. Enye ekeben̄e Abasi ete: “Wụt mi usụn̄ fo, O Jehovah; teme mi ido fo. Nam mi nsan̄a ke akpanikọ fo, nyụn̄ teme mi: koro afo edide Abasi edinyan̄a mi; mmebet fi ofụri usen.” (Ps. 25:4, 5) Akpana nnyịn n̄ko iben̄e Jehovah ite anam nnyịn ima ndinam se inemde enye esịt. Ke ini ikerede iban̄a nte Jehovah Abasi ye Eyen esie ẹdade se inamde inọ mmọ, emi esinam inen̄ede ikọm mmọ. (Matt. 26:6-10; Luke 21:1-4) Esịtekọm emi ayanam iben̄e Jehovah ọnọ nnyịn ukeme ndinam n̄kọri ke utom esie. Prọfet Isaiah owụt utọ edu oro ikpenyenede. Ke ini Jehovah okobụpde ete: “Anie ke ndidọn̄ utom? Anie edinyụn̄ aka n̄kpọ ọnọ nnyịn?” Isaiah ama ọbọrọ ete: “Se mi, dọn̄ mi utom.”—Isa. 6:8.
Didie ke Akpanam N̄kọri?
11. (a) Ntak emi ẹyomde nditọete iren ẹnam n̄kpọ man ẹdot ndikama ifetutom? (b) Nso ke eyenete akpanam man odot ndikama ifetutom?
11 Owo 289,678 ẹkena baptism ke ofụri ererimbot ke isua utom 2008. Emi enen̄ede owụt ke imoyom nditọete iren ndida usụn̄ ke esop. Nso ke eyenete eren akpanam man an̄wam ke afan̄ emi? Ke nditịn̄ ibio ibio, edi ndisịn idem nnam se N̄wed Abasi ọdọhọde owo oro oyomde ndidi asan̄autom unamutom m̀mê ebiowo anam. (1 Tim. 3:1-10, 12, 13; Titus 1:5-9) Didie ke enye akpanam emi? Edi ndisịn ifịk n̄kwọrọ ikọ, ntịn̄ enyịn nnam se ẹnọde enye anam ke esop, nnọ nti ibọrọ ke mbono esop, nnyụn̄ mma nditọete. Ndinam kpukpru emi owụt ke owo ama esop Abasi.
12. Nso ke mme uyen ẹkpenam ndiwụt ke imenen̄ede ima akpanikọ?
12 Nso ke nditọete iren, akpan akpan mme uyen, ẹkpenam man ẹkọri ke esop? Akpana mmọ ẹka iso ẹkpep Bible man ẹkpekọri ke “ọniọn̄ ye ifiọk eke spirit.” (Col. 1:9) Ndisịn idem n̄kpep Bible nnyụn̄ nnen̄ede nsịn idem ke ndutịm mbono esop ayan̄wam. N̄kpọ en̄wen emi ekemede ndinam n̄kparawa ẹdot ndikama ifetutom edi ndinam n̄kpọ man ẹdot ndidụk utom uyọhọ ini ekededi. (1 Cor. 16:9) Ndinam utom Jehovah nte ubọkọkọ esinem etieti, esinyụn̄ asan̄a ye ediwak edidiọn̄.—Kot Ecclesiastes 12:1.
13, 14. Didie ke nditọete iban ẹkeme ndiwụt ke imokpono ifet oro mmimọ inyenede ke esop?
13 Nditọete iban n̄ko ẹkeme ndiwụt ke imama ifet editiene nsu se idude ke Psalm 68:11. Itien̄wed oro okot ete: “Ọbọn̄ ọnọ uyo: iban emi ẹkwọrọde ẹdi akamba udịm.” Akpan usụn̄ kiet oro nditọete iban ẹwụtde ke imama ifet emi inyenede ke esop edi ndibuana ke utom edinam mbet. (Matt. 28:19, 20) Mmọdo, edieke nditọete iban ẹbuanade ọyọhọ ọyọhọ ke utom ukwọrọikọ ẹnyụn̄ ẹnyịmede ndiwa idem nnam utom emi, oro owụt ke mmọ ẹda ifet oro mmọ ẹnyenede nte ọsọn̄urua n̄kpọ.
14 Paul ekewet Titus ete: “Yak n̄kani iban ẹnyene edu ukpono, . . . ẹdi mme ọnọ nti ukpep; man mmọ ẹti n̄kparawa iban ẹte ẹfiọk ndima mme ebe mmọ, ẹma nditọ mmọ, ẹnyene eti ibuot, ẹdu edisana uwem, ẹtie ke ufọk ẹnam n̄kpọ, ẹnyene eti ido, ẹsụk idem ẹnọ mme ebe mmọ, mbak ẹditịn̄ ikọ isụn̄i ẹdian ikọ Abasi.” (Titus 2:3-5) Ke akpanikọ, nditọete iban oro ẹkọride ẹsịm ọyọhọ idaha ẹkeme ndinen̄ede n̄n̄wam esop. Edieke mmọ ẹkponode nditọete iren oro ẹdade usụn̄ ke esop, ẹkamade idem ẹnyụn̄ ẹsịnede n̄kpọ ukpono ukpono, ẹmekde unọ idem inemesịt oro ọfọnde, emi edidi eti uwụtn̄kpọ ọnọ mbon eken ke esop onyụn̄ owụt ke mmọ ẹnen̄ede ẹkpono ifet oro mmọ ẹnyenede ke esop.
15. Nso ke eyenete an̄wan oro mîdọhọ ebe akpanam ke ini enye okopde ndobo?
15 Ndusụk ini, eyenete an̄wan emi mîdọhọ ebe ekeme ndikere ke imọ inyeneke ufọn ke esop. Eyenete an̄wan oro mîdọhọ ebe ọdọhọ ete: “Unana ebe esinam owo ndobo ndusụk ini.” Ke ini ẹkebụpde enye se ikan̄wamde enye, enye ọkọdọhọ ete: “Akam ye ukpepn̄kpọ Bible ama anam mfiọk ke mmenyene ufọn. Mma ndifiọk nte Jehovah adade mi. Ekem, ntọn̄ọ ndin̄wam mme owo ke esop. Emi ama anam n̄kere mban̄a mbon en̄wen utu ke ndisụk n̄kere mban̄a idemmi kpọt.” Jehovah ọkọdọhọ David ke Psalm 32:8 ete: “Nyeteme fi, nyetịn̄ fi enyịn mi ke idem.” Ke akpanikọ, Jehovah amama kpukpru ikọt esie, esịnede nditọete iban oro mîdọhọ ebe, enye oyonyụn̄ an̄wam kpukpru ikọt esie ẹfiọk ke imenyene ufọn ke esop.
Ka Iso Nam Utom Fo!
16, 17. (a) Ntak emi mîdụhe se ifọnde nte ndiyere ikot oro Jehovah ọnọde ete ididụk esop esie? (b) Nso ke ikpanam man ika iso idara ifet oro inyenede ndinam n̄kpọ Jehovah?
16 Jehovah odụri asan̄autom esie kiet kiet adian ke idem. Jesus ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Ke otu ediwak biliọn owo oro ẹdude ke isọn̄, nnyịn ke Jehovah okot ọdọn̄ ke esop esie. Mfọnn̄kan n̄kpọ oro ikanamde ekedi ndiyere ikot emi. Enye anam uwem nnyịn enyene uduak. Ndien nso n̄kpọ idatesịt ke edi ntem ndinyene utom ke esop Esie!
17 Andiwet psalm ọkọdọhọ Jehovah ete: “O Jehovah, mmama idụn̄ ufọk fo.” Enye ama onyụn̄ ọkwọ ete: “Ukot mi kada ke una-isọn̄: nyọkọm Jehovah ke otu mbon-esop.” (Ps. 26:8, 12) Jehovah ọnọ owo kiet kiet utom ke esop esie. Edieke ikade iso itiene ndausụn̄ esop Abasi inyụn̄ isịnde idem inam utom Abasi, nnyịn iyaka iso idara ọsọn̄urua ifet oro Jehovah ọnọde nnyịn ndinam n̄kpọ esie.
Nte Afo Emeti?
• Ntak emi ikpọdọhọde ke kpukpru Christian ẹnyene utom ke esop?
• Nso ke ikpanam ndiwụt ke imada ifet oro inyenede ke esop Abasi ke akpan n̄kpọ?
• Nso ye nso ikeme ndibiere ifetutom oro owo akamade ke esop?
• Didie ke mme uyen ye ikpọ owo ẹkpewụt ke imada ifet oro inyenede ke esop Abasi ke akpan n̄kpọ?
[Mme Mbụme Ukpepn̄kpọ]
[Mme ndise ke page 16]
Nso ke nditọete iren ẹkpenam man ẹdot ndikama ifetuom ke esop?
[Ndise ke page 17]
Nso ke nditọete iban ẹkpenam ndiwụt ke imokpono ifet oro mmimọ inyenede ke esop?