Dat Esịt ke Utom Abasi kpa ye Oro Enyenede Ekese Ndinam

JEHOVAH oyom fi okop idatesịt. (Ps. 100:1) Anaedi emenyene ekese ndinam ke adianade ye utom Abasi oro anamde. Ekeme ndidi ukûnyeneke ekese ndinam ke ini akayakde idem ọnọ Abasi, edi idahaemi, utom idịbi udia ye utom esop ẹnen̄ede ẹdia fi idem. Ekeme ndidi esịt esifịna fi edieke mûkemeke ndinam se akaduakde ndinam. Nso ke akpanam man enyene ini anam se aduakde onyụn̄ aka iso anam n̄kpọ Jehovah ke idatesịt?—Neh. 8:10.

Enen̄ede oyom owo anam eti ndutịm ke ndiọkeyo emi edide ẹdodụri owo ẹdọk, ẹdodụri ẹsụhọde mi. Item apostle Paul emi ekeme ndinen̄ede n̄n̄wam fi; enye ọdọhọ ete: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄, ẹdedep ifet ẹnọ idem mbufo, koro mme usen ẹdiọkde.”—Eph. 5:15, 16.

Ke ekerede aban̄a eti item emi, nso ke akpanam man ekeme ndinịm ukpepn̄kpọ idemfo, ese aban̄a ubon, aka ukwọrọikọ, anam utom, onyụn̄ ese aban̄a mme n̄kpọ eken?

Ndi ke eteti nte esịt akadatde fi ke ini akayakde idem ọnọ Abasi onyụn̄ ana baptism? Se ekekpepde aban̄a Jehovah ye uduak esie akanam esịt adat fi. Anaedi ama esịn ifịk ekpep Bible ke ediwak ọfiọn̄ mbemiso ekekemede ndinyene utọ ifiọk ye idatesịt oro. Se akanamde emi itakke-tak. Ukpepn̄kpọ emi anam edi se edide mfịn.

Ana aka iso ekpep Bible edieke oyomde ndika iso n̄kop idatesịt. Edieke mûsusọpke unyene ini ukot unyụn̄ ukpep Bible, ọwọrọ ke ana afiak odụn̄ọde ndutịm fo. Emekeme ndinen̄ede n̄kpere Jehovah idem edieke adade minit ifan̄ kpọt kpukpru usen ekpep Bible onyụn̄ etie ekere se ekpepde! Emi n̄ko ayanam okop idatesịt.

Ekese mme asan̄autom Abasi ẹsida ini emi mmọ ẹkesibiatde ẹnam se mînen̄ekede idi akpan n̄kpọ ẹnam akpan n̄kpọ. Bụp idemfo,  ‘Hour ifan̄ ke nsida n̄kot mme n̄wed ererimbot m̀mê n̄wedmbụk n̄kpọntịbe, nse ekebe ndise, n̄kop ikwọ, m̀mê mbre mbre?’ Kpukpru emi ẹsinem edieke ẹnamde mmọ ke nnennen ini. (1 Tim. 4:8) Edieke esidade ini emi akpadade anam n̄kpọ kiet anam n̄kpọ en̄wen, ọwọrọ ke ana okpụhọde ndutịm fo.

Adam enyene nditọ ita, onyụn̄ edi ebiowo. Enye etịn̄ se in̄wamde imọ ete: “Ndu ata mfefere uwem. Nsibreke mbre emi adiade owo ini akaha, nnyụn̄ nyomke ikpọ n̄kpọ emi ẹsibiatde ekese ini ẹse ẹban̄a. Idịghe nte n̄kama idem ke ufen, se idude edi nte ke nsima mbre mi edi idaha idaha.”

Ndisitie n̄kere nti utịp emi enyenede ke ntak ubiere emi anamde ekeme ndinam ọdọdiọn̄ okop idatesịt onyụn̄ enyene idotenyịn. Ke uwụtn̄kpọ, Mariusz, ebiowo emi enyenede nditọ ita ọdọhọ ete: “Mma ntọn̄ọ ndinyene idotenyịn ke n̄kpọ ọyọfọn ke ini n̄kọtọn̄ọde ndikpep Bible. Edi mmesinyene mfịna ke ini ke ini, ndien Jehovah ikpọn̄ ọfiọk ediwak mfịna mi. Mmọkọm Jehovah ke un̄wam esie, mmọfiọk ke n̄kpọ ọyọfọn.”

Kpa nte ekedide ye Mariusz, iwọrọke ite ke ima ikam inyenyene idotenyịn ke editịmede esịt ọnyọn̄. Edi idotenyịn ekeme ndinam okop idem inem onyụn̄ ekeme ndiyọ nsịn̄ede uwem emi edifọn edifọn. Bible ọdọhọ ete: “Kpukpru usen owo ukụt ẹdọdiọk: edi [owo emi okopde] inemesịt [etie nte adia] usọrọ kpukpru ini.” (N̄ke 15:15) Kere n̄ko ban̄a adan̄a nte Abasi amade fi. Nditie n̄kere n̄kpọ ntem ekeme ndinam enen̄ede ama Jehovah onyụn̄ okop idatesịt.—Matt. 22:37.

Se isinen̄ede inam ubon ẹkop idatesịt edi ndibem iso nyom Obio Ubọn̄ Jehovah. Ndidu uwem nte mme Christian esinam ubon ẹtetịm ẹdiana kiet utu ke nditie mfịna mfịna. Edieke ẹnamde emi, ufọk mbufo eyenem, koro emem ye edidianakiet oyodu.—Ps. 133:1.

Ubon ndidiana kiet nnam n̄kpọ Abasi esinam mmọ ẹkop inemesịt. Mariusz ọdọhọ ete: “Mmesinen̄ede mma ndidu ye ubon mi. N̄wan mi esinen̄ede an̄wam mi. Enye esisan̄a ye ami kpukpru ini oro enye ekemede, edide ke an̄wautom, ke ini n̄kade nditiene nnịm an̄wa mbono asana, ye ke ini n̄kade ndinọ utịn̄ikọ ke esop en̄wen. N̄kpọ emi esinen̄ede enem mi.”

N̄wed Abasi ọdọhọ mme Christian ẹse ẹban̄a ufọk mmọ. (1 Tim. 5:8) Edi edieke esibiatde ekese ini anam utom utom, oro idiyakke ekeme ndinam n̄kpọ Abasi ke idatesịt. Bọn̄ akam ban̄a n̄kpọ emi. (Ps. 55:22) Ndusụk owo ẹnyịme ndiyom utom en̄wen man ẹbem iso ẹyom Obio Ubọn̄ Abasi. Christian ndomokiet ikpayakke inem okụk anam enye ada ini emi enye akpadade anam n̄kpọ Abasi anam utom.—N̄ke 22:3.

Ọkpọfọn ewet nti ye ndiọi utịp utom emi osụk anamde idahaemi, ye enye emi oyomde ndinam. Idụhe owo emi mîmaha utom emi ẹkpede eti okụk. Edi ndi utom fo ayak adiana ye ubon fo anam n̄kpọ Abasi? Fiak tie kere n̄kpọ emi, nyụn̄ nam ubiere emi edinọde fi ini ndibem iso nyom Obio Ubọn̄ Jehovah.

Edieke utom fo mîyakke ọkọri ke n̄kan̄ eke spirit, emekeme ndinam ukpụhọde. Ediwak nditọete ẹsiyom utom en̄wen man ẹkeme ndinyene ini nnam n̄kpọ Abasi. Eyenete kiet ke Poland ọdọhọ ete: “Mma n̄kpọn̄ utom emi n̄kesinamde koro utom emi ekesisio mi esịn ke usụn̄ isan̄ kpukpru ini. N̄kenyeneke ini nnam n̄kpọ Abasi m̀mê ndise mban̄a ubon mi.” Eyenete emi ama oyom utom en̄wen oro ọnọde enye ini.

Ma Ndin̄wam Mbon En̄wen

Jesus ọkọdọhọ ke “inemesịt okpon ke ndinọnọ akan ke ndibọbọ.” (Utom 20:35) Enyene ediwak n̄kpọ emi ikpanamde man esịt enem owo. Ndusụk ini, edituak inua imam, ndinọ owo ubọk, m̀mê ndikọm owo ke ndisịn ifịk nnam n̄kpọ Abasi ekeme ndinam idem enem mbufo mbiba.

Apostle Paul ọkọdọhọ ekemmọ nditọete ete: “Ẹsọn̄ọ ukpọn̄ eke ofụhọde esịt, ẹn̄wam mbon mmemidem.” (1 Thess. 5:14) Mbon  emi ẹfụhọde ẹkeme ndikere ke mfịna mmimọ okpon akan mmimọ. Ndi emekeme ndin̄wam mmọ? Emekeme ndisịn udọn̄ nnọ eyenete emi etiede nte n̄kpọ Jehovah ọtọn̄ọ ndidorode enye. Emi ayan̄wam fi n̄ko. Imọfiọk ke enyene mfịna emi owo ndomokiet mîdikemeke ndikọk. Edi omosụk ekeme ndidọn̄ owo esịt nnyụn̄ n̄n̄wam enye eberi edem ke Jehovah emi n̄kpọ ndomokiet mîsọn̄ke ikan. Jehovah idikpọn̄ke mbon emi ẹbuọtde idem ye enye.—Ps. 27:10; Isa. 59:1.

N̄kpọ en̄wen emi ekemede ndinam nnọ owo emi mîkopke aba inem ndinam n̄kpọ Abasi edi ndidọhọ enye asan̄a ye afo ke an̄wautom. Ke ini Jesus ọkọdọn̄de mbet 70 ete ẹkekwọrọ ikọ, enye akanam mmọ ẹsan̄a “iba iba.” (Luke 10:1) Ndi ukereke ke ndisan̄a ntre ama an̄wam mmọ? Ndi emekeme nditiene uwụtn̄kpọ Jesus emi man an̄wam nditọete fo ẹfiak ẹkop inem utom Abasi?

Ediwak n̄kpọ ẹdu emi ẹtịmerede owo esịt mfịn. Edi Paul ọkọdọhọ ete: “Ẹdat esịt ke Ọbọn̄ kpukpru ini. Nyọtọn̄ọ ntak ndọhọ, Ẹdat esịt!” (Phil. 4:4) Uwem fo enyene se ọwọrọde koro amama Abasi, okop item esie, onyụn̄ esịn ifịk anam utom emi enye ọdọhọde anam. Emi esinam okop idatesịt. Ke adianade do, Jehovah esin̄wam fi ọyọ mme mfịna emi osobode.—Rome 2:6, 7.

Imenyene mbuọtidem ke ibịghike ke obufa ererimbot oro Jehovah ọkọn̄wọn̄ọde ọmọn̄ edisịm. Iyenyene ekese edidiọn̄ inyụn̄ inen̄ede ikop idatesịt. (Ps. 37:34) Mmọdo, dat esịt. Kûfre akpakịp edidiọn̄ emi Jehovah ọnọde fi idahaemi. Edieke anamde oro, ayaka iso ‘anam n̄kpọ Jehovah ke idatesịt.’—Ps. 100:1.

[Ndise ke page 8]

(Ama oyom ndikụt nte enye enen̄erede etie, se n̄wed)

Ekeme ndiyom anam ukpụhọde ke ndutịm fo edieke oyomde ndika iso nnam n̄kpọ Abasi ke idatesịt

NDUỌKODUDU ye UNỌ IDEM INEMESỊT

UFỌK ye EDISE MBAN̄A UBON

UTOM

MBONO ESOP

UKPEPN̄KPỌ IDEMOWO

UTOM UKWỌRỌIKỌ

[Mme ndise ke page 10]

Ndi emekeme ndin̄wam mbon en̄wen ẹfiak ẹkop idatesịt ndinam n̄kpọ Abasi?