Da Usọ Kama “Akan̄kan̄ Eke Spirit”

“Ẹkama akan̄kan̄ eke spirit, oro edi, ikọ Abasi.”—EPH. 6:17.

1, 2. Nso ke ikpanam ke emi ẹsụk ẹyomde-yom mme anditan̄a etop Obio Ubọn̄ mi?

KE JESUS ama okokụt ke mme owo ẹnen̄ede ẹyom Abasi, enye ama ọdọhọ mbet esie ete: “Idọk okpon, edi mme anamutom iwakke. Mmọdo, ẹben̄e Enyene idọk ẹte osio mme anamutom ọnọ ẹdi ke idọk esie.” Edi Jesus iketreke do. Ke enye ama eketịn̄ emi ama, enye ama “okot mbet esie duopeba” onyụn̄ ọdọn̄ mmọ ẹkekwọrọ ikọ, oro edi, ẹkenam utom “idọk.” (Matt. 9:35-38; 10:1, 5) Ekem Jesus ama “emek owo ata-ye-duop en̄wen onyụn̄ osio mmọ ọdọn̄ ẹsan̄a iba iba” ẹkenam kpa utom kiet emi.—Luke 10:1, 2.

² Ẹnen̄ede ẹyom mme anditan̄a etop Obio Ubọn̄ mfịn n̄ko. Owo 18,164,539 ẹkedụk Editi ke 2009. Ọwọrọ ke mbon oro ẹketienede nnyịn ẹdụk Editi isua oko ẹma ẹbe miliọn 10. Emi owụt ke n̄kpọ enen̄ede adat ke in̄wan̄ eke spirit. (John 4:34, 35) Mmọdo, akpana iben̄e enyene idọk ọnọ ediwak mbonutom ẹdi. Edi didie ke idinam n̄kpọ ekekem ye eben̄e emi? Se ikpanamde ekpedi ndikpep ndikwọrọ ikọ enen̄ede ọfọn, nsịn ifịk n̄kwọrọ etop Obio Ubọn̄ emi nnyụn̄ nnam mbet.—Matt. 28:19, 20; Mark 13:10.

3. Didie ke spirit Abasi anam nnyịn inyene uforo ke an̄wautom?

³ Ibuotikọ oro ikekpepde urua oko ama owụt nte edisana spirit ekemede ndinam itịn̄ “ikọ Abasi uko uko.” (Utom 4:31) Spirit emi ekeme n̄ko ndinam ikeme ndikwọrọ ikọ ye usọ. N̄kpọ kiet emi ekemede ndinam inen̄ede inyene uforo ke an̄wautom edi ndida Bible, kpa n̄wọrọnda n̄kpọutom emi Jehovah Abasi ọnọde, nnam n̄kpọ edifọn edifọn. Ẹkeda edisana spirit Abasi ẹwet Bible. (2 Tim. 3:16) Ntre, enye edi Ikọ Abasi. Mmọdo, ke ini idade usọ inam Bible an̄wan̄a mme owo ke an̄wautom, oro onyụn̄ etie nte ndiyak edisana spirit ada nnyịn usụn̄. Ẹyak ise kan̄a nte Ikọ Abasi enyenede odudu, mbemiso inemede nte ikemede ndida usọ nnam Bible an̄wan̄a mme owo ke an̄wautom.

‘Ikọ Abasi Enyene Odudu’

4. Didie ke Bible ekeme ndikpụhọde owo?

⁴ Ikọ Abasi enen̄ede enyene odudu. (Heb. 4:12) Idụhe akan̄kan̄ emi ọsọpde nte Ikọ Abasi, sia enye ekeme ndikịm nnyụn̄ mbahade ọkpọ ye ndia ke ndamban̄a usụn̄. Akpanikọ Bible esidụk owo ọkpọ, otụk enye ke idem, onyụn̄ anam enye ọfiọk utọ owo emi imọ inen̄erede idi. Enye ekeme ndikpụhọde owo ofụri ofụri.—Kot Colossae 3:10.

5. Didie ke Bible esin̄wam nnyịn, ndien nso idi ufọn?

⁵ Akan oro, ọniọn̄ emi odude ke Bible inyeneke mbiet! Bible owụt nte ẹkpedude uwem ke idiọk ererimbot emi. Ikọ Abasi owụt nnyịn ebiet emi ikpodụkde ye nte ikpasan̄ade. (Ps. 119:105) Ikọ Abasi esinen̄ede an̄wam nnyịn ke ini inyenede mfịna, onyụn̄ anam ifiọk orụk ufan oro ikpemekde, nte ikpọnọde idem inemesịt, orụk utom oro ikpanamde, nte ikpesịnede n̄kpọ, ye ntre ntre eken.  (Ps. 37:25; N̄ke 13:20; John 15:14; 1 Tim. 2:9) Ndidu uwem nte Bible etemede anam ikeme nditie ke emem ye mme owo. (Matt. 7:12; Phil. 2:3, 4) Edieke iyakde Ikọ Abasi ada nnyịn usụn̄, iyekere iban̄a nte se ibierede ndinam idahaemi editụkde nnyịn ke ini iso. (1 Tim. 6:9) Bible etịn̄ n̄ko aban̄a se Abasi aduakde ndinam ke ini iso, ndien emi anam idu uwem ekekem ye uduak Abasi emi. (Matt. 6:33; 1 John 2:17, 18) Uwem nnyịn eyenen̄ede enyene se ọwọrọde edieke inamde se Bible ọdọhọde.

6. Bible enyene odudu adan̄a didie?

⁶ Kere n̄ko ban̄a utọ okopodudu n̄kpọekọn̄ eke spirit emi Bible edide. Paul okokot enye “akan̄kan̄ eke spirit.” (Kot Ephesus 6:12, 17.) Enye ekeme ndinam mme owo ẹwọrọ ke ufụn Satan, edieke ẹdade enye ẹkpep mmọ n̄kpọ edifọn edifọn. Akan̄kan̄ enye emi esikam anyanyan̄a owo, iwotke-wot. Mmọdo, akpana ikama enye ye usọ.

Tịm Siak Ikọ Akpanikọ

7. Ntak emi edide akpan n̄kpọ nditịm mfiọk nte ẹkpekamade “akan̄kan̄ eke spirit”?

⁷ Owoekọn̄ edikeme ndikama akan̄kan̄ esie n̄wana ekọn̄ edifọn edifọn edieke edide enye ama ekpekpep ndinam oro. Ntre ke edi ye nte ikamade “akan̄kan̄ eke spirit” in̄wana ekọn̄ eke spirit. Paul ekewet ete: “Sịn ofụri ukeme fo ndiwụt Abasi idemfo ete idi owo emi ẹnyịmede, anamutom emi mînyeneke n̄kpọ eke anamde enye okop bụt, etịmde asiak ikọ akpanikọ.”—2 Tim. 2:15.

8, 9. Nso ke ikpanam man ifiọk se ikọ itie N̄wed Abasi ọwọrọde? Nọ uwụtn̄kpọ.

⁸ Nso idin̄wam nnyịn ‘itịm isiak ikọ akpanikọ’ ke an̄wautom? Mbemiso ikemede ndinam Bible etịm an̄wan̄a owo, ana enye etịm an̄wan̄a nnyịn kan̄a. Ọwọrọ ke ana itịn̄ enyịn idụn̄ọde ifiọk se ikanamde ẹwet itien̄wed oro. Oro edi, ndibem iso n̄kot mme ufan̄ikọ oro ẹdude mbemiso enye oro iyomde ndikot, nnyụn̄ n̄kot mmọ oro ẹtienede enye.

⁹ Ih, mbemiso itịmde ifiọk se itie N̄wed Abasi ọwọrọde, ana ikot kan̄a mme ufan̄ikọ oro ẹdude ke enyọn̄ ye ke isọn̄. Se Paul etịn̄de ke Galatia 5:13 owụt ke oyom inam emi. Enye ekewet ete: “Nditọete, ke akpanikọ, ẹkekot mbufo ẹte ẹdinyene ifụre; edi ẹkûda ifụre emi nte n̄kpọ ndida nnam se idọn̄de obụkidem, edi ẹdụk ufụn ẹnọ kiet eken ke ima.” Nso orụk ifụre ke Paul eketịn̄ aban̄a mi? Ndi enye eketịn̄ aban̄a ndiwọrọ ke ufụn idiọkn̄kpọ ye n̄kpa, m̀mê eke nsunsu ukpepn̄kpọ, m̀mê ufụn n̄kpọ en̄wen? Edieke okotde mme ufan̄ikọ eken ke n̄kanade oro, oyokụt ke Paul eketịn̄ aban̄a ndiwọrọ ke ufụn isụn̄i Ibet Moses. (Gal. 3:13, 19-24; 4:1-5) Enye eketịn̄ aban̄a ifụre oro mme Christian ẹnyenede. Mbon oro ẹkemade ifụre emi—kpa mmọ oro ẹkesiban̄ade kiet eken idiọk  iban̄a ẹnyụn̄ ẹtọhọ ye kiet eken—ẹma ẹnyịme ndikabade ndụk ufụn nnọ kiet eken ke ima.—Gal. 5:15.

10. Nso ikeme ndin̄wam nnyịn inen̄ede ifiọk se itie N̄wed Abasi ọwọrọde, ndien m̀mọ̀n̄ ke ikeme ndikụt emi?

¹⁰ N̄kpọ en̄wen oro ekemede ndin̄wam nnyịn inen̄ede ifiọk se itie N̄wed Abasi ọwọrọde edi ndifiọk andikewet, ini emi ẹkewetde, se iketịbede ini oro, se ikanamde ẹwet, ye nte mme owo ẹkesidude uwem ẹnyụn̄ ẹkpono Abasi ini oro. *

11. Nso ke nnyịn mîkpanamke ke ini inamde Bible an̄wan̄a mme owo?

¹¹ ‘Nditịm nsiak ikọ akpanikọ’ esịne n̄kpọ akan ndinam se Bible etịn̄de enen̄ede an̄wan̄a owo. Ikpanaha ida Bible isịn mme owo ndịk ke idem. Kpa ye oro isidade Bible iwụt ke se itịn̄de edi akpanikọ nte Jesus akanamde ke ini Devil okodomode enye, Bible idịghe ikpa oro ikpadade imia mme owo ke an̄wautom. (Deut. 6:16; 8:3; 10:20; Matt. 4:4, 7, 10) Oyom inam nte apostle Peter ọkọdọhọde mi ete: “Ẹnam Christ asana ke esịt mbufo nte Ọbọn̄, ẹdu ke mben̄eidem kpukpru ini ndiwụt owo ekededi eke oyomde ntak idotenyịn emi mbufo ẹnyenede, edi ẹnam ntre ke ifụre ifụre ido ye ntotụn̄ọ ukpono.”—1 Pet. 3:15.

12, 13. Nso idi “mme n̄kpọ eke ẹsọn̄ọde ẹdọn̄ n̄kam,” emi akpanikọ oro odude ke Bible ekemede ndiwụri? Nọ uwụtn̄kpọ.

¹² Nso ke akpanikọ oro odude ke Bible ekeme ndinam edieke idade enye ikpep mme owo ke nnennen usụn̄? (Kot 2 Corinth 10:4, 5.) Enye ekeme ndiwụri “mme n̄kpọ eke ẹsọn̄ọde ẹdọn̄ n̄kam,” oro edi, anam ẹdiọn̄ọ kpukpru nsunsu ukpepn̄kpọ, ndiọi edinam, ye ikpîkpu ekikere emi mme owo ẹtịbede edi. Imekeme ndida Bible n̄wụri kpukpru ekikere emi “ẹmenerede ke enyọn̄ ndin̄wana ye ifiọk Abasi.” Imonyụn̄ ikeme ndida enye nnam mme owo ẹfiọk akpanikọ.

¹³ Ke uwụtn̄kpọ, mma kiet ke India, emi edide isua 93, ekekpep toto ke edet iba nte ke owo ekeme ndifiak mmana. Ke ini eyen esie emi odude ke esenidụt ọkọtọn̄ọde ndida leta n̄kpep enye Bible, enye ama enen̄ede ama se enye ekekpepde aban̄a Jehovah ye se Enye ọn̄wọn̄ọde ndinam. Edi mma emi ama enen̄ede enịm ke owo esifiak amana. Ntre ke ini eyen esie ekewetde enye aban̄a se isitịbede ke ini owo akpade, enye ama enen̄ede afan̄a. Enye ọkọdọhọ ete: “Ikọ Bible mbufo enye emi ikpọn̄ in̄wan̄ake mi. Kpukpru ufọkabasi ẹdọhọ ke ukpọn̄ isikpaha. Se ndiọn̄ọde okịm edi nte ke owo ama akpa, ke odu n̄kpọ emi owo mîkwe, emi esiwọrọde enye ke idem onyụn̄ afiak edimana utịm ike 8,400,000. Ntak ọkpọdọhọde ke emi  idịghe akpanikọ? Ndi ọwọrọ ke kpukpru ufọkabasi emi ẹsu nsu?” Ndi “akan̄kan̄ eke spirit” ekeme ndiwụri n̄kpọ eke ọsọn̄ọde ọdọn̄ n̄kam ntre? Ke eyen esie ama akafiak eneme ndusụk itie Bible ye enye, mma emi ama ewet ke urua ifan̄ ama ekebe ete: “Ọtọn̄ọ ndin̄wan̄a mi se isitịbede ke ini owo akpade. Esịt enen̄ede enem mi ndifiọk ke iyafiak ikụt mbon nnyịn oro ẹkekpan̄ade ke ini ẹdinamde mme akpan̄kpa ẹset. Oh, etie mi nte Obio Ubọn̄ Abasi ekpedi idahaoro.”

Da Enye Kpek Mme Owo

14. Ndikpek owo ọwọrọ nso?

¹⁴ Ndida Bible n̄kwọrọ ikọ uforo uforo idịghe ndidiọn̄ọ ndikot itie N̄wed Abasi ke ibuot. Paul ekesikpekpek mme owo, se ikpesinyụn̄ inamde edi oro n̄ko. (Kot Utom 19:8, 9; 28:23.) Ndikpek owo ọwọrọ ndinam enye anam se ọdọhọde. Owo emi ẹkpekde esinen̄ede enịm ke se ẹdọhọde inam edi akpanikọ. Ke ini idade Bible ikpek owo, nnyịn inam enye enịm ke se Bible ekpepde edi akpanikọ. Man inam emi, ana inam owo emi ikpekde okụt ke se itịn̄de edi akpanikọ. Yak ise nte ikemede ndinam emi.

15. Didie ke ekeme ndikot Bible ke usụn̄ oro anamde enyeneufọk okpono enye?

¹⁵ Kot Bible nọ owo ke usụn̄ oro anamde enye okpono Bible. Ke ini oyomde ndikot Bible, nam enyeneufọk ọfiọk nte Abasi ekerede aban̄a se oyomde ndineme. Ke ama okobụp eyenufọk mbụme yak enye ọbọrọ, emekeme ndidọhọ ete, ‘Yak ise se Abasi etịn̄de aban̄a n̄kpọ emi.’ Mîdịghe, emekeme ndibụp ete: ‘Nso ke Abasi ekere aban̄a emi?’ Nditịn̄ ikọ ntem anam enyeneufọk ọfiọk ke Bible edi Ikọ Abasi onyụn̄ anam enye enen̄ede okpono enye. Enen̄ede oyom inam emi akpan akpan ke ini ikwọrọde ikọ inọ owo emi enịmde Abasi ke akpanikọ, edi itịmke idiọn̄ọ se Bible ekpepde.—Ps. 19:7-10.

16. Nso ke akpanam man se N̄wed Abasi etịn̄de etịm an̄wan̄a owo?

¹⁶ Kûkokot kpọt, nam an̄wan̄a. Paul ama esiwak ndinam se enye etịn̄de an̄wan̄a onyụn̄ ada N̄wed Abasi ọsọn̄ọ se enye ekpepde owo. (Utom 17:3) Ediwak n̄kpọ ẹsidọn̄ọ ke ufan̄ikọ kiet, ntre, sio se inyenede n̄kpọ ndinam ye se etịn̄de da neme nneme fo. Usụn̄ kiet emi ekemede ndinam emi edi ndifiak n̄kot ikọ oro akanamde okot itien̄wed oro, mîdịghe, bụp enyeneufọk mbụme oro edinamde enye okụt se oyomde enye okụt. Ekem, nam itien̄wed oro an̄wan̄a. Ke ama akanam emi, nam enye okụt nte enye akpadade itie N̄wed Abasi oro odu uwem.

17. Didie ke akpada N̄wed Abasi ọkọk ibuot ke usụn̄ oro anamde owo enịm se enye etịn̄de?

¹⁷ Da N̄wed Abasi kọk ibuot ke usụn̄ oro anamde owo enịm se enye etịn̄de. Paul ama esiwak ndida mbukpek n̄kọk ibuot ke usụn̄ oro anamde mme owo ẹnịm se enye okotde ọnọ mmọ ke N̄wed Abasi. (Utom 17:2, 4) Akpana idomo ndinam se itịn̄de odụk owo ọkpọ nte Paul ekesinamde. Bụp mbụme oro owụtde ke emekere aban̄a enyeneufọk, mbụme emi edinamde enye etịn̄ se isịnede enye ke esịt. (N̄ke 20:5) Kûsesuene enye. Tịn̄ ikọ ke usụn̄ oro an̄wan̄ade owo, onyụn̄ esịnede ifiọk. Nọ mme uwụtn̄kpọ oro ẹnamde owo enịm se etịn̄de. Ikọ fo ekpenyene  ndito Bible. Ndikot itien̄wed kiet kpọt nnyụn̄ nnam enye enen̄ede an̄wan̄a ọfọn akan ndikot iba m̀mê ita usọp usọp mbe ntre. Emi ayanam ekeme ndida mbukpek n̄kpep owo n̄kpọ. (N̄ke 16:23) Ndusụk ini, ekeme ndiyom anam ndụn̄ọde man enen̄ede owụt ke se etịn̄de edi akpanikọ. N̄wan isua 93 oro iketịn̄de iban̄a ke enyọn̄ emi ama oyom ndifiọk ntak emi ukpepn̄kpọ ukpọn̄ ikpaha ke nsinsi edide ọsọ ntre. Ndifiọk ebiet emi ukpepn̄kpọ oro ọkọtọn̄ọde ye nte enye akasan̄ade odụk ekese ido ukpono ke ererimbot ama anam enye enyịme se Bible ekpepde aban̄a ukpọn̄. *

Ka Iso Kama Akan̄kan̄ Emi ke Usọ

18, 19. Ntak emi ikpakade iso ikama “akan̄kan̄ eke spirit” ke usọ?

¹⁸ Bible ọdọhọ ke “idaha ererimbot emi ke okpụhọde,” ndien ndiọi owo ẹdọdiọn̄ ẹdiọk ẹkan nte ẹkediọkde. (1 Cor. 7:31; 2 Tim. 3:13) Mmọdo, enen̄ede oyom ika iso ida usọ ikama “akan̄kan̄ eke spirit, oro edi, ikọ Abasi,” iwụri “mme n̄kpọ eke ẹsọn̄ọde ẹdọn̄ n̄kam.”

¹⁹ Esịt enen̄ede enem nnyịn ndinyene Ikọ Abasi, kpa Bible, nda enye n̄wụri nsunsu ukpepn̄kpọ, nnyụn̄ nda n̄n̄wam mbon oro ẹnyenede eti esịt! Idụhe n̄kpọ eke enyenede odudu nte Ikọ Abasi. Mmọdo, ẹyak inen̄ede isịn idem ida usọ ikama “akan̄kan̄ eke spirit” emi nte ikwọrọde etop Obio Ubọn̄ emi Abasi ọdọn̄de nnyịn.

[Mme Ikọ Idakisọn̄]

Nso ke Afo Ekekpep?

• Ikọ Abasi enyene odudu adan̄a didie?

• Didie ke ikeme ‘nditịm nsiak ikọ akpanikọ’?

• Nso ke etop Bible ekeme ndinam ye “mme n̄kpọ eke ẹsọn̄ọde ẹdọn̄ n̄kam”?

• Didie ke ekeme ndinen̄ede nnyene mbukpek ke an̄wautom?

[Mme Mbụme Ukpepn̄kpọ]

[Ekebe/Ndise ke page 12]

Nte Akpadade N̄wed Abasi Ekpek Owo

▪ Nam mme owo ẹkpono Bible

▪ Nam enye an̄wan̄a

▪ Tịn̄ ikọ ke usụn̄ oro odụkde owo ọkpọ

[Ndise ke page 11]

Kpep ndikama “akan̄kan̄ eke spirit” uforo uforo