Di Disan̄a ke Mfọnn̄kan Usụn̄!
Di Disan̄a ke Mfọnn̄kan Usụn̄!
“Edieke nnyịn idude uwem m̀mê edieke nnyịn ikpade, nnyịn idi eke Jehovah.”—ROME 14:8.
1. Jesus ọkọdọhọ ke nso idi mfọnn̄kan usụn̄ emi owo okpodude uwem?
JEHOVAH oyom isan̄a ke mfọnn̄kan usụn̄. Mme owo ẹsan̄a mfịn ke nsio nsio usụn̄, edi usụn̄ kiet ọfọn akan. Idụhe se ifọnde nte ndinam se Ikọ Abasi etemede nnyụn̄ n̄kpebe Jesus Christ Eyen Abasi. Jesus ọkọdọhọ mme mbet esie ete ẹkpono Abasi ke spirit ye ke akpanikọ, onyụn̄ ọdọn̄ mmọ ẹkenam mme mbet. (Matt. 28:19, 20; John 4:24) Edieke inamde se Jesus ekekpepde, esịt ayadat Jehovah ndien enye ọyọdiọn̄ nnyịn.
2. Didie ke ediwak owo ẹkenam n̄kpọ ẹban̄a etop Obio Ubọn̄ ke eyo mme apostle, ndien ndidọhọ ke owo asan̄a ke “Usụn̄ Oro” ọkọwọrọ nso?
2 Ke ini “mbon oro ẹnyenede eti esịt ndinyene nsinsi uwem” ẹsibọde akpanikọ ẹnyụn̄ ẹna baptism, esinem nnyịn ndisịn udọn̄ nnọ mmọ nte ẹkûkpọn̄ usụn̄ emi, ke enye edi mfọnn̄kan usụn̄. (Utom 13:48) Ke eyo mme apostle, ata ediwak owo emi ẹtode nsio nsio idụt ẹma ẹbọ akpanikọ ẹnyụn̄ ẹna baptism ndiwụt ke imayak idem inọ Abasi ndinam uduak esie. (Utom 2:41) Mmọ ẹkesan̄a ke “Usụn̄ Oro.” (Utom 9:2; 19:23) Ama enen ndikot akpanikọ Usụn̄ koro mme anditiene Christ ẹkedu uwem ke usụn̄ oro owụtde ke mmọ ẹnen̄ede ẹnyene mbuọtidem ke Jesus Christ ẹnyụn̄ ẹkpebe enye.—1 Pet. 2:21.
3. Ntak emi mme asan̄autom Jehovah ẹsinade baptism, ndien owo ifan̄ ẹnam emi ke isua duop emi ẹkebede?
3 Ẹnen̄ede ẹsịn ifịk ẹnam mbet ke akpatre usen emi, ndien ẹnam utom emi ẹbe idụt 230 idahaemi. Ke isua duop emi ẹkebede, se iwakde ibe owo 2,700,000 ẹma ẹbiere ndinam n̄kpọ Jehovah, ẹnyụn̄ ẹna baptism ndiwụt ke imayak idem inọ enye. Emi owụt ke se iwakde ibe owo 5,000 ẹsina baptism kpukpru urua! Mmọ ẹnam emi sia mmọ ẹnen̄ede ẹma Abasi, ẹfiọk se Bible ekpepde, ẹnyụn̄ ẹnịm se mmimọ ikpepde. Baptism edi ata akpan n̄kpọ ke uwem nnyịn, koro owo ọtọn̄ọ ndidi ufan Jehovah ke enye ama akana baptism. N̄ko, ke ini owo anade baptism, enye owụt ke imọbuọt idem ke Jehovah ayan̄wam imọ inam akpanikọ inọ enye ukem nte enye akan̄wamde mme asan̄autom esie ke eset.—Isa. 30:21.
Ntak Emi Anade Baptism?
4, 5. Nso idi ufọn una baptism?
4 Ekeme ndidi emekpep Bible, amanam ukpụhọde ke uwem fo, ndien edi asuanetop oro mînaha baptism. Mbọk amanam etieti. Edi ndi amayak idem fo ọnọ Abasi, oro edi, ndibọn̄ san̄asan̄a akam ndọhọ Abasi ke imayak idem inọ enye? N̄ko, ndi amaduak ndina baptism? Anaedi emekpep ke Bible ke akpana ada ofụri uwem fo anam n̄kpọ Jehovah, idịghe ndisụk nnam se inemde fi m̀mê nditak ke un̄wana. (Kot Psalm 148:11-13; Luke 12:15) Edi nso idedi ufọn baptism emi?
5 Uwem fo eyenen̄ede enyene se ọwọrọde edieke ayakde idem fo ọnọ Abasi. Eyenen̄ede okop inemesịt ke ntak emi anamde n̄kpọ Abasi. (Rome 12:1, 2) Edisana spirit Jehovah ayanam etie emem emem onyụn̄ enyene mbuọtidem ke Abasi. (Gal. 5:22, 23) Abasi ọyọbọrọ akam fo onyụn̄ an̄wam fi anam se imọ iyomde. Oyokop inem utom Abasi, onyụn̄ ọdọdiọn̄ enyene idotenyịn nsinsi uwem sia odude uwem nte Abasi oyomde. Ke adianade do, ndiyak idem nnọ Abasi nnyụn̄ nna baptism owụt ke emenen̄ede oyom ndidi kiet ke otu Mme Ntiense Jehovah.—Isa. 43:10-12.
6. Ndina baptism anam mme owo ẹfiọk nso ẹban̄a nnyịn?
6 Ke ini iyakde idem inọ Abasi inyụn̄ ina baptism, iwụt mme owo ke ididi inyene Jehovah. Apostle Paul ọkọdọhọ ete: “Baba owo nnyịn kiet idụhe uwem inọ idemesie ikpọn̄, inyụn̄ idụhe owo ndomokiet eke akpade ọnọ idemesie ikpọn̄; koro edieke nnyịn idude uwem, nnyịn idu inọ Jehovah, ndien edieke nnyịn ikpade, nnyịn ikpa inọ Jehovah. Ke ntre, edieke nnyịn idude uwem m̀mê edieke nnyịn ikpade, nnyịn idi eke Jehovah.” (Rome 14:7, 8) Abasi ndinọ nnyịn ifụre ndinam se imade owụt nte enye okponode nnyịn. Esịt esidat Jehovah ke ini ibierede ke idem nnyịn ndinam n̄kpọ esie ke ofụri esịt ke ntak emi imade enye. (N̄ke 27:11) Ke ini inade baptism, iwụt ke imayak idem inọ Abasi, ifiak inam mme owo ẹfiọk ke Jehovah akara nnyịn. Emi n̄ko owụt ke idọhọ ke enye ikpọn̄-ikpọn̄ odot ndikara ekondo. (Utom 5:29, 32) Ndien emi anam Jehovah odu ye nnyịn. (Kot Psalm 118:6.) Baptism anam inyene ekese edidiọn̄ eke spirit idahaemi, iyonyụn̄ ibọ ekese efen efen ke ini iso.
Baptism Anam Inyene Ndima Nditọete
7-9. (a) Nso ke Jesus ọkọn̄wọn̄ọ ọnọ mbon emi ẹkpọn̄de kpukpru n̄kpọ ẹtiene enye? (b) Didie ke se Jesus ọkọn̄wọn̄ọde ke Mark 10:29, 30 osu mfịn?
7 Apostle Peter ọkọdọhọ Jesus ete: “Sese! Nnyịn ima ikpọn̄ kpukpru n̄kpọ inyụn̄ itiene fi; nso ke nnyịn idinen̄ede inyene?” (Matt. 19:27) Peter okoyom ndifiọk nte uwem imọ ye eke mme mbet eken ẹditiede ke ini iso. Mmọ ẹma ẹyak ediwak n̄kpọ ẹtak mmimọ man ẹkeme ndikwọrọ etop Obio Ubọn̄. (Matt. 4:18-22) Nso ke Jesus ọkọn̄wọn̄ọ ọnọ mmọ?
8 Mark ọdọhọ ke Jesus ọkọdọhọ ke mme mbet imọ ẹyenyene nditọete eke spirit ke ofụri ererimbot. Jesus ọkọdọhọ ete: “Idụhe baba owo kiet emi ọkọkpọn̄de ufọk m̀mê nditọeka iren m̀mê nditọeka iban m̀mê eka m̀mê ete m̀mê nditọ m̀mê in̄wan̄ ke ntak mi ye ke ntak eti mbụk emi mîdibọhọ n̄kpọ utịm ikikie idahaemi ke ini emi, mme ufọk ye nditọeka iren ye nditọeka iban ye eka ye nditọ ye in̄wan̄, ọkọrọ ye ukọbọ, ye nsinsi uwem ke editịm n̄kpọ emi edidide.” (Mark 10:29, 30) Mme Christian akpa isua ikie nte Lydia, Aquila, Priscilla, ye Gaius, ẹma ẹsinọ nditọete mmọ ufọk ẹdụn̄ ẹnyụn̄ ẹkabade ẹtie nte “nditọeka [mmọ] iren ye nditọeka iban ye eka,” kpa nte Jesus ọkọn̄wọn̄ọde.—Utom 16:14, 15; 18:2-4; 3 John 1, 5-8.
9 Ikọ Jesus emi enen̄ede osu idahaemi. “In̄wan̄” emi mme mbet esie ẹkpọn̄de ada aban̄a ubọkutom emi ediwak nditọete nnyịn ẹkpọn̄de man ẹka ẹkenam utom isụn̄utom, utom Bethel, ndinam utom nte mme asan̄autom ofụri ererimbot, ye ntre ntre, ke nsio nsio idụt. Ediwak nditọete nnyịn iren ye iban ẹkpọn̄ ufọk mmọ ẹkedu mmemmem uwem, ndien esinem nnyịn ndikop nte Jehovah esede aban̄a mmọ ye nte utom Abasi anamde mmọ ẹkop inemesịt. (Utom 20:35) Ke adianade do, kpukpru mme asan̄autom Jehovah oro ẹma ẹkena baptism ke ofụri ererimbot ke ẹdia ufọn ẹto “ndibem iso nyom obio ubọn̄ [Abasi] ye edinen ido esie.”—Matt. 6:33.
Ẹdu ke “Ndịbe Ebiet”
10, 11. Nso idi “ndịbe ebiet Ata Edikon̄,” ndien nso ke ikpanam man ikeme ndidu do?
10 Ndiyak idem nnọ Abasi nnyụn̄ nna baptism ọnọ ata akamba ufọn en̄wen, oro edi, ifet edidu ke “ndịbe ebiet Ata Edikon̄.” (Kot Psalm 91:1.) Ebiet emi edi ndamban̄a itie udịbe, emi Abasi edịpde ikọt esie ke n̄kan̄ eke spirit. Enye edi “ndịbe ebiet,” koro mbon emi mîfiọkke Abasi, mînyụn̄ ibuọtke idem ye enye ifiọkke ke utọ ebiet oro do. Edieke inamde se ikọn̄wọn̄ọde ke ini ikayakde idem inọ Jehovah, inyụn̄ inen̄erede ibuọt idem ye enye, ọwọrọ ke idọhọ enye ite: ‘Afo edi ebiet ubọhọ mi, ye ọkpọsọn̄ ebiet mi; Abasi mi, nyọbuọt idem mi ye afo.’ (Ps. 91:2) Ih, Jehovah edi ebietidụn̄ nnyịn. (Ps. 91:10) Mbọk m̀mê enyene ebiet en̄wen emi ọfọnde akan emi?
11 Ndidu ke “ndịbe ebiet” Jehovah ọwọrọ ke ididi ufan esie. Nso ifet ke oro edi ntem! Itọn̄ọ ndidi ufan esie ke ndondo oro iyakde idem inọ enye inyụn̄ ina baptism. Ndien edieke iyomde ndinen̄ede nsan̄a n̄kpere enye, ana ika iso ikpep Bible, ibọn̄ akam ke ofụri esịt inọ enye, inyụn̄ ikop item esie. (Jas. 4:8) Jesus ekpere Jehovah akan, esinyụn̄ ọbuọt idem ye enye kpukpru ini. (John 8:29) Ntre, nnyịn ikpakam itiene ibuọt idem ye Jehovah inyụn̄ inịm ke enye iditreke ndin̄wam nnyịn inam se ikọn̄wọn̄ọde ke ini ikayakde idem inọ enye. (Eccl. 5:4) Mme n̄kpọ eke spirit oro Abasi ọnọde nnyịn owụt ke enye enen̄ede ama nnyịn onyụn̄ oyom ituak ibuot inọ enye.
Da Paradise Eke Spirit Nnyịn ke Ọsọn̄urua N̄kpọ
12, 13. (a) Nso idi paradise eke spirit? (b) Didie ke ikeme ndin̄wam mbufa owo?
12 Ndiyak idem nnọ Abasi nnyụn̄ nna baptism anam ikeme ndidu ke paradise eke spirit. Paradise emi edi san̄asan̄a idaha eke spirit emi mbon oro ẹdude ke emem ye Jehovah Abasi ye ekemmọ nditọete, ẹnyenede ke ofụri ererimbot. (Ps. 29:11; Isa. 54:13) Idụhe n̄kpọ ndomokiet ke ererimbot emi ebietde paradise eke spirit emi. Ndien isinen̄ede ikụt emi ke mbono ofụri ererimbot, ke ini nditọete nnyịn emi ẹtode nsio nsio idụt, usem, ye ekpụk, ẹdide ẹdidu ọtọkiet ke emem, ẹnyụn̄ ẹma kiet eken.
13 Paradise eke spirit nnyịn enen̄ede okpụhọde ye idiọk ererimbot emi. (Kot Isaiah 65:13, 14.) Ndikwọrọ eti mbụk Obio Ubọn̄ Abasi ọnọ nnyịn ifet ndikot mbon en̄wen ẹtiene ẹdidụk paradise eke spirit emi. Esinem nnyịn n̄ko ndin̄wam mbufa owo, nnyụn̄ n̄kpep mmọ nte ẹkwọrọde ikọ. Mbiowo ẹkeme ndidọhọ in̄wam mbufa owo kpa nte Aquila ye Priscilla ‘ẹkenamde usụn̄ Abasi enen̄ede an̄wan̄a Apollos.’—Utom 18:24-26.
Ka Iso Kpep N̄kpọ To Jesus
14, 15. Ntak emi ikpakade iso ikpep n̄kpọ ito Jesus?
14 Imenyene nti ntak ndika iso n̄kpep n̄kpọ nto Jesus. Enye ama anam utom ye Ete esie ke anana-ibat isua mbemiso ekedide isọn̄. (N̄ke 8:22, 30) Enye ama ọfiọk ke ndinam n̄kpọ Abasi nnyụn̄ ntie ntiense mban̄a akpanikọ edi mfọnn̄kan n̄kpọ emi ikpanamde. (John 18:37) Enye ama ọfiọk n̄ko nte ke edieke imọ mîkpakanamke n̄kpọ Abasi, ke oro ọkpọwọrọ ke imọ itịmke ikere n̄kpọ, ke inyụn̄ ikere iban̄a idem imọ kpọt. N̄ko, enye ama ọfiọk ke iyosobo ikpọ idomo, ke ẹyenyụn̄ ẹwot imọ. (Matt. 20:18, 19; Heb. 4:15) Jesus enịm uwụtn̄kpọ ọnọ nnyịn onyụn̄ ekpep nnyịn ndisọn̄ọ nda.
15 Ke Jesus ama akana baptism ama, Satan ama odomo ndinam enye ọkpọn̄ mfọnn̄kan usụn̄, edi ikekemeke. (Matt. 4:1-11) Emi owụt ke imekeme ndisụk nsọn̄ọ nda nnam n̄kpọ Abasi inamke n̄kpọ m̀mê nso idomo ke Satan odomo nnyịn. Enye esinen̄ede ama ndidomo mbon emi ẹsụk ẹben̄ede idem ndina baptism ye mbon emi ẹnade baptism obufa. (1 Pet. 5:8) Mbonufọk nnyịn ẹkeme ndikọbọ nnyịn sia mme owo ẹdọhọde mmọ ke Mme Ntiense Jehovah idịghe nti owo. Edi utọ ukọbọ emi esinọ nnyịn ifet ndidu uwem oro owụtde ke nnyịn idịghe se mme owo ẹtịn̄de, ke idi nti Christian. Ikeme ndinam emi edieke idade mbufiọk ye ata edu ukpono ibọrọ owo mbụme inyụn̄ inọ ikọ ntiense. (1 Pet. 3:15) Ndien emi ekeme ndinen̄ede nnyene ufọn nnọ mbon emi ẹkpan̄de utọn̄ ẹnọ nnyịn.—1 Tim. 4:16.
Kûkpọn̄ Mfọnn̄kan Usụn̄ Emi!
16, 17. (a) Siak akpan n̄kpọ ita emi Deuteronomy 30:19, 20 ọdọhọde inam man idu uwem. (b) Didie ke Jesus, John, ye Paul ẹkesọn̄ọ se Moses eketịn̄de?
16 Ke n̄kpọ nte isua 1,500 mbemiso Jesus ekedide isọn̄, Moses ama ọdọhọ nditọ Israel ẹmek mfọnn̄kan usụn̄. Moses ọkọdọhọ mmọ ete: “Mmowụk enyọn̄ ye isọn̄, nte ẹdi ntiense ẹban̄a mbufo mfịn emi; mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre enye.” (Deut. 30:19, 20) Imọfiọk ke nditọ Israel ikokopke item Abasi emi, edi enye ke oyoyom nnyịn inam akpan n̄kpọ ita emi Moses akasiakde ke ibet emi, man idu uwem. Jesus ye mbon en̄wen ẹma ẹdọhọ n̄ko ke Abasi ke oyoyom inam mme n̄kpọ emi.
17 Akpa, ‘ana ima Jehovah Abasi nnyịn.’ Iwụt ke imama Abasi ke ini itienede ndinen usụn̄ esie. (Matt. 22:37) Ọyọhọ iba, ‘ana ikop uyo Jehovah’ ke ndikpep Bible nnyụn̄ nnịm mbet esie. (1 John 5:3) Ọwọrọ ke ana isidụk mme mbono esop kpukpru ini sia do ke ẹsikpep Ikọ Abasi. (Heb. 10:23-25) Ọyọhọ ita, ‘ana isọn̄ọ iyịre ye Jehovah.’ M̀mê nso ikpetịbe, ẹyak ika iso ibuọt idem ye Abasi inyụn̄ itiene Eyen esie kpukpru ini.—2 Cor. 4:16-18.
18. (a) Nso ke Enyọn̄-Ukpeme eketịn̄ aban̄a akpanikọ ko ke 1914? (b) Didie ke ikpada akpanikọ oro ẹnamde an̄wan̄a nnyịn?
18 Ndinam se Bible ekpepde asan̄a ye akwa edidiọn̄. Enyọn̄-Ukpeme emi ẹkemịn̄de ke 1914 ama ọsọn̄ọ emi. Enye ọkọdọhọ ete: “Nte nnyịn idịghe mbon emi Abasi ọdiọn̄de ye mbon emi ẹkopde inemesịt? Ndi Abasi nnyịn idịghe Abasi akpanikọ? Edieke owo ndomokiet okụtde ebiet en̄wen emi ọfọnde akan esop Abasi, yak enye aka. Ndien imekere ke enye iditreke ndidi ndinam nnyịn ifiọk n̄ko. Nnyịn ifiọkke n̄kpọ ndomokiet emi ọfọnde m̀mê akade-ka nditie nte Ikọ Abasi. . . . Inua inyụn̄ ikemeke nditịn̄ orụk emem, idatesịt, ye edidiọn̄ emi ifiọk Abasi anamde inyene. Esinen̄ede enem nnyịn ndikpep n̄kpọ mban̄a Ọniọn̄, Edinen Ikpe, Odudu, ye Ima Abasi. Inyeneke se inanade ke n̄kan̄ eke spirit. N̄kukụre se ikpanamde idahaemi ekpedi ndidọdiọn̄ n̄kọ ifiọk Abasi.” (Enyọn̄-Ukpeme [Ikọmbakara] eke December 15, 1914, page 377-378) Ke isụk idadara akpanikọ oro ẹnamde an̄wan̄a nnyịn tutu emi. Ke akpanikọ, imenen̄ede inyene eti ntak idahaemi ndikop inemesịt sia “[isan̄ade] ke un̄wana Jehovah.”—Isa. 2:5; Ps. 43:3; N̄ke 4:18.
19. Ntak emi mbon emi ẹdotde ndina baptism ẹkpenamde oro usọp usọp?
19 Edieke oyomde ‘ndisan̄a ke un̄wana Jehovah,’ edi uyakke kan̄a idem unọ Abasi unyụn̄ una baptism, sọsọp nam oro. Nam se ededi emi Bible ọdọhọde mbon emi ẹyomde ndina baptism ẹnam, koro emi edi mfọnn̄kan usụn̄ ndiwụt ke imama se Abasi ye Christ ẹnamde ẹnọ nnyịn. Nọ Jehovah ata ọsọn̄urua n̄kpọ emi enyenede, oro edi, uwem fo. Wụt ke imama ndinam uduak Abasi ke nditiene Eyen esie. (2 Cor. 5:14, 15) Ke akpanikọ, emi edi mfọnn̄kan usụn̄ oro owo akpasan̄ade!
Didie ke Afo Ọkpọbọrọ?
• Nso ke baptism nnyịn owụt?
• Nso edidiọn̄ ke idinyene edieke iyakde idem inọ Abasi inyụn̄ ina baptism?
• Ntak emi enen̄erede oyom ikpep n̄kpọ ito Jesus?
• Nso idin̄wam nnyịn ika iso isan̄a ke mfọnn̄kan usụn̄?
[Mme Mbụme Ukpepn̄kpọ]
[Ndise ke page 25]
Ndina baptism owụt ke emebiere ndisan̄a ke mfọnn̄kan usụn̄
[Ndise ke page 26]
Ndi afo do ke “ndịbe ebiet Ata Edikon̄”?