Kûyak Satan Abian̄a Fi

RABSHAKEH, isụn̄utom Edidem Sennacherib emi akakarade Assyria, ọkọdọhọ mbon emi ẹkedụn̄ọde ke Jerusalem ke ini mbonekọn̄ Assyria ẹkekande Judah ẹkụk ete: ‘Ẹkûyak ẹbian̄a mbufo. Ẹkûkere ke Abasi mbufo ayanyan̄a mbufo. Mbufo ẹnam emem ye ami mbak ẹdikpan̄a!’ Enye okoyom idem emem mbon Jerusalem man mmọ ẹkọn̄ọ mfan̄.—2 Ndi. 18:28-35.

Mbon Assyria ẹkedi ata mbon ibak. Mmọ ẹma ẹsiwụt mme asua nte isibakde ibak ye mbon ntan̄mfep man idem enyek mmọ. Ewetmbụk eset emi ekerede Philip Taylor ọkọdọhọ ke mmọ ẹkesida “abian̄a abian̄a etop ẹsịn mbon emi mmọ ẹkande ndịk ke idem, ẹnyụn̄ ẹda mme ndise oro mîdịghe akpanikọ ẹnam idem emem mme asua.” Abian̄a edi ata idiọk n̄kpọekọn̄. Ewetmbụk oro ọdọhọ ke “enye ekeme ndinam esịt eyemede owo.”

Ata mme Christian ‘in̄wanake ye obụk ye iyịp, edi ẹn̄wana ye ndiọi spirit,’ oro edi, ye mme angel emi ẹkesọn̄de ibuot ye Abasi. (Eph. 6:12) Ata akpan owo en̄wan nnyịn edi Satan kpa Devil. Enye n̄ko esida abian̄a abian̄a etop esịn mme owo ndịk ke idem.

Satan ọkọdọhọ ke imekeme ndinam kpukpru nnyịn itre ndinam n̄kpọ Abasi. Enye ọkọdọhọ Jehovah ke ini Job okodude uwem nte ke “kpukpru se owo enyenede ke owo edinọ ke ibuot uwem esie,” oro edi, ke edieke owo enen̄erede okụt ukụt, ke enye iditreke ndikpọn̄ Abasi. (Job 2:4) Ndi enye eketịn̄ akpanikọ? Ndi odu idomo oro nnyịn mîkemeke ndiyọ, emi ediyomde ibiat ibet Abasi man idu uwem? Se Satan oyomde nnyịn ikere edi oro. Ntak edi oro enye esinamde se enye ekemede-keme man anam nnyịn ikere ntre. Ẹyak ineme nte enye esinamde emi ye nte ikemede ndikpeme mbak enye idibian̄a nnyịn.

Mmọ “Emi Ẹdorode ke Ntan”

Satan ama ada Eliphaz, kiet ke otu mme ufan Job ita anam etie nte ke owo ikemeke ndika iso nnam n̄kpọ Abasi ke ini osobode afanikọn̄. Eliphaz ọkọdọhọ Job ke mme owo ‘ẹdụn̄ọ ufọk mbat, ẹdoro ke ntan! Ẹnuak mmọ kpa nte ọfọn̄ekpo! Ẹtetịm mmọ, ọtọn̄ọde ke usenubọk tutu ke mbubreyo: mmọ ẹtak ke nsinsi, owo baba kiet inyụn̄ ikereke.’—Job 4:19, 20.

Ebiet en̄wen ke Bible ọdọhọ ke owo etie nte “eso mbat,” m̀mê ọtọ-akpa. (2 Cor. 4:7) Kpukpru nnyịn imenyene mmeme sia idide mme anana-mfọnmma owo. (Rome 5:12) Nnyịn inyụn̄ ikemeke ndikan Satan ke odudu idem nnyịn. Edi Jehovah esin̄wam nnyịn mme Christian. Okposụkedi emi nnyịn mîfọnke ima, Abasi abat nnyịn nte ọsọn̄urua n̄kpọuto. (Isa. 43:4) N̄ko-n̄ko, enye esinọ mbon oro ẹben̄ede enye edisana spirit esie. (Luke 11:13) Spirit emi ekeme ndinọ nnyịn “odudu eke ebede ukeme owo,” anamde ikeme ndiyọ afanikọn̄ ekededi oro Satan anamde esịm nnyịn. (2 Cor. 4:7; Phil. 4:13) Edieke ‘isọn̄ọde ida ke mbuọtidem’ in̄wana ye Satan, Abasi ayanam isọn̄ọ ida inyụn̄ ikop idem. (1 Pet. 5:8-10) Mmọdo, ikpanaha ifehe Satan kpa Devil.

 Owo Emi “Ọn̄wọn̄de Idiọk Ido nte Mmọn̄”

Ke Eliphaz ama okobụp Job ete: “Owo edi nso eke enye akpasanade? Owo eke n̄wan amande onyụn̄ edi nso eke enye ekpenende?” Enye ama adian do ete: “Sese, [Abasi] ibuọtke idem esie ye edisana ikọt esiemmọ, mme heaven inyụn̄ isanake ke enyịn esiemmọ: N̄wan̄wa ediso se idehede inyụn̄ ibiarade, kpa owo emi ọn̄wọn̄de idiọk ido nte mmọn̄!” (Job 15:14-16) Eliphaz ọkọdọhọ Job ke idụhe owo eke ọfọnde ke enyịn̄ Jehovah. Satan n̄ko oyom ikere ke nnyịn ikemeke ndinem Abasi esịt. Enye oyom esịt amia nnyịn ufen kpukpru ini aban̄a idiọkn̄kpọ oro ima ikakabade esịt. Oyom ikere ke Abasi idifenke nnyịn tutu amama, ye nte ke se Jehovah oyomde inam ọsọn̄ akaha. Satan oyom nnyịn ikere ke Jehovah isituaha owo mbọm, ifenke inọ owo, inyụn̄ idọn̄ke enyịn ke se itịbede inọ owo.

Imọfiọk ke kpukpru owo ẹma “ẹnam idiọkn̄kpọ ẹnyụn̄ ẹtaba ubọn̄ Abasi.” Ntre, idụhe owo nnyịn ndomokiet oro ekemede ndinam kpukpru se Jehovah oyomde nnennen nnennen. (Rome 3:23; 7:21-23) Edi oro iwọrọke ke nnyịn inyeneke ufọn ke enyịn esie. Jehovah ọfiọk ke “akani urụkikọt, enye emi ẹkotde Devil ye Satan,” esida unana mfọnmma nnyịn oyom nnyịn ikọ. (Edi. 12:9, 10) Abasi ọfiọk ke “nnyịn idi ntan,” ntre, ‘enye isitọhọke ye nnyịn ke nsinsi.’—Ps. 103:8, 9, 14.

Edieke ituade n̄kpọfiọk inyụn̄ ikabarede esịt itre ndinam idiọk, “enye ayawak ndidahado.” (Isa. 55:7; Ps. 51:17) Bible ọdọhọ ke ọkpọkọm idiọk ido nnyịn “ẹkpetie nte iduot, ẹyefia nte snow.” (Isa. 1:18) Mmọdọ, ẹyak ikûkpa mba ke ndinam uduak Abasi.

Unana mfọnmma iyakke nnyịn inen ke iso Abasi. Adam ye Eve ẹma ẹtaba mfọnmma uwem ye idotenyịn nsinsi uwem, ẹnyụn̄ ẹnam kpukpru nnyịn itaba emi n̄ko. (Rome 6:23) Edi sia Jehovah enen̄ede ama nnyịn, enye ama anam ndutịm man efen mme idiọkn̄kpọ nnyịn edieke ibuọtde idem ke uwa ufak Jesus Christ Eyen esie. (Matt. 20:28; John 3:16) Emi enen̄ede edi “mfọnido Abasi oro owo mîdotke”! (Titus 2:11) Enye owụt ke ẹkeme ndifen mme idiọkn̄kpọ nnyịn. Mmọdo, ikpanaha iyak Satan anam ikere ke Abasi idifenke idiọkn̄kpọ nnyịn tutu amama.

“Nyan Ubọk Fo Tụk Ọkpọ Esie, ye Obụkidem Esie”

Satan ọkọdọhọ ke edieke Job ọdọn̄ọde idiọk idiọk, ke enye ọyọkpọn̄ Abasi. Enye ọkọdọhọ Jehovah ete: “Nyan ubọk fo tụk ọkpọ esie, ye obụkidem esie: enye iditreke ndikpọn̄ fi an̄wa-an̄wa.” (Job 2:5) Satan eyenen̄ede enem esịt edieke udọn̄ọ  anamde nnyịn ikere ke nnyịn iwọrọke n̄kpọ.

Edi Jehovah idikpọn̄ke nnyịn sia nnyịn mîkemeke ndinam kpukpru se ikesinamde inọ enye. Yak idọhọ ke owo ọnọ ufan nnyịn unan. Ndi nnyịn idibatke aba enye ke n̄kpọ sia enye mîkemeke aba ndinam kpukpru se ekesinamde ọnọ nnyịn? Nsa-o! Idisụk imama inyụn̄ ise iban̄a enye—akpan akpan edieke ẹkenọde enye unan oro ke ntak nnyịn. Edieke nnyịn ikemede ndinam oro, ndi akpana ikere ke Jehovah idikemeke ndinam oro n̄ko? Bible ọdọhọ ke ‘Abasi ikwan̄ake nte efrede utom ye ima emi nnyịn iwụtde iban̄a enyịn̄ esie.’—Heb. 6:10.

Bible etịn̄ aban̄a “ubuene ebeakpa kiet” emi ekemede ndidi ama esima ndinọ un̄wam man ẹda ẹnam n̄kpọ Abasi ke ediwak isua. Ke ini Jesus okokụtde nte mma emi “esịnde okudọk okụk iba” ke ekebe etịbe temple, ndi Jesus ama esuene enye onyụn̄ ọdọhọ ke etịbe esie ekpri akaha? Baba-o. Utu ke oro, enye akakam ọdọhọ ke mma oro anam akan, sia enye ọkọnọ ofụri se enye ekekemede man ẹda ẹnam n̄kpọ Abasi.—Luke 21:1-4.

Edieke isọn̄ọde ida inam se ifọnde, Jehovah idikpọn̄ke nnyịn edide ke ini usọn̄ m̀mê ke ini idọn̄ọde. Tutu amama, Enye idikpọn̄ke mme anam-akpanikọ ikọt esie sia afanikọn̄ mîyakke mmọ ẹnam kpukpru se ẹkesinamde ẹnọ enye.—Ps. 71:9, 17, 18.

Ẹbọ “Ndụn Edinyan̄a Ẹyara”

Nso ke ikpanam mbak Satan edibian̄a nnyịn? Apostle Paul ekewet ete: “Ẹka iso ẹkop odudu ke Ọbọn̄ ye ke ọkpọsọn̄ ukeme esie. Ẹmen ofụri n̄kpọekọn̄ Abasi ẹsịne man mbufo ẹkpekeme ndisọn̄ọ nda n̄n̄wana ye n̄kari Devil.” Kiet ke otu n̄kpọekọn̄ eke spirit oro edi “ndụn edinyan̄a.” (Eph. 6:10, 11, 17) Edieke nnyịn mîyomke Satan abian̄a nnyịn, ana ibọ ndụn edinyan̄a emi iyara kpukpru ini. Ndụn isiyakke n̄kpọ anam owoekọn̄ ibuot. Kpasụk ntre n̄ko, “idotenyịn edinyan̄a” oro inyenede nte ke Abasi ayanam isọn̄ emi akabade edi obufa idiyakke Satan abian̄a nnyịn. (1 Thess. 5:8) Oyom inen̄ede isịn idem ikpep Bible man ika iso inyene idotenyịn emi.

Job ama ọyọ kpukpru afanikọn̄ oro Satan akanamde esịm enye. Enye ama enen̄ede enyene mbuọtidem ke Abasi tutu ifeheke n̄kpa. Enye ọkọdọhọ Jehovah ete: “Afo okpokot, ndien ami n̄kpeyere fi, utom ubọk fo ọkpọdọn̄ fi.” (Job 14:15) Job ama ọfiọk ke ekpedi ikpakpa, ke nte Abasi amade mme anam-akpanikọ ikọt esie idiyakke enye efre mmọ ke udi, edi ke ayanam mmọ ẹset.

Nnyịn ikpakam inyene ukem mbuọtidem emi ke Jehovah. Enye ayanyan̄a nnyịn osio ke kpukpru afanikọn̄ oro Satan ye ikọt esie ẹnamde ẹsịm nnyịn. Paul ọkọdọhọ ke ‘Abasi edi akpanikọ, idinyụn̄ iyakke ẹdomo nnyịn ẹbe se ikemede ndiyọ, edi enye oyosio usụn̄ ubọhọ ke ufọt idomo man ikeme ndiyọ.’—1 Cor. 10:13.

[Ndise ke page 20]

Jehovah esinem esịt ke ini anamde akpanikọ ọnọ enye

[Ndise ke page 21]

Bọ ndụn edinyan̄a yara kpukpru ini