‘Kwọrọ Ikọ Abasi Uko Uko’
‘Kwọrọ Ikọ Abasi Uko Uko’
“Kpukpru mmọ ẹyọhọ ye edisana spirit ẹnyụn̄ ẹtịn̄ ikọ Abasi uko uko.”—UTOM 4:31.
1, 2. Ntak emi ikpọkwọrọde ikọ ke usụn̄ oro otụkde owo ọkpọ?
JESUS ama ọdọhọ mme mbet esie usen ita mbemiso ẹwotde enye ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” Mbemiso Jesus akafiakde ọnyọn̄ heaven, enye ama ọdọhọ mme mbet esie ‘ẹkenam mme owo ke kpukpru idụt ẹdi mbet imọ, ẹnyụn̄ ẹkpep mmọ ẹnam kpukpru se imọ iketemede mmọ.’ Ekem enye ama ọdọhọ ke iyodu ye mmọ “kpukpru usen tutu esịm utịt editịm n̄kpọ emi.”—Matt. 24:14; 26:1, 2; 28:19, 20.
2 Nnyịn Mme Ntiense Jehovah ke isịn idem inam utom emi Jesus ọkọtọn̄ọde mi n̄kpọ nte isua 2,000 emi ẹkebede. Idụhe utom ndomokiet emi ọfọnde nte utom ukwọrọikọ ye edinam mbet, sia enye edi utom unyan̄a uwem. Ntak edi oro anade inen̄ede ikwọrọ ikọ ke usụn̄ oro otụkde owo ọkpọ. Ke ibuotikọ emi, iyeneme nte edisana spirit ekemede ndinam nnyịn ikwọrọ ikọ uko uko. Ndien ke ọyọhọ ibuotikọ ukpepn̄kpọ iba ye ita, iyeneme nte spirit Jehovah ekemede ndinam nnyịn ida usọ ikpep mme owo n̄kpọ, isinyụn̄ ikwọrọ ikọ kpukpru ini.
Oyom Inyene Uko
3. Ntak emi oyomde inyene uko man ikeme ndikwọrọ etop Obio Ubọn̄ Abasi?
3 Utom edikwọrọ etop Obio Ubọn̄ emi Abasi ọnọde nnyịn edi ata akwa ifetutom emi mînyeneke mbiet. Edi utom emi esisọn̄ ndusụk ini. Ndusụk owo ẹsisọp ẹnyịme etop Obio Ubọn̄ Abasi, edi ndusụk ẹsinam n̄kpọ nte mbon eyo Noah. Jesus ọkọdọhọ ke mmọ ikọfiọkke, m̀mê ikọdọn̄ke utọn̄ ke se Noah ọkọkwọrọde, “tutu ukwọ edi edikpọri mmọ kpukpru efep.” (Matt. 24:38, 39) N̄ko, enyene mbon emi ẹsisakde m̀mê ẹbiọn̄ọde nnyịn. (2 Pet. 3:3) Ekeme ndidi mbon ukara, nditọ ufọkn̄wed nnyịn, mbon itieutom nnyịn, m̀mê mbonufọk nnyịn. Ke adianade do, bụt ye edikere ke mme owo idimaha aba nnyịn ẹkeme n̄ko ndinam idem emem nnyịn. Ediwak n̄kpọ ẹdu oro ẹkemede ndinam ikûnyene “ifụre utịn̄ikọ” nnyụn̄ n̄kwọrọ ikọ Abasi “uko uko.” (Eph. 6:19, 20) Oyom inyene uko man ikeme ndika iso n̄kwọrọ ikọ Abasi. Nso ikeme ndinam inyene uko?
4. (a) Nso idi uko? (b) Nso ikọnọ apostle Paul uko ndikọkwọrọ ikọ ke Thessalonica?
4 Ikọ Greek oro ẹkabarede nte uko ọwọrọ “nditịn̄ ikọ in̄wan̄-in̄wan̄, ntịn̄ akpanikọ, ubakke owo enyịn.” Emi owụt ke inaha ibak owo enyịn. Edi ndinyene uko iwọrọke ndinam n̄kpọ usọn̄enyịn usọn̄enyịn m̀mê emiom emiom. (Col. 4:6) Kpa ye oro oyomde inyene uko, ana idomo n̄ko nditie ke emem ye kpukpru owo. (Rome 12:18) Ke adianade do, oyom inyene mbufiọk ke nte inamde n̄kpọ uko uko mbak nnyịn idikam idue iyat mme owo esịt ke an̄wautom. Edi man ikeme ndinyene uko emi asan̄ade ye mbufiọk, ana inyene mme edu en̄wen oro mîsimemke utom ndinyene. Nnyịn ikemeke ndinyene utọ uko emi ke odudu idem nnyịn. Nso ikọnọ apostle Paul ye mme nsan̄autom esie uko ndikọkwọrọ ikọ ke Thessalonica, kpa ye oro ‘ẹkemiomde mmọ ke Philippi’? Paul ọdọhọ ke ‘Abasi ọkọnọ mmimọ uko’ ikwọrọ ikọ. (Kot 1 Thessalonica 2:2.) Jehovah Abasi ekeme ndinam inyene utọ uko emi, ikûnyụn̄ ukop ndịk.
5. Nso ke Jehovah akanam man Peter, John, ye mme mbet eken ẹnyene uko?
5 Apostle Peter ye John ẹma ẹbọrọ “mme andikara ye mbiowo ye mme ewetn̄wed” emi ẹkedọhọde mmọ ẹtre ndikwọrọ ikọ ete: “Ẹkere ise ke idem mbufo m̀mê enen ke enyịn Abasi ndikop uyo mbufo n̄kan eke Abasi. Edi amaedi nnyịn, nnyịn ikemeke nditre nditịn̄ mban̄a mme n̄kpọ emi nnyịn ikokụtde inyụn̄ ikopde.” Utu ke ndiben̄e Abasi nte anam ukọbọ oro etre, mmọ ẹkekam ẹdiana ye mme mbet eken ẹben̄e ẹte: “Jehovah, nọ ntịn̄enyịn ke ikọ ndịghe emi mmọ ẹtịn̄de, nyụn̄ nọ ifịn fo ukeme ndika iso ntịn̄ ikọ fo uko uko.” (Utom 4:5, 19, 20, 29) Didie ke Jehovah ọkọbọrọ akam mmọ? (Kot Utom 4:31.) Jehovah ama ọnọ mmọ spirit esie emi akanamde mmọ ẹnyene uko. Spirit emi ekeme ndinam inyene uko n̄ko. Edi didie ke ikeme ndinyene spirit emi nnyụn̄ nyak enye ada nnyịn usụn̄ ke ini ikwọrọde ikọ?
Se Akpanamde man Enyene Uko
6, 7. Nso idi ata nnennen usụn̄ oro owo akpasan̄ade enyene edisana spirit? Nọ mme uwụtn̄kpọ.
6 Ata nnennen usụn̄ oro owo akpasan̄ade enyene edisana spirit edi ndiben̄e Andinyene. Jesus ọkọdọhọ mbon oro ẹkekopde ukwọrọikọ esie ete: “Edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!” (Luke 11:13) Mmọdo, akpana isiben̄e Abasi edisana spirit kpukpru ini. Edieke esisọn̄de nnyịn ndikwọrọ ikọ ke efak, ke ido nneme, m̀mê ke ebiet emi ẹnamde mbubehe, imekeme ndiben̄e Jehovah spirit esie inyụn̄ idọhọ enye anam nnyịn inyene uko.—1 Thess. 5:17.
7 Se eyenete nnyịn an̄wan emi ekerede Rosa * akanamde edi oro. Enye anam utom ke ufọkn̄wed. Usen kiet, owo itieutom mmọ ama okot nte mme andikpep ke ufọkn̄wed en̄wen ẹbakde ibak ye nditọ ufọkn̄wed. N̄kpọ emi ama anam enye mbọm tutu enye ofiori ete: “Ntak emi mme owo ẹbakde ibak ntem?” Rosa ikekemeke ndime, sia enye ama ọfiọk ke ifet edi oro ndikwọrọ ikọ. Nso ke enye akanam man enyene ukọ ọkwọrọ ikọ? Enye ọdọhọ ete: “Mma mben̄e Jehovah spirit esie man an̄wam mi.” Rosa ama ọkwọrọ ikọ ọnọ owo itieutom mmọ oro, onyụn̄ anam ndutịm ndifiak nnyene nneme ye enye usen efen. Yak ineme n̄ko iban̄a se Milane, eyenan̄wan isua ition emi odụn̄de ke New York City akanamde. Enye ọdọhọ ete: “Mbemiso ndahade n̄wed, Mama esitie ye ami ọbọn̄ akam ọnọ Jehovah.” Nso ke mmọ ẹsiben̄e? Ẹsiben̄e Jehovah ẹte ọnọ Milane uko ndinam mme owo ẹfiọk enye. Eka esie ọdọhọ ete: “Emi ama ọnọ Milane uko nditịn̄ ntak emi enye mîsitieneke inam usọrọ usen emana ye mme usọrọ ini nduọkodudu eken.” Kpukpru emi ẹwụt ke akam ekeme ndinam inyene uko.
8. Nso ke se iketịbede inọ prọfet Jeremiah ekpep nnyịn aban̄a se ikpanamde man inyene uko?
8 Kere n̄ko ban̄a se ikanamde prọfet Jeremiah enyene uko. Ke ini Jehovah ekemekde enye ete edi prọfet ọnọ mme idụt, Jeremiah ọkọdọhọ ete: “Mfiọkke nditịn̄ ikọ: koro ami ndide eyenọwọn̄.” (Jer. 1:4-6) Edi nte ini akakade, Jeremiah ama etịn̄ ikọ uko uko tutu mme owo ẹkedida enye nte prọfet nsobo. (Jer. 38:4) Enye ama atan̄a ubiereikpe Jehovah uko uko ke se ibede isua 65. Emi ama anam ẹnen̄ede ẹdiọn̄ọ enye ke Israel. Ndien ke n̄kpọ nte isua 600 ama ekebe, mbon emi ẹkekopde nte Jesus etịn̄de ikọ uko uko n̄ko ẹkedọhọ ke Jeremiah afiak edimana oro. (Matt. 16:13, 14) Nso ikanam prọfet Jeremiah emi ekedide owo o-bụt enyene uko ntre? Enye ọdọhọ ete: “Ndien [ikọ Abasi] odu mi ke esịt nte ikan̄ eke asakde, esịne mi ke ọkpọ, ndien n̄n̄wana ndimụm idemmi n̄kama, tutu akak.” (Jer. 20:9) Ih, ikọ Jehovah ọkọnọ Jeremiah odudu, onyụn̄ anam enye ekeme nditịn̄ ikọ uko uko.
9. Ntak emi ikọ Abasi ekemede nditụk nnyịn nte okotụkde Jeremiah?
9 Ke leta oro apostle Paul ekewetde mme Hebrew, enye ọkọdọhọ ke “ikọ Abasi enyene uwem onyụn̄ enyene odudu onyụn̄ ọsọp akan ofụt iso iba onyụn̄ ekịm abahade ukpọn̄ ye spirit, ye ikek ye ndia esie, onyụn̄ ekeme ndifiọk mme uduak ye ekikere esịt owo.” (Heb. 4:12) Ikọ Abasi ekeme nditụk nnyịn, ukem nte okotụkde Jeremiah. Ti ete ke kpa ye oro edide mme owo ẹkewet Bible, ke mmọ ikewetke ekikere idemmọ, edi spirit Abasi akada mmọ usụn̄. Udiana Peter 1:21 ọdọhọ ke “akananam ntịn̄nnịm ikọ itoho ke uduak owo, edi mme owo ẹketịn̄ ikọ ẹto Abasi nte edisana spirit akadade mmọ usụn̄.” Ke ini itịn̄de enyịn ikpep Bible ke ini idem nnyịn, ọwọrọ ikọ ifiọk emi edisana spirit akadade mme owo usụn̄ ẹwet. (Kot 1 Corinth 2:10.) Enye ekeme nditie “nte ikan̄ eke asakde” tutu nnyịn ikemeke aba ndime, m̀mê ndifịk enye nnịm ke esịt.
10, 11. (a) Didie ke ikpesikpep n̄kpọ man ikeme ndikwọrọ ikọ uko uko? (b) Tịn̄ ke nsụhọde n̄kaha n̄kpọ kiet oro edinamde man ukpepn̄kpọ idemfo ọfọn akan nte ekesidide.
10 Edieke iyomde ukpepn̄kpọ idem nnyịn enen̄ede enyene ufọn ọnọ nnyịn, ana isikpep enye ke usụn̄ oro odụkde nnyịn ọkpọ. Ke uwụtn̄kpọ, ẹma ẹnọ prọfet Ezekiel ikpan̄wed oro esịnede ọkpọsọn̄ etop ke n̄kukụt ẹte ata. Akana enye ọkwọrọ etop emi ọnọ mbon emi esịt ama okodoro ufiọn. Edi enye ekenyene ndinen̄ede mfiọk se etop emi aban̄ade man enen̄ede enem enye nditịn̄ nnọ mme owo, nte n̄kpọ eke ẹdọhọde ke enye adia aranọkwọk.—Kot Ezekiel 2:8-3:4, 7-9.
11 Eyo nnyịn emi onyụn̄ etie nte eyo mme Ezekiel. Ediwak owo mfịn iyomke-yom ndikop etop Bible. Mmọdo, man ikeme ndika iso n̄kwọrọ ikọ Abasi, enen̄ede oyom ikpep Bible ke usụn̄ oro se ikpepde edinen̄erede in̄wan̄a nnyịn. Ikpep enye kpukpru ini, utu ke ndikpep ntomo ntomo. Oyom inyene ukem ekikere andiwet psalm oro ọkọkwọde ete: “Ikọ inua mi, ye ekikere esịt mi ẹyenem fi esịt, O Jehovah, akwa itiat mi, ye andifak mi.” (Ps. 19:14) Esinen̄ede ọfọn itie ikere akpanikọ oro ikpepde ke Bible man enye enen̄ede odụk nnyịn ọkpọ. Enen̄ede oyom isịn ifịk inam ukpepn̄kpọ idem nnyịn ọfọn akan nte ekesidide. *
12. Ntak emi edidụk mme mbono esop ekemede ndinam edisana spirit ada nnyịn usụn̄?
12 N̄kpọ en̄wen oro ikpanamde man idia ufọn edisana spirit Jehovah edi “[ndikere] nte ikpedemerede kiet eken inọ ima ye nti utom, ikûsịn ndisop idem ọtọkiet.” (Heb. 10:24, 25) Eti usụn̄ ndiyak spirit emi ada nnyịn usụn̄ edi ndisịn idem ndụk mme mbono esop kpukpru ini, nnen̄ede n̄kpan̄ utọn̄, nnyụn̄ nnam se ikpepde. Idem n̄kpọ, n̄kọ spirit emi esida esop Abasi usụn̄.—Kot Ediyarade 3:6.
Ufọn Edinyene Uko
13. Mme Christian akpa isua ikie ndikọkwọrọ eti mbụk nnọ kpukpru edibotn̄kpọ ke idak ikpaenyọn̄ anam ifiọk nso?
13 Edisana spirit edi akakan odudu ke ekondo, ndien enye ekeme ndinọ owo odudu ndinam n̄kpọ Jehovah. Enye akanam mme Christian akpa isua ikie ẹkwọrọ eti mbụk ẹnọ “kpukpru edibotn̄kpọ ke idak ikpaenyọn̄.” (Col. 1:23) Ke ini itide ke ediwak mmọ ‘ikọfiọkke n̄wed,’ emi esinam inen̄ede inịm ke odudu oro akande ukeme owo akada mmọ usụn̄.—Utom 4:13.
14. Nso ke ikpanam man “[inyene] ifiopesịt ke spirit”?
14 Ndidu uwem oro ayakde edisana spirit ada nnyịn usụn̄ ekeme n̄ko ndinam ikwọrọ ikọ uko uko. Ndibọn̄ akam kpukpru ini mben̄e Abasi spirit esie, nsịn idem n̄kpep Bible, nnen̄ede ntie n̄kere se ikotde ke Bible, nnyụn̄ ndụk mme mbono esop kpukpru ini, ẹkeme ndinam ‘inyene ifiopesịt ke spirit.’ (Rome 12:11) Bible ọdọhọ ke “owo Jew kiet emi ekerede Apollos, amanaisọn̄ eyen Alexandria, emi edide owo udọnikọ, [ama] edi ke Ephesus,” ndien “sia enye enyenede ifiopesịt ke spirit, enye [ama] etịn̄ onyụn̄ ekpep n̄kpọ [aban̄a] Jesus nnennen nnennen.” (Utom 18:24, 25) Edieke “[inyenede] ifiopesịt ke spirit,” imekeme ndinen̄ede nnyene uko ke ini ikwọrọde ikọ ke ufọk ke ufọk ye ke ido nneme.—Rome 12:11.
15. Nso idi ufọn edinen̄ede n̄kwọrọ ikọ uko uko?
15 Ndinen̄ede n̄kwọrọ ikọ uko uko esinyene ufọn ọnọ nnyịn n̄ko. Enye esinam inam se inende sia imenen̄ede ifiọk ke etop nnyịn edi akpan etop, inyụn̄ ifiọk ufọn esie. Anam ukwọrọikọ enen̄ede ọdọn̄ nnyịn ndika sia esịt esinen̄ede enem nnyịn ke ini ifiọkde ke utom ukwọrọikọ nnyịn enyene ufọn. Onyụn̄ anam inen̄ede isịn ifịk sia ifiọkde ke oyom kpukpru owo ẹsọsọp ẹkop etop emi mbemiso utịt edide.
16. Nso ke ikpanam edieke nnyịn mîsịnke aba ifịk ikwọrọ ikọ nte ikesikwọrọde?
16 Nso ke ikpanam edieke nnyịn mîsịnke aba ifịk ikwọrọ ikọ nte ikesikwọrọde? Emi ọwọrọ ke ana inen̄ede idụn̄ọde idem nnyịn. Paul ọkọdọhọ ete: “Ẹka iso ẹdomo ẹse m̀mê mbufo ẹdu ke mbuọtidem, ẹka iso ẹwụt se mbufo ke idem mbufo ẹdide.” (2 Cor. 13:5) Bụp idemfo ete: ‘Ndi ke nnyenyene ifiopesịt ke spirit? Ndi mmesiben̄e Jehovah nte ọnọ mi spirit esie? Ndi akam mi esiwụt ke mmenịm ke enye ayan̄wam mi nnam uduak esie? Ndi esiwụt ke mmokop inemesịt ndinam utom ukwọrọikọ emi enye ọdọn̄de nnyịn mi? Nsinam ukpepn̄kpọ idem mi didie? Nsitie n̄kere se n̄kpepde ebịghi adan̄a didie? Ndi mmesitiene nnam n̄kpọ ke mbono esop?’ Ndikere mban̄a mme mbụme emi ekeme ndinam ọfiọk ebiet emi mûnamke ọfọn, man anam ukpụhọde.
Yak Spirit Abasi Anam Fi Enyene Uko
17, 18. (a) Ẹnam utom ukwọrọikọ adan̄a didie mfịn? (b) Nso ke ikpanam man inyene “akakan ifụre utịn̄ikọ” ida ikwọrọ eti mbụk Obio Ubọn̄ Abasi?
17 Jesus ọkọdọhọ mme mbet esie ke ama ekeset ete: “Mbufo ẹyebọ odudu ke ini edisana spirit edide edidoro mbufo ke idem, ndien mbufo ẹyedi mme ntiense mi ke Jerusalem ye ke ofụri Judea ye Samaria tutu esịm ke ata utịt ikpehe isọn̄.” (Utom 1:8) Mfịn, ẹnam utom emi ke udomo oro akanam owo mînamke. Mme Ntiense Jehovah oro ẹwakde ẹbe miliọn itiaba ke ẹkwọrọ etop Obio Ubọn̄ Abasi ke se ibede idụt 230. Mmọ ẹsida n̄kpọ nte biliọn hour kiet ye ubak ẹkwọrọ ikọ kpukpru isua. Enen̄ede edi n̄kpọ inemesịt nditiene mbuana ifịk ifịk ke utom emi owo mîdifiakke inam aba mi.
18 Spirit Abasi ọnọ ndausụn̄ ke utom ukwọrọikọ emi ẹnamde ke ofụri ererimbot mfịn ukem nte ọkọnọde ke akpa isua ikie. Edieke itienede ndausụn̄ spirit Abasi, iyenyene “akakan ifụre utịn̄ikọ” ke ini ikwọrọde ikọ. (Utom 28:31) Mmọdo, ẹyak idomo nte ikekeme nditiene ndausụn̄ spirit emi, nte isụk ikwọrọde eti mbụk Obio Ubọn̄ Abasi!
[Mme Ikọ Idakisọn̄]
^ ikp. 7 Ẹkpụhọ mme enyịn̄.
^ ikp. 11 Edieke oyomde edikot Bible ye ukpepn̄kpọ idemfo ẹnen̄ede ẹnyene ufọn ọnọ fi, se ibuotikọ emi, “Sịn Idem ke Edikot N̄wed,” ye “Ukpepn̄kpọ Enyene Ufọn,” ke page 21-32, ke Bọ Ufọn to Ukpepn̄kpọ Ufọkn̄wed Utom Ukara Abasi.
Nso ke Afo Ekekpep?
• Ntak emi oyomde inyene uko man ikeme ndikwọrọ ikọ Abasi?
• Nso ikanam mme Christian akpa isua ikie ẹnyene uko?
• Nso ke ikpanam man inyene uko?
• Nso idi ufọn edinyene uko?
[Mme Mbụme Ukpepn̄kpọ]
[Ndise ke page 7]
Didie ke mme ete ye eka ẹkeme ndin̄wam nditọ mmọ ẹnyene uko?
[Ndise ke page 8]
Ibio ibio akam ekeme ndinam enyene uko ọkwọrọ ikọ