Mme Mbụme Ẹtode Mme Andikot

Nso ikpanam owo oyom ndifiak nna baptism?

Enyene se ikemede ndinam owo emi ama akana baptism ekere ke imọ ikodotke ndina baptism ke akpa ifet, ntre ke akpana ifiak ina baptism. Ke uwụtn̄kpọ, ekeme ndidi ke ini owo oro okoyomde ndina baptism, enye ama esidịbe anam idiọkn̄kpọ, mîdịghe, edịbe odu utọ uwem oro ekpedide se ẹsiode enye ẹfep ke esop ekpedi enye ama anana baptism. Ndi utọ owo oro ekeme ndiyak idem nnọ Abasi kpa ye oro osụk odude utọ uwem oro? Baba. N̄kukụre ini emi enye ekemede ndinen̄ede nyak idem nnọ Jehovah edi ke enye ama akakabarede esịt onyụn̄ etre ndinam se Bible akpande. Ke ntre, owo emi ekedịbede odu oburobụt uwem tutu ada akana baptism ekeme ndifiak ndọhọ ẹnịm imọ baptism.

Nso kaban̄a owo emi mîkodụhe oburobụt uwem ke ini oyomde ndina baptism, edi ke ama akana baptism, edinam idiọkn̄kpọ oro oyomde ẹkpe ikpe ẹnọ enye? Nso ke ẹkpenam edieke enye ọdọhọde ke baptism ikenen̄ekede in̄wan̄a imọ, ndien ke etie imọ nte imọ ikanaha baptism. Ikpanaha mbiowo emi ẹsobode ye enye ẹtịn̄ ikọ oro ekemede ndinam owo ekere ke enye ikodotke ndina baptism, m̀mê ndibụp enye m̀mê enye ekere ke Abasi ama enyịme uyakidem esie ye baptism. N̄kọ enye ama okop utịn̄ikọ baptism, emi anamde owo ọfiọk se baptism ọwọrọde. N̄kọ enye ọkọbọrọ “ih,” ke ini ẹkebụpde mbụme uyakidem ye baptism. Ekem enye adaha okokpụhọ ọfọn̄, onyụn̄ asan̄a ke ukot esie mbiba okodụk mmọn̄ ndien ẹnịm enye baptism. Enye ndikanam kpukpru emi owụt ke enye ama ọfiọk se ikanamde. Ke ntem, mbiowo ẹkpenyene ndinam n̄kpọ ye enye nte owo emi ama akana baptism.

Edieke enye obụpde m̀mê baptism imọ osụk enyene ufọn do, mbiowo ẹkpenyene ndidọhọ enye okot Enyọn̄-Ukpeme (Ikọmbakara) eke March 1, 1960, page 159 ye 160, ye eke February 15, 1964, page 123 esịm 126; do ke ẹnen̄ede ẹneme n̄kpọ ẹban̄a edifiak nna baptism. Edieke n̄kpọ ndomokiet (ke uwụtn̄kpọ, edieke owo ekerede ke n̄kpọ iketịmke in̄wan̄a imọ ke ini ikanade baptism) anamde owo ekere ke akpana ifiak ina baptism, owo oro enyene ndibiere ke idemesie.

Nso ke mme Christian ẹkpekere ẹban̄a mbemiso ẹbierede ndidụn̄ ufọk ye owo?

Idụhe owo emi mîyomke itie udakibuot. Edi idịghe kpukpru owo ẹnyene ebietidụn̄. Unana ye udọn̄ọ, mîdịghe mme mfịna eken ẹkeme ndinam mme iman ẹdụn̄ọ kiet. Ke ndusụk obio, mme iman ẹsifaha ke ubet kiet, tutu mmọ inyeneke aba ukpọk itie udịp idem.

Idịghe utom esop Abasi ndibiere ọtọ ye ebiet m̀mê owo emi asan̄autom Jehovah kiet kiet okpodụn̄de kiet. Christian kiet kiet enyene ndida mme edumbet Bible mbiere m̀mê Abasi ama nte imọ idụn̄de m̀mê imaha. Yak ineme iban̄a ndusụk edumbet emi.

 Se ikpenen̄erede ikere iban̄a ekpedi m̀mê ndidụn̄ ye mbon en̄wen ayanam ika iso inam se ifọnde inyụn̄ inam n̄kpọ Abasi, m̀mê idinamke. Nso utọ owo ke iyom ndidụn̄ kiet? Ndi mmọ ẹdi mme asan̄autom Jehovah? Ndi mmọ ẹsinam se Bible ọdọhọde? Apostle Paul ọkọdọhọ ete: “Ẹkûyak ẹtụn mbufo usụn̄. Idiọk nsan̄a ababiat eti ido.”—1 Cor. 15:33.

Bible owụt ke Jehovah asasua use ye efịbe. (Heb. 13:4) Emi owụt ke Abasi inyịmeke eren ye n̄wan emi mîdịghe n̄wan ye ebe ẹdụn̄ọ kiet nte n̄wan ye ebe. Ikpanaha Christian odụn̄ ufọk kiet ye mbon emi ẹdude oburobụt uwem.

N̄ko-n̄ko, Bible ọdọhọ kpukpru mbon oro ẹyomde mfọn Abasi “ẹfehe ẹkpọn̄ use.” (1 Cor. 6:18) Mmọdo, ikpanaha Christian odụn̄ ke ebiet ekededi oro ekemede ndinam enye anam oburobụt ido. Ke uwụtn̄kpọ, yak idọhọ ke ediwak mme asan̄autom Jehovah ẹdụn̄ọ ke ufọk kiet. Ndi ukereke ke oro ekeme ndinam owo edue anam se idiọkde? Nso iditịbe edieke eren ye n̄wan emi mîdịghe n̄wan ye ebe ẹdude ikpọn̄ ke ini mbon eken mîdụhe ke ufọk? Ukem ntre, ikpọfọnke eren ye n̄wan emi ẹduakde ndidọ kiet eken ẹdụn̄ọ ufọk kiet. Iwụt ke imenyene ọniọn̄ edieke ifepde utọ idaha emi.

Idinyụn̄ iwụtke eti ibuot mbon emi ẹma ẹkesio kiet eken ndọ ndika iso ndụn̄ọ kiet. Koro sia mmọ ẹma ẹkenen̄ede ẹkpere kiet eken idem, oro ekeme ndinam mmọ ẹnam use.—N̄ke 22:3.

N̄kpọ en̄wen oro nnyịn mîkpefreke iban̄a edi nte mme owo ẹsede se inamde. Edieke Christian ọdọhọde ke ufọk emi idụn̄de ifịnake imọ, nso kaban̄a mme ndanse? Nso ke mmọ ẹditịn̄? Ikpanaha idedei inam n̄kpọ oro anamde ẹtịn̄ idiọk ẹdian enyịn̄ Jehovah. Paul ọkọdọhọ ete: “Ẹkûnam n̄kpọ ẹdi ntak iduọ ẹnọ mme Jew ọkọrọ ye mbon Greek ye esop Abasi, kpa nte ami nnemde kpukpru owo esịt ke kpukpru n̄kpọ, nyomke ufọn idemmi edi nyom ufọn ediwak owo, man ẹkpenyan̄a mmọ.”—1 Cor. 10:32, 33.

Ekeme ndinen̄ede nsọn̄ mbon emi ẹyomde ndinam se inemde Jehovah esịt ndinyene eti ebietidụn̄. Kpa ye oro, akpana mme Christian “ẹka iso ẹdụn̄ọde ẹfiọk se Ọbọn̄ enyịmede,” ẹnyụn̄ ẹkụt ẹte ke owo isịneke ke ufọk mmimọ inam ndisịme ido. (Eph. 5:5, 10) Emi owụt ke akpana mme Christian ẹbọn̄ akam ẹben̄e ndausụn̄ Abasi, ẹnyụn̄ ẹnam se ẹkekeme man ẹn̄wam kiet eken ẹnam se ifọnde ẹnyụn̄ ẹnọ enyịn̄ Jehovah ubọn̄.