Ndi Amada Jehovah nte Ete Fo?

KE INI kiet ke otu mbet Jesus ọkọdọhọde enye ete: “Ọbọn̄, kpep nnyịn ndibọn̄ akam,” Jesus ọkọdọhọ mmọ ete: “Ini ekededi eke mbufo ẹbọn̄de akam, ẹdọhọ ẹte, ‘Ete, yak ẹnam enyịn̄ fo asana.’” (Luke 11:1, 2) Jesus ama ọfiọk ikpọ udorienyịn̄ Abasi, nte “El Shaddai,” oro edi, “Ata Ọkpọsọn̄ Abasi,” “Akwa Anditeme,” ‘Andibot,’ “Andisọn̄ọ usen,” ye “nsinsi Edidem.” (Gen. 49:25; Isa. 30:20, NW; 40:28; Dan. 7:9; 1 Tim. 1:17) Edi enye ekemek ndikot enye Ete. Ntak-a? Ekeme ndidi Jesus okoyom nnyịn isineme nneme ye Abasi—kpa enye emi okon̄de akan ke ofụri ekondo—nte ekpri eyen emi osụhọrede idem esinemede ye edima ete esie.

Edi esisọn̄ ndusụk owo ndida Abasi nte Ete mmọ. Eyenete nnyịn emi ekerede Atsuko * ọdọhọ ete: “N̄kekemeke ndisan̄a n̄kpere Jehovah nnyụn̄ mbọn̄ akam nnọ enye nte ata Ete mi ke ata ediwak isua, idem ke mma n̄kana baptism.” Enye ọdọhọ ke se ikanamde n̄kpọ etie ntre ye imọ edi nte ke akananam idem ata ete emi okobonde imọ inamke n̄kpọ ndiwụt ke imama imọ.

Ke mme akpatre usen ndiọkeyo emi, ata ediwak ete inyeneke “ndammana ima” emi ete ekpenyenede ọnọ eyen. (2 Tim. 3:1, 3) Ntre, ata ediwak owo ẹnyene ukem mfịna Atsuko emi. Edi imekeme ndisụk nsọn̄ idem esịt, koro imenyene ekese ntak ndida Jehovah nte edima Ete.

Jehovah—Abasi Ntatubọk

Edieke iyomde ndida Jehovah nte Ete, ana inen̄ede ifiọk enye. Jesus ọkọdọhọ ete: “Baba owo kiet itịmke ifiọk Eyen ke mîbọhọke Ete, owo ndomokiet inyụn̄ itịmke ifiọk Ete ke mîbọhọke Eyen ye owo ekededi emi Eyen enyịmede ndiyarade enye nnọ.” (Matt. 11:27) Mfọnn̄kan usụn̄ ndifiọk utọ Ete emi Jehovah edide edi nditie n̄kere se Jesus ekekpepde aban̄a Abasi akpanikọ. Nso ke enye ekekpep mme owo aban̄a Ete esie?

Jesus ọkọdọhọ ke ‘Ete ọnọ imọ uwem,’ oro edi, ke Jehovah okobot imọ. (John 6:57) Kpa Ete emi okonyụn̄ obot nnyịn. (Ps. 36:9; Utom 17:28) Nso ikanam Jehovah obot nnyịn? Ndi idịghe ima akanam? Akpana inen̄ede ima Ete nnyịn eke heaven ke ndikobot nnyịn.

N̄kponn̄kan usụn̄ emi Abasi owụtde ke imama nnyịn edi ndikọnọ Jesus edikpa afak nnyịn. Ufak emi anam nnyịn emi idide mme anamidiọk ikeme ndida ke edem edima Eyen esie nsan̄a n̄kpere enye. (Rome 5:12; 1 John 4:9, 10) Ndien n̄ko sia Ete nnyịn eke heaven esisude mme un̄wọn̄ọ esie, imọfiọk ke enye ọyọnọ kpukpru mbon emi ẹmade enye ẹnyụn̄ ẹkopde item esie “ubọn̄ ubọn̄ ifụre eke nditọ Abasi.”—Rome 8:21.

Ke adianade do, Ete nnyịn eke heaven “[anam] utịn esie asiaha ọnọ” nnyịn kpukpru usen. (Matt. 5:45) Kpa ye emi edide utịn enen̄ede enyene ufọn ọnọ nnyịn, onyụn̄ esinem ndiwebe, owo nnyịn ifan̄ esiti ke akpana ibọn̄ akam iben̄e Jehovah anam utịn asiaha? Idụhe eke ọnọde owo n̄kpọ nte Ete nnyịn eke heaven. Enye ọdiọn̄ọ kpukpru se nnyịn iyomde idem mbemiso iben̄ede enye. Mmọdo, ọkpọfọn isitie ise inyụn̄ ikere nte Ete nnyịn eke heaven esede aban̄a edibotn̄kpọ esie.—Matt. 6:8, 26.

 Ete Nnyịn Edi Eti Andikpeme

Isaiah ama etịn̄ ntịn̄nnịm ikọ ọnọ ikọt Abasi ke eset ete: “Ikpọ obot ẹyesehede, n̄kpri ẹyenyụn̄ ẹnyek: edi ima mi idisehekede ikpọn̄ fi, ediomi emem mi idinyụn̄ inyekke; emi edi uyo Jehovah emi atuade fi mbọm,” m̀mê “ekpemede fi,” nte The Bible in Living English ọdọhọde. (Isa. 54:10) Akam emi Jesus ọkọbọn̄de okoneyo emi ekesierede usen emi ẹkewotde enye enen̄ede ọsọn̄ọ ke Jehovah edi eti andikpeme. Enye ama esịn mme mbet esie ke akam ete: “Mmọ ẹdu ke ererimbot, ndien ami ke nnyọn̄ ntiene fi. Edisana Ete, da enyịn̄ fo kpeme mmọ.” (John 17:11, 14) Jehovah ke ese onyụn̄ ekpeme mbon emi ẹtienede Jesus.

Usụn̄ kiet emi Jehovah ekpemede nnyịn mbak Satan edimụm nnyịn ke n̄kari esie edi ndinam “ofụn emi anamde akpanikọ onyụn̄ enyenede ọniọn̄” ọnọ nnyịn udia ke edikem ini. (Matt. 24:45) Ana idia udia emi edieke iyomde ‘ndisịne ofụri n̄kpọekọn̄ Abasi.’ Ke uwụtn̄kpọ, edieke inyenede ‘mbuọtidem emi edide akwa otuekọn̄,’ iyekeme “ndida [enye] nnịme kpukpru enyịm ikan̄ andidiọk.” (Eph. 6:11, 16) Omokụt do nte mbuọtidem ekemede ndikpeme nnyịn ke n̄kan̄ eke spirit, ndien emi owụt nte Ete nnyịn eke heaven esikpemede nnyịn.

Ndidụn̄ọde nte Eyen Abasi akanamde n̄kpọ ke ini enye okodude ke isọn̄ ekeme ndinam inen̄ede ifiọk nte Ete nnyịn eke heaven amade nnyịn. Se se idude ke Mark 10:13-16. Jesus ọkọdọhọ mme mbet esie ke itien̄wed emi ete: “Ẹyak n̄kpri nditọ ẹtiene mi.” Jesus ama “emen nditọ oro akama ke ubọk esie onyụn̄ ọtọn̄ọ ndidiọn̄ mmọ.” Anaedi esịt ama enen̄ede enem mmọ. Ntre, Jesus ndikọdọhọ ke “owo eke okụtde [imọ] okụt Ete n̄ko” owụt ke Abasi oyom nnyịn isan̄a ikpere imọ ntre n̄ko.—John 14:9.

Jehovah Abasi edi ima. Idụhe eke ọnọde owo n̄kpọ m̀mê ekemede ndikpeme owo nte enye. Enye ke idemesie ọdọhọ isan̄a ikpere imọ. (Jas. 4:8) Kpukpru emi ẹwụt ke idụhe ete eke ebietde Jehovah!

Nte Ikemede Ndibọ Ufọn!

Iyenen̄ede ibọ ufọn edieke ibuọtde idem ye Jehovah, kpa edima Ete nnyịn eke heaven. (N̄ke 3:5, 6) Jesus ama ọbọ ufọn ke ndibuọt idem ofụri ofụri ye Ete esie. Enye ọkọdọhọ mbet esie ete: “Ndụhe ikpọn̄, edi Ete mi emi ọkọdọn̄de mi odu ye ami.” (John 8:16) Enye ama ọfiọk ke Jehovah do ye imọ. Ke uwụtn̄kpọ, ke ini Jesus akanade baptism, Ete ama etịn̄ ikọ emi ọkọsọn̄ọde enye idem ete: “Emi edi edima Eyen mi, emi ami nnyịmede.” (Matt. 3:15-17) N̄ko, esisịt ini mbemiso Jesus akakpade, enye ama ofiori ete: “Ete, mmayak spirit mi nsịn fi ke ubọk.” (Luke 23:46) Jesus okosụk ọbọbuọt idem ye Ete esie tutu esịm ini emi enye akakpade.

Imekeme ndibuọt idem ye Jehovah ntre n̄ko. Ndien edieke idade Jehovah nte Ete nnyịn, n̄kpọ ndomokiet idinamke nnyịn ndịk. (Ps. 118:6) Atsuko oro ikasiakde ke enyọn̄ emi ekesikere ke imekeme ndida ke idem imọ n̄kọk mfịna imọ. Edi enye ama okụt ata akwa ukpụhọde ke uwem ke ini enye ekekpepde nte Jesus ekesidude uwem onyụn̄ ọkwọrọde ikọ, akpan akpan nte enye ekenen̄erede ekpere Ete esie eke heaven idem. Atsuko ọdọhọ ete: “Enen̄ede an̄wan̄a mi ndien se owo ndinyene Ete nnyụn̄ mbuọt idem ye enye ọwọrọde.” Enye adian do ete: “Mmenen̄ede nnyene ata emem nnyụn̄ n̄kop inemesịt. Ke nditịm ntịn̄, ufọn idụhe ndifịna idem ke ntak n̄kpọ ndomokiet.”

Ewe ufọn en̄wen ke idibọ edieke idade Jehovah nte Ete nnyịn? Nditọ ẹsinen̄ede ẹma ete ye eka mmọ, ẹsinyụn̄ ẹyom ndinam esịt enem mmọ. Ima akanam Eyen Abasi ‘esinam se inemde Ete esie esịt kpukpru ini.’ (John 8:29) Ntre n̄ko ke edidi ye nnyịn, edieke imade Ete nnyịn eke heaven, iyanam  n̄kpọ nte enyene-ibuot eyen inyụn̄ ‘itoro enye an̄wan̄wa.’—Matt. 11:25; John 5:19.

Ete Nnyịn ‘Omụm Nnyịn Ubọk Nnasia’

Ete nnyịn eke heaven ọnọ nnyịn “andin̄wam,” oro edi, edisana spirit esie. Jesus ọkọdọhọ ke edisana spirit emi “ayada [nnyịn] usụn̄ odụk ke ofụri akpanikọ.” (John 14:15-17; 16:12, 13) Edisana spirit ekeme ndinam inen̄ede idiọn̄ọ Ete. Enye ekeme ndin̄wam nnyịn iwụri ndiọi ye mme ukwan̄ ekikere “eke ẹsọn̄ọde ẹdọn̄ n̄kam” ke esịt owo, onyụn̄ ‘omụm kpukpru ekikere nte mbuotekọn̄ anam ẹsụk ibuot ẹnọ Christ.’ (2 Cor. 10:4, 5) Ẹyak iben̄e Jehovah ọnọ nnyịn “andin̄wam” emi Eyen esie ọkọn̄wọn̄ọde mi, inyụn̄ inyene mbuọtidem ke ‘Ete nnyịn eke heaven ọyọnọ mbon oro ẹben̄ede enye edisana spirit.’ (Luke 11:13) Ọfọn n̄ko iben̄e Jehovah ite edisana spirit emi anam nnyịn itetịm isan̄a ikpere enye.

Ndịk isinamke eyenọwọn̄ ke ini ete esie omụmde enye ubọk asan̄a. Edieke adade Jehovah nte Ete fo, ikọ itie N̄wed Abasi emi ọyọsọn̄ọ fi idem, enye ọdọhọ ete: ‘Ami Jehovah Abasi fo mmụm fi ubọk nnasia, ndọhọ fi, nte, Kûfehe; ami n̄n̄wam fi.’ (Isaiah 41:13) Ih, emekeme ‘ndisan̄a’ ye Abasi ke nsinsi. Nso akwa ifet ke emi ekpedi ntem! (Mic. 6:8) Ka iso nam uduak Jehovah, ndien enye ayama fi, anam okop inemesịt, onyụn̄ ekpeme fi sia adade enye nte Ete fo.

[Ikọ Idakisọn̄]