“Ndinen Owo Ẹyeyama nte Utịn”

“Adan̄aoro ndinen owo ẹyeyama nte utịn ke obio ubọn̄ Ete mmọ.”—MATT. 13:43.

1. Nso n̄kpọ aban̄ade Obio Ubọn̄ Abasi ke Jesus akada uwụtn̄kpọ ekpep mme owo?

JESUS CHRIST ama esiwak ndinọ uwụtn̄kpọ m̀mê ndida n̄ke nnam se enye ekpepde mme owo aban̄a Obio Ubọn̄ Abasi an̄wan̄a. Enye “[ekesida] mme uwụtn̄kpọ etịn̄ ikọ ọnọ otuowo. Ke akpanikọ, enye [ikesitịn̄ke] ikọ inọ mmọ ke mîdịghe ke uwụtn̄kpọ.” (Matt. 13:34) Ke ini ọkọnọde uwụtn̄kpọ aban̄a nte ẹsisuande akpanikọ Obio Ubọn̄, enye ama etịn̄ aban̄a udeme emi esịt owo enyenede ke ndinam enye enyịme etop emi, ye se Jehovah esinamde man mme owo ẹkọri ke n̄kan̄ eke spirit. (Mark 4:3-9, 26-29) Enye ama ọnọ uwụtn̄kpọ en̄wen aban̄a nte mme owo ẹsinen̄erede ẹnyịme etop Obio Ubọn̄ kpa ye oro nnyịn mîsifiọkke emi ke ntọn̄ọ ntọn̄ọ. (Matt. 13:31-33) Enye ama owụt n̄ko ke idịghe kpukpru mbon oro ẹnyịmede etop Obio Ubọn̄ emi, edidot ndidụk enye.—Matt. 13:47-50. *

2. Ke uwụtn̄kpọ wheat ye mbiet, Jesus ọkọdọhọ ke eti n̄kpasịp ada aban̄a nso?

² Jesus ama ọnọ uwụtn̄kpọ kiet aban̄a mbon emi editienede imọ ikara ke Obio Ubọn̄ Abasi. Ẹkot uwụtn̄kpọ emi, uwụtn̄kpọ wheat ye mbiet, ndien enye odu ke Matthew ibuot 13. Ke uwụtn̄kpọ en̄wen, Jesus ọkọdọhọ ke n̄kpasịp oro ẹsuande ada aban̄a “ikọ obio ubọn̄,” edi ke uwụtn̄kpọ wheat ye mbiet, enye ọkọdọhọ ke eti n̄kpasịp ada aban̄a n̄kpọ en̄wen, oro edi, “nditọ obio ubọn̄.” (Matt. 13:19, 38) Nditọ emi idịghe mbon oro ẹdidude ke isọn̄, edi ẹdi “nditọ” m̀mê mme ada udeme nnyene ke Obio Ubọn̄ Abasi.—Rome 8:14-17; kot Galatia 4:6, 7.

Uwụtn̄kpọ Wheat ye Mbiet

3. Nso iketịbe inọ asuan n̄kpasịp ke uwụtn̄kpọ emi, ndien nso ke enye ẹkebiere ndinam?

³ Uwụtn̄kpọ oro aka ntem: “Obio ubọn̄ heaven ebiet owo eke asuande eti n̄kpasịp ke in̄wan̄ esie. Ke adan̄aemi mme owo ẹdede idap, asua esie edi onyụn̄ edisuan mbiet ọdọn̄ ke otu wheat, ndien ọnyọn̄. Ke ini enye asiahade ikọn̄ onyụn̄ on̄wụmde mfri, mbiet oro ẹnyụn̄ ẹsiaha n̄ko. Ndien ifụn enyeneufọk ẹto ẹdi ẹnyụn̄ ẹdidọhọ enye ẹte, ‘Ete, nte idịghe eti n̄kpasịp ke akasuan ke in̄wan̄ fo? Enye asan̄a didie, ndien, etịbe mbiet?’ Enye ọdọhọ mmọ ete, ‘Owo usua, akanam emi.’ Mmọ ẹdọhọ enye ẹte, ‘Ndi afo omoyom nnyịn, ndien, iwọrọ ika ikosion̄o mmọ?’ Enye ete, ‘Baba; mbak, ke adan̄aemi ẹsion̄ode mbiet, mbufo ẹdidịbede wheat ẹkọrọ ye mmọ. Ẹyak mmọ mbiba ẹkọri ọtọkiet tutu esịm ini ukpen̄e; ndien ke ini ukpen̄e nyọdọhọ mbon ukpen̄e nte, Ẹbem iso ẹsion̄o mbiet ẹnyụn̄ ẹbọp mmọ ke ebek ke ebek man ẹfọp mmọ, ndien ẹketan̄ wheat ẹdọn̄ ke ubet ubon n̄kpọ mi.’” —Matt. 13:24-30.

4. (a) Anie idi asuan n̄kpasịp oro? (b) Ini ewe ke Jesus ọkọtọn̄ọ ndisuan eti n̄kpasịp emi, ndien didie ke enye akanam emi?

 ⁴ Anie edi asuan n̄kpasịp oro akasuande eti n̄kpasịp ke in̄wan̄ esie? Jesus ama ọbọrọ mbụme emi ke ini enye eketịn̄de se uwụtn̄kpọ emi ọwọrọde ọnọ mme mbet esie, enye ọkọdọhọ ke “asuan n̄kpasịp edi Eyen owo.” (Matt. 13:37) “Eyen owo,” oro edi, Jesus, ọkọdiọn̄ in̄wan̄ emi eben̄e ini utọ ke isua ita ye ubak oro enye akanamde utom ukwọrọikọ esie mi ke isọn̄. (Matt. 8:20; 25:31; 26:64) Ndien ke Pentecost 33 E.N., enye ama ọtọn̄ọ ndisuan eti n̄kpasịp—kpa “nditọ obio ubọn̄” ke in̄wan̄ emi. Jesus, emi Jehovah ọnọde odudu, ọkọtọn̄ọ ndisuan eti n̄kpasịp emi ke ndondo oro enye akan̄wan̄ade edisana spirit ọduọk mbet esie, ke ntem emekde mmọ nte nditọ Abasi. * (Utom 2:33) Eti n̄kpasịp emi ama ọkọri akabade edi eti wheat. Mmọdo, ẹkesuan eti n̄kpasịp emi man ẹmek mbon oro ẹditienede inyene udeme inyụn̄ ikara ye Jesus ke Obio Ubọn̄ esie.

5. Anie idi asua oro ẹsiakde ke uwụtn̄kpọ oro, ndien mmanie ẹdi mbiet?

⁵ Anie idi asua oro, ndien mmanie idi mbiet oro ẹketịn̄de ẹban̄a? Jesus ọkọdọhọ ke asua oro “edi Devil.” Ndien ke mbiet edi “nditọ andidiọk.” (Matt. 13:25, 38, 39) Jesus eketịn̄ aban̄a mbiet emi  ẹkotde darnel. Idiọk mbiet emi esibiet wheat ke ini ọtọn̄ọde ndisehe. Enen̄ede odot ẹmen mbiet emi ẹdomo ye mme inua-okot Christian emi ẹdọhọde ke idi nditọ Obio Ubọn̄ edi emi mîn̄wụmke nti mfri. Mbon abian̄a emi ẹnamde nte idi mme anditiene Christ mi ẹsịne ke otu “mfri” Satan emi ẹkotde Devil.—Gen. 3:15.

6. Ini ewe ke mbiet oro ọkọtọn̄ọ nditịbe, ndien didie ke mme owo ‘ẹkede idap’?

⁶ Ini ewe ke mme Christian abian̄a emi ẹketọn̄ọ ndidu? Jesus ọkọdọhọ ete: “Ke adan̄aemi mme owo ẹdede idap.” (Matt. 13:25) Ini ewe ke mme owo ẹkede idap? Ibọrọ odu ke leta oro apostle Paul ekewetde ọnọ mbiowo esop Ephesus, enye ọkọdọhọ ete: “Mmọfiọk nte ke mma nnyọn̄ mme ndiọi wolf ẹyedụk ke otu mbufo idinyụn̄ inamke n̄kpọ ke mbọm ye otuerọn̄, ndien mme owo ẹyedaha ẹda ke otu mbufo ẹtịn̄ ukwan̄ ikọ man ẹdụri mbet ẹnọ idemmọ.” (Utom 20:29, 30) Enye ama ọdọhọ mmọ ete ẹnen̄ede ẹkpeme. Ke ini mme apostle emi ẹketiede “nte ukpan” ẹma ẹkede, oro edi, ẹma ẹkekpan̄a, ediwak mme Christian ẹma ẹkpọn̄ nnennen usụn̄. (Kot 2 Thessalonica 2:3, 6-8.) Ini oro ke mme Christian abian̄a ẹketọn̄ọ ndiwụt idem.

7. Ndi ndusụk wheat ẹkekabade ẹdi mbiet? Ntak ọdọhọde ntre?

⁷ Jesus ikọdọhọke ke wheat edikabade edi mbiet, edi ọkọdọhọ ke ẹkam ẹmemen mbiet ẹdisuan ke otu wheat. Mmọdo, uwụtn̄kpọ emi iban̄ake ata mme Christian emi ẹkpọn̄de esop Abasi, edi aban̄a se Satan esinamde man odomo ndibiat esop Abasi. Enye esida mbon abian̄a edisịn ke esop. Mbemiso akpatre apostle, oro edi, John akakpade, utọ mme owo emi ẹma ẹtọtọn̄ọ ndidụk esop Abasi.—2 Pet. 2:1-3; 1 John 2:18.

“Ẹyak Mmọ Mbiba Ẹkọri Ọtọkiet Tutu Esịm Ini Ukpen̄e”

8, 9. (a) Ntak emi se ete oro ọkọbọrọde ifịn esie akanamde uwụtn̄kpọ emi enen̄ede an̄wan̄a mme mbet Jesus? (b) Didie ke wheat ye mbiet oro ẹtịn̄de ẹban̄a ke uwụtn̄kpọ oro ẹkekọri ọtọkiet?

⁸ Ifịn Ete oro ẹma ẹkebụp enye ẹte: ‘Ndi omoyom iwọrọ ikosion̄o mbiet oro?’ (Matt. 13:27, 28) Enye ama ọnọ ibọrọ emi akpade owo idem. Ete mbon ọkọdọhọ mmọ ẹyak mbiet oro ye wheat ẹkọri ọtọkiet tutu esịm ini ukpen̄e. Se enye eketịn̄de oro ama anam n̄kpọ emi enen̄ede an̄wan̄a mme mbet Jesus. Sia emi ama anam mmọ ẹfiọk adan̄a nte ọsọn̄de ndifiọk ukpụhọde wheat ye mbiet darnel. Mbon oro ẹsitọde wheat ẹfiọk ke orụn̄ mbiet darnel esiwa-wan̄a ye orụn̄ wheat. * Emi akanam eteufọk oro ọdọhọ ifụn̄ esie ẹbet kan̄a.

⁹ Ukem ntre, ke ediwak isua ikie idahaemi, mme ido ukpono Christendom ẹsion̄o nsio nsio ndiọi mbiet ẹdi—akpa ekedi ke mme Ufọkabasi Roman Catholic ye Orthodox, ndien nte ini akade, ke mme ufọkabasi Protestant. Edi eti n̄kpasịp okosụk ododu ke ererimbot. Ete oro Jesus eketịn̄de aban̄a ama enyene ime ayak mbiet ye wheat oro ẹkọri ke ata anyan ini tutu esịm ini ukpen̄e emi edide isibiatke-biat ini.

Ini Ukpen̄e Oro Ẹketiede-Tie Ẹbet

10, 11. (a) Ini ewe idi ini ukpen̄e? (b) Didie ke ẹketan̄ ndamban̄a wheat ẹdọn̄ ke ubet ubonn̄kpọ Jehovah?

¹⁰ Jesus ọkọdọhọ ke “ini ukpen̄e edi utịt editịm n̄kpọ emi, ndien mbon ukpen̄e ẹdi mme angel.” (Matt. 13:39) Ke ndiọkeyo akpatre ini emi ke ẹbahade mmọ—ẹtan̄ ẹnyụn̄ ẹbahade nditọ Obio Ubọn̄ ẹsion̄o  ke otu mme ndamban̄a mbiet oro. Apostle Peter ama ewet aban̄a emi ete: “Ekem ini ikpe nditọn̄ọ ke ufọk Abasi. Edi edieke ebemde iso ọtọn̄ọ ye nnyịn, nso ididi utịt mbon emi mîsụkke ibuot inọ eti mbụk Abasi?”—1 Pet. 4:17.

¹¹ Ke ntọn̄ọ ntọn̄ọ akpatre ini m̀mê “utịt editịm n̄kpọ emi,” ẹma ẹtọn̄ọ ndikpe ikpe nnọ kpukpru mbon emi ẹdọhọde ke idi mme Christian—man ẹfiọk m̀mê mmọ ẹdi “nditọ obio ubọn̄” m̀mê “nditọ andidiọk.” Emi ọkọtọn̄ọ ye iduọ Akwa Babylon, ekem ẹma ẹtan̄ nditọ obio ubọn̄ ẹbok ọtọkiet ke ntọn̄ọ ntọn̄ọ ini ukpen̄e. (Matt. 13:30) Edi didie ke ẹketan̄ mme ndamban̄a wheat ẹdọn̄ ke ubet ubonn̄kpọ Jehovah? Ẹkenam emi, ke ndinam mmọ ẹdidụk esop Abasi emi ẹkefiakde ẹtọn̄ọ, emi mmọ ẹkedide ẹdikụt mfọn Abasi ẹnyụn̄ ẹnyene ukpeme esie, m̀mê ke ndinam mmọ ẹset ẹkenyene udeme mmọ ke heaven.

12. Ini ukpen̄e ebịghi adan̄a didie?

¹² Ini ikpe ebịghi adan̄a didie? Jesus okokot enye “ini,” ntre enye idịghe n̄kpọ usen kiet. (Edi. 14:15, 16) Ini ikpe mme Christian oro ẹyetde aran ayaka iso tutu akpatre ini emi esịm utịt, ke ẹma ẹfịk akpatre owo ke otu mmọ idiọn̄ọ ẹma.—Edi. 7:1-4.

13. Didie ke mme mbiet oro ẹnam mme owo ẹduọn̄ọ, ndien didie ke mmọ ẹnam ukwan̄ido?

¹³ Mmanie ke ẹditan̄ ifep ke Obio Ubọn̄, ndien didie ke mmọ ẹnam mme owo ẹduọn̄ọ ẹnyụn̄ ẹnam ukwan̄ido? (Matt. 13:41) Mme ọkwọrọ ederi Christendom emi ẹtiede nte mbiet, ẹbian̄a ediwak miliọn owo ke ediwak isua idahaemi. Mmọ ẹnam emi ke ndikpep mme ukpepn̄kpọ emi mînọhọ Abasi ubọn̄, kpa “n̄kpọ eke ẹsịnde owo ẹduọn̄ọ,” utọ nte ke ẹyetụhọde mme owo ke hell ye nte ke Abasi edi Ita-ke-Kiet. Mmọ ẹnịm ndiọi uwụtn̄kpọ ẹnọ mme anditiene mmọ. Mmọ ẹnam ufan ye ererimbot emi ẹnyụn̄ ẹdu oburobụt uwem. (Jas. 4:4) Ke adianade do, mmọ idọn̄ke enyịn ke mme idiọkn̄kpọ oro ikọt mmọ ẹnamde. (Kot Jude 4.) Kpa ye ofụri emi, okpokụt nte mmọ ẹsịnde ibuot ye itọn̄ ke n̄kpọ Abasi, edikere ke mmọ ẹma Abasi etieti. Nditọ Obio Ubọn̄ ẹnen̄ede ẹkop inemesịt nte ẹkebahade mmimọ ẹsion̄o ke otu ndiọi mbiet emi ye ke mme ukpepn̄kpọ mmọ oro ẹnamde mme owo ẹduọn̄ọ.

14. Didie ke mme ndamban̄a mbiet emi ẹtuan̄a ẹnyụn̄ ẹta edet?

¹⁴ Didie ke mme ndamban̄a mbiet emi ẹtuan̄a ẹnyụn̄ ẹta edet? (Matt. 13:42) “Nditọ andidiọk” ẹtuan̄a sia “nditọ obio ubọn̄” ẹnam mme owo ẹfiọk ke mmọ inamke se Abasi amade inyụn̄ ikpepke akpanikọ. Ntak en̄wen edi sia ikọt mmọ inọhọ mmọ un̄wam aba nte ẹkesinọde, inyụn̄ isụkke ibuot aba inọ mmọ.—Kot Isaiah 65:13, 14.

15. Didie ke ẹtan̄ mbiet oro ẹkefọp ke ikan̄?

¹⁵ Didie ke ẹtan̄ mbiet oro ẹkefọp ke ikan̄? (Matt. 13:40) Ndifọp mmọ ke ikan̄ ada aban̄a se iditịbede inọ mmọ ke  akpatre. Nditop mmọ ndọn̄ ke ndamban̄a n̄kpọdiọhọ ikan̄ ọwọrọ ke ẹdisobo mmọ ke nsinsi. (Edi. 20:14; 21:8) Ẹyesobo mme inua-okot Christian emi ofụri ofụri ke ini “akwa ukụt.”—Matt. 24:21.

Mmọ “Ẹyeyama nte Utịn”

16, 17. Nso ke Malachi ọkọdọhọ ke editịbe ke temple Abasi, ndien didie ke emi ọkọtọn̄ọ ndisu?

¹⁶ Ini ewe ke mme ndamban̄a wheat oro “ẹkeyama nte utịn”? (Matt. 13:43) Malachi ama etịn̄ se iditịbede ke ini ẹdidide idinam temple Abasi asana, enye ọkọdọhọ ete: “Ndien ọbọn̄ emi mbufo ẹyomde, kpa angel ediomi emi enemde mbufo esịt, ayabuat mbufo ke temple esie ke idaha kiet. Sese, enye ke edi: Jehovah mme udịm ọdọhọ. Edi anie ekeme ndiyọ usen edidi esie? Anie owo ekeme ndida ke ini enye ayararede idem esie? Koro enye ebietde ikan̄ usọ-gold, onyụn̄ ebiet soap mme ọdiọn̄-ọfọn̄: enye onyụn̄ etie etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.”—Mal. 3:1-3.

¹⁷ Kaban̄a eyo nnyịn emi, ntịn̄nnịm ikọ emi ọkọtọn̄ọ ndisu ke 1918, kpa ini emi Jehovah ye “angel ediomi,” oro edi, Jesus Christ, ẹkedide ẹdise se ikade iso ke temple eke spirit. Malachi ama etịn se iditịbede ke ẹma ẹkụre edinam asana emi, enye ọkọdọhọ ete: “Mbufo ẹyetọn̄ọ ntak ẹkụt nte eti ye idiọk ẹsan̄ade isio, ye nte anam n̄kpọ Abasi ye owo eke mînamke n̄kpọ esie ẹsan̄ade isio.” (Mal. 3:18) N̄kọri oro ata mme Christian emi ẹkefiakde ẹsọn̄ọ mmọ idem ẹnamde, owụt ke ini ukpen̄e ọkọtọn̄ọ ke 1918.

18. Nso ke prọfet Daniel ọkọdọhọ ke editịbe ke ini nnyịn emi?

¹⁸ Prọfet Daniel eketịn̄ aban̄a ini nnyịn emi ke ini enye ọkọdọhọde ete: “Mmọ eke ẹnyenede eti ibuot ẹyeyama nte ikpa-enyọn̄ ayamade: mmọ eke ẹnamde ediwak owo ẹkabade ẹdi edinen, ẹyenyụn̄ ẹbiet ntanta-ọfiọn̄ ke nsinsi-nsinsi.” (Dan. 12:3) Mmanie ẹyama nte ikpa-enyọn̄ mfịn? Mmọ ẹdi mme Christian oro ẹyetde aran, kpa wheat oro Jesus eketịn̄de aban̄a ke uwụtn̄kpọ wheat ye mbiet. N̄ko, mbon mbieterọn̄ ndikaka iso n̄wak, enen̄ede owụt ke mbon ukpen̄e ke ẹsion̄o mme abian̄a abian̄a Christian. Ndien sia mmọ ẹdianade ye nsụhọ Israel eke spirit, akwa otuowo emi, kpa mbon emi ẹdidude ke isọn̄ ke ini Obio Ubọn̄ Abasi edikarade, ke ẹnam un̄wana mmọ ayama ke idiọk ererimbot emi.—Zech. 8:23; Matt. 5:14-16; Phil. 2:15.

19, 20. Nso ke “nditọ obio ubọn̄” ẹnen̄ede ẹtie ẹbet, ndien ewe mbụme ke ẹdibọrọ urua en̄wen?

¹⁹ Mfịn, “nditọ obio ubọn̄” ke ẹtie ẹbet ndikọbọ ọsọn̄urua udeme mmọ ke heaven. (Rome 8:18, 19; 1 Cor. 15:53; Phil. 1:21-24) Edi tutu esịm ini oro, ana mmọ ẹka iso ẹnam akpanikọ, ẹyama, ẹkûnyụn̄ ẹbiet “nditọ andidiọk.” (Matt. 13:38; Edi. 2:10) Ndi esịt inemke nnyịn nditiene n̄kụt se itịbede ke ini ẹsatde mbiet emi ke ndamban̄a usụn̄ ẹsion̄o?

²⁰ Edi, nso ke nditọ Obio Ubọn̄ ẹbuana ye akwa otuowo emi ẹkade-ka iso ndiwak, emi ẹnyụn̄ ẹnyenede idotenyịn ndidu uwem ke nsinsi mi ke isọn̄ ke ini Obio Ubọn̄ Abasi edikarade? Ẹyebọrọ mbụme emi urua en̄wen.

[Mme Ikọ Idakisọn̄]

Nte Afo Emeti?

Ke uwụtn̄kpọ Jesus oro aban̄ade wheat ye mbiet, nso ke mme ikọ emi ẹda ẹban̄a?

• Eti n̄kpasịp

• Asuan n̄kpasịp

• Ndisuan n̄kpasịp

• Asua

• Mbiet

• Ini ukpen̄e

• Ubet ubonn̄kpọ

• Editua ye ẹdita edet

• N̄kpọdiọhọ ikan̄

[Mme Mbụme Ukpepn̄kpọ]

[Ndise ke page 20]

Ẹketọn̄ọ nditọ eti n̄kpasịp ke Pentecost 33 E.N.

[Ndise ke page 23]

Ke ẹtan̄ ndamban̄a wheat ẹdọn̄ ke ubet ubonn̄kpọ Jehovah idahaemi

[Ebiet ẹdade n̄kpọ ẹto]

Pictorial Archive (Near Eastern History) Est.