San̄a ke Spirit Nyụn̄ Du Uwem nte Owo Emi Ama Akayak Idem Ọnọ Abasi

“Ẹka iso ẹsan̄a ke spirit ndien mbufo idinamke baba n̄kpọ kiet emi ọdọn̄de obụkidem.”—GAL. 5:16.

1. Orụk baptism ifan̄ ke mme owo ẹkena ke usen Pentecost?

KE USEN Pentecost isua 33 E.N., mme mbet Jesus ẹma ẹsem nsio nsio usem ke ẹma ẹkeda edisana spirit ẹnịm mmọ baptism. Ndien ẹma ẹnọ mmọ nsio nsio enọ eke spirit. (1 Cor. 12:4-10) Nso ikedi ufọn enọ emi ye ufọn utịn̄ikọ emi apostle Peter ọkọnọde usen oro? Ẹdọhọ ke ‘esịt ama afịna ediwak owo.’ Ndien mmọ ẹma ẹkabade esịt ẹnyụn̄ ẹna baptism nte Peter okonyụn̄ ọdọhọde mmọ ẹnam. Bible ọdọhọ ke “Mbon emi ẹkenyịmede ikọ esie ke ofụri esịt [ẹma] ẹna baptism, ndien ke usen oro n̄kpọ nte ukpọn̄ tọsịn ita ẹdiana ye mmọ.” (Utom 2:22, 36-41) Ekeme ndidi ẹkenịm mmọ baptism ke  mmọn̄ ke enyịn̄ Ete ye Eyen ye edisana spirit, nte Jesus eketemede.—Matt. 28:19.

2, 3. (a) Nso idi ukpụhọde edida edisana spirit nnịm owo baptism ye ndina baptism ke enyịn̄ edisana spirit? (b) Ntak emi anade kpukpru ata mme Christian ẹna baptism ke mmọn̄?

² Ndi ndida edisana spirit nnịm owo baptism okpụhọde ye ndinịm owo baptism ke enyịn̄ edisana spirit? Ih, okpụhọde. Mbon oro ẹdade edisana spirit ẹnịm mmọ baptism ẹdi mbon emi ẹtọn̄ọde ntak ẹmana nte nditọ Abasi eke spirit. (John 3:3) Ẹyet mmọ aran man ẹkpetiene Christ ẹkara, ẹnyụn̄ ẹdi mme udiana oku ke Obio Ubọn̄ heaven. Mmọ ẹdi ubak idem eke spirit Christ. (1 Cor. 12:13; Gal. 3:27; Edi. 20:6) Ntre, baptism emi, oro edi, ndida edisana spirit nnịm owo baptism, ke Jehovah akada spirit esie enịm mme mbet Jesus ke usen Pentecost, ekem emek mbon emi ẹditienede Christ ikara. (Rome 8:15-17) Edi, nso kaban̄a edinịm mme owo baptism ke enyịn̄ edisana spirit, emi nnyịn isinịmde ke mbono nnyịn?

³ Ata mme Christian ẹsina baptism ke mmọn̄ man ẹwụt ke ima iyak idem ofụri ofụri inọ Jehovah Abasi. Mme Christian emi ẹdikade heaven ẹsina baptism ke mmọn̄. Ntre n̄ko ke oyom ediwak miliọn mme owo mfịn emi ẹnyenede idotenyịn ndidu nsinsi uwem ke isọn̄ ẹna baptism ke mmọn̄. Inamke n̄kpọ m̀mê owo edika heaven m̀mê edidu ke isọn̄, ana enye ana baptism ke enyịn̄ Ete ye Eyen ye edisana spirit, man Abasi enyịme enye. Ke ntre, ẹyom kpukpru mbon emi ẹnade baptism “ẹka iso ẹsan̄a ke spirit.” (Kot Galatia 5:16.) Ndi ke asan̄a ke spirit onyụn̄ odu uwem nte owo emi ama akayak idem ọnọ Abasi?

Se ‘Ndisan̄a ke Spirit’ Ọwọrọde

4. Nso ke ‘ndisan̄a ke spirit’ ọwọrọ?

⁴ Ndisan̄a ke spirit ọwọrọ ndiyak edisana spirit ada fi usụn̄, oro edi, ndiyak enye eteme fi se akpanamde ke usen ke usen. Galatia Ibuot 5 anam ẹdiọn̄ọ owo emi edisana spirit adade usụn̄ ye enye emi etienede udọn̄ obụkidem.—Kot Galatia 5:17, 18.

5. Nso ke owo emi ayakde edisana spirit ada enye usụn̄ mîdinamke?

⁵ Edieke edisana spirit adade fi usụn̄, eyesịn ukeme etre ndinam ubọkutom obụkidem, oro edi, “use, mbubiam ido, obukpo ido, ukpono ndem, ubụpekpo, usua, utọk, ufụp, obom obom iyatesịt, ndomoidem, ubahade, isio n̄ka, isịnenyịn, mbun̄wọn̄i, [ye] uyom uyom usọrọ.” (Gal. 5:19-21) Ndien emi owụt ke “[amada] spirit [owot] mme edinam ikpọkidem.” (Rome 8:5, 13) Emi ayanam ekere n̄kpọ eke spirit onyụn̄ etiene ndausụn̄ esie, utu ke ndidụk ufụn nnọ obụkidem.

6. Nọ uwụtn̄kpọ ke se ẹkpenamde man ẹkeme ndin̄wụm mbun̄wụm spirit.

⁶ Edieke enyenede edisana spirit eyenyene nti edu, oro edi, “mbun̄wụm spirit.” (Gal. 5:22, 23) Anaedi ọmọfiọk ke ana esịn ifịk man ekeme ndin̄wụm mbun̄wụm spirit. Da ọtọ-in̄wan̄ emi ama ọkọtọ n̄kpọ ke in̄wan̄ esie ama uwụtn̄kpọ. Enye ọfiọk ke n̄kpọ-in̄wan̄ imọ oyom eyo ye mmọn̄ man ekeme ndidụk idem. Yak idọhọ ke edisana spirit edi eyo. Oyom inyene edisana spirit man ikeme ndin̄wụm mbun̄wụm spirit. Edi, ndi emekere ke  ọtọin̄wan̄ ọyọdọk n̄kpọ ndomokiet ke in̄wan̄ esie edieke enye mîkesịnke idem inam utom? (N̄ke 10:4) Ukem ntre, nte esịnde idem ekpep n̄kpọ ntre ke editetịm in̄wụm mbun̄wụm spirit. Bụp idemfo ete: ‘Ndi mmayak edisana spirit ada mi usụn̄ man n̄keme ndin̄wụm mbun̄wụm spirit?’

7. Ntak emi anade isịn idem ikpep Ikọ Abasi inyụn̄ itie ikere edieke iyomde ndin̄wụm mbun̄wụm spirit?

⁷ Ana ọtọin̄wan̄ ọduọk mmọn̄ ke in̄wan̄ esie man n̄kpọ-in̄wan̄ ekeme ndidụk idem. Mmọdo, ana ọn̄wọn̄ mmọn̄ akpanikọ emi esop Abasi ẹnọde, emi onyụn̄ odude ke Bible man ekeme ndin̄wụm mbun̄wụm spirit. (Isa. 55:1) Anaedi emesitịn̄ ọnọ mme owo nte ke edisana spirit Abasi akada mbon oro ẹkewetde Bible usụn̄. (2 Tim. 3:16) Ke ofụn emi anamde akpanikọ onyụn̄ enyenede ọniọn̄ anam akpanikọ emi odude ke Bible enen̄ede an̄wan̄a mme owo. (Matt. 24:45-47) Imọfiọk ke ana ikot Ikọ Abasi inyụn̄ itie ikere se ikotde man edisana spirit Abasi ada nnyịn usụn̄. Edieke anamde emi, ọwọrọ ke etiene nti uwụtn̄kpọ mme prọfet emi “[ẹketịmde] ẹbụp ẹnyụn̄ ẹtịm ẹnam ndụn̄ọde” ẹban̄a se ẹketịn̄de ẹnọ mmọ. Enen̄ede enem ndifiọk ke idem mme angel ẹnen̄ede ẹnyene udọn̄ ke akpanikọ aban̄ade Mfri oro ẹken̄wọn̄ọde ye esop mme Christian emi ẹyetde aran.—Kot 1 Peter 1:10-12.

Didie ke Edisana Spirit Esida Owo Usụn̄?

8. Ntak emi ọfọnde eben̄e Jehovah spirit esie?

⁸ Ikụreke ke ndikpep Bible nnyụn̄ ntie n̄kere se ikpepde kpọt. Ana aka iso eben̄e Jehovah an̄wam fi onyụn̄ ada fi usụn̄. Enye ekeme ‘ndinam n̄kan kpukpru se nnyịn iben̄ede’ enye. (Eph. 3:20; Luke 11:13) Edieke owo obụpde ntak emi anade imọ ika iso iben̄e Abasi n̄kpọ, ke ini edide Abasi ọfiọk ‘mme n̄kpọ emi imọ iyomde idem mbemiso iben̄ede enye,’ nso ke ekpetịn̄? (Matt. 6:8) Se idude edi nte ke ndibọn̄ akam mben̄e Jehovah edisana spirit esie owụt ke imọbuọt idem ye enye. Ke uwụtn̄kpọ, edieke owo edide ebịne fi ete an̄wam imọ, anaedi ayanam se ededi emi ekemede man an̄wam enye, koro enye ndidi mbịne fi owụt ke enye enịm ke emekeme ndin̄wam imọ. (Men Mme N̄ke 3:27 domo.) Ntre n̄ko ke esinem Jehovah ke ini eben̄ede enye spirit esie, ndien enye ọyọnọ fi.—N̄ke 15:8.

9. Didie ke ndidụk mme mbono esop ekeme ndinam edisana spirit Abasi ada nnyịn usụn̄?

⁹ Eyenem fi ndifiọk ke n̄kpọ en̄wen emi akpanamde man spirit Abasi ada fi usụn̄ edi ndisidụk mme mbono esop, ye n̄kpri ye ikpọ mbono. Enen̄ede ọfọn ndidomo ukeme ndụk nnyụn̄ n̄kpan̄ utọn̄ ke se ẹnamde ke mme mbono emi. Emi ayanam “ntotụn̄ọ n̄kpọ Abasi” enen̄ede an̄wan̄a fi. (1 Cor. 2:10) Ndisibọrọ mbụme ke mbono esop kpukpru ini esifọn n̄ko. Kere ban̄a mme mbono esop emi okodụkde ke urua inan̄ emi ẹkebede. Ikafan̄ ke ekemenede ubọk ndibọrọ mbụme, man etịn̄ se ọfiọkde aban̄a Abasi? Ndi oyom afiak anam n̄kpọ ke afan̄ emi? Edieke edide ntre, biere se edinamde ke mme mbono esop. Jehovah oyokụt ke enen̄ede ọdọn̄ fi nditiene nnam se ẹnamde ke esop, enye oyonyụn̄ ọnọ fi spirit esie, ndien spirit emi ayanam  enen̄ede ọfiọk se ekpepde ke mbono esop.

10. Nso ke idikot mbon en̄wen edinam edieke isan̄ade ke spirit?

¹⁰ Edieke isan̄ade ke spirit, iyanam se Ediyarade 22:17 ọdọhọde; itien̄wed oro ọdọhọ ete: “Spirit ye n̄wanndọ ẹka iso ẹdọhọ ẹte: ‘Di!’ Ndien yak owo eke okopde ọdọhọ ete: ‘Di!’ Yak owo eke itọn̄ asatde edi; yak owo eke amade ọbọ mmọn̄ uwem ọn̄wọn̄ ke mfọn.” Spirit emi anam otu an̄wan ndọ emi ẹyetde aran ẹkot mme owo ẹdin̄wọn̄ mmọn̄ uwem. Edieke edide ama enyịme ikot emi, onyụn̄ ‘edi,’ ndi emebiere ndikot mbon en̄wen ẹtiene ‘ẹdi’? Edi ata akwa ifet nditiene nnam utom unyan̄a uwem emi!

11, 12. Didie ke edisana spirit an̄wam ke utom ukwọrọikọ?

¹¹ Edisana spirit ada usụn̄ ke akpan utom emi. Bible etịn̄ nte edisana spirit ekesin̄wamde mme isụn̄utom ke akpa isua ikie ẹkekwọrọ ikọ ke mme obio oro owo mîkọkwọrọke ikọ. ‘Edisana spirit ama ọbiọn̄ọ apostle Paul ye nsan̄a esie nditịn̄ ikọ ke n̄kann̄kụk Asia’; ikonyụn̄ iyakke mmọ ẹdụk Bithynia. Nnyịn inen̄ekede ifiọk nte edisana spirit akasan̄ade ọbiọn̄ọ mmọ nditịn̄ ikọ ke mme obio oro, edi imọfiọk ke spirit akanam Paul ọkọkwọrọ ikọ ke Europe. Enye ama okụt ke n̄kukụt nte owo Macedonia ekpede enye ubọk ete edin̄wam mmimọ.—Utom 16:6-10.

¹² Spirit Jehovah ada usụn̄ ke utom ukwọrọikọ emi ẹnamde ke ofụri ererimbot mfịn. Owo iwụtke mme owo ke n̄kukụt aba ebiet emi mmọ ẹkpekade, utu ke oro, Jehovah ada edisana spirit esie an̄wam mme Christian oro ẹyetde aran. Spirit emi anam nditọete nnyịn ẹsịn ofụri ukeme ẹkwọrọ ikọ ẹnyụn̄ ẹkpep mme owo Bible. Anaedi emesitiene ọkwọrọ ikọ. Ndi emekeme ndinam utom emi etetịm okpon akan nte esinamde?

13. Didie ke ekeme nditiene ndausụn̄ edisana spirit? Nọ uwụtn̄kpọ.

¹³ Edieke anamde se ẹdọhọde ikọt Abasi ẹnam, ọwọrọ ke emetiene ndausụn̄ edisana spirit. Da ekpri Mihoko emi odụn̄de ke Japan ke uwụtn̄kpọ. Ke ini enye ọkọtọn̄ọde usiakusụn̄, enye ekekere ke imọ idikemeke ndikpep mme owo n̄kpọ, koro imọ idiọn̄ọke se iditịn̄de inọ mmọ. Ndien kpa ini oro, ẹma ẹnọ ekikere ke nte ẹkpenamde mfiakn̄ka ke Utom Obio Ubọn̄ Nnyịn. Ndien ẹma ẹsio ediye uduot ekpri n̄wed oro, A Satisfying Life—How to Attain It. N̄wed oro ama enen̄ede enyene ufọn ke Japan. Mihoko ama anam ekikere oro ẹkenọde ke nte ẹkpedade n̄wed emi ẹnịm ibio ibio ukpepn̄kpọ Bible. Enye ama ọtọn̄ọ ndinyene ediwak ukpepn̄kpọ Bible, idem ekpepde mbon emi ekemede ndidi ikesimaha ndikpep Bible. Enye ọdọhọ ete, “mma nnyene ediwak ukpepn̄kpọ Bible; enyene ini emi mbon emi nsikpepde n̄kpọ ẹkewakde ẹsịm owo 12, tutu ndidọdọhọ ndusụk owo ẹbet kan̄a.” Eyenyene ediwak edidiọn̄ edieke asan̄ade ke spirit anam se ẹdọhọde mme asan̄autom Jehovah ẹnam.

Beri Edem ke Spirit Abasi

14, 15. (a) Didie ke mme anana-mfọnmma owo ẹkeme ndidu uwem nte mbon emi ẹma ẹkeyak idem ẹnọ Abasi? (b) Didie ke ekeme ndinyene ata nti ufan?

¹⁴ Emenyene utom ndinam sia edide  asan̄autom oro ẹma ẹkedori ubọk. (Rome 10:14) Emekeme ndikere ke imọ idotke ndinam utom emi. Edi, Abasi anam fi odot ndinam utom emi, ukem nte enye anamde mme Christian oro ẹyetde aran ẹdot. (Kot 2 Corinth 3:5.) Eyekeme ndidu uwem nte owo emi ama akayak idem ọnọ Abasi edieke adade ofụri ukeme fo anam n̄kpọ esie, onyụn̄ eberi edem ke spirit esie.

¹⁵ Imọfiọk ke imemke utom nnyịn mme anana-mfọnmma owo ndinam se ikọn̄wọn̄ọde ke ini ikayakde idem inọ Jehovah Abasi, emi edide mfọnmma. Mfịna en̄wen edi nte ke nte odude uwem idahaemi ekeme ndikpa ndusụk mbon emi ekesidụkde ndụk idem, onyụn̄ anam mmọ ‘ẹsụn̄i fi.’ (1 Pet. 4:4) Edi, kûfre ke emedinyene mbufa ufan, ndien ke Jehovah ye Jesus Christ ẹdi ata akpan ufan fo. (Kot James 2:21-23.) Eyenen̄ede ọfọn emehe ye nditọete ke esop mbufo, sia mmọ ẹsịne ke ‘otu nditọete’ nnyịn emi ẹdude ke ofụri ererimbot. (1 Pet. 2:17; N̄ke 17:17) Jehovah ayada spirit esie anam enyene mme ufan emi ẹdinamde anam se ifọnde.

16. Didie ke ekeme ‘ndikop inemesịt ke mmemidem’ nte Paul?

¹⁶ Kpa ye emi enyenede nti ufan ke esop Abasi, ekeme ndisọn̄ fi ndiyọ mme mfịna eke usen ke usen. Ndusụk mfịna emi ẹkeme ndinam idem emem fi onyụn̄ anam etie nte n̄kpọ eke ẹdọhọde ke mfịna fo okpon akan. Utọ ini ntem ọfọn eben̄e Jehovah edisana spirit esie. Apostle Paul ọkọdọhọ ke ‘adan̄aemi imọ ikopde mmemidem, adan̄aoro ke ikop odudu.’ (Kot 2 Corinth 4:7-10; 12:10.) Paul ama ọfiọk ke spirit Abasi ekeme ndin̄wam nnyịn ke ini inyenede mfịna, inamke n̄kpọ m̀mê nso utọ mfịna ke inyene. Mmọdo, anamutom odudu Abasi ekeme ndisọn̄ọ fi idem ini ekededi emi okopde mmemidem onyụn̄ oyomde un̄wam. Paul ọkọdọhọ ke “[imokop] inemesịt ke mmemidem.” Ini emi idem ekememde Paul ke enye ekenen̄ede okụt nte edisana spirit an̄wamde imọ. Edisana spirit ekeme ndin̄wam fi n̄ko!—Rome 15:13.

17. Didie ke edisana spirit ekeme ndin̄wam nnyịn idu uwem nte mme asan̄autom Jehovah?

¹⁷ Imoyom spirit Abasi man ikeme ndidu uwem nte mbon oro ẹma ẹkeyak idem ẹnọ Abasi. Da nte ke edi etubom nsụn̄ikan̄. Oyom ndikpono Jehovah ke nsinsi. Edisana spirit etie nte ofụm emi esimende nsụn̄ikan̄ sụn̄sụn̄ tutu ekesịm esụk. Imọfiọk ke uyomke spirit ererimbot Satan emi emen fi oyo. (1 Cor. 2:12) Kpep ndiọn̄ọ nnennen ofụm emi ekpetienede. Edisana spirit edi nnennen ofụm emi. Edisan̄a spirit esida Ikọ Abasi ye esop Abasi emi enye adade usụn̄ eteme nnyịn se ikpanamde.

18. Nso ke ebiere ndinam, ndien ntak?

¹⁸ Edieke edide ke ekpep Bible ye Mme Ntiense Jehovah, onyụn̄ esitiene odụk mme mbono esop, edi uyakke kan̄a idem unọ Abasi unyụn̄ una baptism, bụp idemfo ete, ‘Ntak emi mmenyakke idem nnọ Abasi nnyụn̄ nna baptism?’ Edieke ọfiọkde se edisana spirit anamde man osu uduak Jehovah mfịn, ndien omonyụn̄ ama se enye anamde emi, mbọk nam se ekpepde ke Bible. Jehovah eyenen̄ede ọdiọn̄ fi. Enye ayan̄wan̄a edisana spirit esie ọnọ fi. Edieke edide ebịghi esisịt akana baptism, ọwọrọ ke emenen̄ede okụt nte edisana spirit esin̄wamde fi. Omokụt nte Abasi adade spirit esie ọsọn̄ọ fi idem. Spirit emi ekeme ndika iso nsọn̄ọ fi idem, idem ke nsinsi nsinsi. Ke ntre, biere ndika iso nsan̄a ke spirit.

Nte Afo Emeti?

• Nso ke ‘ndisan̄a ke spirit’ ọwọrọ?

• Nso idin̄wam fi ‘aka iso asan̄a ke spirit’?

• Didie ke ekeme ndidu uwem nte owo emi ama akayak idem ọnọ Abasi?

[Mme Mbụme Ukpepn̄kpọ]

[Ndise ke page 15]

Oyom isịn idem ikpep n̄kpọ kpa nte ọtọin̄wan̄ esisịnde idem ọtọ n̄kpọ ke in̄wan̄ esie

[Mme ndise ke page 16, 17]

Ndi spirit Abasi esida fi usụn̄?