Ndiyọ Afanikọn̄ Anam Inen̄ede Ibuọt Idem ye Jehovah

Nte Ada Dello Stritto Obụkde

Ndi isua 36. Idahaoro ke nsụk n̄kụre ndision̄o se idude ke itie N̄wed Abasi usen mfịn n̄wet ke n̄wed mi. Edi ndision̄o ikọ ifan̄ emi kpọt n̄wet ada mi ofụri hour iba. Ntak ebịghide ntre? Yak eka mi etịn̄ ọnọ fi.—Joel

AMI ye Luigi ebe mi idi kiet ke otu Mme Ntiense Jehovah; ikana baptism ke 1968. Akpan mi ekere David, udọ ekere Marc, udọ udọ ekere Joel. Joel akamana ke 1973 ke ufọkibọk Binche ke Belgium. To do sịm Brussels emi edide ibuot obio Belgium edi n̄kpọ nte kilomita 60. Joel ikekemke ọfiọn̄ ke ini enye akamanade, ntre enye ama ekpri etieti. Ke ini ekekemde ndisio nnyịn unyọn̄, ẹma ẹdọhọ nyak enye afiak okpon esisịt ke ufọkibọk mbemiso ndimen enye.

Ke urua ifan̄ ama ekebe, eyen nsek okosụk ada nte akakade, ntre ami ye ebe mi ima imen enye ibịne abiausọbọ nditọwọn̄. Ke enye ama ekese Joel idem ama, abiausọbọ oro ama ọdọhọ ete: “Joel enyene mfịna emi nditọeka esie mînyeneke.” Enye ama etie ntem sụn̄-n̄ ke ata anyan ini. Emi ama anam mfiọk ke Joel enyene ata akamba mfịna. Ekem enye ama ada ebe mi ọwọrọ ọkọdọhọ enye ete: “Eyen fo enyene ata idiọk udọn̄ọ emi ẹkotde Down syndrome.”

Se abiausọbọ emi eketịn̄de ama anam esịt ọduọ nnyịn, ntre ima ida Joel ibịne abiausọbọ en̄wen. Abiausọbọ emi ama enen̄ede ese Joel idem ke n̄kpọ nte hour kiet, inyụn̄ isioroke uyo. Eketie nnyịn ke idem nte ke enye idisehe eyen oro idem ima usen oro. Ke akpatre, abiausọbọ oro ama emenede enyịn ese nnyịn onyụn̄ ọdọhọ ete: “Eyen emi idikemeke ndinam n̄kpọ ndomokiet ke idemesie.” Ekem enye ama etịn̄ sụn̄sụn̄ ete: “Edi eyenem Joel ndifiọk ke ete ye eka imọ ẹnen̄ede ẹma imọ.” Eyet ama oyom ndibọhọ mi, ntre mma mmen Joel sụn̄sụn̄ n̄kama, inyụn̄ ida enye inyọn̄ ufọk. Joel ekedi n̄kpọ nte ọfiọn̄ iba kpọt.

Mbono Esop ye Ukwọrọikọ Ẹma Ẹsọn̄ọ Nnyịn Idem

Nte mbiausọbọ ẹkekade iso ẹse Joel idem, ẹma ẹkụt ke enye enyene n̄ko ata idiọk mfịna ke esịt, n̄ko ke ọkpọ esie ẹmem etieti. Sia esịt esie okokponde akaha, emi ama efịk obufre esie onyụn̄ anam enye  esidọn̄ọ ndien ndien. Joel ama ọdọn̄ọ udọn̄ọ obufre ke ini enye ekedide ọfiọn̄ inan̄, ndien ima imen enye ifiak ika ufọkibọk, ẹkenyụn̄ ẹsio enye ẹnịm isio ke ntak udọn̄ọ emi. Mbọm esie ama enen̄ede anam nnyịn ke ini ikụtde nte enye amian̄ade. Ama enen̄ede ọdọn̄ nnyịn ndikam ntotụk enye nse, edi owo ikayakke isan̄a ikpere enye ofụri ọfiọn̄ iba ye ubak. N̄kukụre se ami ye ebe mi ikesinamde ekedi ndinyụn̄ nsese enye ntre, mfat kiet eken n̄kama mbọn̄ akam.

Ke ofụri ini afanikọn̄ emi, ami ye ebe mi ye akpan ye udọ nnyịn emi ẹkedide isua 6 ye isua 3 ini oro, ikafiakke mbono esop. Ndika mbono esop ama anam inen̄ede ikụt ke Jehovah ekere aban̄a nnyịn. Ke ini ikụtde nte nditọete ẹkande nnyịn ẹkụk ke Ufọkmbono Obio Ubọn̄, eketie nte n̄kpọ eke Jehovah emende nnyịn akama, ndien emi ama esin̄wam nnyịn. (Ps. 55:22) Idem mme nurse oro ẹkesede Joel enyịn ẹma ẹdọhọ ke imokụt ke ndidụk mbono esop enen̄ede an̄wam nnyịn.

Mma mben̄e Jehovah n̄ko nte ọnọ mi ukeme n̄ka ukwọrọikọ. Utu ke nditie ke ufọk ntua eyet, ama esidọn̄ mi ndinam mme owo ẹfiọk ke se in̄wamde mi nyọ afanikọn̄ mi edi mbuọtidem emi nnyenede nte ke owo ididọn̄ọke aba ke ererimbot oro Abasi ọn̄wọn̄ọde. Ini ekededi oro n̄kade ukwọrọikọ, mma n̄kụt ke Jehovah ọbọrọ akam mi.

“Akanam N̄kwe Utọ N̄kpọ Emi!”

Ke ini ikemende Joel idisịm ufọk ke ẹma ẹkesio enye ke ufọkibọk, esịt ama enen̄ede enem nnyịn. Edi ke ndan̄nsiere, n̄kpọ mmọn̄eyet ama etịbe. Idem Joel ama ọdiọk akan akpa, ndien ima ifiak imen enye ifehe ika ufọkibọk. Ke abiausọbọ ama ekese Joel idem ama, enye ama ọdọhọ nnyịn ete: “N̄kereke ke Joel oyodu ebe ọfiọn̄ itiokiet.” Ke ọfiọn̄ iba ama ekebe, ke ini Joel ekedide n̄kpọ nte ọfiọn̄ itiaita, eketie nte enye ọmọn̄ akpa nte abiausọbọ ọkọdọhọde, sia idem ama ọdiọk enye etieti. Abiausọbọ ama ọdọhọ nnyịn ete: “Owo ikemeke ndinyan̄a.” Ekem adian ete: “Jehovah kpọt ekeme ndinyan̄a enye.”

Mma mfiak n̄ka ubet emi ẹkenịmde Joel ke ufọkibọk. Kpa ye oro idem ekenen̄erede emem mi, n̄koyomke ndikpọn̄ ebiet emi enye akanade. Nditọete iban ẹma ẹsididu ye ami, sia ebe mi ekesede aban̄a akpan ye udọ nnyịn. Ke urua kiet ama ekebe, ifehesịt ama anam Joel. Mme nurse ẹma ẹmen enye ẹfehe ẹdụk ubet, edi ikekemeke ndinam n̄kpọ ndomokiet. Nurse kiet ama edidọhọ mi ke minit ifan̄ ebede ete: “Okụre ndien . . . ” Mma ntua n̄wọrọ ke ubet oro. Mma ndomo ndibọn̄ akam nnọ Jehovah, edi n̄kọfiọkke se n̄kpetịn̄de. Ke minit 15 ama ekebe, nurse ama ofiori okot mi ọdọhọ ete: “Joel eset!” Enye ama omụm mi ubọk onyụn̄ ọdọhọ ete: “Di, dise.” Ke nsịmde do, mma n̄kụt ke enye ke en̄wek! Inikiet inikiet, mbụk emi ama asuana kpukpru ebiet. Mme nurse ye mbiausọbọ ẹma ẹdi ẹdise Joel, ndien ediwak mmọ ẹma ẹdọhọ ẹte: “Akanam n̄kwe utọ n̄kpọ emi!”

N̄kpọ N̄kpaidem Etịbe ke Ini Enye Edide Isua Inan̄

Ke ini Joel ekedide isua ifan̄ kpọt, abiausọbọ nditọwọn̄ oro ikasiakde ke ntọn̄ọ ntọn̄ọ ama esiwak ndidọhọ nnyịn  nte: “Oyom ẹnen̄ede ẹwụt ke ẹmama Joel.” Sia ami ye ebe mi ikenen̄erede ikụt ke Jehovah enen̄ede ese aban̄a nnyịn, ima ibiere ndinam ntre n̄ko ye Joel. Ima inen̄ede inam ntre sia ama oyom isin̄wam enye inam kpukpru n̄kpọ.

Enyene n̄kpọ emi ekesitịbede toto ke usen emi Joel akamanade tutu esịm ini emi enye ekedide isua itiaba. Tọn̄ọ ke October sịm March, ekesidi udọn̄ọ enye emi ama okụre en̄wen ọtọn̄ọ, ntre ekesidi ikaka inyọnyọn̄ ufọkibọk. Ke ofụri ini emi, mma ndomo nte n̄kekeme ndise mban̄a akpan ye udọ mi n̄ko, ndien mmọ ẹma ẹnen̄ede ẹsịn idem ẹtiene ẹn̄wam Joel, tutu enye anam n̄kọri oro akakpade owo idem. Ke uwụtn̄kpọ, ediwak mbiausọbọ ẹkedọhọ ke Joel edidi mbụn̄ọ. Edi usen kiet ke ini Joel ekedide isua inan̄, Marc udọeka esie ama ọdọhọ enye: “Joel di, nam Mama okụt ke emekeme ndisan̄a!” Idem ama akpa mi ndikụt Joel osiode ukot. Esịt ama enen̄ede enem mi, ndien ima ibono ọtọkiet nte ubon ibọn̄ akam ke ofụri esịt ikọm Jehovah. Ima isinen̄ede itoro Joel ini ekededi oro enye anamde n̄kpọ en̄wen, ekpedi ata ekpri n̄kpọ.

Ufọn Edikpep Enye Ikọ Abasi Toto ke Nsek

Ima isida Joel ika mbono esop adan̄a nte ikekeme. Ikesisịn enye ke san̄asan̄a ukpatn̄kpọ nditọwọn̄ emi ẹfụkde akrasi ẹkanade mbak enye edimen udọn̄ọ. Kpa ye oro Joel ekesisịnede ke n̄kpọ oro, enye ama esikop inemesịt ke ini odụkde mbono esop.

Nditọete ẹma ẹsin̄wam nnyịn, ẹwụt ke imama nnyịn ẹnyụn̄ ẹnọ se inanade nnyịn. Eyenete kiet ama esima nditi nnyịn Isaiah 59:1, emi ọdọhọde ete: “Sese, ubọk Jehovah ikabakede imụhọ ikan nte enye anyan̄ade; utọn̄ esie inyụn̄ idobike ikan nte enye okopde.” Ikọ emi ama anam inen̄ede ibuọt idem ye Jehovah.

Nte Joel okosụk okponde, ima idomo ndinam enye enen̄ede ama ndinam n̄kpọ Jehovah. Ini ekededi oro ifet odude, ima isineme iban̄a Jehovah ye Joel, inam nneme nnyịn edi ke usụn̄ emi edinamde enye enen̄ede ama Jehovah. Ima isiben̄e Jehovah ite ọdiọn̄ se inamde.

Ke ini Joel ekedide n̄kpọ nte isua 13, ama enen̄ede enem nnyịn ndikụt ke enye enen̄ede ama ndikwọrọ ikọ nnọ mme owo. Ẹma ẹsiak enye idem ke ini enye ekedide isua 14. Ndien ke idem ama ọkọtọn̄ọ ndisọn̄ enye, esịt ama enen̄ede enem mi ke ini enye ọkọdọhọde mi ete: “Mama, ndi nnọ abiausọbọ emi n̄wed Afo Emekeme?” Ẹma ẹfiak ẹsiak enye idem ke isua ifan̄ ama ekebe. Ima ikere ke ekeme ndidi enye idibọhọke isan̄ enye emi. Mbemiso ẹkesiakde Joel idem, enye ama ọnọ mbiausọbọ oro ẹkeyomde ndisiak enye idem leta emi iketiede ntre iwet. Leta emi okowụt ke Joel iyomke ẹsịn imọ iyịp. Abiausọbọ emi esisiakde owo idem ama obụp Joel ete: “Ndi emenyịme ye se ẹwetde emi?” Joel ama ọbọrọ ke ọkpọsọn̄ uyo ete: “Ih Ete.” Ima ikop inemesịt sia enye ama ọbuọt idem ye Andibot onyụn̄ enyịme ndinam se Enye amade. Mbon oro ẹkenamde  utom ke ufọkibọk oro ẹma ẹnen̄ede ẹn̄wam nnyịn, ima inyụn̄ inen̄ede ikọm mmọ.

Joel Anam N̄kọri ke Esop

Joel akana baptism ke ini ekedide isua 17. Ndifreke usen oro tutu amama! Ndikụt enye esịnde ifịk anam n̄kpọ Abasi anam inen̄ede ikop inemesịt. Tutu mfịn, ima oro enye amade Jehovah ye ifịk oro enye enyenede ke akpanikọ itekke. Joel esidi ama okokụt owo, enye ọdọhọ ete: “Mîkpedịghe akpanikọ, adan̄aemi n̄kpebet efere!”

Joel ama ekpep ndikot nnyụn̄ n̄wet n̄kpọ ke ini ekedide n̄kpọ nte isua 19. Emi ekedi ata ọkpọsọn̄ n̄kpọ. Esịt ama esinem nnyịn ọkpọkọm enye ekewet ikọ kiet kpọt. Enye ama ọtọn̄ọ do ndien ndisikot itie N̄wed Abasi eke usen ke usen kpukpru usenubọk. Ekem, enye ama esitịn̄ enyịn osion̄o mme ikọ itien̄wed usen oro ewet ke n̄wed esie. Ndien okpokụt n̄wed oro idahaemi, udutreke nditua.

Ke usen mbono esop, Joel esiyom idaha ke eti ini man enye ekpenyene ifet ọkọm mme owo mbemiso mbono esop ọtọn̄ọ. Enye esima ndibọrọ mbụme ke mbono esop nnyụn̄ nnam nnamn̄wụt. Enye esise n̄ko aban̄a ukwak utịn̄ikọ onyụn̄ anam mme n̄kpọ eken. Edieke idem esie ọsọn̄de, enye esitiene nnyịn aka ukwọrọikọ kpukpru urua. Ẹma ẹmek enye asan̄autom unamutom ke 2007. Mmọneyet idatesịt ama asiaha nnyịn. Jehovah enen̄ede ọdiọn̄ nnyịn.

Imokụt ke Jehovah An̄wam Nnyịn

Ke 1999, afanikọn̄ en̄wen ama etịbe. Ete kiet ama awat ubomisọn̄ idat idat editọ ubomisọn̄ nnyịn, ndien emi ama ọnọ ebe mi ata akamba unan. Ẹma ẹsịbe enye ukot kiet, ẹnyụn̄ ẹsiak enye ọkpọ asakedem. Ndibuọt idem ye Jehovah ama anam ikụt n̄ko nte enye esisọn̄ọde mme asan̄autom esie idem. (Phil. 4:13) Kpa ye oro enye obiomode ndo, nnyịn isiyakke oro enen̄ede afịna nnyịn. Ndien sia enye mîkemeke ndinam utom mbakara, enye enen̄ede enyene ini ndise mban̄a Joel. Emi ọnọ mi ekese ini ndida nnam n̄kpọ Abasi. Ke adianade ye ndise Joel enyịn, ebe mi esinen̄ede ese aban̄a nnyịn ke n̄kan̄ eke spirit, onyụn̄ ese aban̄a esop sia enye edi anam-ndutịm otu mbiowo.

Mme afanikọn̄ oro ẹsịmde nnyịn akam ananam inen̄ede ikpere kiet eken. Ini afanikọn̄ emi ekpep nnyịn nte ikpodude uwem, onyụn̄ ekpep nnyịn ndida uwem nte ikụtde. Ke ini esịt etịmerede nnyịn, imesitịn̄ mfịna nnyịn inọ Jehovah ke akam. Esịt ama enen̄ede ọduọ nnyịn ndikụt akpan ye udọ nnyịn ẹkpọn̄de Jehovah ke mmọ ẹma ẹkekponi ẹma. Imenịm ke mmọ ẹkeme ndifiak ndinam n̄kpọ Jehovah usen kiet.—Luke 15:17-24.

Imokụt nte Jehovah an̄wamde nnyịn ke ofụri ini afanikọn̄ emi, inyụn̄ ikpep ndibuọt idem ye enye ke ini isobode afanikọn̄. Imenen̄ede ima se idude ke Isaiah 41:13, emi ọdọhọde ete: “Koro ami Jehovah Abasi fo mmụmde fi ubọk nnasia, emi ndọhọde fi, nte, Kûfehe; ami n̄n̄wam fi.” Ndifiọk ke Jehovah omụm nnyịn ubọk enen̄ede ọdọn̄ nnyịn esịt. Imekeme nditịn̄ nte ke ndiyọ afanikọn̄ anam inen̄ede ibuọt idem ye Jehovah emi edide Ete nnyịn eke heaven.

[Ndise ke page 16, 17]

Joel ye eka esie

[Ndise ke page 18]

Eka Joel, Joel, ye ete esie

[Ndise ke page 19]

Joel esima ndikọm nditọete oro ẹdide mbono esop