Nte Afo Emeti?
Nte Afo Emeti?
Nte afo ama ọbọ ufọn oto edikot mme nsiondi Enyọn̄-Ukpeme eke ndondo emi? Se m̀mê emekeme ndibọrọ mme mbụme oro ẹtienede mi:
• Ntak emi akanade Messiah akpa?
N̄kpa Jesus owụt ke kpa ye ọkpọsọn̄ idomo Satan, ke mfọnmma owo ekeme ndika iso nten̄e Abasi tutu esịm n̄kpa. N̄ko, enye ama osio isop idiọkn̄kpọ oro nditọ Adam ẹkedade ẹmana, onyụn̄ anam ẹkeme ndinọ kpukpru mbon oro ẹbuọtde idem ke Jesus nsinsi uwem.—12/15, page 22-23.
• Nso idin̄wam owo okûn̄wọn̄ mmịn ukaha?
Ndibọn̄ akam nnyụn̄ n̄kpep Bible ẹkeme ndin̄wam. Nyene mfara ke idem, nam se ekebierede, mek nti nsan̄a. Edieke oyomde ndin̄wọn̄ mmịn, biere udomo oro edin̄wọn̄de, kpep ndisịn mmịn.—1/1, page 7-9.
• Nso ke ndinyene eti nneme ye nditọ abuana?
Eti nneme idịghe sụk nditịn̄ ikọ nnọ nditọ kpọt, edi abuana ndibụp mmọ mbụme nnyụn̄ n̄kpan̄ utọn̄ n̄kop ibọrọ mmọ. Ndusụk ubon ẹsineme nti nneme ke ini udia.—1/15, page 18-19.
• Sia edide Jehovah ọfọn ama, didie ndien ke enye esitua n̄kpọfiọk?
Ndusụk ini, Jehovah esikpụhọde usụn̄ nte enye anamde n̄kpọ ye mme owo. Nditọ Israel ẹma ẹsikpọn̄ Jehovah ẹtiene ẹtuak ibuot ẹnọ mme abasi en̄wen. Ndien Jehovah ikekpemeke mmọ aba. Edi ke ini mmọ ẹketuade n̄kpọfiọk ẹnyụn̄ ẹseme ẹnọ Abasi ẹte an̄wam mmimọ, Enye ama okpụhọde ekikere esie m̀mê ‘atua n̄kpọfiọk.’ (Judg. 2:18)—2/1, page 21 page 21.
• Nso ikpanam owo oyom ndifiak nna baptism?
Owo edibiere ndifiak nna baptism edieke edide enye ama esidịbe anam idiọkn̄kpọ ke ini enye okoyomde ndina baptism, mîdịghe, edịbe odu utọ uwem oro ekpedide se ẹsiode enye ẹfep ke esop ekpedi enye ama anana baptism.—2/15, page 22.
• Siak ukwan̄ ekikere ita emi ẹsinamde mme owo ẹyịp n̄kpọ?
Ndusụk owo ẹkere ke idiọkke ndiyịp n̄kpọ sia idide ubuene. Mbon eken ẹsidọhọ ke idụhe eke mîsiyịpke n̄kpọ. Ndien ndusụk owo emi ẹsifiọhọde n̄kpọ ẹsidọhọ ẹte: “Efiọhọ mi, ndịghe inọ.” Bible inyịmeke kpukpru emi.—3/1, page 12-14.
• Ke uwụtn̄kpọ Jesus oro aban̄ade wheat ye mbiet, nso ke ndisuan m̀mê nditọ eti n̄kpasịp ada aban̄a?
Eyen owo, oro edi, Jesus, ọkọdiọn̄ in̄wan̄ emi ke ini akanamde utom ukwọrọikọ esie mi ke isọn̄. Enye ọkọtọn̄ọ ndisuan eti n̄kpasịp ke in̄wan̄ emi ke ini ẹkeyetde mme Christian aran nte nditọ Abasi m̀mê nditọ Obio Ubọn̄ ọtọn̄ọde ke usen Pentecost eke isua 33 E.N. ka iso.—3/15, page 20.
• Didie ke ẹtan̄ mme ndamban̄a wheat ẹdọn̄ ke ubet ubonn̄kpọ Jehovah? (Matt. 13:30)
Emi etịbe ke akpatre ini eyo emi. Ẹtan̄ nditọ Obio Ubọn̄, kpa ndamban̄a wheat oro ẹdọn̄ ke ubet ubonn̄kpọ Jehovah ke ndinam mmọ ẹdidụk esop Abasi emi ẹkefiakde ẹtọn̄ọ, m̀mê ke ndinam mmọ ẹset ẹkenyene udeme mmọ ke heaven.—3/15, page 22.
• Mmanie ẹkemek mme n̄wed oro ẹkpesịnede ke otu N̄wed Abasi Christian Usem Greek?
Idịghe ufọkabasi ndomokiet m̀mê oku ido ukpono ekemek. Spirit Abasi akanam ata mme Christian ẹfiọk mme n̄wed oro enye akanamde mme asan̄autom Abasi ẹwet. Bible ọsọn̄ọ emi sia enye ọdọhọ ke kiet ke otu mme enọ eke spirit emi Abasi ọkọnọde mme Christian ke eset ekedi “[ukeme ndifiọk] ikọ odudu spirit.” (1 Cor. 12:4, 10)—4/1, page 28page 28.