Mme Mbụme Ẹtode Mme Andikot

Sia Jehovah mîmaha ukpono ndem, ntak emi enye mîkamiaha Aaron ufen ke ndikanam eyen enan̄ o-gold?

Exodus ibuot 32 owụt ke Aaron ama abiat ibet Abasi emi ọdọhọde ẹkûkpono ndem ke ndikanam eyen enan̄ o-gold. (Ex. 20:3-5) Emi ama anam Jehovah ‘ayat esịt ye Aaron eti-eti, ete isobo enye; edi Moses ekpe Abasi ubọk ke ibuot esie.’ (Deut. 9:19, 20) Ndi n̄kpeubọk edinen owo oro ama “enyene odudu” ekem ndinyan̄a Aaron? (Jas. 5:16) Ih, etie nte akam Moses ye n̄kpọ iba en̄wen akanam Jehovah okûmia Aaron ufen.

Akpa, ekeme ndidi akpanikọ oro Aaron ekesinamde akanyan̄a enye. Ke ini Jehovah ọkọdọhọde Moses ọkọdọhọ Pharaoh ayak nditọ Israel ẹnyọn̄ọ, enye ama emek Aaron ete asan̄a ye Moses man esitịn̄ ikọ ke ibuot Moses. (Ex. 4:10-16) Mmọ ẹma ẹsika ẹbịne idiọk Pharaoh oro akakarade Egypt do, ẹnyụn̄ ẹyọ kpukpru ndọk ye emiom oro enye okomiomde mmọ. Aaron ekedi ata anam-akpanikọ asan̄autom Jehovah ke Egypt.—Ex. 4:21.

Kûfre n̄ko se ikanamde Aaron anam eyen enan̄ o-gold oro. Ke Moses ama akabiat usen 40 ke Obot Sinai, ‘kpukpru owo ẹnyụn̄ ẹkụt nte enye ebịghide ndito enyọn̄ obot nsụhọde,’ mmọ ẹkpek Aaron ẹte anam mbiet ọnọ mmimọ, enye onyụn̄ enyịme anam eyen enan̄ o-gold. (Ex. 32:1-6) Edi se Aaron akanamde ke oro ebede okowụt ke enye ikanamke n̄kpọ oro ke ofụri esịt. Ẹma ẹsịn̄ede ete mbon ẹkaha. Ke ini Moses okosobode ndem oro, kpukpru nditọ Levi—esịnede Aaron—ẹkeda ke n̄kan̄ Jehovah. Ẹma ẹsobo owo tọsịn ita emi ẹkesịnde nsọk ẹnọ ukpono ndem oro.—Ex. 32:25-29.

Moses ama ọdọhọ mmọ ke oro ebede, ete: “Mbufo ẹmenam ata idiọk ido.” (Ex. 32:30) Emi owụt ke idịghe Aaron kpọt ekenyene nduduọhọ. Ntre, idịghe enye kpọt ke Jehovah okonyụn̄ atua mbọm.

Ke n̄kpọ eyen enan̄ o-gold oro ama ọkọduọk ebe, Jehovah ama ọdọhọ ẹmek Aaron akwa oku. Jehovah ọkọdọhọ Moses ete: “Sịne Aaron edisana edisịne-n̄kpọ ke idem, nyụn̄ yet enye aran, nyụn̄ nịm enye ke edisana; man enye [edi] oku mi.” (Ex. 40:12, 13) Oro owụt ke Jehovah ama efen ọnọ Aaron. Aaron ekedi ata owo Abasi, idịghe okpono ndem.