Ka Iso Nọ Ukeme Ufiọk N̄kpọ Fo Ukpecp

NTE isinemke fi ndikụt ata esịn̄ede idem oyụrọrede idem inikiet inikiet, edi iduọhọ? Bible ọdọhọ mme Christian ẹnọ ukeme ukeren̄kpọ mmọ ukpep ukem nte ata esịn̄ede idem esinọde idem esie ukpep.

Apostle Paul ọkọdọhọ ke leta oro enye ekewetde mme Hebrew ete: “Ọkpọsọn̄ udia enyene mbon oro ẹkọride esịm ọyọhọ idaha, kpa mbon oro ẹnọde ukeme ufiọk n̄kpọ mmọ ukpep [ukem nte ata esịn̄ede idem esinamde] ebe ke ndida enye nnam n̄kpọ man ẹdiọn̄ọ se inende ye se idiọkde.” (Heb. 5:14) Ekere ke nso ikanam Paul ọdọhọ mme Christian oro ẹnọ ukeme ukeren̄kpọ mmọ ukpep ukem nte ata esịn̄ede idem esisịn̄erede idem man idem esie efere? Didie ke ikeme ndinọ ukeme ufiọk n̄kpọ nnyịn ukpep?

‘Di Andikpep’

Ke ini Paul ọkọdọhọde ke Jesus edi ‘akwa oku ukem nte Melchizedek,’ enye ama adian ete: “Nnyịn imenyene ekese nditịn̄ mban̄a enye [Jesus,] emi onyụn̄ ọsọn̄de ndinam an̄wan̄a, sia utọn̄ mbufo ama akakabade odobi ndikop n̄kpọ. Koro, ke akpanikọ, okposụkedi mbufo ẹkpedide mme andikpep ke ẹkerede ẹban̄a ini emi, mbufo ẹfiak ẹyom owo ekpep mbufo mme akpa editọn̄ọ n̄kpọ ndisana ikọ Abasi, ẹnyụn̄ ẹkabade ẹdi mbon oro ẹyomde mmọn̄eba, idịghe ọkpọsọn̄ udia.”—Heb. 5:10-12.

Etie nte ndusụk mme Jew emi ẹkedide Christian ke eyo Paul ẹkenyụn̄ ẹsịne ntre ke esop, isịnke idem ikpep Ikọ Abasi inyụn̄ inamke n̄kọri. Ntak edi oro ekenen̄erede ọsọn̄ mmọ ndinyịme mbufa n̄kpọ oro ẹkekpepde ẹban̄a Ibet Moses ye n̄kpọ aban̄ade mbobi. (Utom 15:1, 2, 27-29; Gal. 2:11-14; 6:12, 13) Ikememke ndusụk mmọ nditre mme edinam usen Sabbath eke urua ke urua ye eke Usen Usio-Isop. (Col. 2:16, 17; Heb. 9:1-14) Ntak edi oro Paul ọkọdọhọde mmọ ẹnọ ukeme ufiọk n̄kpọ mmọ ukpep man ẹdiọn̄ọ se inende ye se idiọkde ẹnyụn̄ ‘ẹsịn ifịk ẹkọri ẹsịm ọyọhọ idaha.’ (Heb. 6:1, 2) Anaedi item emi ama anam ndusụk mmọ ẹfiak ẹtie ẹkere n̄kpọ, onyụn̄ anam mmọ ẹnam n̄kọri ke esop. Nso kaban̄a nnyịn?

Nọ Ukeme Ufiọk N̄kpọ Fo Ukpep

Didie ke ikeme ndinọ ukeme ukere n̄kpọ nnyịn ukpep man inen̄ede ifiọk Abasi? Paul ọkọdọhọ ke idinam emi edieke ‘isidade enye inam n̄kpọ.’ Ukem nte nta mme esịn̄ede idem esisịn̄erede idem man ẹkeme ndiwọn̄ọde idem nte mmọ ẹkpemama, ana inọ ukeme ukeren̄kpọ nnyịn ukpep man ifiọk se inende ye se idiọkde.

John Ratey, prọfesọ emi ekpepde n̄kpọ aban̄a udọn̄ọ ibuot ke Ufọkn̄wed Ntaifiọk Harvard ọdọhọ ete: “Ndisikere n̄kpọ esinen̄ede ọfọn ye mfre nnyịn.” Gene Cohen, akamba owo ke ikpehe emi ẹkpepde n̄kpọ ẹban̄a Usọn̄, Nsọn̄ọidem, ye Ubonowo, ke Ufọkn̄wed Ntaifiọk George Washington, ọdọhọ ete: “Ke ini inen̄erede ikere n̄kpọ, emi esinam mfre osion̄o mbufa esịp oro edinamde iti n̄kpọ edi.”

Mmọdo, ọfọn isinọ ukeme ukeren̄kpọ nnyịn ukpep man inen̄ede ifiọk Ikọ Abasi. Emi ayanam ikeme ndinen̄ede nnam “uduak Abasi.”—Rome 12:1, 2.

 Ndi “Ọkpọsọn̄ Udia” Esidọn̄ Fi?

Edieke iyomde ‘ndikọri nsịm ọyọhọ idaha,’ ana ibụp idem nnyịn ite: ‘Ndi mmenen̄ede mfiọk akpanikọ n̄kan nte n̄kọfiọkde? Ndi mme owo ẹkụt ke mmanam n̄kọri?’ Eka eyen esinem esịt ndinọ eyen esie eba ye udia nditọwọn̄ ke ini eyen esie edide nsek. Edi editie eka didie ke idem edieke eyen oro osụk oyomde ndiwap eba kpọt ke ama okokpon ama? Ukem ntre, esinem nnyịn ndikụt nte owo emi ikpepde n̄kpọ anamde n̄kọri, ayakde idem ọnọ Abasi onyụn̄ ana baptism. Edi ekpetie fi didie ke idem edieke enye mînamke n̄kọri? Ndi esịt ekpenem fi? (1 Cor. 3:1-4) Andikpep esiyom owo emi enye ekpepde n̄kpọ akabade edi andikpep n̄ko.

Ndida ukeme ufiọk n̄kpọ nnyịn mbiere se ikpanamde esịne nditie n̄kere se ikpepde, ndien emi esịne utom. (Ps. 1:1-3) Inaha iyak n̄kpọ ekededi, utọ nte TV m̀mê mme edinam oro imade, emi mîsiyakke owo etie ekere akpan n̄kpọ ọn̄wọn̄ọde ntịn̄enyịn nnyịn. Edieke iyomde ndinam ukeme ukeren̄kpọ nnyịn ekere n̄kpọ ọfọn, ana ima ndikpep Bible ye mme n̄wed emi “ofụn emi anamde akpanikọ onyụn̄ enyenede ọniọn̄” osiode. (Matt. 24:45-47) Ke adianade ye ndikot Bible ke usen ke usen, enen̄ede ọfọn inyene ini emi isinịmde Utuakibuot Ubon inyụn̄ ision̄o nsio nsio ibuotikọ ke Bible ikpep.

Jerónimo, esenyịn oro asan̄ade-san̄a ke Mexico ọdọhọ ke esidi ima ibọbọ Enyọn̄-Ukpeme, imọtọn̄ọ ndikpep. Enyene ini emi enye esikpepde n̄kpọ ye n̄wan esie. Jerónimo ọdọhọ ete: “Ami ye n̄wan mi imesitie kiet ikot Bible ke usen ke usen, inyụn̄ ikama ‘Kụt Eti Isọn̄’ ke ini inamde oro.” Eyenete emi ekerede Ronald ọdọhọ ke imọ isitreke nditiene n̄kot itie Bible oro ofụn anam-akpanikọ ọdọhọde esop ẹkot ke urua ke urua. Enye esision̄o n̄ko mme ibuotikọ oro enye amade ndikpep ke Bible enịm onyụn̄ ekpep mmọ. Enye ọdọhọ ete: “Emi anam nsitetie mbet ini emi nsikpepde n̄kpọ.”

Nnyịn ndien-e? Ndi imenyene akpan ini oro isiode inịm, emi isidade ikpep Bible inyụn̄ itie ikere se ikpepde? Ndi ke inọ ukeme ukere n̄kpọ nnyịn ukpep, man inyene ekese ifiọk emi edinamde ikeme ndinam ubiere oro ekemde ye Ikọ Abasi? (N̄ke 2:1-7) Kpukpru nnyịn ikpakam ibiere ndika iso n̄kọri ke n̄kan̄ eke spirit, inyụn̄ inyene ifiọk ye ọniọn̄ nte mbon oro ẹnọde ukeme ufiọk n̄kpọ mmọ ukpep man ẹdiọn̄ọ se inende ye se idiọkde!

[Ndise ke page 23]

Inọ ukeme ukere n̄kpọ nnyịn ukpep ke ini isịnde idem ikpep n̄kpọ