Ntak Emi Okpokponode N̄kani Owo?

IDỤHE eto oro ẹsiode ndise ke ofụri ererimbot nte enye oro odude ke esụk California, ke U.S.A. Ẹkot enye Anana-Mbiet Eto Cypress. Ẹdọhọ ke enye ebe isua 250. Sia ediye eto emi ebịghide uwem, mme owo ẹnen̄ede ẹma enye. Ke uwụtn̄kpọ, ẹda nsio nsio urụk ẹmụm enye ẹkama ẹnyụn̄ ẹkọk itiat ẹkanade enye ẹkụk.

Eto emi ekeme ndinam iti n̄kani owo ke mme esop nnyịn, emi ẹnyụn̄ ẹyọde nsio nsio idaha. Akpan usụn̄ kiet oro mmọ ẹnamde emi edi ndikwọrọ eti mbụk. Prọfet Joel ọkọdọhọ ke ‘n̄kani owo’ ẹyetan̄a etop Bible. (Joel 2:28-32; Utom 2:16-21) Kam kere ibat hour oro mmọ ẹbiatde ẹsịn ifịk ẹkpep mme owo “eti mbụk obio ubọn̄”! (Matt. 24:14) Ndusụk mmọ ẹyọ ukọbọ m̀mê mme afanikọn̄ eken ke ediwak isua. Edieke ẹmade ikpîkpu eto ẹnyụn̄ ẹkọk itiat ẹkanade enye ke ntak emi ebịghide uwem, ndi ukereke ke oyom inen̄ede ima inyụn̄ ikpono n̄kani owo emi ẹdude ke esop Abasi?

Jehovah Abasi ọkọdọhọ ikọt esie ke eset ete: “Daha da ke iso owo iwat, nyụn̄ kpono ebio-owo.” (Lev. 19:32) Ke esop Jehovah mfịn, imokụt nti uwụtn̄kpọ oro mme anam-akpanikọ asan̄autom Jehovah, emi ‘ẹsan̄ade ye enye’ ke ata ediwak isua, ẹnịmde. (Mic. 6:8) Sia mmọ ẹkade iso ẹnam se Bible ọdọhọde, imekeme ndinen̄ede ndọhọ ke “iwat [mmọ] edi anyanya ubọn̄.”—N̄ke 16:31.

 Apostle Paul ọkọdọhọ akparawa oro ekekerede Timothy ete: “Kûsọn̄ọ uyo ukụt ndudue unọ ebiowo.” Edi “nọ enye item nte ete” nyụn̄ nọ “n̄kani iban nte mme eka.” (1 Tim. 5:1, 2) Akana Timothy esikpono n̄kani owo. Jehovah oyom nnyịn n̄ko isitịn̄ ikọ ukpono ukpono ye ikpọ owo.

Rome 12:10 ọdọhọ “[ida] iso ke ndinọ kiet eken ukpono.” Mbiowo ẹsikpono n̄kani owo emi ẹdude ke esop. Edi ẹdọhọ kpukpru nnyịn ida iso ke ndinọ kiet eken ukpono.

Ana nditọ ye nditọ nditọ ẹkere ẹban̄a mme ete, mme eka, mme ete ete, ye mme eka eka mmọ. Mme owo ẹnam n̄kpọ ẹnyụn̄ ẹka iso ndinam n̄kpọ mbak eto oro ikasiakde ke ntọn̄ọ ibuotikọ emi edikpa. Ukem ntre, ana isinam n̄kpọ man iwụt ke imokpono mme ete, mme eka, mme ete ete, ye mme eka eka nnyịn emi ẹdude ke uwem. Ke uwụtn̄kpọ, edieke isinen̄erede ikpan̄ utọn̄ inọ mmọ, nnyịn idinamke n̄kpọ oro ọfọnde ye nnyịn, edi ikereke m̀mê ọfọn n̄ko ye mmọ.—N̄ke 23:22; 1 Tim. 5:4.

N̄kani owo emi ẹdude ke esop ẹdi ata ọsọn̄urua n̄kpọ ke enyịn Jehovah. Enye ifreke mmọ. (Ps. 71:18) Enye ọnọ mmọ odudu ndika iso nnam n̄kpọ esie ke ofụri esịt. Ẹyak nnyịn n̄ko ika iso in̄wam inyụn̄ ikpono n̄kani owo.

[Ndise ke page 7]

Ana ikpono n̄kani owo, ukem nte ẹkponode Eto Cypress

[Ebiet ẹdade n̄kpọ ẹto]

American Spirit Images/age fotostock