Ndidiana Kiet ke Ima Ntọt Mbono Ofụri Isua

ESỊT ama enen̄ede enem owo 5,000 ye n̄kpọ emi ẹkedụkde mbono ofụri isua Watch Tower Bible and Tract Society of Pennsylvania ke Ufọk Mbono nnyịn ke Jersey City ke New Jersey ke U.S.A. Ẹketọn̄ọ mbono emi ke usenubọk October 3, 2009, ndien ọyọhọ ike-125 ẹnịmde enye edi emi. Ata ediwak mbon Bethel ke United States ye Canada ẹkese edinam emi ke ekebe ndise. Ofụri mbon emi ima Jehovah anamde mmọ ẹdiana kiet, emi ẹkebuanade ke mbono hour ita oro ẹkedi owo 13,235.

Jeoffrey Jackson owo Otu Ukara ekedi etieibuot okpokoro. Enye ọkọtọn̄ọ mbono oro ke ndidọhọ n̄kaikwọ Bethel ẹkwọ ndusụk ikwọ ke obufa n̄wed ikwọ nnyịn. Owo Otu Ukara emi ekerede David Splane akada iso ke ikwọ oro; enye ama etịn̄ ibio ibio aban̄a ufọn oro ikwọ enyenede ke utuakibuot akpanikọ. Ẹma ẹdọhọ otuowo ẹtiene ẹkwọ mbufa ikwọ ita. N̄kaikwọ Bethel ẹkebem iso ẹkwọ, ekem otuowo ẹdiana. Emi iwọrọke ke akpana mme esop ẹsinyene n̄kaikwọ, m̀mê ndinyene n̄kaikwọ ke ikpọ ye n̄kpri mbono, ẹkenyụn̄ ẹnam emi ini kiet emi kpọt ke ntak akpan edinam emi.

Ntọt Nsio Nsio N̄kọk Itieutom

Mbon Kọmiti N̄kọk Itieutom emi ẹtode idụt ition ẹma ẹbụk nte n̄kpọ akade iso ke n̄kọk itieutom mmọ. Kenneth Little ọkọdọhọ ke n̄kọk itieutom Canada ẹmọn̄ ẹtọn̄ọ ndimịn̄ ekese ke otu magazine oro ẹdidade ẹnam utom ke United States ye Canada, ndien emi ọwọrọ ke mmọ ẹyemịn̄ magazine awak utịm ikoduop akan nte ẹkesimịn̄de. Man ẹkeme ndinam emi, obufa ukwak umịn̄n̄wed mmọ edisinam utom hour 16 kpukpru usen.

Reiner Thompson ama etịn̄ nte utom Obio Ubọn̄ akade iso ke Dominican Republic. Albert Olih etịn̄ eke Nigeria. Emile Kritzinger emi otode Mozambique ọkọdọhọ ke ẹma ẹkekọbọ nditọete do ke ediwak isua, ke ukara ẹma ẹdinyịme ido ukpono nnyịn ndien ke 1992. Ibat mbufa asuanetop oro ẹnyenede ndondo emi ke idụt mbita emi awak etieti. Viv Mouritz emi anamde utom ke n̄kọk itieutom Australia ama etịn̄ aban̄a n̄kọri oro ẹnamde ke East Timor, emi nditọete ke Australia ẹsede ẹban̄a.

Mme Kọmiti Otu Ukara

Ke 1976, ẹma ẹbahade Otu Ukara ẹdọn̄ ke kọmiti itiokiet, ndien tọn̄ọ oro, mme kọmiti emi ẹse ẹban̄a utom Mme Ntiense Jehovah ke ofụri ererimbot. Nte ini akakade, ẹma ẹmek ndusụk mbon erọn̄ en̄wen ẹte ẹn̄wam mmọ. Owo 23 ke otu mme erọn̄ en̄wen ẹn̄wam kọmiti oro idahaemi. Ẹma ẹnam ndụn̄ọde ye owo itiokiet ke otu emi. Edieke ẹtọde isua oro kpukpru mmọ ẹnamde utom uyọhọ ini ẹdian kiet, esịm isua 341, oro edi, isua 57 ke ẹbaharede ukem ukem.

Don Adams emi ọkọtọn̄ọde utom Bethel ke 1943, ọkọdọhọ ke mme anam-ndutịm ke kọmiti ition eken ẹnam Kọmiti Mme Anam-Ndutịm, man ẹkụt ẹte ke kpukpru kọmiti emi ẹdiana kiet ẹnam n̄kpọ ke nde ke nde. Kọmiti emi esise aban̄a ikpọ mfịna utọ nte ukọbọ, ikpe, afanikọn̄, m̀mê mme n̄kpọ ntre  oro ọnọmọde Mme Ntiense Jehovah ke ofụri ererimbot.

Dan Molchan ama etịn̄ utom Kọmiti Mbonutom emi esede aban̄a owo 19,851 emi ẹnamde utom Bethel ke ofụri ererimbot. David Sinclair etịn̄ nte Kọmiti Usio N̄wed ẹsisan̄ade ẹdep se n̄kọk itieutom ẹyomde. N̄ko, Robert Wallen emi anamde utom ke Bethel ke n̄kpọ nte isua 60 idahaemi ama etịn̄ nte Kọmiti Utom esisede aban̄a utom ukwọrọikọ emi ikọt Jehovah ẹnamde ye se ẹnamde ke mme esop. William Malenfant etịn̄ nte Kọmiti Unọ Ukpep ẹsinamde ndutịm mbono. Ndien akpatre owo, John Wischuk, etịn̄ nte Kọmiti Uwetn̄wed ẹsiwetde mme n̄wed nnyịn. *

Ibuotikọ Isua 2010 Aban̄a Ima

Mbon Otu Ukara ẹkenọ utịn̄ikọ ita oro ẹtienede mi. Gerrit Lösch ọkọtọn̄ọ utịn̄ikọ esie ye mbụme emi; “Ndi omoyom ẹma fi?” Enye ọkọdọhọ ke mme owo ẹsinen̄ede ẹyom ẹma mmimọ, ndien ke ima mîdụhe, uwem idụhe. Sia edide ata ima akanam Jehovah obot nnyịn, oro ọwọrọ ke ima anam idu uwem. Enye ọkọdọhọ ke ima Abasi esinen̄ede anam ikwọrọ ikọ inyụn̄ ikpep mme owo n̄kpọ.

Idịghe mme mbọhọidụn̄ nnyịn kpọt ke isima utọ ima emi, edi imesima mme asua nnyịn n̄ko. (Matt. 5:43-45) Ẹma ẹsịn udọn̄ ẹnọ otuowo nditi ufen oro Jesus ọkọbọde ke ntak nnyịn—umia oro ẹkemiade enye, emiom oro ẹkemiomde enye, ẹtọ enye etap, ẹnyụn̄ ẹkịm enye ke eduat. Kpa ye kpukpru emi, enye ama esịn mbonekọn̄ oro ẹkekọn̄de enye ke eto ke akam. Ndi emi inamke inen̄ede ima Jesus? Do ke Brọda Lösch akasiak ibuotikọ isua 2010, emi ẹdade ẹto 1 Corinth 13:7, 8. Enye ọdọhọ ete: ‘Ima ọyọyọ kpukpru n̄kpọ, ima idibehe ifep ke nsinsi.’ Nnyịn imodori enyịn ndidu uwem ke nsinsi, ima ima nsinsi, mme owo ẹnyụn̄ ẹma nnyịn.

Ndi Aranuwat Okụre ke Ubomisọn̄ Fo?

Samuel Herd ọkọtọn̄ọ utịn̄ikọ esie ye uwụtn̄kpọ. Da nte ke ufan fo ọdọhọ edi ika ebiet emi edide kilomita 50. Nte ẹsụk ẹwatde ẹka, afo okụt ke mita aranuwat nte ke aran uwat ekpere ndikụre. Afo ọdọhọ enye; enye ete okûfịna ke galọn kiet ke ososụhọ. Edi ibịghike aranuwat oro okụre. Ndi owụt ifiọk ndiwat ubomisọn̄ emi idiọn̄ọde ke aranuwat oyokokụre ọkpọn̄ nnyịn ke usụn̄? Ndi ikpakam ifọnke ndikụt ete ke imesịn aranuwat ọyọhọ ubomisọn̄ nnyịn? Ana isidọn̄ ndamban̄a aranuwat emi edide ifiọk Jehovah iyọhọ idem.

Oyom isinam oro kpukpru ini. Usụn̄ inan̄  oro ikpanamde emi ẹdi: Akpa, ukpepn̄kpọ idemowo. Sikot Bible kpukpru usen man ọfiọk se isịnede ke Bible. Idịghe ndikot enye nte owo okot uto, ana ikụt ite ke se ikotde an̄wan̄a nnyịn. Ọyọhọ iba, kûda mbubreyo Utuakibuot Ubon ufen efen. Ndi imesisịn aranuwat nnyịn iyọhọ ndamban̄a ubomisọn̄ nnyịn kpukpru ini, mîdịghe ndi isisịn nsịtnsịt? Ọyọhọ ita edi ndisidụk kpukpru mbono esop. Ọyọhọ inan̄ edi ndiyom ebiet emi odobode ntie n̄kere se Jehovah anamde. Psalm 143:5 ọdọhọ ete: “Mmeti eyo oko; . . . mmetie n̄kere se ubọk fo ẹkenamde.”

“Ndinen Owo Ẹyeyama”

John Barr ọkọnọ akpatre utịn̄ikọ. Enye ama anam uwụtn̄kpọ Jesus oro aban̄ade wheat ye mbiet an̄wan̄a. (Matt. 13:24-30, 38, 43) Uwụtn̄kpọ emi aban̄a “ukpen̄e” emi ẹtan̄de “nditọ obio ubọn̄” ẹbok ẹnyụn̄ ẹsion̄o mbiet man ẹmen ẹkefọp.

Brọda Barr ọkọdọhọ ke owo iditan̄ke “nditọ obio ubọn̄” ibok ke nsinsi. Enye ama okot Matthew 24:34, emi ọdọhọde ke “emana emi idibehe ifep tutu kpukpru n̄kpọ emi ẹwọrọ ẹsu.” Sia idiọn̄ọ mme akpatre usen emi ọkọtọn̄ọde ndisu ke 1914, Brọda Barr ama etịn̄ utịm ikaba ete ke “etie nte ikọ Jesus ọkọwọrọ ke mme Christian oro ẹyetde aran emi ẹkekụtde ndusụk mbon oro ẹyetde aran emi ẹkedude ke 1914 ẹyedu ke ini akwa ukụt editọn̄ọde.” Nnyịn ifiọkke adan̄a nte “emana emi” edibịghide, edi enye esịne otu iba emi isụk isiakde mi, okposụkedi emi kpukpru mmọ mîdịghe n̄ka. Esịt enen̄ede enem nnyịn ndifiọk ke ndusụk mbon oro ẹyetde aran, emi ẹkekụtde nditọete mmọ oro ẹkekụtde ẹnyụn̄ ẹfiọk ke idiọn̄ọ oro Jesus ọkọnọde ọtọn̄ọ ndisu ke 1914, ẹyedu uwem ẹkụt akwa ukụt.

“Nditọ obio ubọn̄” ke ẹnen̄ede ẹtie ẹbet utịp mmọ ke heaven. Edi ana kpukpru nnyịn ika iso inam akpanikọ inọ Jehovah, ika iso iyama tutu esịm utịt. Enen̄ede edi akwa ifet ndikụt ẹtan̄de “wheat” ẹbok ọtọkiet mfịn!

Ke ẹma ẹkekwọ akpatre ikwọ, Theodore Jaracz, owo Otu Ukara, ama eberi edinam oro ke akam. Mbono emi ama enem tutu.

[Ikọ Idakisọn̄]

[Ekebe ke page 5]

UFỌKN̄WED MBIOWO

Ke mbono oro, Anthony Morris owo Otu Ukara, ama ọtọt ete ke ẹtọn̄ọ ufọkn̄wed emi kpukpru mbiowo ẹdidụkde. Ẹketọn̄ọ ufọkn̄wed emi ke United States ke ntọn̄ọ ntọn̄ọ 2008, ke Itie Unọ Ukpep Enyọn̄-Ukpeme ke Patterson ke New York. Ibịghike ọyọhọ otu 72 ẹkekụre ufọkn̄wed emi, ndien mbiowo 6,720 ẹkedụk. Ntọn̄ọ ekedi oro sia mbiowo oro ẹdude ke United States kpọt ẹbe 86,000. Ke ntak emi, tọn̄ọ ke December 7, 2009, Otu Ukara ẹma ẹnyịme ẹsinịm ufọkn̄wed emi n̄ko ke Brooklyn ke New York.

Ẹyeda ọfiọn̄ iba ẹnọ mme esenyịn inan̄ emi ẹsan̄ade-san̄a ukpep ke Patterson, man mmọ ẹsinọ ukpep ke ufọkn̄wed emi. Ekem ẹyedọhọ mmọ ẹkenọ ukpep ke Brooklyn, ẹnyụn̄ ẹfiak ẹnọ esenyịn inan̄ en̄wen ukpep. Mmọ emi n̄ko ẹyekenọ ukpep ke Brooklyn, ke ini mmọ eken ẹdikade ikenịm ufọkn̄wed emi ke mme Ufọk Mbono ye ke mme Ufọkmbono Obio Ubọn̄. Ẹyeka iso ẹnọ ukpep emi tutu ẹnyene mme andikpep 12, emi ẹdisinịmde ufọkn̄wed emi ke Ikọmbakara ke itie itiokiet kpukpru urua ke United States. Ekem ẹyenọ owo inan̄ emi ẹdisinịmde ufọkn̄wed emi ke usem Spanish ukpep. Emi iwọrọke ke owo idisinịmke aba Ufọkn̄wed Utom Obio Ubọn̄; ẹtọn̄ọ ufọkn̄wed emi man ẹn̄wam mbiowo ẹka iso ẹnen̄ede ẹnam n̄kpọ Abasi. N̄kọk itieutom ke ofụri ererimbot ẹyetọn̄ọ ufọkn̄wed emi ke mme Ufọk Mbono ye ke mme Ufọkmbono Obio Ubọn̄ ke isua utom 2011.

[Ndise ke page 4]

Ẹkeda ikwọ ke obufa n̄wed ikwọ nnyịn “Sing to Jehovah” ẹtọn̄ọ mbono ofụri isua