Se Akpanamde ke Ini Ebe m̀mê N̄wan Fo Ọkpọn̄de Fi

MARGARITA ye Raúl ebe esie ẹma ẹnam utom uyọhọ ini ke ediwak isua. * Edi ke Margarita ama akaman eyen, ebe esie ama ọtọn̄ọ ndikpọn̄ Jehovah. Ekem, ọtọn̄ọ ndidu oburobụt uwem, ndien ẹma ẹsio enye ke esop. Margarita ọdọhọ ete: “Eketie nte mmọn̄ mbe mfep. Esịt ama enen̄ede ọduọ mi tutu n̄kọfiọkke se n̄kpanamde.”

Ikebịghike ke Jane ama ọkọdọ ndọ, ebe esie ama okpụhọde uwem. Enye ama ọtọn̄ọ ndisimia Jane. Jane ọdọhọ ete: “Akpa usen oro enye ọkọtọde mi ita, idem ama akpa mi, bụt onyụn̄ anam mi. Enye ama ekpe mi ubọk ete mfen nnọ imọ. Sia ndide Christian, mma mfen nnọ enye, edi enye ekedida emi nte ubọkutom. N̄kekere ke ifọnke ntịn̄ mfịna nnyịn nnọ owo ekededi, m̀mê mbiowo. Nte ikesidụn̄ọde edi oro ke ediwak isua—ama amia mi ama, ekpe ubọk, ami nnyụn̄ mfen nnọ enye. N̄kekere ke enyene se n̄kpanamde man enye ama mi. Edi ke enye ama ọkọkpọn̄  mi ye eyen, mma n̄kere m̀mê akam enyene se n̄kpakanamde man ndọ nnyịn okûbiara.”

Ekeme ndidi se iwọrọde Margarita ye Jane ọwọrọ fi n̄ko—ke ọbọ ufen, unyeneke okụk, unyụn̄ ukemeke aba ndinen̄ede nnam n̄kpọ Abasi sia ebe fo mînamke akpanikọ. Ekeme ndinyụn̄ ndi se itịn̄de emi ọwọrọ ebe emi n̄wan mînamke akpanikọ. Nnyịn idu ke ndiọkeyo emi Bible eketịn̄de aban̄a. Itien̄wed oro ọdọhọ ke ubon ẹyenyene mfịna ke “mme akpatre usen” emi sia ediwak owo idinyeneke ndammana ima, inyụn̄ idụhe uwem ẹkekem ye se Abasi emi mmọ ẹdọhọde nte ikponode oyomde. (2 Tim. 3:1-5) Ata mme Christian ẹsinyene mme mfịna emi n̄ko. Mmọdo, nso ke akpanam edieke ebe m̀mê n̄wan fo odude utọ uwem emi?

Se Idemfo nte Jehovah Esede Fi

Ekeme nditie fi nte n̄kpọ ndap ke ini owo emi amade anamde fi ata idiọkn̄kpọ. Emekeme ndikere m̀mê akam enyene se eduede.

Jesus ekedi mfọnmma owo, edi kûfre ke ata ufan esie akada enye ọnọ. Jesus ama enen̄ede ọbọn̄ akam mbemiso emekde mme apostle emi ẹkedide ata mme ufan esie. Kpukpru mmọ ẹkedi ata mme asan̄autom Jehovah ini oro. Ntem, anaedi Jesus ama enen̄ede okop mfụhọ ke ini Judas “akakabarede edi owo mbia.” (Luke 6:12-16) Edi Jehovah ikọdọhọke ke Jesus anam Judas odu idiọk uwem.

Idụhe n̄wan m̀mê ebe emi ọfọnde ama, emi mîsinamke ndudue. Edisana spirit akanam andiwet psalm ewet ete: “O Jehovah, afo ekpese mme idiọk ido, O Ọbọn̄, anie ekpekeme ndida?” (Ps. 130:3) Ukem nte Jehovah, akpana mme ọdọ ndọ ẹsifen ẹnọ kiet eken.—1 Pet. 4:8.

Edi “owo nnyịn kiet kiet ayanam ibat aban̄a idemesie ọnọ Abasi.” (Rome 14:12) Edieke ebe m̀mê n̄wan esimade nditọk m̀mê ndimia kiet eken, enye iditreke ndinam ibat nnọ Jehovah. Jehovah asasua afai ye idiọk ikọ inua, inyụn̄ idụhe se ikpanamde owo esuene n̄wan m̀mê ebe esie ntre. Utọ ido oro iyehe, owụt ke owo inyeneke ima. (Ps. 11:5; Eph. 5:33; Col. 3:6-8) Edieke Christian edide owo iyatesịt, mînyụn̄ imaha ndikabade esịt, ana ẹsio utọ owo oro ẹfep ke esop Abasi. (Gal. 5:19-21; 2 John 9, 10) Edieke ebe m̀mê n̄wan fo edide utọ owo emi, mbọk kûkere ke ifọnke nditịn̄ nnọ mbiowo. Mbọm mbon oro ebe m̀mê n̄wan esifiomode esinam Jehovah.

Owo emi esịnde efịbe iduehe ebe m̀mê n̄wan esie kpọt, edi edue Jehovah n̄ko. (Matt. 19:4-9; Heb. 13:4) Edieke esinamde item Bible, kûkere ke afo anam ebe m̀mê n̄wan fo esịn efịbe.

Ti ke Jehovah ọdiọn̄ọ nte etiede fi ke idem. Enye ọkọdọhọ ke imọ idi ebe inọ idụt Israel. Ndien Bible etịn̄ nte ekesitiede enye ke idem ke ini nditọ Israel ẹkekpọn̄de enye ẹketuak ibuot ẹnọ mme abasi en̄wen. (Isa. 54:5, 6; Jer. 3:1, 6-10) Edieke ebe m̀mê n̄wan fo ọkpọn̄de fi, ọdiọkde fi ukama, m̀mê esịnde efịbe, ti ke Jehovah okop eyet emi afo atuade. (Mal. 2:13, 14) Enye ọfiọk ke omoyom un̄wam ye ndọn̄esịt.

Nte Jehovah Esidọn̄de Owo Esịt

Jehovah esida esop esie ọdọn̄ owo esịt. Se ikọdọn̄de Jane esịt edi oro. Jane ọdọhọ ete: “Esenyịn circuit ekedi ke ata nnennen ini emi idem ekenen̄erede emem mi. Ebe emi ama okot mi ikpe usiondọ. Ibifịk ikodụhe-du mi aba, edi esenyịn circuit nnyịn ama ọfiọk nte etiede mi ke idem. Enye ama enen̄ede etie ye ami eneme se idude  ke 1 Corinth 7:15. Itie Bible emi ye nti ikọ oro enye eketịn̄de ama anam mfiọk ke idịghe ami nnam ebe mi anam se enye akanamde oro, onyụn̄ anam esịt ana mi sụn̄.” *

Margarita n̄ko ama okụt ke Jehovah esida esop esie an̄wam owo. Enye ọdọhọ ete: “Mma nda nditọ mi n̄ka obio en̄wen ke mma n̄kokụt ke ebe mi iyomke ndikabade esịt. Mma n̄kọbọ ubet ufọk iba do ndụn̄. Ke ndan̄nsiere, mma nnen̄ede n̄kop mfụhọ, ndien nte n̄kosụk nsion̄ode n̄kpọ ke ekpat, owo ama ọkọn̄ usụn̄. N̄kekere ke mma enyene-ebiet ke edi sia enye okodụn̄ ekpere nnyịn. Idem ama akpa mi ndikụt eyenete an̄wan emi ekekpepde eka mi Bible onyụn̄ anam nnyịn idikụt akpanikọ. Idịghe ami ke enye ekediyom, edi ekedi ndikụt mma enyene-ebiet oro enye esikpepde n̄kpọ. Esịt ama enem mi tutu ntọn̄ọ nditua. Enye ama etiene atua ke ama okokop se ikọwọrọde mi. Ekem ọsọsọp anam ndutịm man idụk mbono esop usen oro. Mbon esop mmọ ẹma ẹnen̄ede ẹdara nnyịn, ndien mbiowo ẹma ẹnam ndutịm man ẹn̄wam mi n̄keme ndise mban̄a nditọ mi ke n̄kan̄ eke spirit.”

Se Mbon En̄wen Ẹkpenamde man Ẹn̄wam

Nditọete ẹkeme ndin̄wam ke nsio nsio usụn̄. Ke uwụtn̄kpọ, akana Margarita anam utom. Ubon kiet ke esop oro ẹma ẹsise ẹban̄a nditọ esie n̄wed ama asuana.

Margarita ọdọhọ ete: “Esịt esinen̄ede enem mi ke ini nditọete iren ye iban ẹdọhọde ke idisan̄a ye nnyịn ke an̄wautom.” Utọ un̄wam emi anam nditọete ke esop “ẹka iso ẹbiom mfịghe kiet eken,” onyụn̄ owụt ke mmọ ẹnịm “ibet Christ.”—Gal. 6:2.

Mbon emi mme owo ẹnamde mmọ ẹbọ ufen ẹsikop inemesịt ke ini mbon en̄wen ẹfọnde ido ye mmọ ntre. Monique emi ebe ọkọkpọn̄de enye ye nditọ inan̄, ye isọn $15,000 (emi edide ebe miliọn naira iba), ọdọhọ ete: “Nditọete ke esop ẹma ẹnen̄ede ẹfọn ido ye nnyịn. Ndiọn̄ọke nte n̄kpokodude uwem edieke mmọ mîkpakan̄wamke mi. Mmọfiọk ke Jehovah okosio utọ nti nditọete oro ọnọ nditọ mi. Esịt enem mi ndikụt nte un̄wam nditọete oro anamde nditọ mi ẹnam n̄kọri ke n̄kan̄ eke  spirit. Mbiowo ẹsin̄wam mi ke ini nyomde item. Edieke nyomde owo emi ntịn̄de mfịna mi nnọ, mmọ ẹsikpan̄ utọn̄ ẹnọ mi.”—Mark 10:29, 30.

Edi eti ufan esifiọk n̄ko ini emi enye mîkpetịn̄ke n̄kpọ ndomokiet iban̄a mfịna ufan esie. (Eccl. 3:7) Margarita ọdọhọ ete: “Se nsinemede idahaemi ye nditọete iban ke esop nnyịn edi utom ukwọrọikọ, ukpepn̄kpọ Bible nnyịn, nditọ nnyịn, ye mme n̄kpọ ntre—nsinemeke mfịna mi. Mmokop inemesịt sia mmọ ẹn̄wam mi mfre se ikebede nnyụn̄ ntọn̄ọ obufa uwem.”

Kûsio Usiene

Ndusụk ini, ekeme ndidi udûkereke ke imọ inam ebe m̀mê n̄wan imọ anam idiọkn̄kpọ, edi esịt ekeme ndinen̄ede ndiọk fi ndifiọk ke enye anam ọbọ ofụri ufen emi osụk ọbọde idahaemi. Edieke akade iso ọdiọk esịt, ọwọrọ udukemeke aba ndika iso nnam n̄kpọ Jehovah. Ke uwụtn̄kpọ, emi ekeme ndinam ekere nte edisan̄ade osio enye usiene.

Edieke utọ idiọk ekikere oro odụkde fi esịt, ti se Joshua ye Caleb ẹkenamde. Mme anam-akpanikọ iren emi ẹma ẹnyịme n̄kpa ẹtiene ẹkeyep Isọn̄ Un̄wọn̄ọ. Mbon uyep eken ikenyeneke mbuọtidem, ntre mmọ ẹma ẹnam nditọ Israel ẹkpọn̄ Jehovah. Ke ini Joshua ye Caleb ẹkedọhọde nditọ Israel ẹkûkpọn̄ Jehovah, ndusụk mmọ ẹma ẹyom nditọn̄ọ mmọ ke itiat n̄wot. (Num. 13:25–14:10) Omokụt ke idiọkn̄kpọ nditọ Israel ama anam Joshua ye Caleb ẹtiene ẹbọ ufen ẹyo isua 40 ke wilderness.

Kpa ye oro mîkenemke mmọ, mmọ ikesịnke nditọete mmọ ke esịt. Se ikebehede nditọ mbon ekedi ndinam n̄kpọ Jehovah. Ke otu ofụri emana oro ẹkeyode isua 40 ke wilderness, Joshua, Caleb, ye nditọ Levi kpọt ẹkedụk Isọn̄ Un̄wọn̄ọ.—Num. 14:28-30; Josh. 14:6-12.

Emekeme ndibọ ufen mbịghi edieke ebe m̀mê n̄wan fo mînamke akpanikọ. Ndọ mbufo ekeme ndibiara, esịt ọduọ fi, n̄kpọ onyụn̄ ekeme ndinen̄ede nsọn̄ ye afo. Utu ke ndiyak editịmede esịt owot fi, ti ke Jehovah enen̄ede ọfiọk se enye edinamde mbon oro ẹkoide-koi ẹtre ndinam se Enye ọdọhọde. Idịghe emeti se enye akanamde nditọ Israel ke wilderness ke ntak nsọn̄ibuot mmọ.—Heb. 10:30, 31; 13:4.

Afo N̄ko Emekeme Ndiyọ!

Sikere n̄kpọ Jehovah utu ke ndiyak mfịna fo emen fi emen. Jane ọdọhọ ete: “Se ikan̄wamde mi ekedi ndisibre tape Enyọn̄-Ukpeme ye Awake! N̄kpọ en̄wen ekedi ndisidụk mbono esop. Ndibuana ke se ẹnamde ke mbono esop ama esinam mfre mfịna mi. Ntre ke ekesinyụn̄ edi ke ini n̄kade ukwọrọikọ. Ndin̄wam mbon en̄wen ẹbuọt idem ye Jehovah ama ọsọn̄ọ mbuọtidem mi n̄ko. Ndinọ nditọ ukpepn̄kpọ Bible mi ntịn̄enyịn ama anam nsikere akpan n̄kpọ.”

Monique ọdọhọ ete: “Se ikan̄wamde mi ekedi ndisidụk mbono esop kpukpru ini nnyụn̄ n̄ka ukwọrọikọ adan̄a nte n̄kekeme. Imenen̄ede idiana kiet ke ubon nnyịn, inyụn̄ inen̄ede ikpere mbon esop nnyịn idem. Se itịbede inọ mi anam ndiọn̄ọ ebiet emi mmenamke ọfọn. Mmokụt ukụt, edi Jehovah an̄wam mi nyọ.”

Afo n̄ko emekeme ndiyọ. Kpa ye oro se ebe m̀mê n̄wan fo anamde fi enen̄erede abiak fi, domo ndinam item Abasi emi Paul ekewetde mi ete: “Ẹyak nnyịn ikûkpa mba ke edinam se ifọnde, koro ke edikem ini nnyịn iyọdọk edieke nnyịn mîkpaha mba.”—Gal. 6:9.

[Mme Ikọ Idakisọn̄]

[Ndise ke page 31]

Mbon emi ebe m̀mê n̄wan ọkpọn̄de ẹsikop inemesịt ke ini asan̄ade ye mmọ ke an̄wautom