Kpep Nditọ Fo Ẹma Ndikot N̄wed Nnyụn̄ N̄kpep N̄kpọ

IWAKKE n̄kpọ emi an̄wamde nditọwọn̄ ẹwọrọ n̄kpọ nte ndikpep mmọ ndikot n̄wed nnyụn̄ n̄kpep n̄kpọ. Ndien emi esinem etieti. N̄kpọ emi ediwak owo ẹsinen̄erede ẹma nditi mban̄a ini emi ikedide nditọwọn̄ esidi nte ete ye eka mmimọ ẹkesikotde n̄wed ẹnọ mmimọ. Ukotn̄wed esinem onyụn̄ ọfọn. Enye enen̄ede ọfọn ye mme asan̄autom Abasi, sia ndikpep Bible anam mmọ ẹkọri ke n̄kan̄ eke spirit. Eyenete nnyịn kiet emi enyenede nditọ ọdọhọ ete, “Se nnyịn imade ikan enyene n̄kpọ ndinam ye edikot n̄wed nnyụn̄ n̄kpep n̄kpọ.”

Ndidiọn̄ọ nte ẹkpepde n̄kpọ ekeme ndinam nditọ fo ẹnen̄ede ẹsan̄a ẹkpere Abasi. (Ps. 1:1-3, 6) Kpa ye emi mîdịghe ukotn̄wed edinam ẹnyan̄a owo, Bible ọdọhọ ke ndikot n̄wed ekeme ndinọ owo ata akamba ufọn ke n̄kan̄ eke spirit. Ke uwụtn̄kpọ, Ediyarade 1:3 ọdọhọ ete: “Inemesịt edi eke enye emi okotde ye mmọ emi ẹkopde ntịn̄nnịm ikọ emi.” Se apostle Paul eketịn̄de ọnọ Timothy owụt ata akpan n̄kpọ en̄wen oro owo akpanamde ke adianade ye edikot n̄wed, oro edi, nditie n̄kere se owo okotde. Paul ọkọdọhọ ete: “Tie kere mme n̄kpọ emi; sịn idem ke mmọ ofụri ofụri.” Ntak-a? “Man kpukpru owo ẹkpekụt n̄kọri fo.”—1 Tim. 4:15.

Imọfiọk ke idịghe kpukpru mbon emi ẹfiọkde ndikot n̄wed nnyụn̄ n̄kpep n̄kpọ ẹdidia ufọn ifiọk emi. Ediwak mbon emi ẹdiọn̄ọde ndikot n̄wed isidaha ifiọk emi inam n̄kpọ ndomokiet, edi ẹsikam ẹbiat ini ẹnam se mînyeneke ufọn. Ke ntre, didie ke mme ete ye eka ẹkeme ndinam nditọ mmọ ẹma ndikpep n̄kpọ emi enyenede ufọn?

Ma Nditọ Fo Nyụn̄ Nịm Eti Uwụtn̄kpọ Nọ Mmọ

Nditọ ẹsinen̄ede ẹma ndikpep n̄kpọ edieke mme ete ye eka ẹmade mmọ. Kop se Owen ye Claudia, nditọete nnyịn emi ẹdide ebe ye n̄wan ẹtịn̄de ẹban̄a nditọ mmọ iba: “Nditọ nnyịn ẹsikam ẹtetie ẹbet ini ukpepn̄kpọ emi sia ini emi esinem etieti—imesinen̄ede inam mmọ ẹkop inem ẹnyụn̄ ẹnyene ifụre. Mmọ ẹsikụt ke imenen̄ede ima mmọ.” Idem ke ini nditọ ẹma ẹkekabade uyen, eti idaha oro esidude ke ini ukpepn̄kpọ ubon ayanam mmọ ẹka iso ẹma ndikpep n̄kpọ. Nditọ Owen ye Claudia ẹdi mme asiakusụn̄ idahaemi, mmọ ke ẹdia ufọn ukotn̄wed ye ukpepn̄kpọ oro ete ye eka mmọ ẹkekpepde mmọ.

Ndinịm uwụtn̄kpọ nnọ owo ekeme ndinam enye enen̄ede ama n̄kpọ. Nditọ emi ẹsiwakde ndikụt ete ye eka mmọ ẹkotde n̄wed ẹnyụn̄ ẹkpepde n̄kpọ ẹkeme nditiene uwụtn̄kpọ mmọ. Edi edinam didie inịm utọ uwụtn̄kpọ emi inọ nditọ fo edieke mûsukotke n̄wed? Ekeme ndidi oyoyom afiak anam ndutịm mîdịghe ekpep ndima ndikot  n̄wed. (Rome 2:21) Edieke esikotde n̄wed kpukpru usen, nditọ fo eyekpep ndinam ntre n̄ko. Ndisịn ifịk n̄kot Bible, ntịm idem nnọ mbono esop, nnyụn̄ nnịm ukpepn̄kpọ ubon, anam ẹdiọn̄ọ adan̄a nte amade mme n̄kpọ emi.

Ntre, edieke amade nditọ fo onyụn̄ enịmde eti uwụtn̄kpọ ọnọ mmọ, nditọ fo ẹyema ndikot n̄wed. Edi nso ye nso ke akpanam man an̄wam nditọ fo ẹma ndikot n̄wed?

N̄wam Nditọ Fo Ẹma Ndikot N̄wed

Nso ke akpanam man nditọ fo ẹma ndikot n̄wed? Nọ mmọ n̄wed toto ke ini emi mmọ ẹdide n̄kpri. Ebiowo kiet emi ete ye eka esie ẹkenamde enye ama ndikot n̄wed ọdọhọ ete: “Kpep mmọ nte ẹsikamade n̄wed ye nte ẹsikụbọrede n̄wed. Emi ayanam mmọ ẹma n̄wed.” Ediwak nditọ ẹsima ndikama mme utọ n̄wed nte Kpep N̄kpọ to Akwa Andikpep ye N̄wed Mi eke Mme Mbụk Bible idem mbemiso mmọ ẹdiọn̄ọde ndikot n̄wed. Ndikot mme n̄wed ntem nnọ nditọwọn̄ ekpep mmọ usem onyụn̄ anam mmọ ẹdiọn̄ọ “mme ikọ eke spirit” ye “mme n̄kpọ eke spirit.”—1 Cor. 2:13.

Kot n̄wed nọ mmọ kpukpru ini. Kot n̄wed nọ nditọ fo kpukpru usen. Emi ayanam mmọ ẹfiọk ndikot ikọ ọfọn onyụn̄ anam mmọ ẹma ndikot n̄wed. Ana ekpeme n̄ko nte esikotde n̄wed. Edieke okotde enye nduaidem nduaidem, nte mmọ ẹdisikotde edi oro n̄ko. Ndien oyokụt ke mmọ ẹyeyom afiak okot mbụk oro ọnọ mmimọ. Nyụn̄ nam nte mmọ ẹdọhọde. Ndien nte ini akade, mmọ ẹyeyom ndikpep mme n̄kpọ en̄wen. Edieke akakde mmọ, kûkpak mmọ. Jesus ekesikpep mme owo n̄kpọ etiene “adan̄a nte mmọ ẹkemede ndikop.” (Mark 4:33) Edieke mûkpake-kpak mmọ, mmọ ẹdisitetie ibet ini ukotn̄wed, ndien emi ayanam mmọ ẹtọn̄ọ ndima ukotn̄wed kpa nte afo akaduakde.

Nam mmọ ẹtiene ẹkot, nyụn̄ neme se okotde ye mmọ. Ayakpa fi idem ndikụt ke mmọ ẹtọn̄ọ ndidiọn̄ọ ndikot mme ikọ, ẹnyụn̄ ẹfiọk se mme ikọ oro ẹwọrọde. Ndineme se okotde ye mmọ ayanam mmọ ẹsọp ẹnam n̄kọri. N̄wed emi etịn̄de nte ẹkemede ndikpep nditọ ndikot n̄wed ọfọn ọdọhọ ke ‘ndineme nneme ye nditọwọn̄ anam mmọ ẹsọp ẹmehe ye mme ikọ emi mmọ ẹdikụtde ke ini ẹkotde n̄wed. Ndien nte mmọ ẹsụk ẹdomode ndifiọk n̄kpọ nnyụn̄ n̄keme ndikot n̄wed, se idinen̄erede in̄wam mmọ edi ndisineme nti nneme ye mmọ.’

Dọhọ mmọ ẹkot n̄wed ẹnọ fi nyụn̄ kpep mmọ ndibụp mbụme. Emekeme ndibụp mmọ mbụme onyụn̄ ọnọ mmọ nsio nsio ibọrọ. Emi ayanam mmọ ẹdiọn̄ọ ke imekeme ndikpep ekese ke n̄wed ye nte ke ikọ kiet kiet emi mmimọ ikotde enyene se ọwọrọde. Ndien enen̄ede ọfọn ẹkot n̄wed emi ekpepde n̄kpọ aban̄a Bible kpa akakan n̄wed.—Heb. 4:12.

Kûfre n̄ko ke ukotn̄wed imemke utom. Esida ini, onyụn̄ oyom ẹnam ẹfiak ẹnam mbemiso owo ọdiọn̄ọ ndikot n̄wed ọfọn. * Ntre, nen̄ede toro mmọ ke ukeme oro mmọ ẹsịnde ndikot n̄wed. Ndisitoro mmọ ayanam mmọ ẹnen̄ede ẹma ndikot n̄wed.

Ọfọn Onyụn̄ Enem

Ndikpep nditọ nte ẹkpepde n̄kpọ ayanam mmọ ẹfiọk ufọn ukotn̄wed. Ndikpep n̄kpọ edi ndikọ ifiọk nnyụn̄ n̄kụt nte se ẹkpepde enyenede ebuana ye n̄kpọ en̄wen. Emi oyoyom idiọn̄ọ ndibon se ikpepde ke nde ke nde, iti mmọ, inyụn̄ ida ifiọk oro inam n̄kpọ. Eyenọwọn̄ ama ọfọfiọk ndikpep n̄kpọ ye ufọn ukpepn̄kpọ, ukpep n̄wed edinenem enye onyụn̄ enyene ufọn ọnọ enye.—Eccl. 10:10.

 Wụt mmọ nte ẹsikpepde n̄kpọ. Mbubreyo oro ẹnịmde Utuakibuot Ubon, ini oro ẹdụn̄ọrede itie N̄wed Abasi eke usen ke usen, ye mme ini ntem edi mfọnn̄kan ini emi ekemede ndida n̄wụt nditọ fo nte ẹsikpepde n̄kpọ. Ndisituak nda esisịt n̄kere n̄kpọ, eyekpep nditọ fo akpan n̄kpọ, oro edi, ndisitie n̄kere n̄kpọ. Ke adianade do, emekeme ndibụp eyen fo eren nte se enye ekpepde enyenede ebuana ye se enye ama ọkọfọfiọk. Emi eyekpep enye ndimen n̄kpọ ndomo ye n̄kpọ. Mîdịghe emekeme ndidọhọ eyen fo an̄wan afiak etịn̄ se enye okotde ibio ibio ke ikọ idemesie. Emi ayanam n̄kpọ oro an̄wan̄a enye, inyụn̄ iyakke enye ọsọp efre. Ndifiak ndụn̄ọde se ẹkekpepde, oro edi, ndifiak ntịn̄ akpan n̄kpọ emi odude ke ibuotikọ oro ẹkpepde, edi n̄kpọ en̄wen emi ekemede ndin̄wam owo eti se enye ekekpepde. Emekeme ndikpep nditọwọn̄ ndisiwet mbio mbio n̄kpọ ke ini ẹkpepde n̄kpọ m̀mê ke mme mbono esop. Emi eyenen̄ede an̄wam mmọ ẹsikpan̄ utọn̄. Mme n̄kpọ emi isiakde mi ayanam fi ye nditọ fo ẹkop inem ukpepn̄kpọ onyụn̄ anam se ẹkpepde enyene ufọn.

Tie ke eti itie kpep n̄kpọ. Nditọ ẹyenen̄ede ẹkpan̄ utọn̄ edieke itie oro ẹtiede ekpep n̄kpọ mîtiehe uyom uyom, ifiopke, ikan̄ ye eti n̄kpọitie ẹnyụn̄ ẹdu. Akpan n̄kpọ en̄wen edi nte ete ye eka ẹdade ukpepn̄kpọ. Mma kiet ọdọhọ ete: ‘Ọfọn esikot n̄wed onyụn̄ ekpep n̄kpọ kpukpru ini. Emi ayanam mmọ ẹsinam n̄kpọ ke nde ke nde. Mmọ ẹyefiọk ke kpukpru n̄kpọ enyene ini.’ Ndusụk ete ye eka isiyakke ẹda ini ukpepn̄kpọ ẹnam n̄kpọ en̄wen. Ete kiet emi enen̄erede ọfiọk n̄kpọ emi ọdọhọ ke emi edi mfọnn̄kan usụn̄ ndikpep nditọ nte ẹkpekpepde n̄kpọ.

Nam mmọ ẹdiọn̄ọ ufọn ukpepn̄kpọ. Wụt nditọ fo nte mmọ ẹkemede ndinam se mmọ ẹkpepde. Ndinam se ẹkpepde owụt ke se ẹkekpede enyene ufọn. Eyenete emi edide isua 20 ọdọhọ ete: “Esisọn̄ mi ndikpep se mmemfiọkke ufọn. Edi mmesima ndifiọk n̄kpọ emi mfiọkde ke ebehe mi.” Nditọwọn̄ ẹsima ndidiọn̄ọ n̄kpọ emi mmọ ẹfiọkde ke enyene ufọn ọnọ mmimọ. Mmọ ẹsikam ẹtetie ẹbet utọ ukpepn̄kpọ emi kpa nte ẹsinamde ye n̄wed oro mmọ ẹmade ndikot.

Akakan Udori

Nnyịn ikemeke ndibat kpukpru ufọn edikpep nditọ ndima ukotn̄wed. Ke nditịn̄ ibio ibio, ke ẹsiode edikop idem inem ẹfep, ukotn̄wed ye ukpepn̄kpọ ẹyenam nditọ mbufo ẹfiọk n̄wed, ẹfiọk utom, ẹdiọn̄ọ nte ẹnamde n̄kpọ ye mbon en̄wen, uwem ererimbot emi ayan̄wan̄a mmọ, ndien mmọ ẹyenen̄ede ẹma mbufo, ete ye eka mmọ.

Se ikam ifọnde ikan edi nte ke ndima ndikpep n̄kpọ ayanam nditọ mbufo ẹma ndinam n̄kpọ Abasi. Ndima ndikpep n̄kpọ ayanam mmọ ẹfiọk “ubom ye uniọn̄ ye ukon̄ ye utụn̄ọ” akpanikọ N̄wed Abasi. (Eph. 3:18) Mme ete ye eka oro ẹdide Christian ẹnyene ekese ndikpep nditọ mmọ. Nditọn̄ọ ke ekpri nsịn ofụri ukeme n̄kpep nditọ n̄kpọ nnyụn̄ nnen̄ede nnọ mmọ ntịn̄enyịn esinam mme ete ye eka ẹnyene idotenyịn ke mmọ idikpọn̄ke Jehovah. Ndikpep nditọ fo nte ẹsikpepde n̄kpọ ayanam mmọ ẹnen̄ede ẹsan̄a ẹkpere Abasi ẹnyụn̄ ẹma ndinam n̄kpọ esie. Ke ntre, bọn̄ akam nọ Jehovah ete an̄wam fi ekpep nditọ fo ndima ndikot n̄wed nnyụn̄ n̄kpep n̄kpọ.—N̄ke 22:6.

[Ikọ Idakisọn̄]

 [Ekebe/Mme ndise ke page 26]

Ukotn̄wed . . .

• Kụt ete ke kpukpru owo ẹnyene n̄wed emi ẹyomde ndikot

• Kot uyo ọwọrọ

• Yak nditọ fo ẹtiene ẹkot

• Neme se okotde

• Dọhọ nditọ fo ẹtiene ẹse nte okotde

• Sịn udọn̄ nọ mmọ ẹbụp mbụme

Ukpepn̄kpọ . . .

• Nịm eti uwụtn̄kpọ nọ nditọ fo

• Kpep nditọ fo . . .

○ nditie n̄kere se ẹkpepde

○ ndida n̄kpọ ndomo ye n̄kpọ

○ ndifiak ntịn̄ ibio ibio se ẹkpepde

○ ndinam ndụn̄ọde

○ ndiwet mme akpan n̄kpọ oro ẹkpepde

• Tie ke eti itie kpep n̄kpọ

• Nam nditọ fo ẹfiọk ufọn ukpepn̄kpọ