Nditịn̄ Enyịn Esinyene Ufọn

NDI emesitịn̄ enyịn oyom ifet oro akpadade ọkwọrọ ikọ ke efakutom mbufo? Nditọete ke Turku, emi edide ọwọrọetop obio mbehe ke Finland ẹma ẹnam oro, ndien emi ama enyene ufọn.

Isan̄ kiet, mmọ ẹma ẹkop ke mbon Asia ẹdibehe. Mmọ ẹkedi ndikụre utom ke akamba nsụn̄ikan̄ oro ẹkesụk ẹnamde ke ubọk ke itie unam nsụn̄ikan̄ ke obio mmọ. Ekem, eyenete kiet ama oyom usụn̄ ọdiọn̄ọ mme ufọkisen emi isenowo emi ẹkedụn̄ọde. Enye ama ọfiọk ke bọs esika ekemen mmọ tụhi-tụhi usenubọk aka utom ke itiembehe. Enye ama ọsọsọp asian mbon esop Ikọmbakara ke Turku.

Mbiowo esop oro ẹma ẹfiọk ke ata eti ifet edi oro ndikwọrọ etop Obio Ubọn̄ nnọ ediwak isenowo oro, ndien mmọ ẹma ẹsọsọp ẹnam ndutịm ẹban̄a oro. Ke Sunday urua oro, mme asuanetop duop ẹma ẹbabak n̄kanika itiaba usenubọk ẹka ebiet emi mbonutom oro ẹsidade ẹdụk bọs. Mme asuanetop oro ikekwe owo ndomokiet. Mmọ ẹma ẹkere m̀mê idi ke idiọk ini; m̀mê mbonutom oro ikam idụhe aba ke Turku. Edi ẹtise, kiet esịne ọfọn̄ utom ọwọrọ ke ekpri efak kiet edi. En̄wen adiana, ndien ikebịghike mbonutom oro ẹma ẹdiyọhọ. Mme asuanetop oro ẹma ẹtọn̄ọ ndikwọrọ ikọ, ẹnyụn̄ ẹnọ mmọ n̄wed Ikọmbakara. Ke mfọniso, mbonutom oro ẹma ẹdu do n̄kpọ nte hour kiet mbemiso ẹdahade, anamde nditọete oro ẹkeme ndikwọrọ ikọ nnọ ediwak mmọ. Mbemiso bọs ẹkedahade, ẹma ẹnọ mmọ n̄kpri n̄wed 126, ye magazine 329!

Emi ama anam nditọete oro ẹfiak ẹka urua en̄wen, emi esenyịn circuit ekedide. Isan̄ emi edịm ama edep, esenyịn circuit ekenịm mbono an̄wautom ke ebe itiokiet usenubọk, ndien mme asuanetop 24 ẹma ẹdaha itiembehe bọs oro. Mmọ ẹma ẹda mme n̄wed usem Tagalog sia ẹkediọn̄ọde ke ediwak mbonutom oro ẹto Philippi. Usenubọk oro, ẹma ẹnọ mbonutom oro ikpọ n̄wed 7, n̄kpri n̄wed 69, ye magazine 479 mbemiso mmọ ẹdaha utom. Kere nte esịt ekenemde nditọete oro!

Mbemiso mbonutom oro ẹkenyọn̄ọde obio mmọ, nditọete oro ẹma ẹsika ufọkisen mmọ ẹkenam etop Obio Ubọn̄ enen̄ede an̄wan̄a mmọ. Ndusụk mmọ ẹkedọhọ ke ima isinyene nneme ye nditọete nnyịn ke mme idụt en̄wen. Mmọ ẹma ẹkọm nditọete nnyịn ke ukeme oro mmọ ẹkesịnde ẹyom mmimọ ẹkụt ke ini idude ke Finland.

Ndi ke etịn̄ enyịn n̄ko oyom mme ifet emi akpadade ọkwọrọ ikọ ke efakutom mbufo? Ndi emesịn ofụri ukeme odomo ndikwọrọ ikọ nnọ mbon oro mîtoho edem mbufo? Edieke anamde oro, ekeme ndidi emenyene ukem ifiọkutom oro nditọete nnyịn ke Turku ẹnyenede.

[Ndise obio/Ndise ke page 32]

(Ama oyom ndikụt nte enye enen̄erede etie, se idem n̄wed)

FINLAND

HELSINKI

Turku