Ẹkot Kpukpru Owo!
Ẹkot Kpukpru Owo!
ẸKOT kpukpru owo nso? Ẹkot ẹte ẹdise n̄kọk itieutom Mme Ntiense Jehovah, emi ẹkotde Bethel. Nnyịn inyene n̄kọk itieutom 118 ke ofụri ererimbot. Mbon emi ẹsikade ẹkese Bethel ẹsiwụt esịtekọm ẹban̄a se mmọ ẹkụtde do.
Uyen kiet emi ekpepde Bible ama obụp ke ama okokụt ediwak owo emi ẹkopde inemesịt ẹnyụn̄ ẹsịnde ifịk ẹnam utom ke n̄kọk itieutom Mexico, ete: “Nso ke n̄kpanam man n̄keme ndidu mi?” Ẹma ẹdọhọ ke ‘akpa n̄kpọ emi enye enyenede ndinam edi ndina baptism. Ndien ke ọkpọfọn ndidi asiakusụn̄—oro edi, anditan̄a etop Obio Ubọn̄ ofụri ini.’ Enye ama anam oro, ndien ke isua iba ẹbede, ẹma ẹkot enye edinam utom ke Bethel Mexico, enye anam utom do isua 20 idahaemi.
Nso Idi Bethel?
Ke usem Hebrew, “Bethel” ọwọrọ Ufọk Abasi. (Gen. 28:19) Ẹsimịn̄ Bible ye mme n̄wed nnyịn mi, ekem ẹnọ mmọ ẹwọrọ. Mi ke ẹsinyụn̄ ẹtie ẹnọ esop Mme Ntiense Jehovah—emi edide awak ebe 100,000—ke ofụri ererimbot ndausụn̄. N̄kpọ nte iren ye iban 20,000 emi ẹdude ke nsio nsio idaha emi ẹnyụn̄ ẹtode nsio nsio idụt, ẹda ofụri uwem mmọ ẹnam n̄kpọ ke imaesịt ẹnọ Jehovah ye nditọete mmọ. Mbon emi ẹma ẹkenam utom Bethel ke ediwak isua ẹsidiana ye n̄kparawa ẹnam utom. Esinem mbon Bethel ndidụk mbono esop nnyụn̄ nsan̄a ye esop mmọ n̄ka ukwọrọikọ ke mbubreyo ye ke utịturua. Mmọ ẹsida ini mmọ n̄ko ẹkpep Bible, ẹduọk odudu, ẹnyụn̄ ẹnam mme n̄kpọ eken.
Ẹsinọ mbon Bethel ekpri okụk ekpatọfọn̄ ke ọfiọn̄ ke ọfiọn̄. Mmọ ẹsidia nti udia, ẹnyụn̄ ẹdụn̄ọ ke ndiye ufọk emi asanade. Owo ibọpke Bethel uwouwo uwouwo, edi mmọ ẹye. Esinem isenowo ndikụt ndiye ufọk ye ediye n̄kann̄kụk ye nte ẹnamde n̄kpọ ke nde ke nde ọkọrọ ye mfọnido ye edidianakiet mbon Bethel. Kpa ye oro kpukpru owo ẹsisịnde ifịk ẹnam utom mmọ, oro isikpanke mmọ nditie ufan ufan. Owo inamke asari ke Bethel, owo inyụn̄ idaha idem ke n̄kpọ ke ntak ebiet emi owo anamde utom. Idụhe utom emi ẹsede ke usụhọde—edide edi ndinịm ebiet asana, ndise mban̄a flawa, nditem udia, ndinam utom ke itie umịn̄n̄wed, m̀mê ke ọfis. Mbon Bethel ẹdiana kiet ẹnam utom man ẹn̄wam ke utom emi ekemmọ Mme Ntiense Jehovah ẹsinamde.—Col. 3:23.
Yak Ineme Iban̄a Ndusụk Mbon Bethel
Idahaemi yak ineme iban̄a ndusụk mbon emi ẹnamde utom ke Bethel. Nso ikanam ọdọn̄ mmọ ndinam utom ke Bethel? Da Mario ke uwụtn̄kpọ. Mbemiso enye akakabarede edi kiet ke otu Mme Ntiense Jehovah, enye ama enyene eti utom ke ọwọrọetop usiakifia emi ẹsinamde ubomisọn̄ ke Germany, emi akpakanamde enye oforo. Edi ke enye ama akana baptism, enye ama enyịme ndikanam utom urua kiet kpọt ke Bethel idụt mmọ. Ẹma ẹdọhọ enye akanam utom ke itie umịn̄n̄wed. Mario ama okụt ke mbon Bethel ẹnen̄ede ẹkpụhọde ye mbon itieutom mmimọ. Ntre enye ama esịn n̄wed ndinam utom ke Bethel. Kpa ye oro se enye akanamde emi mîkan̄wan̄ake ndusụk iman esie ye mbon itieutom mmọ, idahaemi Mario ke okop inem utom esie ke Bethel Germany.
Ediwak mbon oro ẹdude ke Bethel ikakaha san̄asan̄a ufọkn̄wed m̀mê ndinyene akpan ubọkutom mbemiso ẹkedide Bethel. Abel emi ama akanam utom isua 15 idahaemi ke Bethel Mexico edi kiet ke otu mmọ. Enye ọdọhọ ete: “Mmekpep ata ediwak n̄kpọ ke Bethel. Mmọdiọn̄ọ ndida awak-n̄kukọhọ ukwak umịn̄n̄wed nnam utom. Mmọfiọk ke n̄kpenyene ata ediwak okụk edieke n̄kpadade ifiọk emi n̄kanam utom ke an̄wa, edi ndinyeneke se nnyenede idahaemi ke Bethel—uwem ifụre emi anamde n̄kop uyụhọ, mmonyụn̄ mbọhọ editịmede esịt ye umia mbuba oro ẹyọhọde ediwak itieutom. N̄kere ke mmọbọ mfọnn̄kan ukpep, emi anamde ntetịm nnyene ifiọk nnyụn̄ n̄kọri ke n̄kan̄ eke spirit. N̄kpọbọhọ utọ ukpep emi idem ọkpọkọm n̄kpaka mfọnn̄kan ufọkn̄wed ntaifiọk.”
Ndika N̄kese Ekeme Ndisọn̄ọ Fi Idem
Ndika n̄kese Bethel ekeme ndinam owo enen̄ede asan̄a ekpere Abasi. Ntre ke ekedi ye Omar ke Mexico. Eka esie ama ekpep enye akpanikọ Bible. Edi ke ama ekesịm isua 17, enye ama etre ndidụk mbono esop inyụn̄ iwọrọke aba an̄wautom. Enye ama ọtọn̄ọ ndinam se amama onyụn̄ esịn ibuot ye itọn̄ oyom inyene. Ke ini enye akanamde utom ke usiakifia unyene uneme ke urụk ukopikọ, enye ama esịne ke otu mbon emi ẹkekade Bethel Mexico ndikowụt obufa n̄kpọutom. Omar ọdọhọ ete: “Ke ima ikowụt mmọ n̄kpọutom oro, mmọ ẹma ẹda nnyịn ẹsan̄a ẹwụt mme n̄kpọ ke Bethel. Se n̄kokụtde ye nte ẹkefọnde ido ye ami ama anam mfiak ntie n̄kere ntak emi n̄kọkpọn̄de Jehovah ndidu uwem ntem. Mma nsọsọp mfiak ntọn̄ọ ndidụk mbono esop nnyụn̄ n̄kpep Bible. Mma nna baptism ke ọfiọn̄ itiokiet ẹbede. Mmọkọm Jehovah ke nsịnudọn̄ oro n̄kọbọde ke ndikese Bethel.”
Ẹkebọk Masahiko emi otode Japan ke akpanikọ. Edi enye ama ọtọn̄ọ ndikere ke esop Abasi etie ukpan ukpan akaha. Ntre, enye ama ọtọn̄ọ nditiene nnam se ededi oro ẹnamde ke ufọkn̄wed onyụn̄ afiak mbono esop ye ukwọrọikọ. Enye ọdọhọ ete: “Usen kiet ubon nnyịn ye mme nditọete ifan̄ ẹma ẹyom ndikese Bethel. Mbonubon nnyịn ẹma ẹkpek mi ẹte ntiene ndi, ntre mma nnyụn̄ ntiene mmọ. Idụhe se ikenemde mi nte ndisan̄a nse Bethel. Akanam mme ufan mi emi mîdịghe Mme Ntiense inamke mi n̄kop utọ inemesịt oro Mme Ntiense ẹkenamde n̄kop ke ini n̄kasan̄ade ye mmọ n̄kese Bethel. Ama enen̄ede ọdọn̄ mi ndinam n̄kpọ Abasi, ndien mma ndọhọ ẹdikpep mi Bible.” Masahiko edi ọkwọrọ ikọ ofụri ini idahaemi ke esop mmọ.
Ntiense kiet ke France ama aka utom ke Moscow. Enye ama ọtọn̄ọ ndimem ke n̄kan̄ eke spirit sia mîkekwe Mme Ntiense Jehovah. Ntre, enye ama ọtọn̄ọ ndidu idiọk uwem onyụn̄ ọdọ owo an̄wa. Eyenete an̄wan kiet emi otode France ama aka ekese enye, ndien mmọ mbiba ẹma ẹka ẹkese Bethel Russia ke St. Petersburg. Enye ewet ete: “Ẹma ẹnen̄ede ẹdara nnyịn ke Bethel, ndien oro ama enen̄ede otụk mi. Kpukpru owo ẹketie emem emem. Mma n̄kụt ke spirit Jehovah odu do. Ntak emi n̄kesịmede n̄kpọn̄ esop Jehovah? Ke mma n̄kaka n̄kese Bethel, mma mbọn̄ akam nnọ Jehovah nte an̄wam mi, ndien mma ntọn̄ọ ndisịn idem n̄kpep nditọ mi Bible.” Se ededi nsịnudọn̄ oro ẹkefiakde ẹnọ eyenete emi, enye ndikaka n̄kese Bethel ama enen̄ede ọsọn̄ọ enye idem onyụn̄ anam enye anam n̄kọri ke n̄kan̄ eke spirit.
Ekere ke esitie mbon emi mîmeheke ye Mme Ntiense Jehovah didie ke idem ke ini mmọ ẹkade ẹkese Bethel? Ke 1988, Alberto emi ekenen̄erede esịn idem ke mbre ukara ama aka ekese Bethel Brazil. Ama enen̄ede enem enye ndikụt nte Bethel asanade, nte ẹnamde n̄kpọ in̄wan̄-in̄wan̄, ye ke nde ke nde. Mbemiso Alberto akakade ekese Bethel, enye ama akaka ufọkn̄wed ukpep utom oku emi eyeneka an̄wan esie edide oku. Enye ama okụt ukpụhọde. Enye ọkọdọhọ ete: “Ẹkededịp kpukpru n̄kpọ oro ẹnamde ke ufọkn̄wed emi.” Ibịghike ke enye ama akaka ekese Bethel, enye ama enyịme ẹkpep imọ Bible, onyụn̄ etre mbre ukara; idahaemi enye edi ebiowo ke esop mmọ.
Di Dise Bethel!
Ediwak owo ẹnen̄ede ẹsịn ukeme man ẹka ẹkese n̄kọk itieutom idụt mmọ. Ke uwụtn̄kpọ, ke Brazil, Paulo ye Eugenia ẹma ẹfam okụk ẹnịm ke isua inan̄ man ẹkeme ndika n̄kese Bethel idụt mmọ emi edide isan̄ usen iba. To ke ufọk mmọ sịm Bethel edi kilomita 3,000. Mmọ ẹdọhọ ẹte: “Nnyịn ituaha n̄kpọfiọk ke ndikesịn kpukpru ukeme oro. Esop Jehovah enen̄ede an̄wan̄a nnyịn idahaemi. Ekesidi ima itetịn̄ se ẹnamde ke Bethel inọ nditọ ukpepn̄kpọ Bible nnyịn, ndusụk mmọ ẹbụp nnyịn ẹte, ‘Ndi akanam emesịm do?’ Edi idahaemi imesibọrọ ih.”
Ndi n̄kọk itieutom odu ke idụt mbufo? Imesịn udọn̄ inọ fi ite aka ekese. Ẹyenen̄ede ẹdara fi, emi oyonyụn̄ esịn udọn̄ ọnọ fi ndika iso nnam n̄kpọ Jehovah.
[Ndise ke page 18]
Mario
[Ndise ke page 18]
Abel
[Ndise ke page 18]
Germany
[Ndise ke page 18]
Japan
[Ndise ke page 18]
Brazil