Mme Mbụme Oro Mme Andikot Ẹbụpde

Ntak emi Jesus ọkọdọhọde n̄wan emi ẹkediọn̄ọde nte anamidiọk ke ẹfen mme idiọkn̄kpọ esie?—Luke 7:37, 48.

Nte Jesus eketiede ke itie udia ke ufọk Pharisee emi ekekerede Simon, n̄wan kiet ama ‘edida Jesus ke edem ekpere ukot esie.’ Enye ama atua ọduọk Jesus mmọn̄eyet ke ukot, ndien ada idet esie ọkwọhọde. Ekem etịm Jesus ukot ima ima, onyụn̄ ada enem-utebe aran ọfiọn̄ọ enye ke ukot. Mbụk Gospel oro ọdọhọ ke enye ekedi n̄wan “emi ẹdiọn̄ọde ke obio ẹte edi anamidiọk.” Imọfiọk ke kpukpru mme anana-mfọnmma owo ẹdi mme anamidiọk, edi Bible esiwak ndikot owo emi amade ndinam idiọk m̀mê ọwọrọde etop idiọk, anamidiọk. Etie nte n̄wan oro ekedi akpara. Utọ owo emi ke Jesus ọkọdọhọ ete: “Ẹmefen mme idiọkn̄kpọ fo.” (Luke 7:36-38, 48) Nso ke ikọ Jesus ọkọwọrọ? Ẹkesan̄a didie ẹfen idiọkn̄kpọ n̄wan oro ke ini edide Jesus ikakpaha kan̄a iwa uwem esie nte ufak?

Mbemiso Jesus ekefende idiọkn̄kpọ n̄wan oro ekeyetde enye ukot onyụn̄ ọfiọn̄ọ enye aran, Jesus ama ọnọ Simon emi okokotde enye ufọk uwụtn̄kpọ man ekpep enye akpan n̄kpọ kiet. Enye ama ada idiọkn̄kpọ odomo ye isọn emi awakde tutu owo ikemeke ndisio, onyụn̄ ọdọhọ Simon ete: “Ọnọ ebuọt kiet ekenyene owo isọn iba; owo kiet akama enye denarius ikie ition, edi enye eken akama aba-ye-duop. Ke ini mmọ mînyeneke se ẹdade ẹsio isọn, enye efen mmọ mbiba ke ofụri esịt. Ke ntre, anie ke otu mmọ edima enye akan?” Simon ama ọbọrọ ete: “N̄kere ke edi owo emi enye ekefende okpon akan ke ofụri esịt.” Jesus ama ọdọhọ ete: “Afo emenen.” (Luke 7:41-43) Isọn oro kpukpru nnyịn ikamade Abasi edi n̄kopitem, ntre ini ekededi oro inamde idiọk, ọwọrọ ke nnyịn ikpehe se ikamade enye. Ntre ke isọn nnyịn esidọdiọn̄ awak. Edi Jehovah etie nte owo emi amade ndifen isọn emi ẹkamade enye. Emi akanam Jesus ọdọhọ mme anditiene enye ẹsibọn̄ akam ẹben̄e Abasi ẹte: “Fen nọ nnyịn ke isọn eke nnyịn ikamade, kpa nte nnyịn n̄ko ifende inọ mmọ eke ẹkamade nnyịn isọn.” (Matt. 6:12) Luke 11:4 owụt ke isọn oro edi idiọkn̄kpọ.

Nso ikesinam Abasi efen mme idiọkn̄kpọ ke eset? Edinen ikpe esie owụt ke utịp idiọkn̄kpọ edi n̄kpa. Ntem, Adam ama akpa ke ntak idiọkn̄kpọ esie. Edi ke Ibet oro Abasi ọkọnọde idụt Israel, anamidiọk ama esiwa unam ọnọ Jehovah man enye efen mme idiọkn̄kpọ esie. Apostle Paul ọkọdọhọ ke “ekpere ndidi ẹda iyịp ẹnam kpukpru n̄kpọ ẹsana nte ekemde ye Ibet, ndien ke ediduọk iyịp mîdụhe edifen inyụn̄ idụhe.” (Heb. 9:22) N̄kukụre se mme Jew ẹkediọn̄ọde nte se ẹsinamde man Abasi efen ọnọ owo edi oro. Ntak edi oro mme Jew ẹkeyatde esịt ke ini Jesus ọkọdọhọde n̄wan oro ke ẹfen mme idiọkn̄kpọ esie. Mbon oro ẹkedude ke itie udia oro ẹma ẹdọhọ ke otu idemmọ ẹte: “Anie edi owo emi akam efende mme idiọkn̄kpọ?” (Luke 7:49) Jesus akada m̀mọ̀n̄ odudu ndien efen idiọkn̄kpọ utọ idiọk owo oro?

Ata akpa ntịn̄nnịm ikọ oro ẹketịn̄de ke ini Adam ye Eve ẹkesọn̄de ibuot akaban̄a nte Jehovah edinọde “mfri” emi Satan ye “mfri” esie ẹdinuakde nditịn̄ikpat. (Gen. 3:15, NW ) Ẹma ẹnuak Jesus nditịn̄ikpat ke ini mme asua Abasi ẹkewotde enye. (Gal. 3:13, 16) Iyịp oro Christ ọkọduọkde afak ubonowo osio ke idiọkn̄kpọ ye n̄kpa. Ke ndondo oro Jehovah eketịn̄de se idude ke Genesis 3:15, enye akada nte ke ẹma ẹkpekpe ufak oro sia mîdụhe se ikemede ndibiọn̄ọ uduak esie. Ntak edi oro enye ekesifende idiọkn̄kpọ mbon oro ẹbuọtde idem ke mme un̄wọn̄ọ esie.

 Jehovah ama esibat ndusụk owo ke edinen mbemiso eyo mme Christian. Enoch, Noah, Abraham, Rahab, ye Job ẹkesịne ke otu emi. Mmọ ẹma ẹbuọt idem ke Abasi ẹnyụn̄ ẹnịm ke enye oyosu mme un̄wọn̄ọ esie. Mbet oro James ekewet ke “Abraham [ama] ọbuọt idem ye Jehovah, ndien ẹbat oro ẹnọ enye ke edinen ido.” Enye ama onyụn̄ ewet aban̄a Rahab ete: “Ke ukem usụn̄ oro nte owo ikabatke n̄ko Rahab akpara oro ke edinen ebe ke utom?”—Jas. 2:21-25.

Edidem David ke Israel eset ama anam ikpọ idiọkn̄kpọ, kpa ye oro enye ama enen̄ede ọbuọt idem ke ata Abasi esinyụn̄ enen̄ede akabade esịt ke ini anamde idiọkn̄kpọ. Ikụreke ke oro, Bible ọdọhọ ete: “Abasi okosio [Jesus] enịm nte uwa ndida nsio isop ebe ke edibuọt idem ke iyịp esie. Emi ekedi man ẹwụt edinen ido esie, koro enye ama efen mme idiọkn̄kpọ emi ẹkenamde ke ini edem ke adan̄aemi Abasi ekemede ime; man enye okpowụt edinen ido esie ke ini emi, enye okponyụn̄ enen ke ini abatde owo eke enyenede mbuọtidem ke Jesus ke edinen.” (Rome 3:25, 26) Ke ntak uwa ufak Jesus oro ẹdinọde, Jehovah ama efen idiọkn̄kpọ David inyụn̄ ibiatke se edinen ikpe Esie oyomde.

Ukem oro ke ekedi ye n̄wan oro ọkọfiọn̄ọde Jesus aran ke ukot. N̄wan oro ama esinam idiọkn̄kpọ, edi idahaemi enye ama akabade esịt. Enye ama owụt ke imoyom ẹfak imọ ẹsio ke idiọkn̄kpọ, onyụn̄ owụt ke imenen̄ede ima owo emi Jehovah ọnọde man afak ubonowo. Kpa ye owo mîkọnọhọ uwa ufak oro kan̄a, uwa oro ama ọtọtọn̄ọ ndinyene ufọn sia n̄kpọ ndomokiet mîkemeke ndibiọn̄ọ uduak Abasi. Emi akanam Jesus ọdọhọ n̄wan oro ete: “Ẹmefen mme idiọkn̄kpọ fo.”

Mbụk emi enen̄ede owụt ke Jesus ikọsọnke mme anamidiọk, edi ke enye ama esinam nti n̄kpọ ọnọ mmọ. N̄ko, Jehovah enyịme ndifen mme anamidiọk oro ẹkabarede esịt. Nso utịbe utịbe un̄wọn̄ọ oro ọsọn̄ọde owo idem ke emi edi ntem ọnọ nnyịn mme anana-mfọnmma owo!

[Ndise ke page 7]

Ẹkebat mme asan̄autom Abasi emi ke edinen