Nte Ufak Anyan̄ade Nnyịn

“Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.”—JOHN 3:36.

1, 2. Nso idi ntak kiet emi akanamde ẹtọn̄ọ ndimịn̄ Zion’s Watch Tower?

ỌYỌHỌ Enyọn̄-Ukpeme inan̄ emi ẹkesiode ko ke October 1879 ọkọdọhọ ete: “Edieke owo etịn̄de enyịn ekpep Bible enye ọyọdiọn̄ọ ufọn emi n̄kpa Christ enyenede.” Ẹkeda ibuotikọ oro ẹkeberi ntem: “Ẹyak isịn n̄kpọ ekededi emi anamde nnyịn ikûda n̄kpa Christ nte uwa usio-isop idiọkn̄kpọ.”—Kot 1 John 2:1, 2.

² Kiet ke otu ntak emi akanamde ẹtọn̄ọ ndimịn̄ Zion’s Watch Tower ke July 1879 ekedi man ẹnam mme owo ẹdiọn̄ọ se Bible ekpepde aban̄a ufak. Se ẹkewetde ke magazine emi ekedi “udia ke edikem ini,” koro ke utịt utịt iduọk isua 1800, ata ediwak mbon emi ẹkedọhọde ke idi Christian ẹma ẹtọn̄ọ ndiyịk nte n̄kpa Jesus ekpedide ufak idiọkn̄kpọ nnyịn.” (Matt. 24:45) Ini oro ke ediwak owo ẹketọn̄ọ ndinịm ukpepn̄kpọ edito ke unam mforo owo. Ukpepn̄kpọ emi atuaha ye se Bible ekpepde nte ke owo ama ọfọn ama mbemiso edinam idiọkn̄kpọ. Edi mme ekpep ukpepn̄kpọ emi ẹkam ẹdọhọ ke owo ekedi unam ke ntọn̄ọ, ekem ediforo owo, ndien ke enye oyosụk anam n̄kọri tutu ọfọn ama, ntre ke ufọn ufak idụhe. Item oro apostle Paul ọkọnọde Timothy enen̄ede odot. Enye ọkọdọhọ ete: “Kpeme se ẹkeyakde ẹsịn fi ke ubọk, wọn̄ọde kpọn̄ ikpîkpu ikọ oro ẹsabarede se isanade ye mme ntuaha oro ẹkotde ke nsu ẹte ‘ifiọk.’ Koro ndusụk owo ẹma ẹwọn̄ọde ẹkpọn̄ mbuọtidem ke ndikada utọ ifiọk oro n̄wụt idem.”—1 Tim. 6:20, 21.

3. Mme mbụme ewe ke idibọrọ?

 ³ Anaedi emebiere ke imọ ‘idiwọn̄ọkede ikpọn̄ mbuọtidem.’ Man ekeme ndinam emi, ọkpọfọn obụp idemfo ete: Ntak emi nyomde ufak? Nso ke ufak akakpa? Nso ke n̄kpanam man ndia ufọn ọsọn̄urua enọ emi ekemede ndinam mi mbọhọ iyatesịt Abasi?

Imekeme Ndibọhọ Iyatesịt Abasi

4, 5. Nso iwụt ke iyatesịt Abasi odoro idiọk editịm n̄kpọ emi?

⁴ Bible ye mbụk ubonowo ẹwụt ke “iyatesịt Abasi odoro” ofụri ubonowo ke idem tọn̄ọ Adam akanam idiọkn̄kpọ. (John 3:36) Imenen̄ede ikụt emi sia idụhe owo ndomokiet emi ekemede ndifehe mbọhọ n̄kpa. Ukara Satan ikemeke ndinyan̄a nnyịn nsio ke mme afanikọn̄ oro nnyịn isobode mfịn, inyụn̄ idụhe ukara owo ndomokiet emi ekemede ndinọ mbon emi mmọ ẹkarade mme akpan n̄kpọ oro mmọ ẹyomde. (1 John 5:19) Ntre, ekọn̄, afai, ye unana ke ẹka isọ ndinọmọ ubonowo.

⁵ Imenen̄ede ikụt ndien ke Jehovah idiọn̄ke idiọk editịm n̄kpọ emi. Paul ọkọdọhọ ke “iyatesịt Abasi oto ke heaven ayarade ke idem kpukpru mme anana uten̄e Abasi.” (Rome 1:18-20) Ntre, mbon emi mîkabakede esịt edi ẹsụk ẹkade iso ẹdu uwem unana uten̄e Abasi iditreke ndibọ utịp idiọk ido mmọ. Ẹnam mme owo ẹdiọn̄ọ iyatesịt Abasi mfịn ke etop ubiereikpe oro ẹn̄wan̄ade ẹduọk ererimbot Satan, ndien etop Bible emi ẹyọyọhọ mme n̄wed nnyịn.—Edi. 16:1.

6, 7. Ewe utom ke mme Christian oro ẹyetde aran ẹda iso, ndien nso ifet ke mbon emi ẹsụk ẹdide ubak ererimbot Satan emi ẹnyene?

⁶ Ndi emi ọwọrọ ke ifet idụhe aba inọ mme owo ndikpọn̄ Satan ndikpono Abasi? Baba, koro ini osụk ododu ọnọ mme owo ndifiak nditie ke emem ye Jehovah. Mme Christian oro ẹyetde aran, emi ẹdide mme ‘isụn̄utom emi ẹdade ke ibuot Christ,’ ke ẹda usụn̄ ke utom ukwọrọikọ, kpa utom emi ẹdade ẹkpe mme owo ke kpukpru idụt ubọk ẹte: “Ẹfiak ẹtie ke emem ye Abasi.”—2 Cor. 5:20, 21.

⁷ Apostle Paul ọkọdọhọ ke Jesus ‘anyan̄a nnyịn osio ke iyatesịt oro edide.’ (1 Thess. 1:10) Nsinsi nsobo eyesịm mme anamidiọk oro mîkabakede esịt ke ini Jehovah ediwụtde akpatre iyatesịt esie. (2 Thess. 1:6-9) Anie edibọhọ? Bible ọdọhọ ete: “Owo eke ọbuọtde idem ke Eyen enyene nsinsi uwem; owo eke ọsọn̄de ibuot ye Eyen idikwe uwem, edi iyatesịt Abasi odoro enye ke idem.” (John 3:36) Kpukpru mbon oro ẹbuọtde idem ke Jesus ye ke uwa ufak esie emi ẹdidude ke ini Abasi edisobode editịm n̄kpọ emi ke akpatre usen iyatesịt esie ẹyebọhọ.

Se Ufak Edide

8. (a) Uwem ekpeketie didie ye Adam ye Eve? (b) Didie ke Jehovah okowụt ke imọ idi Abasi mfọnmma unenikpe?

⁸ Adam ye Eve ẹkedi mfọnmma ke ini ẹkebotde mmọ. Ekpedi mmọ ikọsọn̄ke ibuot ye Abasi, adan̄aemi nditọ mmọ oro ẹkopde inemesịt ẹkpeyọhọ isọn̄ emi ẹnyụn̄ ẹdu  ye mmọ ke Paradise. Edi akpa ete ye eka nnyịn ẹma ẹkokoi ẹbiat ewụhọ Abasi. Ndien utịp ekedi ke Abasi ama ebiere nsinsi nsobo ọnọ mmọ onyụn̄ ebịn mmọ osio ke Paradise. Idiọkn̄kpọ mmọ ama ebe ofụri ubonowo sia Adam ye Eve ẹma ẹnanam idiọkn̄kpọ mbemiso mmọ ẹketọn̄ọde ndinyene nditọ, ndien mmọ ẹma ẹsọn̄ ẹnyụn̄ ẹkpan̄a nte ini akakade. Emi owụt ke Jehovah isisụhu nsu. Adianade do, enye edi Abasi mfọnmma unenikpe. Jehovah ama ododụri Adam utọn̄ ete ke enye ayakpa edieke enye adiade mfri oro imọ ikakpande—Adam ama akpa kpa nte Jehovah ọkọdọhọde.

9, 10. (a) Nso inam nditọ Adam ẹkpan̄a? (b) Nso ke ikpanam man ibọhọ nsinsi n̄kpa?

⁹ Imọbọ idiọkn̄kpọ ye n̄kpa ito Adam sia nnyịn idide nditọ esie. Adam ikobonke nnyịn kan̄a ke ini enye akanamde idiọkn̄kpọ. Ntre, ima itiene ibuana ke n̄kpa oro ẹkebierede ẹnọ enye. Edieke Jehovah okpokosiode n̄kpa efep ke ini emi owo mîkekpehe kan̄a ufak, ọkpọwọrọ ke ikọ esie ikedịghe akpanikọ. Ntem, Paul eketịn̄ ikọ ke ibuot kpukpru nnyịn ke ini enye ọkọdọhọde ete: “Nnyịn imọfiọk ite Ibet edi eke spirit; edi ami ndi obụkidem, emi ẹkenyamde ẹsịn ke idak idiọkn̄kpọ. Mbọm mi owo nditaha! Anie edinyan̄a mi osio ke ikpọkidem emi akade n̄kpa mi?”—Rome 7:14, 24.

¹⁰ Jehovah Abasi ikpọn̄ ekeme ndinọ ufak emi ekemede ndida mfen mme idiọkn̄kpọ nnyịn, nnyụn̄ nnam nnyịn ibọhọ nsinsi n̄kpa. Enye ama anam emi ke ndinọ edima Eyen esie oto heaven edimana nte mfọnmma owo emi ekemede ndinọ uwem esie nte ufak ke ibuot nnyịn. Jesus iketiehe nte Adam edi ama aka iso ọfọn ama. Ke akpanikọ “enye ikanamke idiọkn̄kpọ.” (1 Pet. 2:22) Jesus ekpekekeme ndibon mfọnmma nditọ. Edi enye ama ayak mme asua Abasi ẹwot imọ man ikpada mme anana-mfọnmma nditọ Adam inyene nnyụn̄ nnam mbon oro ẹbuọtde idem ke imọ ẹnyene nsinsi uwem. Kop nte Bible esịnde se isụk inemede emi: “Abasi kiet odu, ye esịne-ufọt kiet ke ufọt Abasi ye mme owo, kpa owo emi edide Christ Jesus, emi ọkọnọde idemesie nte n̄kemn̄kem ufak ke ibuot kpukpru owo.”—1 Tim. 2:5, 6.

11. (a) Nọ uwụtn̄kpọ emi owụtde nte ufak enyenede ufọn? (b) Ufak enyene ufọn ọnọ mmanie?

¹¹ Uwụtn̄kpọ mbon emi idiọk ban̄k ekeyịpde kpukpru okụk emi mmọ ẹkesịnde ekeme ndinam inen̄ede ifiọk se ufak edide. Ẹbiere n̄kpọkọbi ẹnọ mme andinyene ban̄k oro. Edi nso kaban̄a mbon oro ẹkesịnde okụk ke ban̄k oro? Mmọ ẹyekabade ubuene, idinyụn̄ ikemeke ndinyan̄a idem ibọhọke imọ owo emi enyenede esịtmbọm edibọ ban̄k oro edep onyụn̄ ekpe mmọ kpukpru okụk oro ẹkeyịpde. Ukem ntre ke Jehovah Abasi ada iyịp edima Eyen esie edep nditọ Adam onyụn̄ ọsọhi idiọkn̄kpọ mmọ efep. Emi akanam John Andinịm Owo Baptism okot Jesus, “Eyenerọn̄ Abasi oro emende mme idiọkn̄kpọ ererimbot efep!” (John 1:29) Ererimbot emi Jesus emende idiọkn̄kpọ mmọ efep esịne mme odu-uwem ye mme akpan̄kpa.

Se Ufak Akakpade

12, 13. Nso ke Abraham ndikenyịme ndiwa Isaac ekpep nnyịn?

¹² Nnyịn ikemeke ndinen̄ede mfiọk se ufak akakpade Ete nnyịn eke heaven ye edima Eyen esie. Edi enyene mme mbụk Bible emi ẹkemede ndinam n̄kpọ emi an̄wan̄a nnyịn esisịt. Ke uwụtn̄kpọ, kere nte eketiede Abraham ke idem ke ini enye akasan̄ade usen ita aka Moriah man akanam ewụhọ Abasi emi: “Da ndien eyen fo, eyen fo kierakiet, Isaac emi afo amade, ka ke isọn̄ Moriah; nyụn̄ wa enye do ke uwa ke akamba obot kiet eke ndidọhọde fi.”—Gen. 22:2-4.

¹³ Abraham ama ekesịm ebiet emi ẹkedọhọde enye aka. Kere nte esịt ọkọduọde Abraham  ndibọp Isaac ubọk ye ukot mmen ndori ke itieuwa emi enye Abraham ọkọbọpde. Akabiak enye didie ntem ndimenede ikwa nyom ndiwot eyen esie! Kere nte eketiede Isaac ke idem nte enye okosụk odorode ke itie uwa ekere nte edibiakde imọ ke ini ikwa edidụkde imọ idem. Angel Jehovah ama akpan Abraham ke ata nnennen ini. Se Abraham ye Isaac ẹkenamde ekeme ndinam ifiọk esisịt se akakpade Jehovah ndikayak mme isụn̄utom Satan ẹwot Eyen esie. Nte Isaac akanamde n̄kpọ ye Abraham enen̄ede owụt nte Jesus ekenyịmede ndikpa ke ntak nnyịn.—Heb. 11:17-19.

14. Nso iketịbe inọ Jacob emi anamde ifiọk se ufak akakpade Abasi?

¹⁴ Se iketịbede inọ Jacob ekeme n̄ko ndinam ifiọk se ufak akakpade. Jacob ama ama Joseph akan kpukpru nditọ esie. Edi nditọete Joseph ẹma ẹfịbe enye ẹnyụn̄ ẹsua enye. Kpa ye oro, Joseph ama enyịme ete esie ọdọn̄ enye aka ekese nte n̄kpọ ẹketiede ye nditọete esie. To ke ufọk mmọ ke Hebron sịm ebiet emi mmọ ẹkedude ẹbọk erọn̄ ete mmọ ekedi n̄kpọ nte kilomita 100. Kere nte eketiede Jacob ke idem ke ini nditọ esie ẹkemende ọfọn̄ Joseph emi iyịp ama ọkọyọhọ ediwụt enye. Jacob ama ofiori ete: “Ọfọn̄idem eyen mi; idiọk unam amata enye; Joseph amawaha mbak-mbak.” Mme n̄kpọ emi ẹkenam Jacob etetịm ofụhọ onyụn̄ atua Joseph ke ediwak usen. (Gen. 37:33, 34) Jehovah isinamke n̄kpọ nte mme anana-mfọnmma owo ẹsinamde ke ini n̄kpọ etịbede. Edi nditie n̄kere se iketịbede inọ Jacob ekeme ndinam ifiọk esisịt nte eketiede Abasi ke idem ke ini ẹketụhọrede ẹnyụn̄ ẹwot edima Eyen esie mi ke isọn̄.

Nte Ikemede Ndidia Ufọn Ufak

15, 16. (a) Didie ke Jehovah okowụt ke imenyịme ufak Christ? (b) Nso ufọn ke afo adia oto ufak emi?

¹⁵ Jehovah Abasi ama anam anam-akpanikọ Eyen esie eset onyụn̄ ọnọ enye ubọn̄  ubọn̄ idem eke spirit. (1 Pet. 3:18) Ke Jesus ama ekeset, enye ama owụt mme mbet esie idem ke usen 40, ọsọn̄ọ mbuọtidem mmọ onyụn̄ etịm mmọ idem ọnọ utom ukwọrọikọ. Ekem ọnyọn̄ heaven ọkọnọ Abasi ekọmurua iyịp esie emi enye ọkọduọkde man akpafak ata mme anditiene enye emi ẹbuọtde idem ke uwa ufak esie. Jehovah Abasi ama owụt ke imenyịme uwa Christ ke ndinọ Jesus odudu ndin̄wan̄a edisana spirit nduọk mme mbet esie emi ẹkesopde idem ke Jerusalem ke usen Pentecost eke isua 33 E.N.—Utom 2:33.

¹⁶ Mme anditiene Christ emi ẹkeyetde aran mi, ẹma ẹtọn̄ọ ndikpek mme owo ke ebe oro ẹte ẹfehe ẹbọhọ iyatesịt Abasi ke ndina baptism ke enyịn̄ Jesus Christ man ẹfen mme idiọkn̄kpọ mmọ. (Kot Utom 2:38-40.) Tọn̄ọ ke ini oro tutu esịm mfịn, ediwak miliọn owo ke kpukpru idụt ẹdidi ufan Abasi ke ntak mbuọtidem emi mmọ ẹnyenede ke uwa ufak Jesus. (John 6:44) Idahaemi, iyom ndibọrọ mbụme iba emi: Ndi nti utom oro inamde anam Abasi ọn̄wọn̄ọ ndinọ nnyịn nsinsi uwem? Ndi ikọ ọwọrọ ke sia ẹma ẹken̄wọn̄ọ ndinọ nnyịn nsinsi uwem, ke nnyịn ikemeke nditaba enye?

17. Didie ke ekpese n̄wọrọnda edidiọn̄ edidi ufan Abasi?

¹⁷ Nnyịn idotke se ẹkpefakde. Edi ndibuọt idem ke ufak anam ediwak miliọn owo mfịn ẹkabade ẹdi ufan Abasi ẹnyụn̄ ẹnyene idotenyịn ndidu uwem nsinsi ke Paradise isọn̄. Nnyịn ndidi ufan Jehovah iwọrọke ke iyaka iso idi ufan esie. Ana iwụt esịtekọm iban̄a “ufak oro Christ Jesus ekekpede” man ibọhọ iyatesịt Abasi emi osụk edide mi.—Rome 3:24; kot Philippi 2:12.

Ka Iso Ndibuọt Idem ke Ufak

18. Nso ibuana ke ndibuọt idem ke ufak?

¹⁸ Ẹda ibuotikọ ukpepn̄kpọ emi ẹto John 3:36, ndien enye owụt ke ndibuọt idem ke Ọbọn̄ Jesus Christ abuana ndisụk ibuot nnọ enye. Esịtekọm oro inyenede inọ ufak ekpenyene ndinam idu uwem ekekem ye se Jesus ekekpepde, esịnede se enye ekekpepde aban̄a ido uwem. (Mark 7:21-23) “Iyatesịt Abasi ke edi” ndidoro kpukpru mbon oro mînyịmeke nditre use, ikọ idiọk mbubru, ye “kpukpru orụk mbubiam ido,” emi esịnede ndikọbọ nse ndise idan̄.—Eph. 5:3-6.

19. Nso ke ikpanam ndiwụt ke imọbuọt idem ke ufak?

¹⁹ Esịtekọm oro inyenede iban̄a ufak ekpenyene ndinam nnyịn isịn ifịk inam “mme edinam uten̄e Abasi.” (2 Pet. 3:11) Ẹyak isisio ini inịm ibọn̄ akam ke ofụri esịt kpukpru ini, ikpep Bible, idụk mbono esop, inịm ukpepn̄kpọ ubon, inyụn̄ ikwọrọ ikọ ifịk ifịk. Ẹyak ‘ikûfre ndinam nti n̄kpọ nnyụn̄ mbuana n̄kpọ ye mbon efen, koro Abasi enen̄ede enem esịt aban̄a mme utọ uwa oro.’—Heb. 13:15, 16.

20. Nso edidiọn̄ ke mbon oro ẹkade iso ẹbuọt idem ke ufak ẹdori enyịn ndinyene?

²⁰ Ke ini Jehovah edin̄wan̄ade iyatesịt esie iduọk idiọk editịm n̄kpọ emi, nnyịn iyenen̄ede ikop inemesịt ke ndikọbuọt idem nnyụn̄ n̄ka iso n̄wụt esịtekọm mban̄a ufak. Ke obufa ererimbot oro Abasi ọn̄wọn̄ọde, nnyịn iyọkọm Abasi ke nsinsi nsinsi ke n̄wọrọnda enọ emi anamde nnyịn ibọhọ iyatesịt esie.—Kot John 3:16; Ediyarade 7:9, 10, 13, 14.

Didie ke Afo Ọkpọbọrọ?

• Ntak emi iyomde ufak?

• Nso ke ufak akakpa?

• Nso ufọn ke ufak enyene?

• Didie ke ikeme ndibuọt idem ke uwa ufak Jesus?

[Mme Mbụme Ukpepn̄kpọ]

[Ndise ke page 13]

Ini osụk ododu ọnọ mme owo nditie ke emem ye Jehovah

[Mme ndise ke page 15]

Nditie n̄kere nte eketiede Abraham, Isaac, ye Jacob ke idem ekeme ndinam ifiọk se ufak akakpade