Ifịk Ifịk Adausụn̄ Nnyịn Mfịn

“Enye ọwọrọ aka ndikan onyụn̄ okụre edikan esie.”—EDI. 6:2.

1, 2. (a) Didie ke Bible okowụt se Christ edinamde nte Edidem tọn̄ọ ke 1914? (b) Nso ke Christ anam tọn̄ọ ẹkemek enye Edidem?

ẸKEMEK Christ Edidem Obio Ubọn̄ Messiah Jehovah ke 1914. Nnyịn ise didie enye idahaemi? Ndi ise enye nte Edidem emi awan̄de-wan̄ ubọk etie ke ebekpo, anam anam enye otop enyịn ese nte n̄kpọ etiede ye esop esie mi ke isọn̄? Edieke edide ntre, oyom ikpụhọde ekikere. N̄wed Psalm ye n̄wed Ediyarade ẹwụt ke Jesus edi okopodudu edidem emi odorode ke edem enan̄-mbakara ọwọrọ aka “ndikan onyụn̄ okụre edikan esie.”—Edi. 6:2; Ps. 2:6-9; 45:1-4.

² Akpa n̄kpọ oro Christ akanamde ke ẹma ẹkemek enye Edidem ekedi ndikan “dragon ye mme angel esie.” Sia Christ edide Michael etubom mme angel, enye ama osio Satan ye mme demon esie ke edisana heaven ọduọn̄ọ ke isọn̄. (Edi. 12:7-9) Sia Jesus onyụn̄ edide “angel [m̀mê, isụn̄utom] ediomi” Jehovah, enye ama asan̄a ye Ete esie edi edise temple eke spirit. (Mal. 3:1) Enye ama ekpe ikpe ọnọ Christendom, kpa ikpehe “Akwa Babylon” oro enyenede nduduọhọ akan, onyụn̄ obiom enye ikpe ke ndiduọk iyịp nnyụn̄ nsabade idem ye ukara ererimbot emi.—Edi. 18:2, 3, 24.

Christ Anam Ofụn Esie ke Isọn̄ Asana

3, 4. (a) Nso utom ke Christ akanam nte isụn̄utom Jehovah? (b) Nso ke ẹkekụt ke ini ẹkedide ẹdise temple, ndien anie ke Jesus emi edide Ibuot esop ekemek?

³ Ke ini Jehovah akasan̄ade ye Christ edi edise temple eke spirit, enye ama okụt otu ata mme Christian ke okụre temple emi, oro  mîkedịghe mbon ufọkabasi Christendom. Kpa ye oro, okosụk oyoyom ẹnam mme Christian oro ẹkeyetde aran mi, m̀mê “nditọ Levi,” ẹsana. Ekedi kpa nte prọfet Malachi ama eketetịn̄, ete: “Enye [Jehovah eyetie] etem silver onyụn̄ anam asana: onyụn̄ anam nditọ Levi ẹsana, onyụn̄ ọdiọn̄ mmọ nte gold ye silver, man mmọ ẹwa uwa ẹnọ Jehovah nte enende.” (Mal. 3:3) Jehovah ama ada “angel [m̀mê, isụn̄utom] ediomi” esie, Christ Jesus, anam nditọ Israel eke spirit emi ẹsana.

⁴ Christ ama okụt ke mme anam-akpanikọ Christian oro ẹyetde aran mi ke ẹkesịn ofụri ukeme ẹnọ ikọt Abasi udia eke spirit ke edikem ini. Ọtọn̄ọde ke 1879 aka iso, mmọ ẹmịn̄ se Bible enen̄erede ekpep aban̄a Obio Ubọn̄ Abasi ke magazine emi, edide ke ini mfọnọn̄kpọ m̀mê ke ini ndiọhọn̄kpọ. Jesus ama ọdọdọhọ ke ini ididide idise mbonufọk imọ ke “utịt editịm n̄kpọ emi,” ke imọ iyokụt ofụn oro ọnọde mmọ “udia ke edikem ini.” Enye ọyọkọm ofụn oro onyụn̄ ‘emek enye ete ese aban̄a kpukpru inyene imọ’ ke isọn̄. (Matt. 24:3, 45-47) Sia Christ edide Ibuot esop Christian, enye ada “ofụn emi anamde akpanikọ onyụn̄ enyenede ọniọn̄” ese aban̄a inyene Obio Ubọn̄ esie mi ke isọn̄. Enye ada Otu Ukara ọnọ “mbonufọk” esie oro ẹyetde aran ye nsan̄a mmọ emi ẹdide “mme erọn̄ en̄wen,” ndausụn̄.—John 10:16.

Ndikpen̄e Mbun̄wụm Isọn̄

5. Nso ke apostle John okokụt nte Edidem Messiah anamde?

⁵ Apostle John ama okụt n̄kpọ en̄wen emi Edidem Messiah edinamde ke “usen Ọbọn̄,” ke ẹma ẹkemek Enye Edidem ke 1914. John ekewet ete: “Ekem n̄kụt, ndien, sese! afia ikpaenyọn̄, ndien owo emi ebietde eyen owo etie ke ikpaenyọn̄ oro, ayara anyanya o-gold ke ibuot onyụn̄ akama edisọp ofụt ke ubọk esie.” (Edi. 1:10; 14:14) John ama okop angel Jehovah ọdọhọde Owo Ukpen̄e oro ete esịn ofụt esie ekpen̄e koro “mbun̄wụm isọn̄ emenen̄ede adat.”—Edi. 14:15, 16.

6. Jesus ọkọdọhọ ke nso iditịbe nte ini akade?

⁶ “Mbun̄wụm isọn̄” eti nnyịn uwụtn̄kpọ Jesus aban̄ade wheat ye mbiet. Jesus ekemen idemesie odomo ye owo oro asuande n̄kpasịp wheat ke in̄wan̄ esie onyụn̄ odoride enyịn ndikpen̄e eti wheat, emi adade aban̄a “nditọ obio ubọn̄,” kpa ata mme Christian oro ẹyetde aran man ẹkpetiene enye ẹkara ke Obio Ubọn̄ esie. Edi asua, kpa “Devil” ama edi okoneyo edisuan mbiet, kpa “nditọ andidiọk,” ọdọn̄ ke in̄wan̄ oro. Asuan n̄kpasịp ama ọdọhọ mbonutom ete ẹyak wheat ye mbiet ẹkọri ọtọkiet tutu esịm ini ukpen̄e, oro edi, “utịt editịm n̄kpọ emi.” Ke ini ukpen̄e, enye ọyọdọn̄ mme angel esie ẹsat wheat ẹsion̄o ke otu mbiet.—Matt. 13:24-30, 36-41.

7. Didie ke Christ ekpen̄e “mbun̄wụm isọn̄”?

 ⁷ Jesus ke anam utom ukpen̄e ke ofụri ererimbot nte ẹkewụtde John ke n̄kukụt. Ẹketọn̄ọ ndikpen̄e “mbun̄wụm isọn̄” ke ini ẹketan̄de nsụhọ 144,000 emi ẹdide “nditọ obio ubọn̄” ẹbon, kpa “wheat” oro Jesus eketịn̄de aban̄a ke uwụtn̄kpọ esie. Ke akpa ekọn̄ ererimbot ama ekebe, mme owo ẹma ẹnen̄ede ẹkụt nte ata mme Christian ẹkpụhọrede ye nsunsu Christian, ntre emi ama anam ẹkeme nditan̄ mme erọn̄ en̄wen mbon nte ọyọhọ ikpehe iba ke “mbun̄wụm isọn̄.” Mme erọn̄ en̄wen emi idịghe “nditọ obio ubọn̄,” edi ẹdi “akwa otuowo” emi ẹnyịmede ndidu ke idak Obio Ubọn̄ oro. Mmọ ẹto “kpukpru mme idụt ye obio ye usem.” Mmọ ẹsụk ibuot ẹnọ Obio Ubọn̄ Messiah, kpa ukara eke heaven emi Christ Jesus ye owo 144,000 emi ẹdide ‘ndisana ikọt’ Abasi ẹdikarade.—Edi. 7:9, 10; Dan. 7:13, 14, 18.

Andida Mme Esop Usụn̄

8, 9. (a) Nso iwụt ke Christ ọfiọk nte mme esop kiet kiet ẹsinamde n̄kpọ ye nte owo kiet kiet ke esop odude uwem? (b) Nte ẹwụtde ke page 26, “mme ntotụn̄ọ n̄kpọ Satan” ewe ke ikpefep?

⁸ Nnyịn ima ikpep ke ibuotikọ oro ekebemde iso ke Christ ama ọfiọk nte n̄kpọ eketiede ke mme esop kiet kiet ke akpa isua ikie E.N. Ke eyo nnyịn, nte Edidem emi ẹma ẹkenọ “kpukpru odudu ke heaven ye ke isọn̄,” Christ Adausụn̄ nnyịn edi Ibuot ọnọ mme esop ke ofụri ererimbot, enye onyụn̄ edi Ibuot ọnọ mme esenyịn ke mme esop. (Matt. 28:18; Col. 1:18) Jehovah anam “enye edi ibuot kpukpru n̄kpọ ọnọ esop” mbon oro ẹyetde aran. (Eph. 1:22) Sia enye edide Ibuot esop, enye ọfiọk kpukpru se ikade iso ke esop Mme Ntiense Jehovah oro ẹwakde ẹbe 100,000.

⁹ Jesus ama ọnọ etop ẹsọk esop Thyatira eset, ete: “Mme n̄kpọ emi ke Eyen Abasi ọdọhọ, kpa enye emi enyịn esie ebietde edemeikan̄, . . . ‘Mmọfiọk mme edinam fo.’” (Edi. 2:18, 19) Enye ama asua ọnọ mbon esop oro ke ndikodu oburobụt uwem nnyụn̄ nnam se mmọ ẹmade-ma. Enye ọkọdọhọ mmọ ete: “Ami ndi enye emi odụn̄ọrede mme ekpụt ye mme esịt, nyonyụn̄ nnọ mbufo owo kiet kiet nte ekemde ye mme edinam mbufo.” (Edi. 2:23) Emi owụt ke Christ ọfiọk nte esop kiet kiet esinamde n̄kpọ ye nte owo kiet kiet ke esop odude uwem. Jesus ama otoro mme Christian ke Thyatira “oro mîkenyeneke ifiọk iban̄a ‘mme ntotụn̄ọ n̄kpọ Satan.’” (Edi. 2:24) Mfịn, enye otoro n̄ko mme Christian, n̄kpri ye ikpọ, oro mînyịmeke ndidụn̄ọde “mme ntotụn̄ọ n̄kpọ Satan” ke Intanet m̀mê ke mme afai afai mbre vidio m̀mê ke nditiene ndu uwem nnam-se-mmade. Esịt esinem enye didie ntem ndikụt ukeme oro ediwak Christian ẹsịnde mfịn ye n̄waidem oro mmọ ẹnamde ndinen̄ede ntiene ndausụn̄ esie ke se ededi oro mmọ ẹnamde!

10. Nso iwụt ke Christ ọnọ mbiowo esop ndausụn̄, edi nso ke mbiowo ẹnyene ndifiọk?

¹⁰ Christ ada mbiowo oro ẹmekde ọnọ mme esop esie oro ẹdude ke isọn̄ ima ima ndausụn̄. (Eph. 4:8, 11, 12) Ke akpa isua ikie, kpukpru mme esenyịn ke esop ẹkedi mbon emi ẹbonde ke spirit. N̄wed Ediyarade okot mmọ ntantaọfiọn̄ ke ubọk nnasia Christ. (Edi. 1:16, 20) Mfịn, ata ediwak mbiowo esop ẹdi mme erọn̄ en̄wen. Edi ẹkeme ndisụk ndọhọ ke Christ ada mmọ usụn̄ koro ẹsimek mmọ ke ẹma ẹkenen̄ede ẹbọn̄ akam ẹnyụn̄ ẹtiene ndausụn̄ edisana spirit. (Utom 20:28) Edi mbiowo ẹfiọk ke Christ ada ekpri otu Christian iren oro ẹyetde aran, emi ẹdide Otu Ukara, ọnọ mme mbet esie ke isọn̄ ndausụn̄.—Kot Utom 15:6, 28-30.

“Di, Ọbọn̄ Jesus”

11. Ntak enen̄erede ọdọn̄ nnyịn ndikụt Adausụn̄ nnyịn edide iwiwa?

¹¹ Ke ediyarade oro ẹkenọde apostle John, Jesus ama ọdọhọ ediwak ini ete ke imọ  ke idi iwiwa. (Edi. 2:16; 3:11; 22:7, 20) Eyịghe idụhe ke enye eketịn̄ aban̄a ini oro imọ ididide idibiere ikpe inọ Akwa Babylon ye editịm n̄kpọ Satan eken oro ẹsụhọde. (2 Thess. 1:7, 8) Sia ekenen̄erede ọdọn̄ akanieren apostle John ndikụt nte kpukpru mme utịbe n̄kpọ oro ẹketịn̄de ẹban̄a ẹsude; enye ama ofiori ete: “Amen! Di, Ọbọn̄ Jesus.” Ọdọn̄ nnyịn n̄ko emi idude uwem ke utịt ini idiọk editịm n̄kpọ emi ndikụt Adausụn̄ ye Edidem nnyịn edide nte Edidem Obio Ubọn̄ edinam enyịn̄ Ete esie asana onyụn̄ owụt ke enye enyene unen ndikara.

12. Nso utom ke Christ edikụre mbemiso ẹsanade ofụm nsobo ẹyak?

¹² Mbemiso Jesus osobode esop Satan oro ẹkụtde ke enyịn, ẹyefịk akpatre owo ke otu 144,000 emi ẹdide Israel eke spirit akpatre idiọn̄ọ. Bible owụt in̄wan̄-in̄wan̄ ete ke ẹyemụm ofụm oro ẹdidade ẹsobo editịm n̄kpọ Satan ẹkama tutu ẹfịk owo 144,000 idiọn̄ọ ẹkụre.—Edi. 7:1-4.

13. Didie ke Christ ediwụt ediyarade edidu esie ke ini “akwa ukụt” ọtọn̄ọde?

¹³ Ata ediwak mme andidụn̄ isọn̄ ifiọkke ke “edidu” Christ ama ọtọn̄ọ ke 1914. (2 Pet. 3:3, 4) Ibịghike, enye ayanam mme owo ẹfiọk edidu esie, ke ini Jehovah edidade enye ebiere ikpe ọnọ nsio nsio ikpehe editịm n̄kpọ Satan. Mme owo ẹyenen̄ede ẹkụt ‘ediyarade edidu esie’ ke ini enye edisobode “owo emi edide abiatibet,” kpa mme ọkwọrọ ederi Christendom. (Kot 2 Thessalonica 2:3, 8.) Emi ọyọnọ akwa uyarade ke Christ ọtọn̄ọ ndinam n̄kpọ nte Ebiereikpe oro Jehovah emekde. (Kot 2 Timothy 4:1.) Ke ini ẹdisobode Christendom emi edide ikpehe Akwa Babylon oro enyenede ndudụhọ akan, oro ediwụt ke nsobo Akwa Babylon—kpa ukara ererimbot eke nsunsu ido ukpono—ọtọn̄ọ. Jehovah eyesịn ke esịt mme andikara ete ẹsobo ndamban̄a akpara emi. (Edi. 17:15-18) Oro ediwụt ke “akwa ukụt” ọtọn̄ọ.—Matt. 24:21.

14. (a) Ntak emi ẹdisịbede ntọn̄ọ akwa ukụt omụhọ? (b) “Idiọn̄ọ Eyen owo” ediwọrọ nso ọnọ ikọt Jehovah?

¹⁴ Jesus ọkọdọhọ ke ẹyesịbe mme usen akwa ukụt oro ẹmụhọ “ke ntak ndimek ikọt” Abasi, kpa nsụhọ Christian oro ẹyetde aran emi ẹsụk ẹdude ke isọn̄. (Matt. 24:22) Jehovah idiyakke ẹsobo mme Christian oro ẹyetde aran ye mme erọn̄ en̄wen emi ẹdide nsan̄a mmọ ke ini ẹdisobode nsunsu ido ukpono. Jesus ama ọdọhọ n̄ko ke “ukụt mme usen oro ama ekebe,” ke mme idiọn̄ọ ẹyedu ke utịn, ọfiọn̄, ye mme ntantaọfiọn̄, ndien “idiọn̄ọ Eyen owo ọyọwọrọ owụt idem ke enyọn̄.” Emi ayanam mme idụt isọn̄ ‘ẹyịbi idemmọ ke eseme.’ Edi utọ n̄kpọ emi idiwọrọke mbon oro ẹyetde aran, emi ẹnyenede idotenyịn uka heaven, idinyụn̄ iwọrọke nsan̄a mmọ emi ẹdoride enyịn ndidu uwem ke isọn̄. Mmọ ‘ẹyenen̄ede ẹda ẹnyụn̄ ẹmenede ibuot mmọ ke enyọn̄, koro edinyan̄a mmọ ke asan̄a ekpere.’—Matt. 24:29, 30; Luke 21:25-28.

15. Nso utom ke Christ edinam ke ini enye edidide?

¹⁵ Mbemiso Eyen owo okụre edikan esie, enye eyedi ke usụn̄ en̄wen. Enye ama etetịn̄ ete: “Ke ini Eyen owo edidide ke ubọn̄ esie, kpukpru mme angel ẹnyụn̄ ẹsan̄a ye enye, ndien enye oyosụhọde etetie ke ebekpo  ubọn̄ esie. Ndien ẹyebon kpukpru mme idụt ke iso esie, enye oyonyụn̄ abahade mme owo kiet ye eken, kpa nte ekpemerọn̄ abaharede erọn̄ ye ebot. Enye oyonyụn̄ enịm erọn̄ ke ubọk nnasia, edi eyenịm ebot ke ufien esie.” (Matt. 25:31-33) Itien̄wed emi etịn̄ aban̄a ini oro Christ edidide nte Ebiereikpe edibahade mme owo ke “kpukpru mme idụt” esịn ke otu iba: “erọn̄,” oro edi, mbon oro ẹsịnde ifịk ẹn̄wam nditọete esie eke spirit (mme Christian oro ẹyetde aran, emi ẹdude ke isọn̄) ye “ebot,” oro edi, mbon oro “mîsụkke ibuot inọ eti mbụk Ọbọn̄ nnyịn Jesus.” (2 Thess. 1:7, 8) Erọn̄, oro edi, “ndinen owo,” ẹyedu “nsinsi uwem” ke isọn̄, edi ebot “ẹyedaha ẹkedụk ke nsinsi edisịbe mfep,” m̀mê nsobo.—Matt. 25:34, 40, 41, 45, 46.

Jesus Okụre Edikan Esie

16. Didie ke Christ Adausụn̄ nnyịn edikụre edikan esie?

¹⁶ Ke ini ẹdifịkde kpukpru mme Christian oro ẹyetde aran idiọn̄ọ ẹnyụn̄ ẹdiọn̄ọ mbon oro ẹdide erọn̄ oro ẹdinịmde ke ubọk nnasia edinyan̄a Christ, do ndien ke Christ ediwọrọ aka ‘okokụre edikan esie.’ (Edi. 5:9, 10; 6:2) Christ ayada udịm mme okopodudu angel, ye nditọete esie oro ẹma ẹkeset, edisobo ofụri editịm n̄kpọ Satan emi esịnede ofụri ndutịm ukara owo, ekọn̄, ye unyamurua. (Edi. 2:26, 27; 19:11-21) Christ oyokụre edikan esie ke ini enye edisobode idiọk editịm n̄kpọ Satan. Ekem enye eyesịn Satan ye mme demon esie ke editụn̄ọ ukpe ke isua tọsịn kiet.—Edi. 20:1-3.

17. Christ edida mme erọn̄ en̄wen usụn̄ ika m̀mọ̀n̄ ke Tọsịn Isua Ukara esie, ndien nso ke nnyịn ikpebiere ndinam?

¹⁷ Ke ini apostle John eketịn̄de aban̄a “akwa otuowo” eke mme erọn̄ en̄wen emi ẹdibọhọde akwa ukụt, enye ama ọdọhọ ke “Eyenerọn̄, emi odude ke ufọt ebekpo, eyekpeme mmọ, oyonyụn̄ ada mmọ usụn̄ aka ke obube mmọn̄ uwem.” (Edi. 7:9, 17) Ih, Christ ayaka iso ndida mme erọn̄ en̄wen emi ẹkopde uyo esie usụn̄ ke ofụri Tọsịn Isua Ukara esie, oyonyụn̄ ada mmọ esịm nsinsi uwem. (Kot John 10:16, 26-28.) Nnyịn ikpakam itiene Edidem ye Adausụn̄ nnyịn ketket idahaemi, inyụn̄ itiene idụk obufa ererimbot oro Jehovah ọn̄wọn̄ọde!

Ndụn̄ọde

• Nso ke Christ akanam ke ẹma ẹkemek enye Edidem?

• Anie ke Christ ada ọnọ mme esop ndausụn̄?

• Didie ke Christ Adausụn̄ nnyịn edidi iwiwa?

• Didie ke Christ edika iso ada nnyịn usụn̄ ke obufa ererimbot?

[Mme Mbụme Ukpepn̄kpọ]

[Ndise ke page 29]

Nsobo idiọk editịm n̄kpọ Satan ayanam ẹfiọk edidu Christ