Sịn Ifịk Yom Edidiọn̄ Jehovah
Sịn Ifịk Yom Edidiọn̄ Jehovah
“[Abasi] edi andinọ mmọ eke ẹsịnde ifịk ẹyom enye utịp.”—HEB. 11:6.
1, 2. (a) Nso ke ediwak owo ẹsinam man Abasi ọdiọn̄ mmọ? (b) Ntak emi ikpenen̄erede iyom edidiọn̄ Jehovah?
“ABASI ọdiọn̄ fi!” edi ekọm oro ẹsiwakde ndikọm owo ke ini owo anamde n̄kpọ ọnọ owo m̀mê ọnọde owo enọ. Mme ọkwọrọ ederi nsio nsio ido ukpono ẹsidiọn̄ mme owo, mme unam, ye mme n̄kpọ eken. Mme owo ẹsika ẹkese mme ebiet oro ẹnyenede n̄kpọ ndinam ye ido ukpono, ẹdoride enyịn ndibọ edidiọn̄. Mbon mbre ukara ẹsibọn̄ akam ẹnọ Abasi ẹte ọdiọn̄ idụt mmimọ. Ndi emekere ke utọ akam oro enen? Ndi utọ akam oro ẹsinyene ufọn? Mmanie ẹsibọ edidiọn̄ Abasi, ndien ntak-a?
2 Jehovah ama ọdọdọhọ ke ama ekem ke utịt eyo, ke imọ iyenyene mme owo emi ẹsanade ẹnyụn̄ ẹtiede emem emem ke kpukpru idụt; ndien ke mmọ ẹyekwọrọ eti mbụk Obio Ubọn̄ ẹsịm utịt isọn̄ kpa ye oro ẹdisuade ẹnyụn̄ ẹbiọn̄ọ mmọ. (Isa. 2:2-4; Matt. 24:14; Edi. 7:9, 14) Nnyịn oro inyịmede ndisịne ke otu mbon oro ẹtịn̄de ẹban̄a mi imoyom edidiọn̄ Abasi; nnyịn idikwe unen edieke nnyịn mînyeneke edidiọn̄ Abasi. (Ps. 127:1) Edi, idisan̄a didie inyene edidiọn̄ Abasi?
Jehovah Eyenen̄ede Ọdiọn̄ Mbon Oro Ẹkopde Uyo Esie
3. N̄kpọ ekpeketie didie ye nditọ Israel edieke mmọ ẹkpekekopde uyo Jehovah?
3 Kot Mme N̄ke 10:6, 7. Esisịt ini mbemiso idụt Israel ẹkedụkde Isọn̄ Un̄wọn̄ọ, Jehovah ama ọdọhọ ke imọ iyanam mmọ ẹforo etieti inyụn̄ ikpeme mmọ edieke mmọ ẹkopde uyo imọ. (Deut. 28:1, 2) Ih, Jehovah iditreke ndidiọn̄ mbon oro ẹkopde uyo esie.
4. Ndikop uyo Abasi ke ofụri esịt abuana nso?
4 Didie ke nditọ Israel ẹkpekekop uyo Abasi? Abasi ama ọdọhọ ke Ibet esie ete ke imọ idinemke esịt ye ikọt imọ edieke mmọ mînamke n̄kpọ imọ “ke idara, ye ke inemesịt.” (Kot Deuteronomy 28:45-47.) Jehovah iyomke ikop uyo esie eto eto, nte emi mme unam m̀mê mme demon ẹsinamde. (Mark 1:27; Jas. 3:3) Nnyịn ikop uyo Abasi ke ofụri esịt sia imade enye. Nnyịn imadat esịt ndinam emi, koro imenịm ke ibet Jehovah idobike owo mbiomo, enye onyụn̄ “edi andinọ mmọ eke ẹsịnde ifiọk ẹyom enye utịp.”—Heb. 11:6; 1 John 5:3.
5. Didie ke ndibuọt idem ke un̄wọn̄ọ Jehovah akan̄wam owo anam ibet oro odude ke Deuteronomy 15:7, 8?
5 Kere nte okoyomde nditọ Israel ẹbuọt idem ye Jehovah ke ini ẹkenamde ibet oro odude ke Deuteronomy 15:7, 8. (Kot.) Ndinyụn̄ nnam ibet emi ntre mmen̄e mmen̄e okpokosụk an̄wan̄wam mme ubuene, edi ndi oro akpakanam ikọt Abasi ẹtie ufan ufan ẹnyụn̄ ẹkop inemesịt? Ata akpan mbụme en̄wen edi, Ndi utọ edu emi okpowụt ke owo enyene mbuọtidem ke Jehovah ekeme ndinọ mme asan̄autom esie se mmọ ẹyomde? Ndi emi okpowụt ke owo ekpebe mfọnido esie? Baba! Abasi esise esịt owo oro enen̄erede ọfọn ido onyụn̄ ọn̄wọn̄ọ ke iyọdiọn̄ kpukpru utom ubọk esie. (Deut. 15:10) Owo oro enyenede mbuọtidem ke un̄wọn̄ọ emi ọyọfọn ido ye mbon en̄wen onyụn̄ okụt ediwak ufọn m̀mê edidiọn̄.—N̄ke 28:20.
6. Mme Hebrew 11:6 ọdọhọ inam nso?
6 Ke adianade ye edibuọt idem ke Jehovah nte Andinọ owo utịp, Mme Hebrew 11:6 owụt edu en̄wen oro ikpenyenede man ibọ edidiọn̄ Abasi. Ti ke Jehovah esinọ mmọ eke “ẹsịnde ifịk ẹyom enye utịp.” Ikọ Greek oro ẹkabarede mi ọwọrọ edisịn odudu ye ọkpọsọn̄ ukeme nyom n̄kpọ. Emi owụt se ikpanamde man inyene edidiọn̄! Ata Abasi emi “mîkemeke ndisu nsu” ọn̄wọn̄ọ ndinọ edidiọn̄ emi. (Titus 1:2) Enye owụt ke ediwak tọsịn isua emi ẹbede ke nnyịn imekeme ndinen̄ede mberi edem ke mme un̄wọn̄ọ imọ. Akananam ikọ esie ikpụhu, mmọ ẹsisu kpukpru ini. (Isa. 55:11) Mmọdo, imenen̄ede inịm ke edieke inyenede ata mbuọtidem, ke enye iditreke ndinọ nnyịn utịp.
7. Didie ke “mfri” Abraham ekeme ndinam inyene edidiọn̄ Abasi?
7 Jesus Christ ekedi akpan “mfri” Abraham. Mme Christian oro ẹyetde aran ẹdi udiana ubak “mfri” oro ẹken̄wọn̄ọde. Ẹnọ mmọ utom ẹditan̄a “nti ido enye emi okokotde [mmọ] osio ke ekịm esịn ke utịbe un̄wana esie.” (Gal. 3:7-9, 14, 16, 26-29; 1 Pet. 2:9) Nnyịn ikemeke ndinyene eti itie ebuana ye Jehovah edieke nnyịn mîkponoke ofụn oro Jesus ekemekde ete ese aban̄a inyene esie. Mîkpedịghe “ofụn emi anamde akpanikọ onyụn̄ enyenede ọniọn̄,” nnyịn ikpọfiọkke se ikotde ke Bible, ikponyụn̄ ifiọkke ndida se ikotde nsịn ke edinam. (Matt. 24:45-47) Abasi ọyọdiọn̄ nnyịn edieke inamde se ikpepde ke Bible.
Wụk Ekikere Fo ke Uduak Abasi
8, 9. Didie ke ete-ekpụk oro Jacob ekesịn ọkpọsọn̄ ukeme man ọbọ se enye ekeben̄ede?
8 Nnyịn imesisọp iti ete-ekpụk oro Jacob ke ini ẹtịn̄de ẹban̄a edisịn ọkpọsọn̄ ukeme man ẹbọ edidiọn̄ Abasi. Enye ikọfiọkke nte Abasi edisude un̄wọn̄ọ oro enye ọkọn̄wọn̄ọde ọnọ Abraham, edi enye ama enịm ke Jehovah ayanam nditọ Abraham ẹtọt, ndien ke ubon esie ayakabade akamba idụt. Ntem, Jacob ama aka Haran ke 1781 M.E.N. man okoyom n̄wan. Se ikenen̄erede ibehe enye ikedịghe ndikoyom ediye an̄wan, edi enye okoyom eka nditọ esie edi n̄wan emi amade n̄kpọ eke spirit onyụn̄ eten̄ede Jehovah.
9 Nnyịn imọfiọk ke Jacob ama osobo ye Rachel iman esie. Enye ama ama Rachel onyụn̄ enyịme ndinam utom nnọ Laban, ete Rachel, ke isua itiaba man ọdọ enye. Emi ikedịghe sụk inem inem mbụk ima. Jacob ama enen̄ede ọfiọk un̄wọn̄ọ oro Ata Ọkpọsọn̄ Abasi ọkọn̄wọn̄ọde ọnọ Abraham ete ete esie ye enye oro Enye akafiakde ọn̄wọn̄ọ ọnọ Isaac ete esie. (Gen. 18:18; 22:17, 18; 26:3-5, 24, 25) Ekem Isaac ama ọdọhọ Jacob eyen esie, ete: “Abasi Ibom ọyọdiọn̄ fi, oyonyụn̄ anam fi ọtọt, onyụn̄ awak, ndien afo ayakabade akamba otu owo; ndien enye ada edidiọn̄ emi enye ọkọdiọn̄de Abraham, ọnọ fi ye nditọ fo n̄ko; kpan̄ afo ekpenyene isọn̄ emi afo edide odudụn̄ ke esịt, emi Abasi ọkọnọde Abraham.” (Gen. 28:3, 4) Ntre, ukeme oro Jacob ekesịnde ndiyom n̄wan oro odotde nnyụn̄ nnyene ubon owụt nte enye ọkọbuọtde idem ke ikọ Jehovah.
10. Ntak emi Jehovah ekenemde esịt ndidiọn̄ Jacob?
10 Jacob ikoyomke inyene man ada ọbọk ubon esie. Enye ekesịn esịt ke un̄wọn̄ọ oro Jehovah ọkọn̄wọn̄ọde ọnọ ubon esie. Enye ekekere aban̄a nte Jehovah edisude uduak esie. Jacob ama ebiere ndinam kpukpru se enye ekekeme man ọbọ edidiọn̄ Abasi kpa ye mme ubiọn̄ọ oro enye okosobode. Enye okosụk enyenyene edu emi idem ke enye ama ọkọsọn̄, ndien Jehovah ama ọdiọn̄ enye.—Kot Genesis 32:24-29.
11. Nso ke ikpanam man ekekem ye uduak Abasi oro ẹyararede ẹnọ nnyịn?
11 Ukem nte Jacob, nnyịn ifiọkke kpukpru n̄kpọ oro ẹbuanade ke Jehovah ndisu uduak esie. Edi, edieke ikpepde Bible, nnyịn iyọfiọk mme n̄kpọ oro ẹkemede nditịbe ke “usen Jehovah.” (2 Pet. 3:10, 17) Ke uwụtn̄kpọ, nnyịn ifiọkke nnennen ini oro usen Jehovah edidide, edi imọfiọk ke enye ekpere. Nnyịn imenịm ke Bible etịn̄ akpanikọ ke ndidọhọ ke edieke idade ekpri ini oro osụhọde mi inọ ọyọhọ ikọ ntiense, ke nnyịn iyanyan̄a idem nnyịn ye mbon oro ẹkopde uyo nnyịn.—1 Tim. 4:16.
12. Nso ke inen̄ede inịm ke akpanikọ?
12 Nnyịn imọfiọk ke utịt ekeme ndidi ini ekededi; Jehovah idibetke tutu ẹnọ kpukpru owo ke isọn̄ ikọ ntiense. (Matt. 10:23) N̄ko-n̄ko, ẹnọ nnyịn eti ndausụn̄ ke nte ikpanamde utom ukwọrọikọ nnyịn uforo uforo. Mbuọtidem anam isịn ofụri ukeme nnyịn ke utom emi, inyụn̄ ida se ededi oro inyenede inam emi. Ndi akpana ikere ke efakutom nnyịn ayaka iso enyene uforo? Ke akpanikọ, nnyịn ikemeke ndifiọk se iditịbede ke ini iso. (Kot Ecclesiastes 11:5, 6.) Utom nnyịn edi ndika iso n̄kwọrọ ikọ, nnyụn̄ nnyene mbuọtidem ke Jehovah ọyọdiọn̄ nnyịn. (1 Cor. 3:6, 7) Imenen̄ede inịm ke enye okụt ọkpọsọn̄ ukeme oro isịnde, ndien enye ayada edisana spirit esie ọnọ nnyịn ndausụn̄ ekededi oro iyomde.—Ps. 32:8.
Yom Edisana Spirit
13, 14. Nso iwụt ke edisana spirit Abasi ekeme ndisụk nnam ikọt Abasi ẹdot ndinam utom Esie?
13 Nso ke ikpanam edieke ikerede ke nnyịn inen̄ekede ikeme ndinam utom oro ẹnọde nnyịn m̀mê ndikwọrọ ikọ? Ikpenyene ndiben̄e Jehovah ọnọ nnyịn edisana spirit esie man itetịm inyene ukeme ndinam n̄kpọ esie. (Kot Luke 11:13.) Spirit Abasi ekeme ndinam mme owo ẹdot ndinam utom m̀mê ẹnyene ifetutom inamke n̄kpọ m̀mê nso ikedi idaha mmọ ke uwem, m̀mê nso ifiọk ke mmọ ẹkenyụn̄ ẹnyene. Ke uwụtn̄kpọ, ke ndondo oro nditọ Israel ẹkewọrọde ke Egypt, spirit Abasi ama an̄wam mme ekpemerọn̄ ye ifịn ẹkan mme asua mmọ kpa ye oro mmọ mîkenyeneke ifiọk un̄wana ekọn̄. (Ex. 17:8-13) Ikebịghike ke oro ama ekebe, kpa spirit oro ama anam Bezalel ye Oholiab ẹkeme nditiene n̄wed ubọpufọk oro Abasi ọkọnọde ẹda ẹbọp tent utuakibuot.—Ex. 31:2-6; 35:30-35.
14 Okopodudu spirit emi ama anam mme asan̄autom Abasi eyomfịn ẹkeme ndise mban̄a utom umịn̄n̄wed ke ini akanade mmọ ẹtọn̄ọ ndimịn̄ n̄wed mmọ. Brọda R. J. Martin, esenyịn ufọk umịn̄n̄wed ini oro, ama ewet se ẹkenamde etisịm 1927 ke leta, ete: “Ọbọn̄ ama eberede usụn̄ ke nnennen ini; ndien nnyịn ima inyene akamba ukwak umịn̄n̄wed rotary, okposụkedi emi nnyịn mîkọfiọkke nte idisan̄ade ida enye imịn̄ n̄wed. Edi Ọbọn̄ ọfiọk ndinam ikọt esie emi ẹyakde ofụri idem mmọ ẹsịn ke utom esie ẹnyene ikike. . . . Ke urua ifan̄ ẹbede, nnyịn ima ikeme ndida ukwak umịn̄n̄wed oro nnam utom; ndien ke isụk idada enye inam utom, imakam ida enye inam utom oro mme andinam enye mîkọfiọkke ke enye ekeme ndinam.” Jehovah aka iso ndidiọn̄ utọ ukeme ofụri esịt oro tutu esịm mfịn.
15. Didie ke Rome 8:11 ekeme ndin̄wam mbon oro ẹsobode idomo?
15 Spirit Jehovah esinam n̄kpọ ke nsio nsio usụn̄. Kpukpru mme asan̄autom Abasi ẹkeme ndinyene spirit emi, spirit emi esinyụn̄ an̄wam mmọ ẹkan ikpọ ubiọn̄ọ. Nso ke ikpanam edieke etiede nte ke idomo ọmọn̄ akan nnyịn ubọk? Ikọ oro Paul ekewetde ke Rome 7:21, 25 ye 8:11 ẹkeme ndisọn̄ọ nnyịn idem. Ih, “spirit owo emi akanamde Jesus eset ke otu mme akpan̄kpa” ekeme ndin̄wam nnyịn nnyụn̄ nnọ nnyịn odudu ndin̄wana n̄kan mme udọn̄ obụkidem. Ẹkewet itie N̄wed Abasi emi ẹnọ mme Christian emi ẹyetde aran ke spirit, edi edumbet itien̄wed oro ebehe ofụri ikọt Abasi. Kpukpru nnyịn iyenyene uwem edieke ibuọtde idem ke Christ, in̄wanade ọkpọsọn̄ man iwot oburobụt udọn̄ obụkidem inyụn̄ idude uwem ekekem ye ndausụn̄ edisana spirit.
16. Nso ke ana inam man inyene edisana spirit Abasi?
16 Ndi nnyịn imekeme ndiwan̄ ubọk ntie ndori enyịn ke Abasi ọyọnọ nnyịn edisana spirit esie? Baba. Ana ibọn̄ akam iben̄e enye inyụn̄ isịn ifịk ikpep Bible. (N̄ke 2:1-6) N̄ko-n̄ko, Abasi ọnọ esop Christian edisana spirit. Nnyịn ndidụk mbono esop kpukpru ini owụt ke ọdọn̄ nnyịn “[ndikop] se spirit ọdọhọde mme esop.” (Edi. 3:6) Akan oro, ana isụhọde idem inam se ikpepde. Mme N̄ke 1:23 ọnọ nnyịn item emi: “Ẹkabade ke nduari mi: sese, nyan̄wan̄a spirit mi nduọk mbufo ke idem.” Ke akpanikọ, Abasi esinọ “mbon oro ẹkopde uyo esie nte andikara” edisana spirit esie.—Utom 5:32.
17. Ikpemen edidiọn̄ oro Abasi ọdiọn̄de ukeme nnyịn idomo ye nso?
17 Okposụkedi emi oyomde isịn ọkpọsọn̄ ukeme ke utom Abasi man ibọ edidiọn̄ esie, ana iti ke idịghe ọkpọsọn̄ utom kpọt esinam Jehovah ọnọ ikọt esie akpakịp nti n̄kpọ. Ẹkeme ndimen nte Abasi ọdiọn̄de ukeme nnyịn ndomo ye nte idem nnyịn esisan̄ade ọbọ ufọn oto nti udia. Abasi okobot nnyịn ke usụn̄ emi ikemede ndikop inem udia nnyụn̄ n̄kop nsọn̄idem ke ini idiade udia. Kpa enye obot udia n̄ko. Nnyịn itịmke ifiọk nte udia esinyenede n̄kpadiaha esie, ediwak nnyịn inyụn̄ ifiọkke nte idem nnyịn esisan̄ade enyene odudu oto udia oro idiade. Edi imọfiọk ke emi esitịbe, ntak edi oro isidiade udia. Ndien edieke idiade nti udia, idem esinen̄ede ọsọn̄ nnyịn. Kpasụk ntre, Jehovah asian nnyịn mme n̄kpọ oro anade inam man inyene nsinsi uwem, onyụn̄ an̄wam nnyịn inam mme n̄kpọ emi. Ana in̄wan̄-in̄wan̄ ke enye anam ekese ndin̄wam nnyịn, ntre enye odot itoro. Mmọdo, ana ibere ye enye inyụn̄ inam n̄kpọ ekekem ye uduak esie man ibọ edidiọn̄ esie.—Hag. 2:18, 19.
18. Nso ke afo ebiere ndinam, ndien ntak?
18 Ke ntre, sịn ofụri ukeme fo nam kpukpru utom oro ẹnọde fi. Buọt idem ye Jehovah kpukpru ini man okụt unen ke utom fo. (Mark 11:23, 24) Ndien kûnyụn̄ ufre ke ‘kpukpru owo eke ẹyomde ẹkụt.’ (Matt. 7:8) Abasi ọyọdiọn̄ mbon oro ẹyetde aran ke ndinọ mmọ “anyanya uwem” ke heaven. (Jas. 1:12) “Mme erọn̄ en̄wen” Christ, emi ẹsịnde ukeme ndibọ edidiọn̄ emi mfri Abraham ọnọde, ẹyedat esịt ndikop Enye ọdọhọde mmọ ete: “Ẹdi, mbufo emi Ete mi ọdiọn̄de, ẹda obio ubọn̄ emi ẹketịmde ẹnịm ẹnọ mbufo toto ke editọn̄ọ ererimbot ẹnyene.” (John 10:16; Matt. 25:34) Ih, ‘mmọ eke Abasi ọdiọn̄de ẹyeda isọn̄ ẹnyene ẹnyụn̄ ẹdụn̄ ke esịt ke nsinsi.’—Ps. 37:22, 29.
Nte Afo Emekeme Ndinam An̄wan̄a?
• Edikop uyo Abasi ke ofụri esịt abuana nso?
• Oyom inam nso man ibọ edidiọn̄ Abasi?
• Didie ke ikeme ndibọ edisana spirit Abasi, ndien didie ke enye ekeme ndin̄wam nnyịn?
[Mme Mbụme Ukpepn̄kpọ]
[Mme ndise ke page 9]
Jacob ama an̄wana ye angel man ọbọ edidiọn̄ Jehovah.
Ndi afo emesisịn utọ ukeme oro?
[Ndise ke page 10]
Edisana spirit Abasi ama etịm Bezalel ye Oholiab idem ndikụt unen